- مساء الخير
_ مساء الخير
- تشربي حاجه ؟
_ لاتية من غير سكر
ابتسم : مش دايت لا انا مبحبش السكر فى الحاجات السخنه
- اها ..
_ ها عاوز تعرف ايه عني ؟
_ بسرعه كده ..
_ احنا قاعدين القاعده دى مش علشان نرسم لبعض لوحه ولا نحب فى بعض ، احنا قاعدين علشان نعرف بعض علشان لو حصل قبول نفرح العيلتين بينا ..
_ اوك .. ممكن ادخن ولا هيضايقك ؟
_ لا براحتك طبعا ..لكن ميمنعش اقولك ان الدخان بيضايقني ..
_ يبقي بلاش..
_ لو بلاش دلواقتي اعمل حسابك انه هيبقي بلاش خالص بعدين ..
_ مش فاهم ..
_ احنا قاعدين مع بعض ليه مش نتعرف ع بعض بغرض الجواز ولا قاعدين نعمل صفقه بلاليين العيد ..
_ ايوه للجواز ..
- علشان كده بقولك من أولها خليك ع طبيعتك بلاش مجاملات ولا حنتفه الا بقي لو عاوز من اول سنه جواز لو ربنا جمعنا ببعض هنقضيها خناقات وصدمات لأن كل واحد فينا طلع غير ما كان قبل الجواز ..
_ انا ع طبيعتي ..!
_ يبقي لو عاوز تشرب سجاير اتفضل لو مش هشترب علشاني ف دا يبقي وعد منك انك هتبطلها او بمعني اصح مش هتشربها فى المكان الل انا فيه ولو اتجوزنا مش هتتشرب فى الشقه علشان الريحه بتمسك فى الفرش وانا قولتلك ريحتها بتتعبني ..
_ ها .. تمام..
_ عاوز تعرف ايه عني ؟
_ يعني بتحبي ايه مبتحبيش ايه ؟
_ بحب كل حاجه حلوه سواء أشخاص أو أفعال وبكره كل حاجه مش حلوة سواء أشخاص أو أفعال..
_ ودا هيتعرف ازاي ؟
_ انت بتحب حد يقولك كلمه حلوة ؟
_ طبعا ..
_ وانا كمان .. بتحب النفاق والكدب ؟
_ لا ..
_ وانا كمان .. قيس ع كده الأشخاص وافعالهم .. الل مبتحبوش لنفسك متحبوش لغيرك والل تحبه لنفسك حبه لغيرك ..بسيطة ..
_ انتى مبتشتغليش صح ؟
_ لا .. لكن لو أتاحت فرصه للشغل مناسب لظروفي اكيد مش هتأخر ..
_ ومبتدوريش ليه ؟
_ انت مش مركز فى الكلام .. قولت لو لقيت شغل مناسب لظروفي فبالتالي انا ظروفي منعاني ورحم الله أمرئ عرف قدر نفسه وانا مش هقدر فى ظروفي دى أشتغل هبقي مقصره فى حاجة فيهم وانا مبحبش ابقي مقصره..
_ ولو اتجوزنا هتشتغلي ؟
_ لسه مش مركز.. ظروفي دى تشمل الل انا فيها والل هكون فيها بمعني لو عرفت ليه لا لو معرفتش مش هضغط ع نفسي ..
_ اه تمام وصلت ..
_ حمد الله ع السلامه
_ نعم ..
_ انت بتحب الكوره ؟
_ طبعا ..
_ وطبعا بتتفرج ع القهوه مع اصحابك
_ اكيد ..
_ انا بتفرج ع ماتشات معينه وبالاخص المنتخب ف ع كده اعمل حسابي لقي فى تجمع فى البيت عندي لو اتجوزنا مع أحبابي ماهو انت هتكون مع اصحابك ..
_ طيب ما اكون موجود معاكي ايه الفرق ؟
_ الفرق ان انا هفضل أسأل مين دا وبيعمل ايه ، عاوزه حد صبور يستحمل لتساؤلاتي إللى أوقات بتكون مش وقتها ومش طالبه عصبية ، ف أنت مع اصحابك هتروق ويبقي الوضع ألطف انا هجمع الي زى ملهمش فى الكوره لكن بيزيطوا ع الاقل هتكون فاهمين بع اكتر ومش هنضايق ..
_ يعني مش هتتضايقي ان انا بتفرج مع اصحابي ؟!
_ لو هضايق علشان ماتش يبقي هضايق انك هتسيبني وتنزل القهوه معاهم وتخرج وتسافر معاهم .. يبقي هتمنع كل دا زى السجاير كده . فليه اخنقك وتخنقني هو انا هنتجوز علشان نخنق بعض ..
_ بتحبي الخروج ؟
_ مبحبش الزحمة المكان الزحمة بيخنقني ، لو فى إمكانية طالعه ليليه بعد الساعه ١٢ اشطه جدا ..
