كتاب الحظ

(5) خير

✨ ليس سقوط المرء فشلا
وانما الفشل أن يبقى حيث سقط

دخل الطبيب على هشام وقال:
ايه يا بطل اخبارنا ايه النهاردة ؟

نكس هشام رأسه ووجه كلامه للدكتور قائلا:
ـ هعمل ايه يعني يا دكتور ما انا زي ما انا

أمسك الطبيب بملف حالة المريض وأردف بعملية:
ـ انت بقيت كويس هكتبلك على خروج

شرد هشام هنيهة ثم قال ساخرا بهمس:
ـيعني بتقولي خبر حلو أوي

انتبه له الطبيب وقال:
ـبتقول حاجة يا هشام

ـ لا ابدا يا دكتور بس بفكر هروح فين لما اخرج

تحدث الطبيب بمرح بنية اخراج هشام من اكتئابه:
ـ ليه يا هشام انت معندكش بيت ولا ايه ؟!

ـ لا يا دكتور الحكاية اكبر من كدة بكتير

جلس الطبيب أمام هشام وقال بشفقة:
ـ طب احكيلي يمكن اقدر اساعدك

"قص هشام على الطبيب ما حدث له من بداية وفاة اهله حتى ضربه ودخوله المشفى"

نظر له الطبيب وقال:
ـ انا طبعا متعاطف معاك بس مش هقدر اكذب عليك واقولك انك مغلطتش انت غضبت ربنا كتير يا هشام ويمكن دة كان عقاب ربنا ليك

طأطأ هشام رأسه للاسفل وقال بخذلان:
ـ انا عارف انى غلطت وغضبت ربنا بس وربنا انا خلاص توبت ومش هرجع للغلط تانى انا اتعلمت من الدرس وفهمت ان الغلط ليه اخر ويمكن ربنا بيحبني عشان كدة عاقبني وفوقني بدل ما اتمادى فى الغلط

فكر الطبيب قليلا وقال فجأة:
ـ طب بص انا هحاول اساعدك
انا اعرف واحد صديقي عنده بيت بس قديم شوية هحاول اشوفلك عنده اوضة وهدفعلك اول شهر بس انت بقا تشتغل وتبقى تدفع بعد كدة

تفاجأ هشام مما قاله الطبيب وقال بإندهاش: ـانت هتساعدني بجد يا دكتور !!!
هو لسه فيه ناس فيها شهامة كدة

ـامال اسيبك تشحت ولا تدخل السجن، على الاقل هاخد ثواب بدل ما اتحمل ذنب فسادك فى الارض

نظر هشام للطبيب بإمتنان وقال:
ـ انا بجد مش عارف اشكرك ازاى يا دكتور واوعدك هحاول اردلك جمايلك دى اول ما اقف على رجلي

ـ قول بس ان شاء الله

ليقدم هشام المشيئة وراء الطبيب:
ـ ان شاء الله

✨✨✨✨

استيقظت مليكة على صوت مريم وهى تخبرها بأن أباها استيقظ من النوم ويريد ان يتكلم معها،
قامت مليكة وغسلت وجهها ودخلت على والد مريم قائلة:
ايه يا عم محمود ياللى ناسينى مبقتش تسأل عليا ولا معبرني خلاص مريم وطنط اماني نسوك مليكة

ضحك محمود على مرحها المعتاد وقال:
يا بت بطلى طولة لسانك دى خالتك اماني لو سمعتك هتعمل منك كفتة

ـ الله انا بحبها اوى

ـ خالتك اماني؟؟

ـ لا الكفتة

لتأتي أماني من ورائها قائلة:
ـ دة انا هحطك عالسيخ يا ندلة،
ايه يا بت مبقيناش نشوفك ليه هو انتى فاكرة اهلك ماتو بجد ولا ايه دة انا كنت بشوفك اكتر من امك

ـ ربنا يعلم انا بحبكم قد ايه بس انتي عارفة ان كارم السبب في كدة

ـ ربنا يصبرنا على ما بلانا ادعيله يا بنتى يمكن ربنا يهديه ويباركلي فى مريم ويرد غيبة أحمد نفسي بقى اشوف عياله اوي وحشوني أوي العفاريت دول

ـ بقولك ايه ؟؟

ـ  ايه؟!

ـ الكفتة خلصت ولا لسه؟

ضحكت أماني بيأس وقالت :
ـ لله الامر من قبل ومن بعد ارحمني يا رب، اعملها شيش طاووق دي ولا ايه

ـحلو برده ميضرش طعمه جميل

"ضحكوا جميعا عليها وبعد ذلك جلسو وقصت لهم مليكة ما حدث مع جابر صاحب العمارة وحقارته معها "

حزن محمود لما سمعه وقال:
ـ أعوذ بالله من دة راجل حد يعمل كدة برده ،متقلقيش يا بنتي انتي قاعدة معانا لحد ما ربنا يسهلها

أصاب مليكة الفزع وتحدثت بتوتر:
ـ لا بالله يا عمي انا مش عاوزة اقعد هنا كارم مش هيسيبني فى حالي وانا مش عاوزة مشاكل انت ادرى بأبنك

ـ ما انا مش هأمن عليكي برا

ـ شوفلي انت بس حتة اقعد فيها وبسرعة قبل ما كارم يرجع من الجيش ويبقى كتر خيرك لو شفتلي شغل كمان

ـ مع ان قلبي مش مطاوعني انك تكوني لوحدك بس بصي هشوفلك شقة فى عمارة واحد صاحبي هي قديمة شوية بس هو راجل ثقة ومش هأمن عليكي غير عنده

ـ قديمة قديمة مش مشكلة المهم انى الاقي مكان اقعد فيه وشغلانه اصرف منها

ـ على بركة الله، بكرة هكلمه وهقوله

ـلا يا عم محمود الله يسترك النهاردة انا عاوزة امشي من هنا قبل ما الاقي كارم فوق راسي

ـ حاضر بإذن الله النهاردة هيكون الموضوع خلصان

⚡⚡⚡

يا ترى تفتكرو مليكة وهشام
هيسكنو فين؟؟؟؟

وهل القدر هيجمعهم تاني🤔
تفتكرو رد فعل كل واحد منهم لما يشوف التاني ايه 🤭

مستنية تعليقاتكم وتخمينكم على الأحداث ولا تقلقو الاثارة والمتعة لم تبدأ بعد احنا لسه بنسخن يا شباب 🔥

⚡⚡⚡

🖤يا رب الفصل يكون عجبكم ومتنسوش تعملولى فوت وتقولولى رأيكم🖤