البارت 20
سنين ناسي ،
سنين ما تدمع العين
على بختك
ليش مريت آعلى بالي ؟
والله ما سويت زين .
_القصاب
ليث/
اجاني اتصال من محمد يكلي شاهر متصوب
وهسه هو بلمستشفى بغداد تعال نمشيله ..
رحت اني لبيتنه اجيب محمد هستوني اريد انزل
وأشوف شهاب هستوه طلع من بيتهم هو وغسان
مثل المستعجل من شافني اجه يركض عليه ..
اقترب من من يمي وكال بخووف:
ليث صدك السمعته كلي ..
رفعة حاجبي اله وكتله بهدوء :
وشنو الي سمعته ..
: شاهر صدك متصوب كلي صدك لو لا..
:اي متصوب ومانعرف شلونه
خليني هسه اروح ..
شفت الخوف بعيونه وايده ترجف
راح على غسان ظل يحجي ويااه
كاله غسان :
ابغداد هسه هو اتصلت على محمد وكلي
اسم المستشفى ..
حجه بأستعجال:
امشي خل نروح لعد ..
دخلت اني ومتعجب من تصرفاته
رحت للبيت وشفت امي تبجي وجوري
اباوع على رسيل كاعده على الدرج
وحاطة ايدها على خده وصافنة
وعيونه مغوركة ..
اجتني امي:ولك يمه كلي شاهر
شلونه..
: يمه كلشي ماعرف هسه راح نروح نشوف
شلونه ..
باوعت على فاتن :شو روحي صيحي رجلج
خل يجي اتأخرنه ترى ..
سئلتهن: أبوي وينه ..
كالت جوري وهيا تشهك: أبوي راح قبلكم
اخذه غيث ومشوو وعمامي راحو هم ..
نزل محمد مستعجل وكال هو يلهث:
يلا أمشي اتأخرنه..
طلعنه نتراكض صعدت السيارة اني اسوق
لان شفت حالة محمد ماتسمح تعبان كلش..
ظلينه ساكتين ومحمد حجه :
الله يستره ان شاءالله ماكو شي
سئلته :
انت منو الي اتصل عليك وخبرك ..
كال :
صديقه الي اتصل ما انطانه اي خبر
بس كال اخوكم متصووب كلش مافتهمت منه
انطاني عنوان المستشفى وبسرعه انكطع الخط
رجعت اتصل عليه ماكو طلعلي مغلق ..
كتله بخوف :ماكو شي ان شاءالله
:دخيلك ربي كون مو خطر عليه
لا يصير بيه شي خايف عليه كلش
مية مره كتله تعال هنا عوف شغلك بغداد
سووي نقل يمنه بس مايقبل اني اول مره
اشووف واحد يريد يبتعد عن اهله ..
:خووية غير هذا شغلة ..
كال بقهر : ايي شغله يصير خير
خل يكوم بلسلامة وربك يعديها على خير
الي تصرف ثاني وياااه اذا ماخليه يجي هنا
واذا مايقبل اكعده بلبيت احنه ناقصين عمر
كل ساعه تجينه هبطة ..
سكتنه وره فترة يلا وصلنة لبغداد
اتصلت على غيث وطلبت منه يوكفلي يم
باب المستشفى وصدك وصلنه ولكيناه
واكف منتظرنه ..
نزلنه وراح محمد يصيح عليه :
ولك هي جلب اتصل عليك ليش ماتجاوب
تريد تحرك بأعصابنه ..
كال غيث : ممنون منك ابو امير مراح احجي
اي شي اني لان مقدر ظروفك والا اشوفك وجهي
الثاني ..
محمد :نعل احسلك اخووك وينه وشلونه..
: خاااب كلشي مابيه الله وكيلك اصحى من يمنه
بس طلقة تايهة اجت برجلة ويكعد بلبيت
لمدة اسبووع او اسبوعين يرتاح بيها ..
ليث : الحمدلله والشكر شو ودينه عليه
خل نشوفه ..
