𝐓𝐰𝐨 𝐏𝐚𝐫𝐚𝐥𝐥𝐞𝐥 𝐋𝐢𝐧𝐞𝐬 𝐌𝐞𝐞𝐭 𝐀𝐭 𝐈𝐧𝐟𝐢𝐧𝐢𝐭𝐲 '/ / '

Ch-4 'U

မနက်ခင်းရဲ့နေရောင်ခြည်နုနုက နှင်းမှုန်ထုကြီးကိုတော်တော်နဲ့ မကျော်ဖြတ်နိုင်ရှာပေ။ အကာကျက်သွားတဲ့ကြက်ဥနှစ်လေးလိုပဲ ရေးရေးလေးသာအရိပ်ပြပြီး ပေါ်ပေါ်ထင်ထင်တော့ဖြင့် ထွက်မလာနိုင်ခဲ့ပါချေ။

ချန်အိမ်တော်ထဲရှိ တစ်ပင်တည်းသော ဇီးပန်းပွင့်ပင်လေး၌ နှင်းခဲထုလေးတွေက ဟိုတစ်စဒီတစ်စရစ်သိုင်းဖက်တွယ်၍ အကိုင်းလေးများပင် မပေါ်တော့ပေ။ အဖြူရောင်ခြုံလွှာကြားမှ ပန်းရောင်အပွင့်ငယ်လေးများတော့ဖြင့် အအေးဒဏ်ကို အန်တုနိုင်နေကာ လှပစွာပင် ငွားငွားစွင့်စွင့် ပွင့်လန်းလျက်သာ။

အိမ်တော်တံခါးဝတွင် လှပသေသပ်ကာ အဆင့်တန်းမြင့်သခင်တို့သာ စီးနင်းနိုင်သော ဝေါ်ယာဉ်တော်ကအဆင်သင့်ဖြစ်လို့နေလေပြီ။

သခင်ကြီးချန်က သူ၏ခင်ပွန်းဖြစ်သူအား အဖြူရောင်သိုးမွေးအပေါ်ရုံကို ငြင်သာစွာ လွှမ်းခြုံပေးနေရင်း နှုတ်မှလဲ မရပ်မနားတစ်ဖွဖွပြောနေသေးသည်။

"ယွင်ရှီးရယ် ကိုယ်ပြောပါတယ် အရမ်းအပင်ပန်းမခံပါနဲ့လို့ ဒီအလုပ်တွေ အိမ်တော်ကလူတွေကိုခိုင်းပါဆိုနေ ခုတော့ကြည့်ပါဦး လက်ဖျားလေးတွေအေးစက်နေပြီ ဘာလို့မီးဖိုချောင်ဝင်ပြန်ရတာတုန်းကွာ ကိုယ်ကမစားရလို့ ငတ်မသေပါဘူး မင်းကျန်းမာရေးကပိုအရေးကြီးတယ်လေ"

စူစူပုပ်ပုပ်လေးနှင့် ပြောနေသော်ငြား တကယ်တမ်းစိတ်ဆိုးနေတာလဲမဟုတ်ပေ။ လက်ဖဝါးလေးဖြင့်အာငွေ့ပေးလျှက် နူးညံ့စွာ ပွတ်သတ်ပေးနေပြန်သေးသည်။ သူပဲပြောလျှက် အမြဲသူပဲ သဲသဲလှုပ်ကာ ဂရုစိုက်ပေသည်။

လော်ယွင်ရှီးအနေနဲ့ အစားအသောက်ဂျီးများလွန်းသော ထိုသခင်ကြီးအတွက် ကိုယ်တိုင်ချက်ပေးမှသာ တော်ကာကျပေမည်။ မဟုတ်ပါက အိမ်တော်စားဖိုဆောင်မှူးများ ချက်ထားပြီဆိုလျှင် ဘယ်လောက်ပင် အရသာကောင်းနေပါစေ တန်ဖိုးထားပြီး တကူးတက မစားသောက်တတ်ပေ။

အိမ်တော်လုပ်ငန်းများ စီစဉ်နေလျှင် သို့မဟုတ် ဖန်းချန်မြို့အရေးဆောင်ရွက်နေပါလျှင် အမြဲတစ်စေ စားသောက်ဖို့ မေ့နေတတ်တာများသည်။ ကြာလျှင် ထိုသခင်ကြီးအရင်ရောဂါရ၍ လော်ယွင်ရှီးထက်ပင် စောစီးစွာမြေအောက်ကမ္ဘာသို့ ကြွမြန်းနိုင်ချေရှိသည်။