_ تمام .. بتعرفي تطبخي ولا هنقضيها تيك اوي ؟
_ بث انا بعرف اعمل اكل لكن لا هكون زى مامتك ولا مامتي، ف انا ليا نفسي الخاص مش الاكل نفس + اكيد هجرب فيك وفيا اكلات لغايه ما تتظبط بس مليش فى الحلويات لاني بعمل فاكهه اكتر لو انت بتحبها اشتري لان خساره تبوظ وهتقولي ايه ضمنك انها هتبوظ هقولك لسه مبوظه صينيه كيكه قبل ما انزل وسايبه ماما بتعمل مناحه ع الدقيق والبيض واللبن والسكر الل اتهدروا .. بس دا ميمنعش ان انا بحب عك الشارع يعني عادي اكل من عربيه فول وكبده مش لازم محلات وحركات ..
_ انتى شايفه date ازاي ؟
_ امممم .. بص لو مخطوبين عادي تيجي البيت نقعد سويا تجرب العك بتاعي مش اكل ماما واقولك انا الل عاملاه لا اكلي انا ، نخرج لو نفع نتمشي نقعد ع الرصيف ايوه متستغربش ونشرب اتنين حاجه ساقعه ، ندخل سينما فيلم اكشن او رعب او كوميدي لان النحنحه مش هتجيب سكه وهتعلي من طموحاتك وانا مش هبقي مستنيه تعمل زى البطل فنتفرج ع حاجه احنا الاتنين هننبسط ببيها ..نروح محل كشري او حواوشي وفطير شرقي .. نتكلم فى التليفون رغي رغي تحكيلي عن يومك وانا كمان بدون تلويين ولا كدب اتنين أصحاب بيتكلموا .. لو اتجوزنا ابسط حاجه فيلم جميل مع طبق فيشار وبيتزايه ومقرمشات وتسالي نتفرج عليه مع بعض ونضحك شويا ونرغي ننسي اليوم والاسبوع الل فات ... نلفلف بعد الساعه ١٢ بالعربية لو في لو مفيش ننزل نتمشي نتطمن ع المنطقه ، كوبايتين شاي بنعناع كده انت تعملهم مش انا علشان احس بطعمهم وتحس انك عملت حاجه .. مجرد دردشه مع بعض فى اليوم كفايه عندي ..
_ امممم ..
_ واه .. لو حصل نصيب بينا متجيبش ورد ولا هدايا غاليه .. خليك فى المعقول كتابين من الكتب الل بحبها ، شوكولاته ، اتنين شاورما واحد بيتزا الحاجات دى بتفرحني اكتر وهتفرحني لان دى من اهتماماتي الل تغيرلي المود .. الورد والساعات والدباديب مبيجوش معايا سكة.. دوغري كده الكتب والاكل والونس هما سكتي
_ لا بجد ..
_ ايوه .. وفكره ال proposal وركبه ونص اوعي تفكر ، الركوع لله احنا هنكفر ولا ايه ..
_ انتى غريبة ؟
_ لا عادية جدا .. انا زى اى بنت مش محتاجه مظاهر انا محتاجة إحساس احسه إللى به هقدر اكمل حياة وأطفال ، محتاجة اطمن ، محتاجه حياة سويه مع شخص سوي نفسيا فاهم الل معاه دى مش للنوم والعيال د وتغسله الهدوم وتطبخله اكله ، لا إنسانه ابسط حقوقها انها تحس انها غاليه عنده وانه فاكرها وبيفكر فيها، زى ما انت ليك مساحه شخصيه تحترم انا كمان ليا مساحتي إللى اكيد مش هتكون على حساب مساحتك ولا حياتنا ودا ينطبق علينا احنا الاتنين .. الحياه الل احنا داخلين عليها أكبر من فستان وشبكه وعشقه.. شخصين سويين هيأسسوا بيت وهيطلعوا منه أطفال اسوياء للمجتمع عارفين يعني ايه حياه وازاي يعيشوا ..المجتمع مش ناقص عك كفايه العك الل حوالينا ..
_ مش عارف اقولك ايه .؟!
_ متقولش حاجه ، انا صريحه جدا معاك متقبل صراحتي ووضوحي ممكن نتقابل تاني ونكمل تعارف بدون مجامله ولا تلويين ..لو لا مش هزعل ولا هضايق ع فكره لان قبلك ٢ قالولي لا .. استأذن انا والقرار راجع لك عن نفسي لسه معرفكش علشان اقول ايوه او لا لسه دى اول مقابله اهلنا جمعونا ببعض ، عندك إستعداد لمقابلة تانيه عرفني .. عن اذنك ..!
- يارا سمير
اعتبروه اإسكريبت ورأيكم مهم
