أمســـيت قـــربان

البارت السابع

💙صباحكم محبه💙
...امسيت قربان...
.....نازك الحمراني....
البارت السابع
عاطف...
عرفت أنو أبوي توفى
وتقبلت هل فكره بواهس طفل
أحاول كد ماأكدر أحفظ صورته أبالي..
واني أتذكر كل حجيه أليه"ولأمي"والكل شخص.
احاول أحفظ مفرداته مو مفردات أمي
لأن اني أبن شيخ جبار...
مااريد اعيش دور اليتيم والناس تمسح راسه
هل افكار ابالي أرددهن بالي...
من اتذكر امشي وي أبوي وهيبته...
وبورى الفاتحه من يمسحون على راسي..
أبقى اقارن منا لمن أنعس وأنام..
من أنسى حجي أبوي...
اروح أكعد يم بيبي واسئلها عنه
-جده أبوي شكد يحب امي"أبوي شلون يحجي.
وتبقى جدتي تتحسر وهي وتنطيني كل تفاصله
كل شي يسوي أبوي
تسولفه اليه...
وچن من تذكر عي  أسوالف أبوي ترتاح مثلي...
بفضلها
عرفت كلشي عن ابوي"اخلاقه"طبعه
و حتى شلون يتغزل...
بقت تجيني حاله من أشتاقه أله..
أروح الغرفته هو وأمي...
من ادخل الكاها حاظنه ثوبه المدمى
وتبچي هل ثوب اليه تنام عليه من أسئلها يمه ليش
-هذا بيه ريحة أبوك...
هل ريحه نطاها اله صديقه
-ليش يمه ماكو عدنا نجيب منها....
لأن اريد اخلي منها اليه..
-لا يمه هل عطر أسمه(كلامور)أبو عارف چان یجیبه
الوالدك دائما...
-زين يمه وين أبو عارف هسه..
-والله ياابني يكولون أخذو ولي ياخذو مايرجع..
-ليش اخذوه
-مااعرف يكولون اتفدى نفسه الاجل ولده
وهسه ولده موجودين "عارف"أمجد زغير أذكره
-اذا زغير اريد أصاحبه...
-ألله كريم يمه شنو ردت..
-أبوي كلي بعد أربع أشهر أسجل مدرسه...
واني أعرف الحساب زين..
باجر يصير تكمل الاربع اشهر شوكت سجليني...
-لا تخاف ابني أسجلك لأن وصية ألغالي...
رح تدخل للمدرسه وي خواتك..بعد شنو تريد
-مازعلين يمه كلبدون...
-الله شمحلاها من تطلع من شفاف أبوك وهو يكولها
وعيونه تلمع "وتصير لمعتهن بضحكه..
-هلكد أتحبين أبوي...
-لو يطلب عمري حتى يعيش أنطي له...
لا تنسيني شنو ردت تخبرني...
-البارحه واني نايم يمچ سمعت خالتي دكلج
شمامه هستوه عمرچ تلاثه وعشرین سنه..
قابل آدفنین نفسچ وی جهالچ أقبلي بلي يجوج
-وانت يمه عاطف صدكت بكلامها جاي تشاقه..
-لايمه تلث مرات سمعته مو مره وحده
يعني رح تعوفينا وتزوجين..
أنا وخواتي...
-لايمه ابد...
-اكيد يمه لأن ابوي راح للسماء..
وأنتي بقيتي النا لاتعوفينا. 
-تعال الحضني مااعوفكم يمه للموت...
حضنها دافي رفعت راسي الها
-بداعت جبار ماتركينا..
-وداعت جبار ابني لا تخلي بالك...
ومن الصبح رح اطرد خالتك لأن خلت بالك هيج
نمت مرتاح باحلام طفل عمره ست سنوات...
الصبح واحنا نتريك أندك باب بيتنا...
واشوف تلث نساوين....
وهاي ثالث مره يجن وامي تطردهن وتصيح...
-حرام عليجن أنتم متخافون الله...
ماأزوج مااريد المرحوم ماطالعه السنه مالته وتتخطبون
زوجته...
لو ماهو چان خیره عل الکل..‌
وتاكلون بخيره
هیچ آجازون خیره....
ماعونتو مات..
