පිරිසිදු වී අවසානයේ ඇඟ පිසදාගෙන රාත්‍රී ඇඳුම් හැඳ ගත් හාන්ස් තෙතැති තුවාය ද කරෙහි ලා ගෙන මුළුතැන්ගෙය වෙත පිය මැන්නේ ය. විදුලි බුබුලකින් ආලෝකවත් වුණු ශීතකරණයකින්, සෝදන බේසමකින්, කෑම මේසයකින්, කුඩා කබඩයකින් හා උදුනකින් සමන්විත වූ මුළුතැන්ගෙය පිරිසිදු විය. එකල ශීතකරණයක් යනු තරමක් වත්පොහොසත්කම් ඇත්තවුන්ට පමණක් හිමි වූ කරුණක් විය.
ශීතකරණය වෙත ගමන් කළ හාන්ස් එහි දොර විවර කොට ඉන් පිඟානක් සහ වීදුරුවක් අතට ගත්තේ ය. නිවෙස පිරිසිදු කොට ඔහුගේ ආහාර පිළියෙල කොට දෙන කාන්තාව ඔහුගේ රාත්‍රී ආහාරය සූදානම් කොට ගොස් තිබුණි. ශීතකරණය අසලින් වූ කෑම මේසය මතින් ඒවා තැබූ ඔහු ශීතකරණයේ දොර වසා දැමුවේ ය. මේසය වටා වූ පුටු සතරින් එකක් පිටතට ඇද එහි හිඳගත් හාන්ස් මේසය මත වූ ගෑරුප්පුවක් හා පිහියක් අතට ගත්තේ ය. ඉන්පසු ඔහු තම සරල රාත්‍රී ආහාරය වෙතට අවධානය යොමු කළේ ය. ඔහු පිටතට ගත් පිඟානෙහි වූයේ සීතල වූ මස් කැබලි කිහිපයකි. පිඟාන අසලින් තිබූ වීදුරුවෙහි වූයේ සීතල කිරි ය. පිහියෙන් මස් කැබැල්ලක් කපා එය ගෑරුප්පුව ආධාරයෙන් මුවට ළං කළ ඔහු එය මුවෙහි ලා ගත්තේ ය. එහි වූ ශීතල ගතියෙන් වෙව්ලා ගියේ ය.
මස් කැබලි කිහිපය රත් කරගැනීමට සිතූ ඔහු සෝදන බේසමට ඉහළින් එල්ලා තිබූ ලෝහ බඳුනක් හා හැන්දක් ගෙන ඒවා උදුන මත තබා ඒවා මදක් උණුසුම් වීමට ඉඩ හළේ ය. පිඟානෙහි වූ මස් කැබලි කිහිපය උදුන මත වූ බඳුනට දැමූ හාන්ස් ඒවා හැන්ද ආධාරයෙන් එහා මෙහා පෙරළමින් මදක් උණුසුම් කොට ගෙන උදුන නිවා දමා මස් කැබලි කිහිපය යළිත් පිඟානට පිළිගැන්වූවේ ය. පිඟාන මේසය මත තබා උදුන මත වූ බඳුන හා හැන්ද සෝදන බේසමට දැමූ ඔහු මේසය වෙත ගොස් යළි හිඳ ගත්තේ ආහාර ගැනීම ඇරඹීමට ය. සෙමෙන් සෙමෙන් පිහිය හා ගෑරුප්පුව ආධාරයෙන් ආහාර ගැනීම සිදු කළ ඔහුගේ අවධානය රැඳී තිබුණේ ඔහු ඉදිරියෙන් වූ හිස් පුටුව දෙසට ය. ඒ දෙස වූ අවධානයෙන් යුක්තව කෑම ගැනීම සිදු කළ ඔහුගේ දෙනෙත් ඉදිරියේ දසුනක් මැවෙන්නට විය.
දුඹුරු පැහැ හිසකේ ඇති තද නිල්පැහැ දෑසකින් යුතු වූ තරුණ පිරිමි පුද්ගලයකු ඔහු ඉදිරියේ වූ ආසනයේ හිඳ ගෙන සිටියේ ය. ඔහු යමක් පවසමින් සිටි අතර ඔහුගේ මුවෙහි ආහාර පිරී තිබුණි. ඔහු එක්වරම මහ හඬින් සිනාසුණු අතර ඔහුගේ මුවින් විසි වුණු ආහාර කැබැල්ලක් ඔහු ඉදිරියේ හිඳ ගෙන සිටි තරුණ හාන්ස්ගේ පිඟාන මතට වැටුණි.
“ඊ...... ඩැනියෙල්, ඔයාට කාලා ඉවර වෙලා හිනාවෙන්න පුළුවන් ද? මට ඔයාගේ කටින් එළියට විසි වෙන කෑම කන්න ඕන නැහැ.” හාන්ස් මැසිවිලි නැගුවේ ය. ඊට මද සිනාවක් පෑ ඩැනියෙල් නම් වූ තරුණයා තම මුවෙහි වූ ආහාර ගිල දමා අවසානයේ යළි මුව විවර කළේ ය.
”වර්සයිහුන්ග්*, මිස්ටර් කෙලර්. ගැත්තාට අනුකම්පා කරත්වා!” යි පවසා නැවතත් මහ මඬින් සිනාසුණේ මෙතෙක් වේලා නොරුස්නා බැල්මක් මුහුණේ රඳවා ගෙන සිටි හාන්ස්ව ද සිනාගස්වමිනි.
