كان مسك وسطها في نفس اللحظه اللي اتفتح فيها الباب
برقت ليه وحاولت تزق فيه بس اللي علي الباب نساها أي حاجه ..
اتغيرت ملامح وشها وكأنها بتعيد ذكريات حزينة مرت في حياتها اتكلمت بصوت مهزوز :
كمال
بص سلطان ليها وهو مستغرب خوفها ونظراتها وبعدين بص للي واقف علي الباب
سلطان: انت مين ؟!
رفع حاجبه واتكلم بعصبية: انا اللي أسألك انت مين
بص لوعد ووجه ليها كلامه:
اه الهانم بقت مدوراها بقا انا اللي غلطان اني عرفت واحدة زيك
سكته بوكس من سلطان في وشه خلي مناخيره تنزل دم
بعدت وعد بعيد وهي خايفة وبقي سلطان في مواجهه كمال
سلطان : انت مين
كمال: أنا جوزها وديني لأندمك علي اللي عملته ده انت متعرفش أنا مين
ضحك سلطان بتحدي: اللي بيعمل ما بيقولش واللي بيقول ما بيعملش ثم أنا معرفش انت مين واللي عندك اعمله
قرب كمال من وعد:
كنت غلطان لما افتكرت في يوم انك ممكن تكوني محترمة وتقدري تفتحي بيت
وعد: انا ..
اتكلمت بعصبية وعلت صوتها :
أنا محترمة غصب عنك ابعد عني بقا مش عاوز تسيبني في حالي ليه انا كرهتك وكرهت نفسي أنا ماحسبتش وقت ما كونت معاك ان دي حياة انت فترة وسخة عدت في حياتي وأتمني لو ماكنتش عيشتها عاوز ايه ها راجع عاوز ايه
قرب منها بزيادة وحط ايده علي وشها:
بحبك وعاوزك
اتعصب سلطان وقرب منه بس وقفه القلم اللي نزل علي وش كمال من وعد
وعد بدموع: لا ياكمال انت مارجعتش عشان بتحبني انت راجع عشان فلوسك خلصت ههه فلوسك قصدي فلوسي اللي أخدتها مني عشان ترضي تطلقني وتريحني من الغلب اللي شوفته معاك بس خلاص بح ماعتش وان مابعدتش عني انا هاعرف ازاي أبعدك وكله بالأصول اطلع بره
بص ليها بشر : الله الله القطة المغمضة طلع ليها ضوافر
وعد: لا كانت موجودة بس ما كانتش بتحب الأذية بس اي حد دلوقتي بقا بيضايقها بتغرز سنانها وضوافرها فيه ما تطلعش غير بالدم الدم فاكره يا كمال فاكره
بص ليه سلطان وهو بيفكر ياتري ايه قصدها بالدم
طلع كمال وقبل ما يمشي لف ليها :
هاتندمي يا وعدي هاتندمي
وهو طالع من باب الڤيلا ضربه سلطان برجله وقع علي وشه
قام بسرعة ووعد فاتحة بوقها من الصدمة ..
لف ليه وهو متعصب :
ايه اللي انت عملته ده ؟!
رد سلطان ببرود : عملت ايه مش أنا دا رجلي