اخذنه وصلنه للممر الي يودي على غرفتة
قبل لا نوصل شفنه شهاب واكف هناك
ومدنك راسه انتبه هو علينه باوعلنه وابتعد
من المكااان ..
حجه محمد وهو راص على سنونه:
هذا شيسوي هنااا شعنده جاي !؟
كال غيث : اجه علمود يشوف شاهر
بس ما دخل عليه كلهم اجو ودخلو عليه
بس هو باقي هنااا واكف وكل ساعه يسئل
بغسان عن حالته وامبين الخوف عليه..
كال محمد بأستهزاء :
كثر الله خيره بعده ما ناسي العشرة
بعده ماناسي شاهر ..
سكتت اني مادخلت ولا حجيت شي
دخلنه للغرفة وشفتهم كلهم ملتمين
باوعت على شاهر تعباان شكله
وشادين رجله ..
وصلت يمه : سلاماات ابو ليث ماتشوف شر
ابتسم الي بتعب وكال :
الله يسلمك الشر ما يجيك و الاسم
بعدين نتصافى اني وياك ..
رحت بسته من راسه واجه محمد سلم عليه
وظل يحجي عليه : ماتسمع الكلام دومك متهور
اطلع منا واني اعلمك على الهبطة الي اكلناها ..
غيث : الله ويكلكم كمت ماا اندل دربي من وره
ابووي بس يصيح عليه حتى لبست حذائي
تكرمون مكلوبي واخذني اسووق طول الطريق
من العمارة لبغداد تالي هذا كله طلع بس
متصوووب برجله تكول يالله ...
ضحكنه على سوالفه بقينه يمه وعمامي
طلعوو من يمنه واخذو ابوي حتى يرتاح
راحوو لبيت شاهر بغداد
يباتون بيه واحنه بقينه يم شاهر
فارس مشه يرجع لان كال البيوت فارغة
مابيه احد كلنه هنااا مايصير ..
بقينه اني ومحمد وغيث وغسان
ظلينه ويحجي شلون صار الحادث..
يكول هستوني طلعت من البيت ماحس
غير اجتني طلقة تايهة برجلي ماعرفت منو
الي ضربه ..
راح غساان طلع واحنه بقينه يمه ظل يحجي
شلون تصووب اجه غيث ونسه نفسه
ضرب شاهر على رجله الي اتصووب بيها
كال : سلامااات شهوري حبيبي ..
عاط شاهر من الألم : اااخ رجلي
الله لا ينطيك غيث ...
محمد بعصبيه : وثول شبيك ماتشوف..
رفع حاجبه : على كيفكم نسيت ما صار شي
وأنت شاهيير شبيك هيج بسرعه تتألم عيب
كبرت انت على سوالف التدلع ...باوعله وعيونه حمر خزرة : انجب واحجي عدل
والفظ اسمي صح لا اكوملك بلقندرة ..
ضحك وكال : ايي عيني انت هذا الاسم
ماتقبل احد يحجي غير هذولاك النااس ..
ابتسمت اني وسكتت ماحجيت من شفت
نظرات شاهر على غيث خزرة وكال
بحدة وعصبية : غيث كاافي ترى ما اتشاقة
اني سد السالفة واسكت ..
سكت غيث كال : شبيك عصبت ترى اشاقة
وياك والله..
دار وجهه وكال : كافي كتلك سد السالفة
وجيبلي مااي لأن عطشت ..
راح غيث جااب بطل مي وانطاه الي
كال :هاك اشرب..
فتحه شاهر ومانشوف غير شاهر
ذب الماي كله على غيث خله هذاك يفز
من مكانه لان ماجان على باله هيج يسوي
: هاااي ليش شاهر خرب يومك اي والله
ضحكنه عليه كال شاهر بأبتسامة :
احسن الك تستاهل ..
ظلينه نسولف شووي وانفتح الباب
دخل غساان وكال : شاهر عندك وقت
حتى تسلم على ضيوفك ..