وکلساع داکین الباب تتخطبون زوجته
الله یلعن الجمال"
والعیون"
والشعر الی تصیر نقمه
علی صاحبها...
جدتي أم جبار تحضنها وتبچي وياها...
-ليش يايمه تدعين على نفسچ...
اني ماباقيه ألكم...
العمر رح يخلص...
والجاي أنقص من الراح..
الجهال منو ألهم يايمه...
-عمه عمرچ طویل لاتحچین هیچ تعبت عمه تعبت
يحسسوني بعمري الزغير..
ويردوني انسى تاج راس الرجال
-هذا أمر الله بنيتي...
انتي حرمه وفيه"وطيبه"غاليه
يشهد الله مايوم زعلتيني كله تم"وحاضر...
رح أكلج هل چلمات بنیتي...
دمسحي دمعاتج بنيتي...
-اوووف كولي عمه بلكن شي يبرد گلبي
الزين راح عمه
ومن يروح الزين يبقى الشين ينكز..
-اي بنيتي حقچ اسمعي شكلچ
أبني جبار راح مغدور لأن كلبه طيبه وأمن الحيه
حيه رباها وسوالها بيت وطلعت تحفر جواه..
ربي يصبرني عل الي أكوله...
الي أريده منچ شمامه
تعدي سنة جبار وفكري بحجي أختج..
-عمه حتى أنتي ضدي...
-لا يا يمه لاتحسبيها سهله أخبرج توافقين تزوجين
الي راح للگبر ابني وصاحبي
قبل لا يكون زلمتچ
بس یایمه لان آخاف علیچ..
-شلون تخافین عمه..
- أخاف أخوتچ بغداد یسمعون بخطاطيبج
-وذا يسمعون عمه مالهم حق...
-لا بنيتي الهم حق ونص..
-ليش عمه"ليش يمه فهميني
-يمه بنيتي خلينا نحجي طك(بصراحه)
أنتي يوم تزوجج اوليدي جبار أنتي فصليه..
لاتزعلين مني..
-لا عمه ابد اي وبعد..
-يمه الفصليه من يموت زلمتها قبل لا تخلص العده
يجون اهلها ياخذونها عدهم تكمل العده...
لأن فصليه...
هذا سنينة(قوانين)العشاير ..
فا أهلچ وآخوتچ خلف الله علیهم ساکتین
لچن همه یخافون الله بل یتامی...
بس هاي ثاني مره من طلعناأني وياچ وجهال..
یجون یتخطبوچ...
عرفتي شقصد...
-لا عمه والله...
- لأن غمه ماتعرفين...الأغصده(القصد)
أنو عندج ولد عموم فا بلعشاير البنيه ولد عمها اولى
من الغريب...
-عود أزوج عمه مااريد أزوج اني زوجة جبار
وللموت ابقى زوجته وبس...
-ولاجل هل شي جاي أخبرج..
-عندج حل...
-أي عندي بس كون المدهربه هند تقبل..
-وشجاب هند بلوسطه عمه...
-خايبه كومي بطيتي(زرفتي)بطيتي چبدي
الله يرحمك جبار وليدي يكلي ذكيه يمه..
شو مرعوصه وماتفتهمين
-عمه وياي تحجين
-لايمه سلامتچ بنيتي اريد استكان چاي...
-جده شنو معنى كلامچ الآمي...
-ماكو شي أبني أنت يجيك الصافي يبن العزيز..
-جده اريد اعرف شنو تقصدين
-خايب خل اعرف اني شقصد عود أعلمك
-يعني ماتعرفين شنو كلامج لدكوليه
-اي
بس هسه رح يجي عمك وتفهم قصدي...
خليت راسي بحضن جدتي...
-جده مضيف أبوي أنسد ليش..
-يمه الكهوچي وطلع غدار...
وراعي المضيف مات
المن بعد نفتحه...
-زين والكاع ليش محد يزرعها..
-يمه الفلح تريد أفلوس...
واحنا العدنا خليناهن الفاتحة أبوك..
-جده يعني ماعدنا فلوس بعد...
-لا تخاف جده الله كريم...
سمعت صوت غريم بنت عمي كمت فرحان
-جده هاي غريم اجت..
