اعقل مجنون

البارت الثاني

أعتقد بأننا جميعاً نعاني من الجنون نوعاً ما ، كلما في الأمر أن اولئك الذين يعيشون حياتهم خارج المصحات العقلية استطاعوا ان يخفوا جنونهم بشكل أفضل...

( ستيفن كينغ)...

من سمعته كال روايتي تراقصت نبضات قلبي وتسارعت ، حبست انفاسي ودعيت ربي يهديه علية ويحجيلي كلشي، اللهم أني استعين بك ، قويني ياالله ...

فهد : شبيج يمعودة شو وجهج أحمر ملامحج ذبلت عيونج انكلبت ليفوك شكو؟

رواية : تحبني ؟

هز راسه هزة ثقة وكال .

فهد : من يوم ما خليتي ايدج فوك كلبي ودعيتي اهدأ ، هدأت صح بس دكات كلبي صارت توجعني وجع غريب لأول مره احسه ، بسببج اثبتت وجودي وكياني ورجعت حبيت الحياة..

تبادلنا نظرات الحب والإعجاب لوهلة من الزمن وصارت نظراتنا ترصد الخوف الساكن اعماقنا من اظهار هذه المشاعر وشلون راح يقابلوها الأهل...

رواية : ليش نكرتني اذا اشكل فارق كبير بحياتك..

فهد :ما نكرتج بس ماجنت اكدر احجي اول شي وضعي مايساعد ، ثنين انه منبوذ من الكل وتعرفين بالوضع ماكو داعي اشرحلج ، واخيراً خايف عليج من الوحش البداخلي..

رواية : بس اريد افهم انت هياتك كدامي انسان طبيعي ومابيك شي ليش هيج تخوفني منك..

قرب الكرسي ناحيتي وصارت رجلي بين رجليه ، وحاوط كفوف ايدي بيديه تلفتت يمين ويسار ورجعت حجيت وياه همس ..

رواية : فهد منا الطلاب عدل كعدتك وابتعد..

تجاهل كلامي وحجه بصوت مليان نبرات تهديد وتنبيه موضح الصورة بالملامح الجانت تحجي قبل لا يسمعني صوته ...

فهد : انه اعرف نفسي زين ، العشته والعانيته شي مو طبيعي خارج عن السيطرة ، بوقت معين وبحالة معينه انه فهد ما اسيطر على نفسي ولا راح اكدر اروض الوحش البداخلي ، انه كائن خطير وراح تتأذين يا بنت الناس ، كلبي عليج وبنفس الوقت ما ردت اكسر بخاطرج اكثر واتجاهلج ، جيت اليوم حتى اوضحلج حبي وعشقي وشلون انتِ خاصة بيه وصرتي روايتي ، بس بدون زواج ولا اريدج تتقربين اكثر من هذا الحد السمحتلج بيه .....

رواية : شنو الحد يعني مافهمت ؟

فهد : حد تقاربنا هاي الكعدة الكعدتها وياج لاتطالبين اكثر ولا تتأملين للبعيد ، تريدين فهد ظلي وياه على نفس علاقتنا القديمة..

بهتت بوجهه بلعت ريكي بصعوبه ، فركت وجهي بأيدي الأثنين ، دنكت راسي ولزمت كفوف ايديه وحجيت..

رواية: واذا روايتك تجاوزتك وعبرت الحد السمحتلها بيه وتقربت منك أكثر ، شنو راح يصير ؟

جر نفس تنهد وكال..

فهد : لا اله الا الله .

رواية: فهد جاوبني ..