عرفت منو يقصد كال شاهر بأستغراب:
ضيوف منووو هلا بيهم خل يجون..
باوع غسان ودخل وراه شهااب
باوعت على شاهر جانت ملامحه راخيه
من شاف شهااب طبك حواجبه وعيونه
تباوعله بغضب كال بهمس : شهااب
باوعله شهااب وهذاك دار وجهه
وكال : اذا ضيف ما مرحب بيه لا يجي
ماريد اشووف اي احد لأن تعباان كلش..
شفت شهااب ابتسم على كلام شااهر
واتقدم عليه اني حسبالي من يسمع كلامه
يطلع من الغرفة ويمشي بس هو سوه العكس..
راح اقترب من يمه وباس راسه
وهذاك بعده داير وجهه كال :
الحمدلله على سلامتك شاهر ماتشوف
شر ان شاء الله..
شاهر ماحجه اي شي اله ظل ساكت
هو شافه هيج ومشه طلع من الغرفة
ولحكه غسااان ..
محمد : هذاااا ليش يجي بيا عين
نسه الي سوواه وهسه انكلب علينه
الحنين عود شوفوني اجيت اتحمدالله
بالسلامه ..
كال شاهر : كاافي محمد تعباان واريد انام ..
سكتنه ماحجينه شي شفت موبايلي يرن
لكيته زينب تتصل عليه هاي اول مره
تتصل طلعت من يمهم ...
فتحت الخط بس بقيت ساكت
ماحجيت شي
اجاني صووته الهادئ:
الووو ليث وياي ..
: ايي ويااج
: شلونك
: الحمد لله أنتي شلونج
:تماام صدك شلونه شاهر ان شاءالله
بخير والحمدلله على سلامتة ..
: الله يسلمج والله زين هسه هو
وان شاءالله باجر يطلع ..
: خووش الحمدلله يلا مع السلامة ..
كتله :صدك زينب ..
: ها ليث
: يمكن العرس انأجله علمود اخوي
ماكدر اسوي العرس وهو مايكدر يجي
وياي من وره رجله انأجله بعد اسبوعين هم..
سكتت هيا ورجعت حجت :
ماشي هم احسن بعد حتى احضر نفسي
وبعد عندي نواقص ممشتريتهن ..
: خووش لعد يلا بااي..
:الله وياك..
سديته من يمه ورحت شفت غسان وشهاب
جانو يحجون من شافوني سكتوو
اني عفتهم ودخلت جووه لكيت محمد
ساند راسه على القنفة وغيث يكلب بموبايله
وشاهر متمدد وصاافن .
كتلهم ؛ محمد وغيث روحو للبيت يم اهلنه
ارتاحوا امبين عليكم التعب واني باقي يم
شاهر ..
كال شاهر بتعب : روحو كلكم اني مابيه
شي يمكن راح انام ..
دخل غسااان كلت لشاهر :
لا مايصير روحو كلكم حتى غساان
روح انت هم تعبان اني باقي يمه ..
هو سكتوو ماحجو شي كامو وسلمو عليه
طلعووو مشوو ..
بقيت يمه كاعد صارت الساعه ب١ بليل
طلعت بره اريد اتصل ..
جاان اشوف شهاب بعده كاعد على الكرسي
كبال غرفة شاهر باوعلي عيونه حمر
امبين تعبااان ونعسااان هم حسبالي مشه
وياهم طلع باقي هنااا ..
عفته ورحت اتصلت على محمد
وسئلني على حاله كتله بخير
ظلينه نسولف وبعدين سديته
رجعت لكيته بمكانه دخلت وشفت
على شاهر صافن ومايحجي اي شي
كتله : شبيك شاهر على شنوو صافن ..
حجه بهدووء :على هاي الدنيا
وعلى الي انعيشه هسه ..
كتله : شهااب بعده هنا مامشه بقى يمك
ماعافك ..