-أي ولك خايب هاي بكد أمك وتتراكضلها..
-لا جده خمس اسنين أكبر مني مو هواي..
طلعت ركض واشوفها تباوس أمي...
-شلونج غريم اشتاقيتلج..
-شلونك عاطف بعد مابقى شي تدخل مدرسه مو
-اي بعد اربع ايام..
لاتنسين اني عمري ست سنوات ونص..
صارت بيه حاله كل مااشوف جده اتسولف وي اي احد
اكعد يمها...
كعدت يمها وهي تحجي وي رحيم...
-هايمه منو الچتال(القاتل)
-یمه من اسبوع آخذت سلاحي ومشيت المكان
بيت مرهون بعد ماندليته
ورميت على بابهم  فنچ یمه منو الي طلع
-منو..
-طلعتلي ام ماضي وهي تبچي...كلتي
-فدوه ابني ماله دخل ماضي بريء
عمه الي وزاه وقرا بعقله...
كله انطيك بنيتي ومهرها دم شيخ جبار
اول مره ماضي رفض...
بس من كله جبار هو قاتل ابوك
راح الكم وتنكر باسم مرهون...
وحك أبو خيمة الزركه أبني قبل لا يكتل الشيخ
اجاني كلي يمه شيخ جبار خوش رجال
بس احب بنت عمي...
ولأجلها اسوي كلشي...
-وتالي اشصار يرحيم..
-واحنا جناةنحجي اني وامه طلع من بيتهم
من شافني
صوب سلاحه عليه
-يمه ابني...
-لا يمه لا تخافين رميت طلقه اجتي برجله صوبته
وقبل لايشرد كمشته...
واعترفلي كلي واحنا بطريق..
جاي يندار شيخ جبار عليه وغدرته من ورى..
كعدت ابچي واتخيل جبار اشلون غدرو
لان اعرف جبار تفاك.
مااشوفه اله ماضي كام  وهو يشرد...
جيت الحك بيه الناس صارت حواجيز..
بعدها رحت العشيرته...
وكالو ذابينه من العشيره...
-اي شسويت تالي ودم اخوك..
-يمه رحتلهم قبل يومين  البيتهم
وطلع ماضي متجادل وي امه
علمود الفلوس مال زواجه
ودافعها ومضروبه بلحايط وميته...
وهسه محد يعرف قراره
-يمه حوبت ابني تسحك وتلحك
اللهم لا شماته خلاص عوفهم الله يحاسبهم..
وخبر عشريتنا...
بعد لا يفتحون هل موضوع..
الخاطر عاطف مايوصله الثار..
-صار يمه على أمرچ بعد کفیت وفیت لادکولین
-کفیت یمه بس هسه عندي سالفه وياك..
-شنو يمه..
-رحيم خطيه مرية اخوك..
-اشبيها..
-اعقد عليها يمه  حتى لو ورق...
-يمه صعبه مااكدر هاي روح جبار "وعزيزته
اخونه من ازوج اخته...
-شنهي تخونه ابني البنيه لساها زغيره"حمره صفره
لا تظن اخوتها يسكتون...
-لايمه صعبه أم عاطف خيتي ومااشوفها غير هشكل..
وهنوده مااكدر أزعلها ابد..
-دكول العمصه السبب..
-اي يمه العمصه اتصير ام ولدي وبناتي..وعشرت عمر
-وانت قابل تخون العشره أغم..
-يمه ابني غالب رح يصير أب تدرين لو لا..
-انت زوجته وهو صبي چا جاي تقشمرني..
-يمه حتى لو مااكدر صعبه فدوه الروحلچ...

اريد أفهم شنو يقصدون بهل كلام عمي وجدتي
بس شفت جدتي تخلي الشيله على وجهه وتنوح
-يمه جبار من بعد عينك محد يسمع حجيي
يمه جبار رحت يلبطل وبقى الأغم...
تقرب خالي يبوس راسها..
-الحمد الله هسه حچیتیها...راح البطل وبقی الآغم..
اني أغم ارتاحيتي يمه
-ولك حتى أدموعي ماتشفع عندك...
-اي يمه ماتشفع لان تردين ازوجة ام عاطف
باوعت لعيون جدتي مابيهن دموع..
