المملوك الاخير
الجزء الخامس عشر
احمد : هى العربيه دى بتكارك ليه كده ، انا حاسس اننا راكبين كارته
حسن : بقولك ايه يا احمد متقرفناش عشان انا قرفت منك انت وخالك وعم عاطف
احند : هى الحقيقه كده بتزعل ، وبعدين انا بقولك كده عشان لو فيها حاجه تصلحها
حسن : يا عم خلى نصايحك لنفسك
احمد : طيب ادخل من هنا
حسن : ايه ده دى لجنه يلا معاك حاجه
احمد : لا مش معايا وبعدين دى شرطة سياحه
حسن : سياحه
احمد : اه بيبقوا موجودين لحد الساعه 5 عشان السياح وكده
الظابط : وقف يا بنى
حسن : انت مش قولت سياحه
احمد : اه بس شرطه انا اول مره حد يوقفنا
الضابط : العربيه دى ليها رخص يا بنى
حسن : اه يا باشا وربنا
الظابط : طيب اركنلى التوكتوك ده على جنب وانزلى انت وصحبك
حسن : توك توك ! انا قولت نهايتى على ايدكو ، انزل يا عم
احمد : هو نزلنا ومعبرناش ليه
حسن : انت بتقولى انا ما انا زى زيك وعمال تقولى شرطة سياحه الله يخربيتك يا اخى
الظابط : ايه يا بنى العربيه المهكعه دى بترخصها ازاى
حسن : بيدونى الرخصه شفقه يا باشا
الظابط : انت هتهزر يلا
حسن : مش بهزر يا باشا بس هى رخصتها ساريه
الظابط : هات يلا بطاقتك انت وهو
احمد : طيب احنا عملنا ايه يا باشا
الظابط : ايه هنكشف عليكوا يمكن يكون عليكوا حاجه
احمد : ابن حلال بقالى كتير مكشفتش
الظابط : بتقول ايه يا حيلتها
احمد : يعنى بقالى كتير موقفتش فى لجنه
حسن : البطاقه اهى يا باشا
الظابط : انت بتشتغل ايه يلا
حسن : بشتغل مع ابويا يا باشا فى المحل
الظابط : وابوك شغال ايه رسام
حسن : لا يا باشا
الظابط : طيب ما تقول بيشتغل ايه بدل ما احبسك
حسن : لا يا باشا ، فاتحين مطعم مطعم فول وطعميه وكده
الظابط : ودى ايه عربية الفول ؟
حسن : حضرتك دمك خفيف اوى يا باشا
الظابط : وانت يلا شغال ايه
احمد : موظف فى المتحف الاسلامى
الظابط : ده الى فى باب الخلق
احمد : ايوه يا باشا ، لو تحب حضرتك تجيب الاطفال وتنورنا فى المتحف
الامين : البطايق سليمه يا باشا
الظابط : خد يا بنى بطاقتك انت وهو وامشوا من هنا
حسن : حاضر يا باشا حاضر ، اركب يا احمد
حسن : انا شايف اننا نروح بقى احسن
احمد : ليه يا بنى عادى هنروح عند المسجد والمدرسه
حسن : هو انت عاوز ايه نتحبس
احمد : يا بنى هنتحبس ليه دى شرطة سياحه
حسن : يعنى هيحبسونا فى شرم الشيخ مثلا
احمد : يا عم يعنى دورهم يأمنوا السياح
حسن : اه واحنا شكلنا ارهابيين وهنفجر نفسنا
احمد : لا بس عادى ممكن يوقفوا اى حد بس لو مش عليك حاجه هتخاف من ايه
حسن : لا ما هو لازم اخاف احنا لو جينا هنا تانى وكنا كلنا اكيد هيشك فينا
احمد : لا احنا هنيحى بعد الساعه 5 هيكونوا مشيوا
حسن ؛ ده ايه المبنى الكبير ده كمان ، ده جزء من القلعه ؟
احمد : ده دار المحفوظات تقريبا فى الوثائق القديمه والسجلات وكده
حسن : بس ده شكله من الطراز القديم
احمد : ادخل شمال الى اعرفه عنه انه مبنى من ايام محمد على وعشان محمد على كان بيحكم من القلعه فهتلاقى اى حاجه وقتها كانت مهمه فى الدوله اما فى القلعه او حولها
حسن : وهو ايام محمد على كان فيه سجلات وورق وكده
احمد : يا بنى مصر فيها سجلات من ايام الفراعنه
حسن : انت اتغيرت يا حسن من وقت ما اشتغلت فى المتحف تحس انك بقيت مثقف بعد ما كنت حمار
احمد : حمار ايه يا جحش انت
حسن : ايه يا عم ده انا بمدحك
احمد ؛ تمدحنى تقولى حمار
حسن : لا قولت مثقف
احمد : ما انت قولت بعد ما كنت حمار
حسن : افصد يعنى حمار مثقف
احمد : اركن يا حسن اركن
حسن : يا عم خلاص متزعلش
احمد : يا عم اركن وصلنا مش عاوز غباوه
