انتقام للعشق

بارت الاول

سلام عليكم
اتمنى القصة تعجبكم
منقول

❤❤❤❤❤❤

البارتات1

واكفة يم باب الجامعة ومنتظرة احد يجي ياخذني
ظليت واكفة شووي لحد ماشفت سيارة اخوي شاهر صارت كبالي ..

باوع عليه وأشرلي بيده .. رحت اني عليه وصعدت بلسيارة ..
باوعتله وأبتسمت : مساء الخير
ردلي الابتسامة : مساء الخيرات شلونه دكتورتنه الحلوة
:تماام الحمدلله
:عساج دوم يابعد اخوج ..
ابتسمت اله ولكلامه الحلوو لازم يسمعني هيج كلام .. احب كلامه واسلوبة اخذ طاقة ايجابية منه ..

وصلنه للبيت واني منهكة ميتة تعب دخلت للبيت وشفت ماكو احد رحت على المطبخ ..

لكيت أمي موجوده كتله بهدووء : السلام عليكم شلونج يمه
باوعتلي وكالت : هلا يمه اجيتي ومنو جابج ..

:منو يعني غيره الوحيد الي يوصلني شاهر اجه عليه .. لعد مثل غيث كاعد وكتلة تعال اخذني لان خطية شاهر يجي من المركز كبل عليه يتعب خطية..

سمعت صوت شاهر وراي كال : اذا ماتعب علمودج اتعب عليمن يعني يهون كلشي لخاطرج..

:فدوه لكلبك يعمري هسه شصاير لو غيث هيج لسانه حلوو .. شو بس يغلط ولسانه زفر
: منوو لسانه زفر جويريه
باوعت ورفعت حاجبي :انت ..
ماكلت شي غلط وبعد لا تكول جويرية اسمي جوري

رفع حاجبه وكال ؛ نعل احسن شي ولي من يمي ترى واصله لخشمي راسي يوجعني ومابيه حيلج
شفته صدك طابك حواجبه وضايج .. : ليش شبيك
:مانمت البارحه وراسي ظل يوجعني

حجت امي :هسه كافي بس تلغون روحو بدلو حتى اصب الغده وهسه ابوكم على جيه ..

عفتهم وصعدت فووك لغرفتي فتحت الباب ورجعت قفلته عليه ..
دخلت للحمام وغسلت وجهي وفتحت الكنتور اخذت ملابس الي وبدلت ..
وكفت يم المرايه امشط شعري واني امشط أخذتني الصفنة .
باوعت على روحي وصافنة اخر شي جريت تنهيدة وعبرة مال سنين ..

هاي يومية لازم نفس الموال فتحت المجر وشفته كبالي اخذته رفعته لوجهي وظليت اتلمسه بحقد ..
هواي اشياء تخليني ارجع احقد واكره ورابطتني بلماضي ماكدر انساه ...

رجعته لمكانه ضميته واخذت نفس قوي ونزلت جوه لكيت الكل كاعد اخواني كلهم .
محمد وشاهر وغيث وليث.. محمد بموبايله وشاهر  متمدد على القنفة ويباوع على التلفزيون ..

وهذا غيث عود راسه يوجعه شو يلغي براس ليث وهذا ساكت بس يباوعله ..
ابتسمت عليهم وكلت ربي لاتحرمني من لمتهم اخواني سندي بهاي الدنيا المره ..

دخلت للمطبخ اساعد امي لكيت فاتن بنت عمي وتكون زوجة محمد موجوده وكاعد تصب بلغده
شافتني وابتسمت : هلا يمته اجيتي ..

: قبل شووي ..

رحت ساعدتهن واخذت السفرة رحت لصالة وفرشته واجه امير ابن محمد ظل يلعب بيه واني ارجع اعدل بيه ..