بــابـلـو 🖤

البـارت 01 🖤

#روايـة_بـابـلو🖤
#البـارت_الاولى

مقعمز علي كرسيه يفكر أفكار تجيبه وتوديه ذهنه من لما خش في الزوبعة هذي ماصفاش من الأفكار
خذ جبد من دخانه ونفخهه بهدوء وهو يراقب في تڪونِ سحابة الدخان قدمه قطع تفكيره دقتت الباب وخشت ذراعه ليمين "أنور"
طفى الدخان وصلح قعدته وبحت في أنور يستنى شن بيقول
بابلو:شن صار
أنور:زي ماتوقعت جا لعند أمه
ضحك بابلو:عيل بقعد طول عمره عيل
أنور:شن ناوي
بابلو وقف وخذا سلاحه حطه في خصره ولبس جاكته:ماتعودتش نخلي الكلاب تهرب مني
أنور وهو يمشي ورا بابلو:في خطر عليك تعدي غادي خليك هنا ونحنا نجيبوه لك
بابلو ماعبرش ڪلام أنور وكمل طريقه
تنهد أنور يعرف صاحبه بعد يسكر راسه علي حاجة مستحيل يرجع فيها

طلع بابلو لقراج يلي ڪان معبي سيارات وشباب واقفين يحرسو في المكان بسلاحتهم اول ماشافو بابلو جاي قربو منه وهما يراجو في الاوامر
بابلو:فراس وخالد وهيثم بتجو معايا الباقي خليكم هنا لعند نرد وافطنو ڪويس لاي حركة غريبة برا المكان
ردو عليه بصوت واحد وكل حد فيهم مشى يشوف شغله

ركب بابلو سيارته ومعه انور وراه الشباب يلي كلمهم وتحرك للحوش يلي خذا عنوانه من أنور

_________________________________

فاقت علي أصوات سيارات قدام حوشهم نزلت من سريرها بشوي وطلعت تتسلل صبت قدام روشن الصالة يلي اطل ؏ الشارع
شافت ثلاث سيارات نزلو منها مجموعة شباب أشكالهم توضح ان الليله هذي مش حتعدي علي خير

مشت لدار خوها بسرعة وفتحت بابه بسرعة وهيا خايفة
مسرة:احميييده احميييييده
فتح احمد عيونه بسرعه أساس ماكنش راقد ڪيف يجيه النوم وهو هارب من بابلو
قعمز وهو يشوف لملامح أخته الخايفه:ڪنك؟
مسرة وهي تحاول ترتب كلامها:فيي فيي مجموعة رجال برا منظرهم مايطمنش شكلهم سارقين
صب أحمد بسرعة ماتوقعش ان بابلو بيلحقه بسرعه هذي خذ يد اخته بسرعة وخششها لدار امه يلي ناضت ؏ دوشتهم
فاطمة:شن في يا احمد
احمد:مافيش شيي ياامي الله يربحك خليك انتِ ومسرة هنا وسكري الباب رد بالك تفتحتي ان شاءالله شن سمعتي
مسرة رعشت من ڪلام احمد عرفت ان الموضوع ڪبير:احمد شن فيي
قبل مايرد عليها احمد سمع خبطت الباب وعييطت مسرة من الخوف

بحت في امه واخته كانه يودع فيهم وطلع سكر الباب وراهم وقابله بابلو ورجاله مصبين في وسط الصالة كانهم في حوشهم

بابلو قرب منه وهو يضحك ويصفق:هههههههه برافووو برااافو برافوو مُصر لاخر لحظة تثبتلي انك مش راجل جاي ادس في روحك عند امك ياعيل
احمد بلع ريقه بصعوبه وهو حاس بمراره في فمه:ماندسش في روحي
ضحك بابلو وبحت في الراجل معهه: يرا خليك مره وحده قد كلامك اشحط روحك وخليك راجل ولو لمرة وحدة

حط احمد يده ورا ظهره يحاول يطلع السلاح وبابلو يبحت فيه يراجي امت يدير حركة
بابلو:عليش رافعهه وانت مش قده
بحركة سريعة طلع احمد سلاحه وصوبه قدم بابلو بس رعشة ايديه خلت الرصاص تمر من جنبه بدون ماتصيبه
و رد عليه بابلو برصاصة في ايديه يلي ماسك بيها السلاح وطاح لوطة وهو يأن من الوجع
بابلو قرب منه وهو يقول:كلب زيك مايقدرش يديرها سمعتني تعرف حـ نكون أحسن منك مانيش قاتلك هنا قدام امك
أشر لشباب يلي معه وقالهم شيلوه
بس عييطت مسرة يلي هزت الحوش وقفتهم وهيا طالعة تجري بشعرها وبجامتها

مسكت في خوها وهي تبكي بعبرتها:الله يرببحك خلييييه اللله يبرحكككمم ماعندناا غيييييرهه بالله عليييك ماتاخذه بالله
أنور والشباب قعدو يبحتو في بابلو يراجو في كلمة منه
أحمد:خشييي جواااا خشيييي
مسرة ماسكة بالقوه في كراع خوه وهيا تبكيي:لاااا لااا والله مانطلقك والله

المشهد هذا ڪان قدام الحاجة فاطمة امهم يلي ماقدرتش تطلع بسبب إعاقتها وهيا تشوف في ولدها الوحييد وبنتها قدام عيونها بالمنظر هذا

ضحك بابلو وهو يبحت فيهم:تس تس تس طلعت اختك ارجل منك
أشر لشباب ياخذوه وطبس هو علي مسرة يتكلم:الڪلام هضا مفروض حطه خوك قدام عيونه قبل مايخوني وهو عارف من انا لا دموعك ولا دموع امك بيشفعوله يلي داره

وطلع هو والشباب رافعين احمد ومسرة تعيييط بعلوووو حسها تتحسبب عليهم وتدعييي

الجيران قدام الحوش يتفرجو مافيش واحد فيهم قدر يدخل وأساس من يقدر يدخلل ويخش في مشكلة مع بابلو السفاح

#يـتبع....🖤

____________________________

بـابلو بـطل روايـتنا إسمه الحقيقي "مـنذر حـسن الـ"****" مـواليد 89
خـش في عالم الإجرام المافيات والعصابات في عمر صغير وقدر بسرعة بذكائه يكون واحد من أكبر الروس في مجاله وأخطرهم شخصيته وهيبته تخلي الكبير قبل الصغير يخاف منه ويحسبله ألف حـساب رغم انه عنده جانب حنون وعاطفي بس قوته وقسوته هيا المسيطرة علي شخصيته

رغم إنه شاب مـن عيلة معروفة ولد إمام في الجامع وأخ ضابط ڪبير في الشرطة بس للاسف هو الوحيد يلي ڪانت  ليه سمعه شينة بين ناسه وجيرانه معروف من صغره بمشاكسته وحبه للمشاكل رغم شدت باته وخوه عليه بس ماكنش يخاف منهم لعند كبر ووصل لشي يلي هو فيه توا

بسبب قصه صارت معه حـ نعرفو شن هيا في أحداث الرواية وهذي مجرد نبذه بـسيطة عن بطلنا إن شاءالله تعجبكم أحداث الرواية وطريقة السرد رغم انها بعيدة عن الواقع شوي وفيه مواقف ومقطفات من وحي الخيال