باوعلي وكال : بعده هنااا !؟
هزيت راسي : اييي حتى امبين عليه تعبان
بس ماقبل يمشي وحتى اليوم من سمع بيك
متصوب اجه يسئلني ويحجي وياي ونسه
المشكلة الي بيناتنه ظل يحجي وهو خايف عليك..
غمض عينه ورجع باوعله كال بقهر :
اااخ من شهاااب كسر ظهري بسوايته
جنت اعتبره اخووي الرابع حاله حالكم
وائمنت اختي عنده طلع مو كد هاي الامانة
وخاان ثقتي ولك هذا جان اعز شخص عندي..
ابتسم : اخاف عليه اكثر من روحي
اذا يريد روحي انطيه اله ايامنه ما تنسي
جاان نعم الصديق الي ابد معافني ..
: اذا ردت شي هو يحضره الي
اذا وكعت بحزن و ضيك يبقى يمي
لحد مايشوفني صرت زين واتحسنت
واذا فرحان هو اول الناس يفرح
بس ماعرف ليش هيج انكلب فجأة
وسوه هذاا الشي صدمة جانت بلنسبة الي
حتى هو خذلني اكثر من اختي لان جان
هو اخوي وصديقي وابن عمي وسندي
بس مانكول غير الله كريم هو اعلم
بلحال ...
ظل يحجي و مقهوور كلش من شهااب
صدك جانوو ونعم الصداقة والخوة
حتى مرات الناس تحسدهم على هذاا الشي
وحقه هسه شاهر اذا ينقهر ويعصب منه
اكثر واحد زهكان ويكره يشوفه هو شاهر ..كتله بتساؤل : زين شااهر اذا يجي يوم
ويطلب منك السماح على السواه تسامحه
لو لا ..
كال بحزن : مادري يا ليث الي سواه
ماينغفر اله بس بعد حسب ليش سوه هيج
اذا هو لحد هسه محاجي اي شي بس صعب
السمااح صعب ...
سكتنه ثنينه خليته شووي يهدئ
وناام واني رحت تمددت على القنفة الي يمه
وظليت صاافن على حالتي وابالي نرجس
ماتروح اكول شكاعد تسووي وشلونه هسه
نستني كرهتني لو تحن الي ..
هيج وكت اني وياها نظل نتراسل للصبح
لحد ماتكلي كاافي نعست اريد انااام
اما اني عيوني ادمع وتحركني من النعاااس
بس ابد ماكلله اريد اناام احب سوالفه
هيااا الوحيدة الي احب اسولف وياها
اما اني ابد ماريد احجي وي اي احد ...
ماحسيت غير ايدي اخذتني رحت لحسابه
شفته موخره الحضر من يمي ..
انصدمت فزيت من مكاااني معقولة
موخره الحضر من يمي ليش وشعجب
ويمته ليش مانتبهت اني !؟
ردت اراسله بس حسيت شي يمنعني
ماريد احجي وياها ماريد اكسره
اني بعد هاهيه صرت لوحدة ثانية
تزوجت وخل هيا تشوف حياته
حرام الي اسويه ماريد اعيشه بأمل ...
سديت الموبايل اتمددت وخليت راسي
على القنفة وظليت صافن على السقف
واني اتذكر محادثاتنه مثل الي اخذتلهن سكرين
بدمااغي وماريد احذفهن عاد هنا الوحيد
البقى من ذكراهااا ااخ جدي الله يسامحك
على السويته أنت وأبوي...
غفيت واني افكر بيهاا واتخيله كدامي
نمت من التعب ...
......
رسيل/
جنت كلش خايفة عليه ومن خوفي
وقلقي اتأكدت اني احب شاااهر
وحتى نسيت زعلي وياااه اريد هسه
بس اشووفه صعدت فوك بغرفتي
وظليت ابجي من خوفي عليه ..
مسحت دموعي وبقيت فووك بغرفتي
كااعدة حتى لا احد ينتبه عليه جنت ابجي
باوعت على شكلي بلمراية ماكو اثار بجي
هدئت نفسي ونزلت جووه شفتهم شووي
مرتاحين ..
