الجزء الرابع
*القهوه الجميله يا احمد
-تسلم ايدك يا حسن .. مفيش احلى من شرب القهوه على السطح بتاعكوا
*على الله يتمر
-خلاص يا عم وانا بشرب قهوه فى ستاربكس ولا ايه
*طيب بزمتك فى ستار بكس هتلاقى هوا زى ده
-لا مفيش .. المهم عملت ايه فى الموضوع الى قولتلك عليه دورت زى ما قولتلك ..؟
*اه دورت
-ولقيت أيه
*زى ما انت قولت بيتقال ان المماليك جمعت الاموال وحولتهم لدهب واخفوا الفلوس والى كان يعرف مكان الدهب ده كام واحد بس من كبار المماليك لحد يوم مذبحة القلعه .. فى اليوم ده محمد على عمل حفل ضخم جدا ودعا رجال الدوله واصحاب المناصب وزعماء المماليك ورجالهم وكان الحفل ده بخصوص تولى ابن محمد على احمد طوسن قيادة الجيش المتوجه للحجاز للقضاء على الحركه الوهابيه .. ولبى الدعوه 470 مملوك وراحوا للحفله فى أبهى صوره ليهم وازهى الملابس .. وبعد تولية احمد طوسن القياده سار الجميع ورا الموكب وتم استدراج المماليك لباب العزب وفجأه اتفتح وابل من الرصاص وكأن اتفتح عليهم طاقة جهنم وحاول المماليك الهرب لكن جنود محمد على كانوا محاصرينهم وبقت الجثث فى كل مكان والى نجا من الرصاص جنود محمد على دبحوه .. الوحيد بقى الى قدر يهرب هو مملوك واحد اسمه أمين بك الأبقى ويقال انه قدر بعد معاناه يهرب للشام و طبعاً لأن امين بك من كبار المماليك فأكيد كان عارف مكان الدهب او معاه نسخه من خريطة الدهب وواضح انه قبل ما يمشى هو الى رسم الخريطه الى بتتكلم عنها
-يعنى الخريطه الموجوده فى المتحف دى خريطة الكنز
*لا مش خريطة الكنز دى الخريطه الى رسمها أمين بك
-انت هتجننى مهو رسم خريطة لأيه أكيد للدهب
*لا هو اكيد مش حافظ شكل الخريطه الاولى بس اكيد عنده نسخه منها والنسخه دى موجوده فى بيته عشان كده هو رسم خريطه لبيته
-وهيرسم خريطه لبيته ليه هو هيتوه عن بيته يعنى
*أمين بك مكنش متوقع انه هيرجع فى وقت قريب كان متوقع انه هيرجع بعد زمن وخاف ان معالم القاهره تتغير وميقدرش يوصل لمكان بيته ومكان الخريطه
-يا ابن اللذينه يا حسن ده انت عامل مجهود كويس
*بس عندى سؤال .. اكيد المعلومات دى سهله يعرفها المتخصصين
-اه طبعاً أكيد طيب ليه مدوروش
*متهيقلى ان المعالم اتغيرت تماماً خصوصا ان الموضوع عدى عليه حوالى 120 سنه وكمان زى ما انت قولت قبل كده المتخصصين شايفين انها مجرد حكايات شعبيه ومتهيقلى ان الخريطه دى اكتشافها كان قريب يعنى مين عارف يمكن يكونوا بيدوروا أو هيدورا بعد كده
-يبقى احنا لازم ندور بسرعه
*ندور فين انت مجنون الموضوع مش سهل
-مفيش حاجه سهله .. احنا لو وصلنا لمكان الدهب حياتنا هتتغير
*والمفروض ان انا وانت الى هندور
-اكيد مش هنبقى لوحدينا
*مش عارف لسه هفكر وبعدين هقولك المهم احنا الى عاوزينه دلوقت صوره واضحه للخريطه دى
-ماشى يا عم خلينى معاك لحد ما نشوف هتوصلنا لإيه
*ولع احمد سجاره وهو يقول .. هوصلك لكل خير ان شاء الله
************************************
