-
شافها كذا مره قاعده لوحدها فى نفس المكان فى نفس الترابيزه بنفس الملامح امرأة فى أول الأربعين ملامحها هاديه وهى ماسكه كتاب ب تقرأه وفى ودانها سماعات الهاند فرى وبتشرب عصير .. عرف انها من سنين هى بتيجى لوحدها فى نفس التوقيت من اليوم .. فضوله حركه وقرر يقتحم سكونها وبعد التعارف :
- ممكن سؤال
- اتفضل
- انتى ليه بعيده عن الناس ودايما لوحدك ؟
- امممم ... احكيلك الحكايه من الاول فاضى
- سامعك ..
- انا كنت وسط ناس كتيره لو قعدت أعد فيهم مش هيكفينى أيام وكنت مطمنه ل الأيام وهما معايا .. كل ما أكبر سنه اخسر شويا ... ابتدت ب بابا مات شويه جم طبطبوا وقالوا اجمدى كده هو انتى اول واحده أبوها يموت ربنا يخليلك أمك واخوكى واحنا اهلك .. مرت فتره واختفوا الل طبطبوا و كانوا أهلى من ناحيه ابويا .. مرت فتره وواضح أن بابا وحشته ماما ف جه اخدها وسابتنى .. وقتها شويا جم طبطبوا وقالولى اجمدى كده هو انتى اول واحده أبوها وامها يموتوا ربنا يخليلك اخوكى واحنا اهلك .. مرت فتره واختفوا الل كانوا بيطبطوا وكانوا أهلى من ناحيه أمى .. مرت فتره واخويا ضاق به الحال وسافر بره مصر وقالى اعذرينى مش هقدر أكون معاكى بس هفضل جنبك .. مرت فتره مكالماته قلت وزياراته اتقفلت واتفاجئت انه اتجوز وعايش حياته ... اصحابى اختفوا بالتدريج لحياتهم .. حاولت اتمسك بالواقع لكن اكتشفت انى متمسكة بوهم وسراب .. بصيت لحياتى لاقيت نفسى لوحدى و الإنسان الل كنت فاكراه طوق نجاتى سابنى وخذلنى قد ايه كنت بتمنى حد يحضنى وقت فراق بابا وميسبنيش حد يضمنى وقت فراق ماما ميجاملنيش حد يمسك ب ايديا وقت فراق اخويا يطمنى ميخذلنيش ..محدش حس بيا ولا بوجعى علشان مبشتكيش لكن الناس وكلامهم ونقدهم ان انا كبرت وعنست ولازم اتجوز علشان عيب اعيش لوحدى .. مينفعش تخرجى .. مينفعش تشتغلى مينفعش تلبسى .. مينفعش تعيشى .. محدش سالنى ولا حاول يكون مكانى كل واحد بيتكلم من بره الصوره ..وقتها قررت اعيش لوحدى بعيد عن الناس الل اكتر ما يهمهم الشكليات حتى لو بموت ... أنا مش اول واحده تتعزل عن البشر ونفاقهم الل وجودهم بيوجع اكتر ما يطمن .. العزله راحه والوحدة أمان أفضل كتير من حياه وسط الناس و الخذلان ...!
- ....
- مستغرب من كلامى ؟
- انتى مش اول واحده قررت تتعزل انتى اكتر من مليون بنت عايشه فى عزله وهى وسط زحمه .. زحمه بالشكل لكن مضمومنها فراغ .. الناس ماهى غير حمل محدش فاهمه ... آسف ع تطفلى عليكى واقتحامى عزلتك أستاذن انا لكن قبل ما امشى اتمنالك الراحه فى حياتك ..
- راحتى أن الناس تبعد عنى ... !
#شخبطه_ليليه_بقلمى