رحت على جووري : هاا بشري شلونه
شاهر ..
ابتسمت : لا الحمدلله كلشي مابيه حتى
حاجيناه متصوب برجله والحمدلله مابيه كلشي
اصابه سليمة يحتاج بس راحه ..
مي بارد ونزل على كلبي اووف الحمدلله
دخيلك ربي ماتقصر الشكرر لله ...
ظلينه لليل كاعدين اتصلت فاتن على محمد
وكالووو يباتون ويجون باجر..
كله التمت يمنه بيت عمي ابو غسان
وعمي ابو فارس موجودات يمنه
بقن يم عمتي يطمن عليه لان خطية
صعد الضغط عده ...
اجه علينه فاارس من بغداد وطمن عمتي
وكال : لا تخافين عمة ابنج كلشي مابيه
الله وكيلج صاااحي جنه حصاان على كولة
غيث..
عمتي ام محمد : ااخ من لسان غيث مايكعد
راحه ..
حجت مرة عمي ام فارس :
ولك كول ماشاءالله لا ينصاب بعين
من وراكم أنت وغيث ..
ظل فارس يداهر بمرة عمي ام محمد
وهيا تضحك على سوالفه طلعه من جوو الخووف
والقلق اباوع على ام غساان ماعاجبه الحجي
كامت استأذنت من يمهم وكامت وياها زهراء
سلمت وطلعت وجمارة بقت يم جوري هيا
وزينب ..
طر الصبح كعدت من وكت اليووم
ولكيتهن كاعدات يحضرن الغدة وينضفن هم
وعمي منطيهن خبر خطار يجون على الغدة
لان يتحمدوله بلسلامة شيووخ ونااس ..
كمنه اني وجمارة على البيت كلبناه كله
كالت مرة عمي الغرفة الجوه تصير لشاهر
مايكدر يصعد هوو ..
كلت لجمارة اني انضفه وانتي نضفي
الهول دخلت على الغرفة كنسته
ومسحته وبدلت جرجف الجرباية
وعطرت الغرفة وطلعت حبيت اني انظف
الغرفة الي يناام بيه ...
اجت مرة عمي ام فارس من وكت تساعدهن
الا ام غساان ب١١ونص يلا اجت ..
ظلينه نساعدهن بلطبخ هووسة صارت كلش
شووي ونسمع صوت السياارت كالوو اجوو ..
كامن كلهن يرحن يسلمن عليه ويشوفنه
اني فرحت بداخلي اريد اشووفه
هستوني كمت اريد امشي اله بس ماعرف
ليش وكفت بنص الطريق واني اتذكر
كلامه الأخير الي هوو مايشوفني
غير بنية جاهلة وصغيرة ومستصغرني
ليش اروح اسلم عليه حتى ياخذ نظرة عليه
اني ميته عليه خل ابقه احسن..
بقيت بلمطبخ واني اسمع صوتهن يسلمن عليه
وهو يرد عليهن بعدين صااح غيث كافي
يريد يمشي يم الزلم ..
طلعو الولد وراح وياهم واني مقهوره لان
ماشفته ليش شصاار وياي وماكمت ..
شافتني جوري وكالت : ليش ما رحتي
سلمتي عليه ..
ابتسمت اله: ماتشوفين ماكدر اكووم
اريد اكمل هاي الزلايط يلا ان شاءالله
من يرجع اسلم عليه وين رايح هوو ..
باوعتلي وسكتت ماحجت شي هيا
واني بقيت اساعدهم والولد كل ساعه
طابين طالعين ساعه ماي ساعه جاااي
دوخونه كلش تعبت اول مره هيج اسوي
اني واشتغل هلكد ...
صبينه الغده الهم ونكلوه الولد
وزينب حضرة الجاي وكمنه صبينه النه غده
كعدنه نتغده احنه وخلصنه شلنه المواعين
وجاوبو مواعين الزلم وغسلناهن ..