මේ මතකය සිහිපත් කරමින් සිනහසෙමින් සිටි හාන්ස්ගේ නෙත් අග කඳුළු බිඳු එක්වුණි. කඳුළු අතරින් බොඳ වූ දර්ශනය මැකී ගිය අතර යළිත් මුළුතැන්ගෙය තුළ නැවතත් සුපුරුදු නිහඬ බව රජයන්නට විය. ඇසුණේ හාන්ස් විසින් සෙමෙන් හුස්ම ගන්නා හඬ පමණි. තම නෙත් පිසදැමූ ඔහුගේ කෑම ගැනීමට වූ රුචිය අහිමි වූ නමුත් පිඟානෙහි ඉතිරි ව තිබූ ආහාර ස්වල්පයක් මුවෙහිලා ගත් හාන්ස් වීදුරුවෙහි වූ කිරි, උගුරු කිහිපයකින් බී හමාර කළේ ය. හිස් බඳුන් දෙක අතට ගත් ඔහු සෝදන බේසම වෙත ගොස් බඳුන් සියල්ල සෝදා නිසි ස්ථානවල තැන්පත් කොට මුළුතැන්ගෙයිහි විදුලි බුබුල නිවා දැමුවේ ය.
තම කාමරය වෙත ඇවිද ගිය හාන්ස් සේදිය යුතු ඇඳුම් දමන කූඩයේ වූ කබාය ගෙන එහි වූ ප්‍රධාන දොරටුවේ අගුලෙහි යතුර පිටතට ගත්තේ ය. නිවසේ ප්‍රධාන ද්වාරය වෙත ඇවිද ගිය ඔහු තමා අත වූ යතුරෙන් එය විවර කොට නිවසින් පිටතට ගමන් කළේ ය. රාත්‍රී සුළඟ ඔහුගේ ගතෙහි දැවටුණි. උද්‍යානයෙහි වූ ලැවෙන්ඩර් මල් පාත්තිය දෙසින් හමා ආ මද නලෙහි මුසු වුණු මිහිරි සුවඳ හාන්ස්ගේ සිත සැනසීමකට ලක් කළේ ය. උද්‍යානය දෙසට ගමන් කළ ඔහු එහි වූ බංකුව මතින් හිඳ ගත්තේ ය. අවට පරිසරය නිහැඬියාවෙන් යුතු වූ අතර ඉඳහිට බකමූ‌ණෙකු නැගූ “හූම්...හූම්...” හඬකින් පරිසරයේ නිසල බව බිඳුණි. ශීතල දරුණු වූ හෙයින් ටිකෙකින් නැවත නිවස තුළට ගමන් කළ හාන්ස්ගේ අතෙහි ලැවෙන්ඩර් මල් පොකුරක් දක්නට ලැබුණි. තමා අත වූ මල් පොකුර විසිත්ත කාමරයෙහි වූ මල් බඳුනට දැමූ ඔහු කාමරයෙහි වූ අල්මාරිය දෙසට ගමන් කොට එහි පහළට නැවී ඉන් විශාල පොතක් පිටතට ගත්තේ ය. නැවත මේසය වෙත ගිය ඔහු බිම ශෝකීය අන්දමින් නිසලව වැතිරී තිබූ ගිලිහුණු ලැවෙන්ඩර් පෙති ගෙන පොතෙහි පිටු අතර තැන්පත් කළේ ය. ඔහු විසින් පෙරළන ලද පොතෙහි පිටු අතරින් පෙර ද තැන්පත් කළ වියළන ලද මල්වල අවශේෂ දැකගත හැකි විය. එම පොත තිබූ ස්ථානයෙහි ම තැන්පත් කළ ඔහු තම කාමරය වෙත නොගොස් නිවස අභ්‍යන්තරයට ගමන් කළේ ය. ඔහු එසේ ගමන් කොට දොරක් ඉදිරිපස නතර වූයේ ය. ඒ ඔහු පිරිසිදු වීමට යන අවස්ථාවේ බැල්මක් හෝ නොහෙළීමට ප්‍රවේශම් වූ කාමරයයි. වෙව්ලන අතැගිලිවලින් කාමරයෙහි නොබය කරකවා දොර විවර කොටගෙන ඊට ඇතුළු වූ ඔහු විදුලි බුබුල දල්වාලූවේ ය.
*වර්සයිහුන්ග් - Verzeihung ( ජර්මානු භාෂාවෙන් 'සමාවෙන්න' යි පැවසීම.)
** ගූගල් ට්‍රාන්ස්ලේටරය උපකාරයෙන් සොයා ගන්නා
YOU ARE READING
Someone He Loved (On Hold)
General Fictionජර්මනිය දෙවන ලෝක යුද්ධයෙන් පසු කාලයෙන් පසු කාලයේ ආර්ථිකමය වශයෙන් විශාල පසුබෑමකට ලක්ව තිබුණි. ජර්මනිය නැගෙනහිර හා බටහිර ලෙස කොටස් දෙකකට බෙදා වෙන් කර තිබුණි. මෙම කතාව බටහිර ජර්මනිය පසුබිම් කරගෙන ගොඩනැගී ඇත. මෙම කතාන්දරය බටහිර ජර්මනියේදී මුණ ගැසෙන ජර...
