اسكريبت في الخمسينه 🦋.
بقلم : نور حمدي .
_ انا عارف انك نفسك تقوم تخنقني ، بس انا عاوز أصلح اللي عملته ، انا جاي وطالب ايد سما .
"ماسكه نفسي بالعافيه وبحاول اهدي نفسي وامنع الأفكار الشيطانية اللي بتدور في دماغي من اني اطلع اقتله ،، اول لما سمعته وهو بيطلب ايدي كأني بركان وانفجر خرجت من اوضتي بعصبيه "
=انت فاكر نفسك ميين ، ولا هو عشان احنا ناس غلابه وملناش ضهر وبنحب نمشي جمب الحيط تبيع وتشتري فينا ، وبأي عين جاي هنا لا وكمان عاوز تتجوزني ، دا بعدك انا اموت نفسي ولا ايدك الوسخه دي تلمس شعره مني تاني انت فاهم ، قوم اطلع بره ..
لقيت بابا مسك قلبه وبيتوجع ، ماما جرت عليه ..
_ حرام عليكي يشيخه مش كفايا اللي جرالنا ، هتموتي ابوكي حرام عليكي ، انتي فاكره ان حد تاني هيرضي بيكي ، واهو جاي يصلح غلطته ، نقوم نتبتر ،، كفايه مشاكل وفضايح بق سيرتنا بقت علي كل لسان .
"كلام ماما خنقني وحسيت ان كلامها صح ، بس مش دا اللي انا بتمناه ، مش دا .. بصتله بكل كره وغيظ وبصوت مكتوم قولت : انا بكرههككك .
___
يابجاحتك يااخي ، يعني تغت*بها وتسرق اعز ماتملك وتروح تتقدم لها كد عادي، وزعلان اووي من رد فعلها ، دا كويس انها مقتلتكش ..
_مهو محدش قالها ترفضني كل لما اتقدملها ، كل دا عشان هي دكتوره وانا في تجارة،، الحب عمره مكان بالشهادة، الحب هنا وشاور علي قلبه " وبيني بينك انا حسيت بالذنب تجاها فمتقلقش هجوزها مده بسيطه واطلقها ، ويلعن ابو الحب ياخي .
____
ملبستش فستان زي البنات ، الفستان اللي اي بنت تحلم تلبسه ، حتي لو بينها وبين نفسها ،، كتبنا الكتاب وانا جوايا رغبه للموت ، حاسة ان انا بمضي علي موتي ، عيني مش قادرة تترفع وتبص في وشه ، حاسه ان انا هقوم واقتله ،، انما هو عنيه متشالتش من عليا ،، عارفه انه بيحبني وعمل كد عشان يذلني ويقفل في وشي كل الفرص وميبقاش قدامي اختيار غيره ،، مش فاهم ان كل شئ قسمه ونصيب ، ومش عارف ان بعد اللي عمله لو اخر راجل في الدنيا عمري مهحبه..
___
دخلت انا وهو البيت وفي ايدي شنطة هدوم صغيره ..
بصيت في الأرض وقولت بخنقة وقرف : اوضتي فيين ؟!
_شاور : دي اوضتنا ..
دخلت عليها جري وقفلت الباب قبل ما يدخل ..
_ افتحي يا سماا .
= ابعد عني انا بكرهك ولو فاكر انك هتلمس مني شعره فأنت بتحلم ، انا اموتك واموت نفسي قبلها ..
_ سما انا هطلقك بس بعد مده من جوازنا، انا عملت كد عشان أصلح اللي عملته واتمني تسامحيني ،، سما انا بحبكك.
" قعدت علي الارض كأني انهارت وقولت بدموع مش قادرة اوقفها ..
= انت فعلا هتطلقني بس من غير ما تلمس شعره مني ،، سيبني في حالي بق يا اخي الله يخليك انا مبقتش قادرة .
" سمعت صوت باب البيت بتقفل ،، عرفت انه خرج .. قومت غيرت هدومي واتأكدت انه مشي من البيت وغسلت وشي واتوضيت وصليت ودعيت ربنا انه يخفف عني وجع القلب دا وبعدها نمت ..
___
خرجت من البيت وانا مخنوق ومضايق وحاسس انها اتقفلت في وشي ،، فكرت ان انا السبب في دموعها دي واجعاني ،، كنت بطلت شرب سجاير عشانها من سنتين ،، لقيت نفسي روحت علي أقرب محل واشتريت علبتين وقعدت علي النيل ،، اشرب سجارة وانفخ اطلع الكبت اللي في قلبي سيجارة ورا التانيه ورا التالته لقيت العلبتين خلصوا .. قعدت كتير محستش بنفسي غير وقرءان الفجر شغال ..