-جده وين دموعچ آبد ماکو...
-ههههه عفیه عاطف بس آنت تعرفها دروبها
هي امي تسوي هيچ لحتی آنقهر...
ماتعرف بعد اسوالفها ماتعبر
باوعتلي صفح وهي ضايجه
-ولك عاطف ليش تكله هيچ ارید آلمك انت وخواتك
ابيت يحفظ كرامتكم"وكرامة امك..
هسه شيقنعه بعد..

مرت الأيام بعد هل حادثه وطلعت سنوية أبوي...
بيومها اجيت من اخر متحان واركض...
جنطتي على ظهري الدنيا حاره موت...
واشوف امي منتظرتني باب المدرسه..
-شلونك ابني جاوبت..
-اي ماما...اقصد أمي الحمدالله
يمه اني زلمه صرت لا تنظريني...
-طبعا زلمه منو كال غير هل شي...
بس اني منتظره خواتك همات..
-اني اجيبهن وياي مو اخوهن يمه
-اي فدوه الابني...
-أجني قمر"وشمس..وطلعنا نتمشى...
وصلنا للبيت
واشوف خالي هادي من بعيد جاي
وياه خالي الكبير همام
واحد يصيرقريبهم ..تقرب يبوسني
-اشلونك أبني جبار"شموس"قمر حبايبي شونكم
ام شمس شلونج....
-اهلا خويه تفضل..
دخلنا واباع على امي ضاجت من شافتهم
جدتي استقبلتهم
-هلا بأهل الطيبه الغالين تفضلو....
وي دخلتهم
اجى عمي رحيم وسيارته يدك هورن..
طلعنا له وهو ينزل من سيارته صناديك فاكهه
-خويه أم عاطف هذا مال اسبوعين..
وهاي أفلوس خلوها بيدكم...
-مشكور خويه أبو غالب ينطيك العافيه..
ساعدناها اني وشمس"وقمر دخلنا الغراض
واشوف امي تركض على صوت خالي تبعتها
واشوف عمي كاعد يمهم وخالي هادي يحچي
-اختي بعد اخذها ماتبقى هنا...
بقيناها يمكم الخاطر اليتامى وتالي هيچ یصیر
جبار الله یرحمه
ونعم منه بس هسه راح الدار حقه
اختي كل يخطبوها لان دتاخذ الأطفال للمدرس
لو لان تطلع للسوك...
الناس دكول شنو اهلها وين
ودتاكل وجوهنا بلحجي
وأنت خويه رحيم محرم عليها...
-شمامه هي حسبت أختي الله شاهد وانتم تعرفون
-ابو غالب انت رجال مثقف وتعرف حق الله
اني وانت نعرف هي حسبت أختك..
بس الناس تعتقد هيج تفكر..
-وهسه المطلوب خويه هادي..
المطلوب ياابو غالب أخذ اختي منا
جدتي صاحت...
-مرية جبار ماتطلع....
خالي هادي تقرب باس راسها...
-أم رحيم مااكدر خلاص اليهنا واحنا نريد نغير بيتنا
يعني بعد حتى مارح تندلون وين نسكن...
هل كلام احسن للجميع..
-وتفرقون الام عن بزرها..
-بعد ام رحيم أعذرينا هذا قرار العشيره...
تقرب وهو يجر ايد أمي وهي تصرخ..
-مااروح مااطلع هذا بيتي"جهالي"الله اكبر..
فدوه خويه عوفني مااروح
اني وشمس"قمر نركض نجر أمي..
وخوالي يجرون بيها
خالي الچبیر همام جر کصیبتها وضربها راشدي
-ولچ حقیره آنتي فصليه...
وجاي نخلصچ من هل لقب
عجبتچ الذله...
-والله  خويه معززه ومكرمه عدهم فدوه خويه...
جرها خالي هادي و همام كل واحد كاضها من جهه
ورجلها تسحل على الصبابه مال البيت...
طلع عمي رحيم وراهم...
وهو يجر ايدهم ويمنعهم يضربوها..
والرجال الي بل سياره قرايب امي نزل
من شاف عمي صاح بصوت عالي
-همام"اني أزوج شمامه
واطلبها منكم زوجه اليه على سنه الله..
ورسوله

يتبع