الشفق الاحمر .

البارت الاول 🤍

Part1 ✅:
من عام 2003/4/15 في النجف تحديداً، نولدت بُنيه
چانت ثاني بنيه لعائلتها اسَمها شَفق ، نولدت بعيون سوده وواسعه ورموش كثيفه وسَمره وضعيفه كلش
الشكوك استوطنت بال اهلها انو اكيد مريضه ممعقوله هيج ضعيفه بنتنا ،
لكن وللاسف هلبنيه من ولادتها وعمرها اشهر طلعت عليها اعراض تخوف خلت اهلها يستغربون لأن اول مره يشوفون هيچ شي
ف طبيعة الاهل ركضو ببنتهم للدكتور  اسمه احمد عَزيز ♥️
الدكتور : هذي بنتكم بيها فتحه بالقلب ورباعيه هم " چان يجر بالكلام ويطول بالاحرف " لكن ك بدايه زينه الامور ومتخوف بس تتلاحگوها بعدين لو تخسروها
الاهل: استغربو وانصدموا وخافو وكل المشاعر تجمعت بيهم صار كل همهم هلشفق هاي تركو اطفالهم وماهتمولهم بگد ماهتمو بالشفق ،
شَوي شوي شفق بدت تكبر بالعُمر سَنه عن سَنه باقيه وياها هلفتحه وچانت طفولتها مگضيتها مستشفيات وكانولات ولعبان نفس ،چانت امها تاخذلها صوره بكل لحظه لان جانت خاله ببالها انو تموت ف تضل هلصور ذكرى الها وتشفي غليلها كل هذا والشفق متدري بشي من كبرت وصارت شوي تفهم چان كل احلامها تدخل مدرسة مثل بنت خالها الي سابقتها بسنه ، بس اهلها چانو شايلين هَمها هنا همه مدارينها هناك طالبات ولعب وهي هنا بس توكع شفايفها تصير لون ازرق ع بنفسجي واصابع اديناتها ورجليناتها يصير لون ازرق شلون بيها؟
صَار عُمر هلشفق 7 سَنوات ب2009 وصارو يجهزولها للمدرسه "صدريه لون نيلي  بيها عَلم عراقي وقوبچات لسه عندي ، واشَرطه وحذاء وجواريب وكَالونات وجنطه ورديه بيها دورا بيها چروخ " كلشي جهزولها وشتطلب يشترولها مع العلم ابوها چان عَماله مو هلگد حالتهم الماديه ،
چانت امها تنضف السمچ بالحديقه وهلشفق تگمز فوك راسها اريد اروح للمدرسه حانت تفتر بالحديقه الصغيره الي بيها نَخلتين وبهاي النخلتين مَرجوحه سواها الها ابوها ،
هلشفق تسمع الطلاب راجعين من الدوام
شفق : ماما حبابه شوكت اداوم مو نونه راح تغلبني وتوصل وانه بعدني شيگولون عليه
الأم : لج ياماما مو كتلج باجر اخذج وتشوفين نونه وتلبسين الملابس الي اشتريناها الچ
شفق : مو تجذبين عليه مثل كل يوم تخليني اخلي الملابس يم راسي واكعد وماتاخذيني
ضلت الأم بحسرتها شتگللها اخاف عليچ شلون بيج ياشفق شلون ؟
كبرت هلشفق ودخلت مدرسه "الخالصه للبنات" وصارت اول ابتدائي هَي وگصايبها واشرطتها گعدت امها اول يوم يمها وبقت وياها وكل ماتروح للاداره تلگه امها تسولف وي المدرسات وتسمعها " عينچن عليها فدوه لروحچن ماگدر احرمها ولا اگدر الاخليها وحدها " صفنت الشفق امي شچاي تحجي مافهمت وراحت تكون صداقات جَديده ،
يوم عن يوم تداوم وشاطره كَلش والمُدرسات بكَلشي مشجعاتها ومخلياتها اول رحلة والبنات يحبنها وصديقاتها ..
يوم من الايام چانت هلشفق تلعب "ركيضان" وي صديقاتها غافلت المُدرسات وصارت تلعب (لان ميخلنها يمنعنها عن الركض ) چان هلشفق وقت ركضتها توگع وتطيح .
صارت شفتها زرگه واصابع ايدها كذالك واغمى عليها صديقاتها خافوا منها وابتعدوا خابروا ع اهلها واجوي اخذوها وهمه گلبهم مليان رعب ،
راجعوها للدكتور واخذولها "ايكو" چان يكللهم
الدكتور : بَنتكم متتحمل اكثر الفتحه كُل ماجالها تتضخم وي كُبر عمرها تلاحگوها او تخسروها ..
الاهل: صارو لاياخذون ولا ينطون وجههم اصفر والتعب بين ع ملامحهم شلون بيهم منين يدبرون وينقذون بنيتهم؟
چان ابوها يطلع يلم الفلس ع الفلس وتوصل ايام ميتغدون بس يتعشون حتى يدبر فقط علاجها ، لاعَم الي مد ايده وساعدنه ولا خال الي عنده وينطينه هم ع گد حالهم خوالي ،
علاجها الي جانت امها تموت الف موته يالله تخليلها العلاج ، جانو واصفيلها قطرات مال عجز قلب "للكبار يصير ع شكل حبوب " بس هي طفله ف تصير قطرات بالحلگ "ديجوكسير" مال واحد ميئوس من حالته ..
جانت اذا زودت قطره تموت اذا قللت تموت لان مو شوي مال عجز قلب ف امها تضل تلوب لمن يصير وقت العلاج ..
مرة من الايام جيرانهم خابر عليهم گللهم اكو لجنة مال اطباء هنديين جايين للعراق اكشفوا بنتكم عليها عسا ولعل بيها امل " اجو بفندق بالنجف لسه اتذكر مكانه بالضبط يصير قريب ع الامام علي عليه السلام "،
والله كيفوا اهل شفق واخذوها لهلفندق بطلاع الروح يالله گدرو يدخلون الهم خَلو الشفق وكشفوها الاطباء حچو بالهندي ، اهل شفق ضلو يتصفنون شنو شكالو مايدرون ، اجه مترجم ترجملهم
المترجم: الدكتور يگول بنتكم متعيش الها مدة 6 اشهر فقط لا اكثر يا تتلاحگوها بعمليه يا تعوفوها وره الله لمن تموت .
الاهل: ضلوا كالعاده يتصفنون والام دموعها تجرين وين ومنين وشلون ندبر ونعيشها تمسكوا بأهل البيت على الرغم من ام شفق مجان عندها عقيده بس برب العالمين بس ماعندها غيرهم..

لاتنسون النَجمه يا نجوم گلبي ♥️
شَاركوا القصة ♥️.
احبكم كُلش ♥️.
دُمتم بخير .