Your name Engraved Herein (Mm Trans)

အခန်း ၄

                             နွေရာသီ

ပြောင်းရတော့မယ်ဆိုတာသိပြီး နောက်ရက်အနည်းငယ်ကြာသည်အထိ အားဟန့် စိတ်ဓာတ်ကျနေမိသည်။ ဘတ်ဒ်ဒီကလည်း Liberal Artဌာနမှာ ရှိတာကြောင့် သူ၏နှလုံးသား တစ်စုံတစ်‌‌နေရာတွင်တော့ ကြည်နူးမှုလေးကို ခံစားလိုက်ရ၏။

သို့သော်ငြားလည်း မိခင်ဖြစ်သူ၏ မျက်ရည်များကို ပြန်စဉ်းစားလိုက်မိတိုင်း သူမ၏ မျှော်လင့်ချက်တွေကို ရိုက်ချိုးမိခဲ့တဲ့အတွက် အပြစ်ရှိသလို ခံစားရပြန်သည်။ သူ(မ)က သူ့ကို တုန်နေအောင်ချစ်ပြီး အဆင့်ရမှတ်တွေကို ဘယ်တုန်းကမှ ဝင်စွက်ဖက်ခြင်းမရှိခဲ့ဘူးဆိုရင်တောင်မှ ဆရာ ဖုန်းခေါ်ခဲ့တာကြောင့် သူ(မ) စိတ်ပျက်သွားတယ်ဆိုတာကိုတော့ အားဟန့် သိ၏။ ဒါပေမဲ့ သူ(မ) ဝမ်းနည်းရတာက သူ(မ) သား‌ကြောင့် အရှက်ကွဲရလို့မဟုတ်ဘဲ သူ(မ) သား၏ အနာဂတ်ကို စိုးရိမ်၍သာဖြစ်ပေသည်။

တီးဝိုင်းလေ့ကျင့်နေသည့်အချိန်တွင် အားဟန့် စိတ်အားငယ်နေတာကို ဖာသာ သတိထားမိသွားခဲ့သည်။ အားဟန့် Liberal Artsဌာနသို့ ပြောင်းရတော့မယ်ဆိုတာကို သူ ကြားခဲ့သည်‌လေ၊ ဒါကြောင့် သူ ဖြစ်နိုင်ချေကို စဉ်းစားလိုက်၏။ စကားစမြည်ပြောဖို့ တီးဝိုင်းလေ့ကျင့်ရေးပြီးသွားလျှင် မထွက်သွားသေးဘဲ နေခဲ့ရန် အားဟန့်ကို သူ မှာလိုက်လေသည်။

ဖာသာအိုလီဗာသည် တီးဝိုင်းလေ့ကျင့်သည့် အခန်း၏ ဘေးက အခန်းငယ်လေးကို အားဟန့်အား လိုက်ပြပေးခဲ့သည်။ ဟွန်းနှင့်ကျန်တဲ့ ကောင်လေးတွေ ပြောတာကတော့ ထိုအခန်းသည် ဖာသာအိုလီ‌ဗာရဲ့ ဆေးရှူဖို့နဲ့ အပြာကားကြည့်ဖို့ရန် "လျှို့ဝှက်နိဗ္ဗာန်ဘုံ" ဟုပင်။

သို့သော် ထိုမကောင်းသည့် အရာတွေအစား အခန်း‌၏ နေရာတော်တော်များများသည် တူရိယာများဖြင့် ပြည့်‌နှက်‌နေ၏။ တီဗီလည်းမရှိသလို ဆေးခြောက်လည်း မရှိချေ။ နေရောင်ခြည်‌သည် ပြတင်းပေါက်မှတစ်ဆင့် ဖြာကျနေပြီး ကုလားထိုင်၊ ကော်ဖီစားပွဲသေး၊ သစ်သားခုံနှစ်ခုံ၊ ဟိုတစ်စုဒီတစ်စု ကွဲနေသည့် အသံသွင်းတိပ်‌ခွေများနှင့် ကော်ဖီဖျော်စက်ပေါ်တွင် ဝေဝါးစွာ အလင်းပြန်‌လျက်။