#ذنبي_أني_ظلمت
الحلقه العاشره.
روح هشام من الشغل ...وعرف من هزان بنته ان مالك كان عندهم وحكي مع اريج بالمطبخ ..مايعرف ليش تعصب ومشي للمطبخ دخل ومن غير مقدمات وقف وراء أريج وقاللها.
هشام:-
سمعت ان مالك جي اليوم وحكي معاك اليوم.
أريج بخلعه وطيحت من يدها الكاشيك اللي كان تغسل فيه:-
بسم الله خلعتني ماحسيت بيك وقت خشيت.
هشام تجاهل كلامها وسألها من جديد:-
ع شن حكيتي انتي ومالك.
أريج من غير ماتلتفتله ورجعت تغسل ف الصحون من جديد:-
ولاشي ...مافيش حاجة مهمه شكرني لاني رديت نخدم عندك واني مهتمه بهزان .
هشام وهو رافع حاجبه ومكتف ايديه قدام صدره:-
هذا بس!!
أريج رمت اللي بيدها ولفت عليه:-
ممكن تفهمني لي شن تبي توصل وتحدد سؤالك.
هشام وهو يشوفلها :-
ماتكلمتوش عليا !!
أريج بهدوء وتنهيده:-
لا ماحكيني عليك ..زي ماقتلك كلمني ع شغلي وهزان بس.
هشام بتسرع وشعور لا ارادي وهزوه :-
وان شاء الله ماقعدتيش تفيلمي عليه وتألفيله ف قصص ...لان انا حاكيله عن كل شي يخصك ..ويعرف انك كنتي محبوسه وقاتله راجل امك.
أريج بهاللحظه حست وكأن سكين انغرست بقلبها ولااراديا دموعها نزلو وقالتله بصوت مجروح ومخنوق بالدموع:-
ع الاقل هو فيه الخير عاملني كبشر ومااستحقرني ولا قلل من قيمتي ...واحترمني واحترم مشاعري مش زيك يا...دكتور ..
وطلعت بتسيبه وهيا فايته من جنبه وتمسح ف دموعها وكيف بتتخطاه
مسكها من يدها وبدون سابق انذار رفعت يدها وضرباته كف👋😡
"دير بالك تلمسني مره تانيه فاهم" .
بعد ضرباته كف وقف مصدوم وحط يده ع خذه وشافلها وبعدها طلع وسيبها ...اما اريج حطت يدها ع فمها بعد مااستوعبت شن دارت
"حيه عليا حيه أنا شن درت بس".
.
.
أما هشام ركب معصب لداره وخش قربع الباب ولوح الجاكيت ع السرير وخش للحمام قعد يغسل ف وجهه بعصبيه بعدها خبط ولوح الحاجات اللي كانت محطوطه ع المرايا بالحمام .
"تستاهل الكف منها وشوي فيك ...عشان تعرف كيف تحكي مره تانيه ...وماتدخل ف شي مايخصك "
عند أريج قررت تركب وتلحقه عشان تعتذر منه واول ماقربت من الدار سمعت صوت حاجات تتكسر ..قربت بسرعه من الباب وخبطت:-
انت كويس يادكتور ..فيك شي.
هشام بعصبيه:-
شن جايه تبي
اريج بخوف:-
جيت نبي نعتذر منك ع...
هشام قطع علاها وماخلاها تكمل كلامها:-
انزلي كملي شغلك...وماتخلي هزان تنتبه ع شي ...وتعشي انتي وياها وماتستنوني لاني مانبيش ..وانسي اللي صار وكان ماصار شي فاهمه.
.
.
.
تسارع ف الاحداث:-
مر اليوم اللي بعدها وهشام واريج يتجنبو ف بعض بعد اللي صار...هشام اختار انه يطلع للعمل قبل ماتنوض اريج وقعد لعند الساعه 12 بالليل بعد مارقدو الكل.
وف صباح اليوم اللي بعده...كانت أريج تجهز ف الفطور بالمطبخ دخل علاها هشام .
