أنا أعتذر فأنا لن أيأس

_ طب قبل ما تتكلم انا أسف أسف بجد عارف ان انا غلط
وانا انت فعلا اتعذبت بكلامى وانت صغير بس انا أسف أسف فعلا
بس قصدك إيه بسؤالك ده

_ مش قصدى حاجة انا بقولك ليه مش سألتنى مش يمكن ده لمغزى معين مش معنى ان بابا عامل نظافة انه كدة وحش وشغلته وحشة ومش تشرف
هى تشرفنى لأنها حلال حضرتك
وبرضو مش معنى ان انا لو كان أبويا دكتور لازم أبقى دكتور زيه
معيد فى الجامعة لازم أبقى زيه
انتو ليه حطيتو القاعدة دى
بجد حرفيا كلامك كان علطول بيأثر فيا
اهانتك كانت علطول بتأثر فيا

دموعى نزلت بهدوء
وكملت بعصبية شوية
ولسة دموعى نازلة

_ ليه محاولتش تشجعنى
انت عاوز تعرف أنا ليه يعنى عاوز اطلع دكتور نفسي صح
ماما كانت مريضة نفسيا
كانت طول عمرها كويسة بس جت وانا فى سن عشر سنين
وعملت حادثة أثرت على دماغها وعقلها وكانت محتاجة عملية جراحية عشان ترجع زى ما كانت
ومكنش فيه فلوس ونفسيتها كانت تعبانة
وده مأثر أكتر على عقلها وكانت محتاجة عملية ومصحة
طبعا
كنت عاوز أطلع دكتور نفسي عشان كدة
بس للأسف انتحرت
ومعرفتش أنقذها
بس حققت حلمى عشانها
عشان مش أخلى حد يبقى زيها ويموت زيها بسبب مرض نفسي
والحمد لله وصلت
عارف مع انى حرفيا ومش هكدب انا بكرهك جدا
بس بسببك وصلت لحلمى ده
وهعالجك لأن هى كانت بتقولى لازم أساعد كل الناس
حتى لو هموت ده هيبقى فى ميزان حسناتى
المهم ان أساعد اللى ادامى واخفف عنه ألمه

خلصت كلامى وهوا فضل باصصلى ومش عارف يرد قطع صمتنا دخول فتاة ليست طويلة كثيرا ولا قصيرة أيضا
ذات أعين واسعة قليلا وذات سحبة جميلة
ومختمرة وذات لباس واسع

_ أستاذ محمد الأنسة ياسمين مستنية حضرتك برة هى وأنسة تسنيم وبعد اذنك هوا ينفع أديله العلاج دلوقتى وأروح ولا مش هينفع

_ تمام يا أنسة رغد أنا جاى واتفضلى تعالى علقى المحاليل واديله العلاج زى ما علمتك واتفضلى روحى وأوعى تنسي تيجى بكرة فى نفس المعاد ومش تتأخرى انهاردة سماح بس

_ حاضر بإذن الله هاجى بدرى

انا خرجت ورغد دخلت عشان تديه بقيت الأدوية

لقيت اخواتى البنات واقفين
ابتسمت فى وشهم بهدوء

ياسمين

_ أخويا حبيبى عامل إيه

ابتسمت بحب وقلت "بخير الحمد لله يا اوزعة وانتى"

_ الحمد لله ياسطا بخير

_ اتعديتى من رغد ولا إيه

تسنيم ردت بضحك
"ومالها رغد يعنى والله البنت قمر جدا ماشاء الله"

_ بتجيبو سيرتى فى الخير ان شاء الله صح

ياسمين بضحك: طبعااا اومااال