ملابسي صاار بيهن ماي سمعت صوت
جوري تكول خل يجي يلا يرتاح ..
دخل من الباب شااهر واني اريد اصعد
الدرج صارت عيني كبال عينه باوعلي
واني دنكت راسي بسرعه ركضت على غرفتيكلبي يدك بسرعه مارده يشوفني هيج وعيب
ملابسي كله ماااي ..
بس فرحت من شفته بخير ومابيه شي
رددت بهمس : الحمدلله والشكر ..
بقيت كاعده فووك سبحت وطلعت
شسورت شعري وتمددت بتعب
نمت بدون ماحس على نفسي
كعدت لكيته صايره ب٦ العصر ..
: عزااا نمت هلكد خل اكووم
كمت من مكاني غسلت وجهي
وخليت مرطب شفايف ونزلت جووه
شافتني فاتن : صح النوم ولج
هلكد نايمه شعندج..
: ولج نمت متأخرة البارحه واليوم
كعدت من وكت ولأن سبحت نعست ..
:اووي مثل الطفل انتي تسبحين وتنامين
: اي والله شسوي لعد ..
كعدت على الميز بلمطبخ وهيا تسوي
عشه كتله : لو مو تعبانة جان كتلج
خل اساعدج..
: مشكورة عيني مانريد مساعده..
اجت جوري وكالت : بنات اصدقاء شاهر
راح يجون كومن نسوي عشه بعد الهم
هذا مايكفي ..
كمت : امري لله ..
طلعنه كباب وكبه ودجاج وكليناه
وزلاطة سوت جوري واني حضرت الطرشي
ولبن وغيره ..
اجه فارس وليث شالو الاكل لان الولد هم
هناا بقوو يم شااهر ..
حضرة قوري الجاي الهم والنه
كعدنه احنه ناكل بلمطبخ مرة عمي ماتريد
وعمي طالع..
جابو الاكل صبيت الجاي الهم
وصبيت النه هم كعدنه نشرب وبعدين
غسلنه المواعين ..
كتلهن : خلص شغلي اروح اصعد..
كالت جوري : شعندج فوك ولج
ماتبقين يمنه..
تعبانه وماشبعانه نووم اريد اتمدد
ظهري اتكسر من شغلكم شنو هاي ..
ضحكن عليه واني رحت صعدت فوك
كبل ماريد اشووف شاهر ابد
مادري ليش هيج يصير وياي
بس احس نفسي بعيدة عنه احسن شي..
صااار الليل وضجت كلش تعودت بليل
اطلع مابقه هيج اتذكرت كل ماطلع يلزمني
شاهر ..
نزلت جووه وجانت غرفة شاهر كبال
الدرج وشفت باب الغؤفة مفتوح يعني
اذا مريت يشوفني درت وجهي وهستوني
اريد اصعد وافزز من صوته :
رسيل اوكفي ..
بلعت ريكي كلبي ظل يدك بسرعه
جنت عادي من اشوفه بس هسه ارتبك
درت وجهي اله ابتسمت بهدوء :
هلاا شاهر الحمدلله على سلامتك ..
باوعلي كال بهمس : شااهر
اتقدم عليه وصار كبالي بيناتنه شبر وأحد
فقط ظل يباوعلي واني نزلت راسي كبل
متوتره كال وهو يبتعد عني :
ليش ماجنتي تردين تشوفيني وماسلمتي عليه
من اجيت شنو مانسيتي الي حجيته ترى
لصالحج اني ماقصدي شي ..
كمل : زين ليش شفتيني اليوم وشردتي ..
ا
رفعت راسي عليه لكيته واكف يم باب غرفته
كتله : مو هيج بس ماجان عندي مجال
وانت كله بره مالحكت اسلم عليك ومن شفتك
اليوم جنت هستوني مخلصه مواعين
وهوسه وكل دهن مال اكل شلون اسلم عليك
هيج..
