قاعدة فِـ المُدرج لوحدي حاسه بملل وفتور في إنتظاره لأنه رفض أخرج استناه برا في الشمس واتعب زي آخر مرة ..
_بصيت للفون لاقيته بعتلي مسدج وبيقولي "انا جيت اطلعي" قومت أجري زي الطفلة الصغيرة اللي باباها جاي ياخدها من المدرسة بعد ما خلصت الدوام، واقف وساند ضهره علي عربيته وعيونه علي المكان اللي هخرج منه، إبتسم بحب وقرب مني مسك ايدي ومشي بيا لحد ما وقفنا مكان ما كان واقف.
«إتاخرت عليكِ؟.
=ابتسمت ليه: لأ جيت علي المعاد.
«طيب يلا عشان ارجعك البيت وبعدها ارجع شُغلي.
=كشرت ونفخت بضيق: يعني ايه بقا لأ مش كل يوم كدا.
«بص ليا بحزن: غصب عني والله إنتِ عارفه انا مشغول إزاي.
= يا غيث والله كدا حرام طب اقولك خلاص هاجي معاك العيادة إيه رائيك.
«رفع حاجبه: وانا متوبتش من اللي عملتيه آخر مرة.
=إتكلمت بغيظ وغيرة: حد قالك تعين سكرتيرة لعيادتك لبسها مستفز وأوڤر.
«طب وانا مالي بيها مش فاهم انا يهمني انها عملية في شغلها.
= لا وإنتَ الصادق دي كانت عنيها هتطلع من مكانها وهي مركزة معاك وإنتَ بتكشف علي المرضيٰ.
«ابتسم بقلة حيلة: واهوه طردتيها وفرجتي عليها العيادة كُلها إرتاحتي، وانا اللي معكوك لوحدي هناك ومش عارف اعمل ايه.
=اتكلمت بحزن عليه وانه شايل الهم لوحده: خلاص هاجي انا معاك واساعدك وكمان فرصة عشان مبقاش لوحدي في البيت وأفضل مستنياك لحد 1 بالليل ووشي في وش الحيط زي المساجين.
«نعم لا طبعًا إنتِ مش حِمل شُغل وإرهاق أكتر من كدا احمدي ربنا إني منزلك جامعتك أصلًا وإنتِ حامل.
= يوه بقا أومال عايزني افضل لوحدي.
«هتصرف متقلقيش وهرجعلك بدري، بس قوليلي أكلتِ حاجة من بعد ما فطرتي الصبح.
=مقدرتش ابص في عيونه واتكلم وبصيت في ساعتي: آه آه أكلت متقلقش.
«عرف كالعادة اني بكذب: أكلتِ إيه بقا؟.
=أكلت متقلقش.
«شَجن بُصيلي وإنتِ بتتكلمي.
=طبيعي لما أبص في عيونه أقول الحقيقة: مأكلتش حاجة.
«برق بعيونه: نعم؟ من الصبح لحد 2 بعد الظهر مأكلتيش حاجة.
=بص بقا إنتَ عارف إني مش قادرة أكل ولا حتي اسمع سيرة الأكل ولولا إنت اكلتني بالعافية الصبح مكنتش هفكر أصلًا في الأكل.
«بص ليا بغيظ وبيحاول يكتم غضبه: إركبي.
=في ايه يا غيث بقولك مش جعانه بجد وانا مش عايزة أروح.