قومت مشيت وعديت من قدام مسجد ،، صوت الادان كان قريب مني لدرجة انه يغسل قلبك من جوه ،، حسيت براحة الف علبة سجاير متحسسكش بيها .. بصيت جوا المسجد لقيت المصلين مصفوفين بخشوع منظرهم يوحي بأنك في الجنة ،، لقيت رِجل بتقدم والتانيه وراها لحد ما دخلت المسجد .. قعدت في جمب اتفرج علي المصلين وهما بيصلوا ،، شاب في سني كان بيجري عشان يلحق الركعه التانيه كأنه راحت عليه نومه وهو ماشي لمحني بص بإستغراب وجه بسرعة جمبي ..
_ مبتصليش ليه ياصحبي !؟
-- اصلي..
_ قوم قوم يلا متنحش ، ادخل اتوضي وتعالي الحقنا في الصلاة قبل متفوتك ..
وسابني وراح وقف في الصفوف .
سبته وخرجت من الجامع بخنقه ، منا مبعرفش اصلي.. اخر مره صليت كنت في 4 ابتدائى ،، مش عارف بيقولوا اي حتي في الصلاة .. روحت البيت ودخلت أوضة تانيه وكان كل تفكيري فإني ازاي بعيد عن ربنا للدرجه دي ،، ازاي بقيت كد..
___
منمتش طول الليل ،، كنت خايفه .. لحد مالفجر ادن عليا قومت صليت وقرأت قرءان ودعيت ،، فجأة لقيتني بقول " يارب اهديه.
ثانيه يهدي مين ،، وانا بدعيله ليه اصلا ، دا واحد حقير وندل يارب خد.. مكملتش الجملة وخرجت تنهيده كأني محبطه وقولت فعلا بق يارب اهديه..
كملت قراءة قرءان سمعت صوت الباب بيتفتح ، عرفت انه هو ،، الحقيقه مكنش فارقلي يجي او ميجيش ،، وف الاخر قومت نمت .
___
صحيت من النوم الضهر لقيت اوضتها مقفوله ،، روحت خبطت عليها..
_ سما ! سما انتي جوا .
سما لو جوا ردي عشان مكسرش الباب ..
في نفسي " هربت دي ولا اي !؟
سما ..
هكسر الباب والله ..
لقيت صوت كأنها لسه نايمه ..
_ ياخي سيبني في حالي بق عاوز مني ايه ، يوووه .
" لما سمعت صوتها ارتحت ، شعور جوايا انها ممكن تكون هربت ، بس لما سمعت صوتها اطمنت..
دخلت المطبخ وعملت سندوتشات وعصير ليا وليها خدت صنيتها وحطتها قدام باب اوضتها ونزلت ادور علي شغل ..
منا عاطل ومبشتغلش .
لفيت علي مكاتب وشركات بس محدش وافق ..
اخر الليل روحت جبت علبة سجاير وقعدت اشرب فيها ، مكملتش 3 سجاير وسبتها .. مش عارف ارتاح ، مشتاق للشعور بتاع امبارح اللي حسيته وقت اذان الفجر ، كان شعور ميتوصفش ، لقيت نفسي قومت وروحت المسجد وقعدت قدامه لحد مالشيخ يجي ويفتحه ..
قعدت ساعتين ونص في البرد ، مكنش في دماغي حاجه غير حاجه واحده بس ،، وهي اني اتعلم ازاي اصلي .
لقيت الشيخ ايجا من بعيد.
_ اي دا يبني قاعد هنا من امتي ؟! مستني مين ؟!
= مستنيك انت يشيخ ، انا بصراحه طالب منك طلب وعارف انك مش هترفضه ، انا عاوزك تعلمني الصلاة..
_ يااه يبني دا انت ربنا بيحبك اووي ، قاعد في عز البرد دا عشان اعلمك ازاي تصلي وتلحق صلاة الفجر ،، تعالي يبني تعالي ..انت اسمك اي الاول !؟
* نبيل.
" دخلت مع الشيخ وقالي عدد ركعات كل فرض اللي كنت عارفها بس قالي نعمل اي في كل ركعة وفهمت وعرفت ،، وطلب مني اصلي القيام معاه ،، انا عمري محسيت براحه أعظم من دي ،، كنت بصلي واقول ' يارب حنن قلبها عليا وخليها تحبني ' .
