اعقل مجنون

بارت الثاني عشر ( احداث السلسلة )

السلام عليكم ورحمة الله وبركاته
كل عام وانتم بألف الف خير اعاده الله عليكم بالصحة والعافية

الاحداث الجديدة نزلت حسب طلبكم وعذروني عن التأخير اللي انكتب فقط اللي وصلني

جنت شبه يائسة يتغير وحالتي النفسية تعبت حيل ، فكرت هواي بالإنفصال بس المشكلة عندي تجربة سابقة وترملت بعمر صغير ما اريد ارجع مرة ثانية لأهلي وياية طفلة ، كلت أصبر واتجرع المر لأن هذا اختياري ولازم اتحمل هواي نصحوني ومن ضمنهم اخوية أدهم كال مايفيدج ابد وراح تتعبين لأن قلبه يم بنت عمج ساكنته ومستحيل هذا الحب ينسي بسهولة ، مشكلتي حبيت حبه لبنت عمي وكلت يمكن اني هم احصل مثل هذا الحب ويتعلق بية بعدين بس اللي صار عكس توقعاتي نطيت ما اخذت ، لحدما بيوم من الأيام جنت مقررة خلص انفصل لان الحياة بيننا صارت لا تطاق ، صمت رهيب عدم تواجده بالبيت سببلي ارباك بحياتي ، صح هو شايل كل المسؤولية بس اني وتالين محتاجين اب حنون علينا ، محتاجين من يلبي احتياجاتنا النفسية ، لأن الحياة مو مجرد فلوس تتوفر وكلشي يصير تمام ، جان خارج البيت ودخل محمل بالاغراض جنت كاعدة وناطية ظهري للباب التفتت التفاتة سريعة ورجعت باوعت للتلفزيون ، وصحت..

نرمان : تالين ايدج ماما وخريها من الجرجف...

هجان : كم مرة كايل صوتج لا تعليه..

التفتت عليه لكيته عاكد حاجبه وينتر بالكلام ، ماجاوبته رجعت باوعتلها وعدت عليها نفس الكلام ، سحبني من ذراعي و وكفني مقابيله..

هجان : كم مرة كلتلج من احجي وياج لا تتجاهليني ولا تجاوبين على الكد وبنتي ممنوع تحجين وياها بهاي الطريقة ، كدامي وهيج تعامليها وراية شلون؟

ابتسمت مستهزئة، سحبني وصار يهز بية بقوة...

هجان : شو صايرة ما تنطاقين يول...

نرمان : شتريد مني شتريد ؟

هجان : ما رايد شي غير تحترميني..

نرمان : قللت ادبي وياك يعني !!!

هجان : نرماااااان..

نرمان : هجان هجان هجان ..

هجان : اسمعيني زين وربج اذا بقيتي على هذا الحال..

قاطعته رفعت راسي اتجاه وجهه وصرنا قريبين لبعضنا ، ركزت بعيونه هو غمض وسحب نفس قوي...

نرمان : شنو تسوي اكثر ؟ هجر ! هجرتني ، تعذيب ! عذبتني نفسياً ، ثقتي بنفسي دمرتها ، قتلت كل مشاعر بداخلي الك شنو تريد تسوي ...

هجان : كلش زودتيها ...

نرمان : شو كل يوم الك معاملة شكل ترى خبلتني...

ضيق عيونه وبعد راسه عني وكال..

هجان : شلون يعني كل يوم معاملة شكل كل هذا وانه سيء بالنسبة الج..