رفع حاجبه وجنه ماصدك كلامي:
اها كلتي ما لحكتي خووش
حسبالي زعلتي ..
رفعت حاجبي : لا ليش ازعل
انت هذا رايك بيه وعادي كل شخص
واله وجهة نظر وادري يمكن زودته ويااك
هوواي واحرجتك يم اخوانك من اكلك شاهير
ترى بس مو قصدي اتعمد لو احرجك بس اني هذا
طبعي وي ولد خالي وعادي بيناتنه حسبالي
انتم هم هيج ماحسبالي تكرهون هيج شي
تعرف بعدني جديده عليكم وان شاءالل
شوي شوي اتعود على تصرفاتكم ...
باوعتله لكيته ساند ظهره على الحايط
وصافن عليه ومكتف ايده كتله :
ليش هيج تباااوع ..
كال بهدوء :ماحسبالي هيج راح تتأثرين
بكلامي ومزعلج هلكد بس اني حجيت
لمصلحتج لا اكثر ..
: تسلم بس اني اعرف مصلحتي ..
درت وجهي وكال : رسيل
باوعتله: نعم ..
دار وجهه : لا ولا شي تصبحين على خير..
عافني ودار وجهه دخل لغرفتة انتبهت عليه يعرج
ابمشيته مايكدر..
مشه وسد الباب اني ماستغربت تصرفه
دومه هيج مايكمل كلامه
عفته وصعدت فووك ...
........
جوري/
الحمدلله من عدت سلامات واخوي كلشي مابيه
ردت امووت اذا يصير بيه شي هذا سندي بلدينا
احن واحد عليه واعز شخص على كلبي ..
اجه والحمدلله مابيه شي بس رجله
وهم مابيه ضرر بس مايكدر يمشي عليه
يظل يعرج وتوجعه بعده واخذ اجازة
اسبوعين خل يرتاح بيها..
صارت هوسة وخطار كل ساعة يجون
هلكنة متنه تعب كل ساعة ماي لو جاي
وغده وعشه البيت ماخله من الخطار
صح متعودين على هيج شي بس مو
جره وحده متنه ...
اجو بيت عمي علينه ام فارس
وام غساان وعلي وسما احفاده وياها
وطبعا ما تخلوو من زهييرة ..
شفته اني اخر مره من ضربته راشدي
بعد مااجت علينه وهسه اجت ..
طلعت من غرفة اخووي عزلته
من طلع من الغرفة هووو درت وجهي
واشوفه كبااالي ..
كلت بصوت مسموع :
ياارب صبررر خيير ..
كالت بحدة : مو حسبالج نسيت ضربتج
الي لا والله بس ضامته الج يا جوري
وبدال الراشدي ارجعه الج عشرة اضعااف..
ماهتميت لكلامه وكتله : وشسووي يعني
شترديني هسه مثلاا اخاااف لو شنو فهميني..
اقتربت مني وكالت بعصبية وعيونه
تنطق بلشر فقط امبين عليه ما ناوية على خير..
كالت بعصبية : شوووفي جووري
شهااب مرجعه الي فهمتي شهااب الي
مو الج .
ابتسمت بأستهزاء :امبين الجخطية مو على اساس يخطبج بأسرع وقت
شوو ماكو كله راحت تزوج وأنتي بعدج كاعده
على كلب بيت خالتج..
رصت على سنانه وكالت :
شووفي منو الي تحجي ولج اصلاً
انتي بعدج عايشة على ذكرى شهااب
وتتمنين نظرة منه واذا كلامي مو صحيح
جان قبلتي على ابن خالج زياااد الي موت
نفسه عليج ويخطبج وانتي ساكتة ...
انصدمت هاااي شتحجي وشتكول
شعرفه هيا ضحكت فهمت صدمتي وكالت :
الله وكيلج كلشي اعرف
ماحسبالج اني عايفتج هيج وساكتة
الا حسبة ابااالي ..