الفجر ادن ووقفت في أول صف ،، اول سجده .. عيطت كتير ، عيطت علي العمر اللي ضاع بدور فيه علي الراحه وهي موجوده هنا ، لو يرجع بيا العمر مكنتش هفوت فرض واحد ،، عيطت خوف من ربنا ، خوف من اني كان ممكن افضل في الضياع دا عمري كله ،، شكرا يارب .
____
"فتحت باب الاوضة عشان اتوضي للضهر ، لقيت صنية اكل قدام الباب "
_ هه يا حنين انا كده هحبك يعني ، دا بعدك .
اتوضيت وصليت وبعدها حسيت اني جوعت ،
دخلت المطبخ عملتلي سندوتش تاني وعصير كلتهم وقعدت اتفرج علي التلفزيون ..
_ هو بيروح فين دا كل يوم كد وميرجعش غير بعد الفجر ، هو مش هيبطل بق السكك البطالة اللي ماشي فيها دي ، دا اي القرف دا ..
الساعه عدت 12 وانا عارفه انه مش جاي غير بعد الفجر..
دخلت نمت ومحستش بنفسي غير الصبح ..
_ اووف صلاة الفجر فاتتني ..
قومت من النوم وخرجت من الاوضه جري الحق اتوضي واصلي الضحي .
لقيته في نفس اللحظه خارج من المطبخ ومعاه صنية السندوتشات والعصير كأنه رايح يحطها تاني قدام اوضتي ..
قلبي انقبض حسيت شكله اتغير بقي فيه قبول ووشه بقي جميل ، انا بقول اي اسكتي بقاا ..
عنيه اتعلقت بيا وبعدين شالها وراح قدام باب الأوضة وحط الصنيه واخد الجاكيت بتاعه من علي الكنبه ومشي ..
___
" طبعا كانت فاكره انها لما متكلش الأكل اللي عملتهولها امبارح هزهق ،، انا عمري ما ازهق منها ،، روحت تاني ادور علي شغل في بنوك الاول رفض التاني التالت قعدت علي الحال دا اسبوعين ،، لحد مأخيرا بنك وافق ..
ياااه حسيت ان طاقة القدر اتفتحلي الحمد لله يارب..
سمعت صوت ادان الضهر ،، دورت علي اي مسجد اصلي فيه ، علي الحال دا بقالي اسبوعين ، بتلهف لكل صلاة واقعد استني اللي بعدها ، لقيت واحد دخلت وانا حاسس اني داخل٠ انقي وأطهر مكان في العالم ، دا بيت ربنا صليت وفي كل سجده كانت نفس الدعوه " يارب حنن قلبها عليا ".
____
لفيت شويه في الشوارع ، مش حابب اروح ، عارف ان دا هيضايقها .. صليت العصر في المسجد والمغرب ،، ..
روحت البيت بعد العشا ، لقيت اوضتها مفتوحه بس ملقتهاش ،، قلبي انقبض وطلعت اجري زي المجنون في البيت ادور عليها بس ملقتهاش ، دخلت اوضتها تاني وفتحت دولابها لقيت هدومها زي مهي ،، فرحت وارتحت شويه؟!.
اومال هي راحت فين ؟!.
____
حسيت بزهق عاوزه اخرج ، بابا وماما وحشوني قولت اروح ازورهم وهو كد كد مبيرجعش غير بعد الفجر ، ولا يرجع هو ملوش اصلا دعوه بيا ..
_ بعياط ، بابا ، ماما وحشتوني اوووي .
= وحشتينا اووي يبنتي ، اخبارك اي ، بيضايقك ، بيضربك ولا حاجه ، احنا والله مبيإدنا حاجه سامحينا..
لا ياماما والله مفيش اي حاجه من الكلام دا..
قعدت احكيلهم والوقت سرقنا وماما رفضت امشي غير لما اتعشا معاهم ..
*الباب خبط .
فتحت لقيته في وشي ، بلعت ريقي بالعافيه ..
_ قلقت عليكي لما ملقتكيش في البيت ، قولت اني هلاقيكي هنا ، هستناكي تحت 10 دقايق ممكن متتأخريش.
ماما بتشوف مين علي الباب لقيته واقف: تعالي يبني اتفضل ، موقفه جوزك لي علي الباب ، ادخل حماتك بتحبك ، العشا محطوط.
" عارف انها عزومة مركبية وعارف ان محدش في البيت بيطقني " شكرا يا حماتي ..
بصلي كأنه بيأكد تاني علي كلامه ونزل .
_ جوزك دا !؟ ، هو ماله اتغير كدا لي ، البركه فيكي .
= ها !..
بقلم الكاتبه : نور حمدي ♡
