#ذنبي_أني_ظلمت.
الحلقه التاسعه عشر .
عند الساعه 8:00 بالليل:-
كانت أريج قاعده بالمطبخ وادير ف العشي وحاسه روحها تعبانه شوي وخش عليها هشام.
هشام وهو يكلم فيها من راس خشمه:-
تعشي انتي وهزان ...انا مش خاطري توا لما نبي ناكل اي شي.
أريج بصوت تاعب:-
مافي داعي تتجنبني ياهشام ...اساسا انا اللي مانبي ورح نحطلك عشاك انت وهزونه ونركب .
هشام قرب منها بلهفه وخوف وشد وجهها بين ايديه:-
أريج خيرك صوتك تاعب ووجهك اصفر.
أريج بألم:-
مريضه شوي.
هشام وهو يمسح ع خذها وبخوف:-
خيرك شن فيك ...شن اللي متعبك بشنو تحسي.
أريج حست بالخجل ووجها قعد احمر:-
ممكن ماتسألني شن اللي واجعني.
هشام عرف شن فيها:-
طيب اركبي وارتاحي ...وتو نجيبلك مسكن يخفف عليك الوجع.
أريج شافتله بأرتباك:-
انت عرفت خيرني!!
هشام بتنهيده وابتسم:-
عارف اكيد...دوره عشان هكي قتلك اركبي أستريحي وتغطي كويس لان الصقع يزيد الوجع.
أريج حست روحها بتموت من الخجل:-
تمام اوك .
ركبت أريج للدار وتمددت ع السرير...وهشام كمل باقي العشي وعشى هزان وضم المطبخ ..وخذي غلى لأريج تفاح الشاي مع النعناع ..ووقت طلع من المطبخ لقي هزان راقده بالصاله ...قامها لدارها وغطاها كويس ...وبعدها خذي الكوبايه وركب لأريج.
وقت هشام خش للدار لقي أريج متكمشه بالسرير وتتوجع قرب منها وقاللها بحنيه:-
أريج خوذي اشربي هذا رح يخفف عليك ...ورح نجيبلك مسكن من الدرج عشان ترتخي .
تعدلت اريج ف تقعميزتها وخذت الطاسه وقعدت تشرب فيها.
هشام مشي للكوميدون وفتح الدرج وطلع منه مسكن وجي شور أريج:-
خوذي المسكن هذا كويس رح يخففلك الوجع.
أريج :-
شن هو المسكن.
هشام:-
ايبروفين ...كويس ومفعوله سريع.
خذت أريج منه الحبه ومدلها طاسه اميه وبعد بلعت الحبه :-
شكرا.
هشام وهو يلمس ف خدها:-
انتي زوجتي ياأريج ...ولو مهما كان ماتهوني عليا ونخاف عليك .
تعدلي ف نومتك ومددي رجليك كويس ...وقعد يغطي فيها .
هشام:-
صقعانه حاسه ببرد.
أريج:-
لالا الدار دافيه.
هشام :-
توجع فيك ديما لما تجيك.
أريج ذابت من الخجل:-
بالعاده اليوم الاول بس.
هشام:-
خير ان شاء الله ...ولو حسيتي باي تعب كلميني حتي لو راقد نوضيني.