خلت ايدها على كتفي وكال بأبتسامة:
روحي لابن خالج يفيدج هوو وانتي وياه
مناسبين على بعض ثنينكم تافهين
وخلي شهاااب الي عوفيه لا تظلين
لازكتله ترى مرجعه الي فهمتي
لا تسوين نفسج ماريده ومكابرة
وانتي كاتله روحج عليه ...
سبحت ايده ودفعته بقووة :
احترمي نفسج فهمتي مو اني الي اسحل
روحي على شخص هو الي ميت عليه ..
ضحكت وكالت: ايي شفنه منو سحل
على الثاني ..
باوعتله بكره وكتله: امشي ولي من يمي
لا والله اسحلج هنااا وادوس على راسج
ذابحه نفسج على واحد ما مكلبج اصلا
ولا معترف بيج ..
عفته ومشيت واني اغلي من القهر
من وراها طايحة الحظ اني هيج تحجي
وياااي ..
خلصت العزيمة وكله راحت
وبقيت اني اتكلب هاي منين اله هاي
السوالف شعرفه زياد رجع خطبني
والله راح انفجر راسي راح يطك
من التفكير ..
مرت يومين وشهااب نفسه اشوفه
بلجامعة يجي على جماارة ..
مره خلصت المحاضرة الاولى
وطلعت ارتاح وبعد نص ساعه
على المحاضرة الثانية ..
كعدت بلحديقة واقره بتركيز
وماحس غير خياال شخص فوك راسي
باوعت ولكيت شهااب يباوعلي ..
كمت من مكاني وكتله بحدة:
شعندك جاااي هنااا ..
كال بهدووء ونظرت ندم بدون سابق إنذار :
تساامحيني ..
صحت بعصبية : شنووو اساامحك ..
انتبهت على نفسي ونصيت صوتي
كتله بحدة: انت عاقل وتحجي هيج
وهم هنااا شهااب روح امشي لا الم امة محمد
عليك كافي عاااد كتلك ماريد اشووفك ..
اقترب مني : جوري اسمعيني
اني والله متندم على الي سويته ولج
حسبالج متهني بحياتي لا والله
بس انطيني فرصة والله اعوضج
عن كلشي سويته الج وسببته الج من الم
وعذاب ..
باوعتله لكيت عيونه مغوركه ودمعه
نزلت من خده دنكت راسي ماحجيت
شي ويااه ..
كلبي ملجووم منه ماكدر اسامحه
على السوواه ..
خلصت محاضراتي ورجعت للبيت تعباانه
كبل صعدت بدلت ونمت بدون اكل ..
مر يومين على السالفة ماشفته ابد
بعد بيومه بس عيونه ما فاركتني
عيونه مغووركة ومتروسة دمووع ..
جان وقت ليل اجتني رسيل
كالت :جدي يريدج بلاستقبال ..
نزلت جووه لكيته كاعد وحده
اشرلي اجي اكعد بصفه كعدت يمه
خله ايده على كتفي وكال :
بوية جوري اريد احجي وياااج ..
باوعتله : شنوو جدي ..
ابتسم وكال : بوية القرار الاول والاخير
الج ماريد اجبرج بس ابن عمج شهااب
رجع خطبج من يمي شتكولين بوية!؟
كمت من مكاااني مصدوومة
كتله : شنوو جدي شتحجي..
لزمني من ايدي وكال :
ابوي اهدي شهااب يريدج وبعده هاويج
شكلتي انتي بوية القرار الج فكري زين
ابن عمج وشااريج بوية صح الي سواه
اكبر غلط بس كلنه نغلط احنه مو انبياء
او ائمة نكون معصومين من الاخطااء ..
ظليت صاافنة واتذكر كلامه وياي
والحجي والمااضي والشماااتة
بعد صفنه طوويلة :
جددي اني موافقة ..
كمت من مكانه وافكر بأهلي
باجر راح تصير مشاكل هنااا شيحجون
شيكولون ..
يتبع..
