الاساطير الاغريقية والرومانية

النحات المجنون بجماليون

ازيكوا يا حلوين اسطورة انهاردة عن نحات قبرصي قصته اثرت اوي والكثير من الأعمال الفنية والروائية والمسرحية والسينمائية اتكلمت عنه.. هنتكلم عن بجماليون.
_______________________________
يلا حطوا فوت عشان نبدا

بجماليون كان نحات بارع ومشهور جدًا في قبرص وأعماله بتشهد له بده، بس مشكلة بجماليون الوحيدة أنه كان منعزل وبيؤثر الوحدة على التواجد مع البشر، خاصًة النساء.
بجماليون ماكنش بيكره جنس النساء في المطلق، ولكن كان بيكره أن النساء البشريات دائمًا أقل من الصورة الفنية المثالية للمرأة في مخيلته، وكأي فنان فنه بيسيطر على فكره وحياته، بجماليون فضل يدور على الصورة المثالية اللي في دماغه وفشل أنه يلاقيها في نساء البشر، ففضل الانعزال للهروب من خيبات الأمل.

في روايات أخرى للأسطورة، يُقال إن بجماليون كره النساء البشريات بسبب بنات بروبيتوس. وهم مجموعة من الفتيات أعرضوا عن عبادة ربّة الجمال فينوس (اللي هي أفروديت في الأساطير الإغريقية) ففينوس عاقبتهم بأنها أشعلت فيهم رغبة جنسية لا تُشبع، فبقوا بيمارسوا البغاء عمال على بطال كده، وبجماليون لما شاف أن جمالهم بيذوي وبيضيع على الأعمال اللاأخلاقية دي كره النساء كلهم (راجل غريب أوي بس ما علينا).

المهم أن بجماليون قرر يعمل المرأة المثالية اللي في مخيلته ونحت تمثال على هيئة فينوس كما يتصورها. بجماليون قعد فترة طويلة جدًا ينحت ويحنتف في التمثال لحد ما بقى آية في الجمال فعلاً.. مع مرور الوقت، هوس بجماليون بمنحوتته بدأ يزيد يوم عن التاني وبقى يقضي وقت أكتر معاها ويكلمها ويجيب لها الهدايا والمجوهرات ويحضنها ويبوسها.  (ياساتر ياساتر )
بجماليون لما لاحظ انها وسعت منه خالص يا عيني وأنه أوشك على الجنون راح معبد افروديت علشان يصلي، وهناك تمني أنه يلاقي امرأة صورة طبق الأصل من منحوتته الحبيبة. و فينوس سمعت أمنيته واستجابت..

بجماليون لمل رجع بيته وهو قلبه مثقل بالحزن وأول ما شاف منحوتته حضنها علشان يهون على نفسه وبدأ يبوسها.. 🤪😶 ولكنه شعر بشيء غريب جدًا! 

أول ما شفايفه لمست شفايف التمثال، بجماليون حس أنهم دافيين وأنهم فقدوا ملمسهم العاجي البارد. بجماليون ساب التمثال وقال “بس! أنا اتجننت خلاص رسمي كده”.. وبعدها بشوية حاول يقرب من التمثال تاني وفعلاً لما لمسها لقى جسم المنحوتة دافي، ولما ركز شوية لاحظ أن أطرافها بدأت تتحرك حركات خفيفة. بجماليون اتسمر في مكانه مابقاش عارف ينطق ولا يتحرك وهو شايف منحوتته الجميلة بتدب فيه الحياة وبتتحرك وبتبتسم له.

فينوس استجابت لأمنية بجماليون وبدل ما تهديه امرأة في جمال المنحوتة، نفخت في المنحوتة نفسها الحياة وبقت امرأة جمالها لا يخطر على مخيلة إنسان.
بجماليون، بعد ما تجاوز الصدمة، أسمى منحوتته جالاتيا وتزوجها وعاش معاها حتى مماته وخلف منها بنت واسمها بافوس أسست مدينة بافوس في قبرص (وهي مدينة حقيقة للان في قبرص).

تمت
___________________________________

وبس دي اسطورة انهاردة عارفة قصيرة ويمكن ملهاش معني ليا. اصل حاجة من الاتنين الرومانسيه هيقولوا يسلام الحب جمع بينه وبين حبيبته التمثال .
يجماعة دا سايكوا الواد رايح فيها خالص يعني مهو يمكن بردوا اتجنن بجد. او ان الاله فعلا استجابت لطلبه . في ناس حلوة بقا بتحب تتفلسف وتطلع العبرة غصب من اي حاجة مع اني شايفة ان بعض القصص مش ليها مش ليها معني ولو لفينا كدا. عادي.

فلسفة زيادة مش مني
موضوع أن الحياة تدب في التمثال ده ويتحول لجالاتيا ملهوش غير تفسيرين ملهومش تالت: التفسير الأول هو أن بجماليون أمعن في خياله حتى تحول لجنون وانفصال تام عن الواقع لدرجة أنه شاف منحوتته تمثال بيتنفس وبيتكلم وبيتحرك، وده معناه أنه فضل عايش حياته كلها مع تمثال.. حي في مخيلته فقط.
والتفسير التاني هو أن فينوس استجابت لأمنية بجماليون كما هي وفعلاً حطت في طريقه امرأة بارعة الجمال ولكن بجماليون، المهووس بالكمال، فضل شايفها على أنها منحوتته، والتفسير ده مأساوي لأن المرأة الواقعية المسكينة اللي هو تزوجها هتفضل طول الوقت تعاني تحت وطأة الصورة الكاملة اللي بجماليون شايفها بيها وفارضها عليها، وما أعتقدش فيه أقسى من أن الإنسان اللي بتحبه مايتقبلش نواقصك ويشوفك بصورة تانية غير صورتك، حتى لو الصورة دي كانت مثالية.

أي قراءة حديثة للأسطورة بطبيعة الحال هتشوف بجماليون إنسان بغيض مهووس بالكمال مطلع عقده وهوسه على البشر من حواليه.
ومن هنا ممكن نفهم ضرورة الهوس بالمُتخَيل بالنسبة للفنان، لأن الخيال المستحيل هو منفذه الوحيد لرؤية العالم الحقيقي.