لقد وقعتُ في الفخ(مكتملة)

البارت الثالث عشر

في مكان تاني ...

بنت بتجري و4 شباب بيجروا وراها والدنيا عتمة

استخبت ورا عربية قديمة وهي بتترعش وبتحاول تكتم نفسها والخوف والتوتر حواليها

الدنيا بدأت تمطر وهي مستخبيه لحد ما سمعت صوت حد جاي حضنت نفسها بخوف وثواني حست بالدوخة وفقدت الوعي

بيقرب خيال شخص منها بخطوات ثابتة والمطر بيزيد لحد ما بيكون قدامها وبيوطي عليها
_____________________________
علي : طب بص بقا نزلني بدل ما اوديك أنا المستشفي أنا صحيح قصير بس مكير اه والله ما يغركش جسمي

وعد بضحك: كفاية اسمي 😂

علي: اسكتييييي هو ده وقت ضحك اتنيلي اسكتي او ساعديني نزلنييي يا عم بدل ما اتغابي عليك

فجأة لقي علي نفسه علي الأرض مسك ضهره بوجع

علي: حد يعمل في حد كده يعني

سلطان رفع حاجبه: قوم وريني هتتغابي عليا ازاي يلا

قام وقف قدامه ..

ضحكت وعد وهي بتبص ل.علي: ماكنتش اعرف ان انت اوزعة خالص كده

علي: لا ياختي هو اللي نخلة

مسكه سلطان من قفاه وعلي حاول يوصل ل قفاه هو كمان ووعد كانت منفجرة في الضحك

علي: اضحكي اضحكي .

رفعه سلطان بإيد واحدة وكان متعلق ومش عارف يعمل حاجة

وعد سكتت وبصت ل.سلطان: لو سمحت كفاية كده علي صديقي وزمالة سيبه ده غلبان

بصلها سلطان للحظات ونزله ..

علي وهو بيعدل في هدومه: طيب حيث كده بقا سلاموو عليكوا انا ماشي

وعد: ابقي تعالي يا علوة

علي بص لسلطان: لما الجو يروق هابقي اجي

مشي علي وسلطان بيزغر ليه وفجأة اتكعبل وقع فطست وعد من الضحك

وسلطان كان مركز عليها ومبتسم

قام علي ونفض هدومه: الكاريزما راحت في داهية خالص

وعد: معلش يا علوه تتعوض

عملها باي باي وهو بيسبل لها وبعدين بص لسلطان وطلع لسانه ومشي ..

قعد سلطان علي الاستراحة اللي في الجنينة فقعدت وعد جمبه..

وعد: لسه ما فتكرتش حاجة

سلطان: للأسف لأ في ذكريات مشوشة بس مش بتوصلني لحاجة

ابتسمت وعد: تصدق بالله انت في نعمة حد يطول ينسي طب انا نفسي انسي ولو جزء من اللي حصل لي ولو جزء بسيط النسيان ده نعمة

سلطان: ما يمكن انا كنت سعيد في حياتي والذكريات اللي عندي ماتتنساش

وعد: بص هو الحمد لله احنا في فيض من النعم بس مافيش انسان سعيد كليا كده زي ما انت فاهم لازم يبقي في حاجة عنده ترجعه لربنا كل واحد واخد حقه 24 قيراط بس متوزعين بين صحة وسعادة وفلوس وولاد وممكن تاخدهم كلهم صحة وفلوس وماتاخدش سعادة الله أعلم . وكمان اللي شفته منه انك انسان عنيف وانطوائي والضحكة ما بتطلعش غير بالقطارة دي حتي تكاد تكون منعدمة تفتكر الشخص ده اللي هو انت يبقي كان شخص سعيد ؟!