#ذنبي_أني_ظلمت
الحلقه العشرون.
بعد اللي صار مع مالك جي قعد عند حوش هشام ..ومرو 4 ايام وهو عنده .
وباليوم الخامس وتحديدا 8:30 بالليل :-
كان هشام مروح من العمل ...وأول ماخش شاف أريج قاعده مع مالك بالصاله ويهدرزو...طبعا هشام "الفيوز اللي بعقله طار ...وركباته غوله ياكبدي".
ومن غير لاسلام ولاكلام ..خش زي المجنون وشد أريج من يدها وطلع بيها لدارهم.
أريج بصدمه وخوف -
ااه هشام بشوي بطيحني ...خيرك شن في .
هشام اول ماخش قربع باب الدار وراه وبغضب قرب من أريج وشدها من يدها:-
ياللي ماتتحشميش قاعده ف حوشي وقدام عيني تخوني فيا.
اريج بأنفعال:-
أنت اكيد انجنيت ...شن قاعد تخرف .
هشام شدها من كتافها وقعد يدوي بعصبيه:-
ردي بالك تفكري تكذبي عليا فاهمه ...شن تبيني نكذب عيني ونصدقك.
أريج عند هني خلاص طفح الكيل عندها ودفاته من صدره وعيطت بوجهه:-
شن اللي شفته قول...شن اللي شفته ...شفتني نتغزل ف الراجل ...شفتني ف وضع مش مزبوط معاه احكي قول شن شفت بعيونك.
هشام شدها من يدها ولواها وراء ظهرها'-
ردي بالك تعيطي ف وجهي مره تانيه فاهمه.
أريج دموعها نزلو وفكت روحها منه :-
بنعيط ...ورح نعيط لاني مليت منك ومن غرورك وتكبرك...مليت وتعبت من عصبيتك ومن العيشه معاك بهالطريقه ...تعرف شي انا كنت مفكره لما نتزوجك رح نستريح ونعيش معاك مرتاحه انت وبنتك...بس بالواقع انت اكثر انسان سببلي اذى نفسي وجسدي عشان هكي خليني ف حالي وياسرك اتهامات ليا.
قعدت اريج ع السرير وهيا منهاره وتبكي :-
هشام انا خلاص وصلت للنهايه معاك...طلقني خلاص .
هشام كان واقف ودموعه معبيات عيونه...كان عارف ان ضغط عليها هلبا بتصرفاته وكلامه وانها خلاص مش رح تتحمل اكثر ...عارف انه حملها حمل ثقيل وطلب منها تتحمله وتسايره ع هواه وماقدر مشاعرها ولا وقفتها معاه ومع بنته ...قرب منها وقعد ع ركابه قدامها وحط راسه ع رجلاها :-
عارفه ياأريج انا تعرفت ع ملاك بعيد ميلاد إسراء بالكليه لما كنا نقرو ...تصدقي لو قتلك حبيتها من أول ماشفتها ماتصدقي ..وبعد مده قصيره صارحتها بمشاعري ومن حظي الحلو كانت تبادلني نفس المشاعر بعد فتره تقدمتلها وعانيت هلبا انا وياها لعند اقتنعوا اهلها ووافقوا ...تزوجنا وعشت معاها اجمل سنين عمري ...كل شي كان حلو بحياتنا واكتملت فرحتنا لما جت هزان ونورت حياتنا ...لعند بيوم اتصلو عليا والفاجعه انهم بلغوني ان مرتي ماتت ع يد واحد حاول يسرقها. .بلحظه انتهي كل شي...حياتي كلها ادمرت بديت عايش جسد من غير روح الشي الوحيد اللي مصبرني هو وجود بنتي.
أريج كانت تسمع ف كلامه ودموعها ينزلو ...وجعتها نفسها ووجعها حاله كيف مكسور ومنهار ويبكي.
