البارت السابع🌹🌹🌹
دق هاتف كرم فنظر فوجدها مي ففتح الخط وهو غاضب
كرم: ايوة يا مي انا مش قلت لك ماتتصليش بيا وانا في البيت بتكلمي ليه دلوقتي ممكن افهم فبهتت مي من رده وتكلمت بهمس وكأنها تبكي
- في ايه ياكرم عملت ايه علشان تكلمني كده يا أخي كأني بكلم ابن خالي جريمة عموماً انا اسفة شكرا على تهزيقك مع السلامة فزفر كرم
- خلاص يا مي معلش انا مضايق شوية بس
- في ايه ياحبيبي قولي
- حياة سابت البيت ومشيت وطالبه الطلاق ففرحت مي بقوة ولكنها لم تظهر ذلك له وظهرت عكس مابداخلها
- يانهار ابيض ليه ايه اللي حصل
- سمعتني يوم ما كنت بكلم ماما وسمعتك وانتي بتندهي عليا جيت لقيتها سايبه دبلتها وكل حاجتها وراحت بيت ابوها وطالبه الطلاق
- وانت عملت ايه ياكرم
- ح اعمل ايه يعني روحت لها وحاولت ارجعها ولما صممت على كلامها كنت ح اسحبها من شعرها لولا تدخل جار لها هناك كنت جرجرتها على البيت فتلمزت مي عليها
- جار لها وده كان عندها بيعمل ايه في الوقت ده ياكرم فصرخ بها كرم
- مي لمى نفسك انتي عارفه كويس اخلاق حياة مش هي اللي تعمل غلط امه اصلا كانت عندها وانا ماشفتهاش ظهرت لما تطاولت على حياة وهو كان طالع مع بناته ولما سمع زعيق مامته دخل علينا لو كان اتأخر شوية بس كنت عرفت ارجعها البيت تاني مش انا اللي تسبني وتعمل كده
- طيب وبعدين ح تعمل ايه
- رجعت واتكلمت مع يوسف ويارا واقنعتهم يروحوا لها بكره ويفهموها ان مافيش حاجة وان كل اللي سمعته كدب فصرخت مي به
- أيه انت اتجننت ياكرم بتنكر جوازنا ازاي يعني
- افهمي يا مي حياة لازم ترجع فاهمة مش انا اللي تعمل فيا كده انا اللي ارميها مش هي وبعدين احنا كده كده متفقين نأجل اعلان جوازنا دلوقتي
فأغتاظت مي وادمرت في نفسها شيئاً
- خلاص براحتك ياكرم ابقى طمني عملت ايه تصبح على خير
- وانتي من اهله يا مي
..........................
استمعت عبير للحوار الدائر بين ابنتها وكرم وبعد أن اغلقت الهاتف نظرت لها وسألتها عما حدث فقصت عليها مي كل شئ فنظرت عبير لها
- وح تعملي ايه دلوقتي ياست مي
- ح اعمل اللي لازم اعمله يامامي الفرصة جت لحد عندي وكرم لازم يبقى ليا لوحدي
- ودي ح تعمليها ازاي يافالحه
- ح تشوفي انتي مش لسه عندك الرقم اللي كنا بنلعب بيه على الزفت اللي كنت متجوزاه
- ايوة عندي ليه
- هاتيه بس وح تعرفي
- طيب لما نشوف اخرتها معاكي ايه وذهبت عبير واحضرت الرقم واعطته لـ مي
فأخذته ووضعته بهاتف اخر معها ونظرت لأمها وابتسمت بشر
- البيه انكر جوازنا لأولاده وانا بقى ح اثبته لهم
- ح تعملي ايه
- بكره ح يبعت ولاده الصبح للهانم علشان يفهموها ان المحروس ابوهم ياحرام مايقدرش يستغنى عنها انا بقى ح ابعت لها قسيمة الجواز
- طيب ماتبعتيها من دلوقتي
- لا بكره علشان يكونوا ولادها عندها يمكن يفضلوا عندها وابقى خلصت منهم وميبقاش فاضل غير الست آمنه ودي مش ح تاخد في أيدي غلوه وح اخليها تحصلهم وضحكوا الاثنان معاً
- برافو عليكي دماغك سم
- تربيتك يا مامي واستمروا في ضحكهم وهم يتكلمون فيما سوف يحدث
