#البطل_المغمور2 "زهور القمر"
#جمان_فريد
#الجزء_الحادي_والعشرين "حال الدنيا"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
في حوش اهل راجح..
تحديدا في الصالون المقابل باب الحوش..
كانوا مقعمزين جمعه وجيهان وبوها وامها يهدرزوا..
اب راجح؛والله عندك حق ياولدي الدنيا معاش زي زمان هلبه حاجات تغيرت..
عواطف؛بس في من اقارب قطيعتهم خير اللي مايجي من وراهم كان المشاكل..
جمعه رفع حواجبه وقال:ممكن..
جيهان ابتسمت...
جمعه مرر نظره عليهم وقال؛ عطيك الصحه ياعمتي ع العشي وان شاء الله ديما عامر ياعامر..توا نبوكن تعطونا الإذن غدوة ورانا خدمه بكري ان شاء الله..
بو راجح؛غير زيدوا شويه تانيه قاعدين نهدرزوا...
جيهان:والله مافيها كيف يابابا يدوب نلحق نروح ونحضر الدرس ونوتي حوايجي تعرف سريبي..وضحكت..
بوها تنهد وقال؛ع راحتكم...
ناضوا الزوز وهما ناضوا معاهم..
عواطف قربت جيهان؛راك تنسي اللي وصيتك عليه..
جيهان:بشرط تقعدي عاقله ياماما بالله عليك..
عواطف تنهدت بقلة حيله وقالت:امري لله..
فجأة انفتح باب الحوش وخش راجح..
تفاجئوا لما شافوه ماعدا جمعه ماعنداش علم باللي صاير..
راجح وع وجهه ملامح الأسف والضيق؛السلام عليكم..
ردوا عليه؛وعليكم السلام...
امه كانت تشوفله بشوق ولهفه..
بس بوه وهو يشبحله لاحظ انه مش ع بعضه..
جيهان جاته سلمت عليه وهي تقول:عاش من شافك...
ابتسم غصبا؛تعيشي...شبح لجمعه وقاله..جمعه نبيك شويه..
كلهم استغربوا وجمعه اكثر منهم هز راسه بإيجاب بدون مايتكلم..
راجح لف ومشي طلع من الحوش وجمعه لحقه..
عواطف بقلق:إن شاء الله خير!
اب راجح:صايرة حاجه بين خوك وجمعه؟
جيهان وهي تحاول تخفي خوفها:لا بابا شن بيصير يعني اكيد بيكلمه في حاجه..وابتسمت بإرتباك..
🍁برا..
جمعه:إن شاء الله خير!
راجح تنهد وقال:عمك خالد..
جمعه عقد حواجبه بشي من الخوف:خيره!؟
راجح؛توفى بكري شويه..عظم الله اجرك..
ارتسمت ع وجه جمعه ملامح الصدمه قعد واقف يشبح لراجح ويحاول يستوعب اللي سمعه..
راجح؛عرفت انك هني من جيهان كلمتها بكري وقالت بتجوا هني ولما سمعت بخبر الوفاة قلت نجي ونبلغك..
جمعه غير عيونه عنه ومررهم قدامه بعدين شبح للباب وقال:قول لجيهان تطلع..
ومشي طول لسيارته..
هو قعد معاه بعيونه لين ركب السيارة.
بعدين مش خش للحوش بش يكلم اخته..
🍁🍁🍁🍁
وفي حوش بوه...عبدالله..
كانوا عماته الزوز غادي يزوروا في خوهم الكبير سعيد اللي عايش مع عبد الله...
امنه"اخت خالد":قلت نديرها حوسه وحده ماعنديش بال لوجيج العراس كل عام..
عيشه"ام جمعه":والله احسن مادرتي..
عبدالله:باهي ربي يكمل ع خير..
اخت خالد التانيه؛سعيد وين سارح؟
سعيد شبحله وقال:شنو؟
:قتلك وين سارح مش معانا بكل..
سعيد بضيق؛مش..مش سارح..لكن هكي مضايق خلوقي..ضايقه..
كلهم انتابهم شعور الخوف..
امنه:خيرك وخيي شن مضايقك..
سعيد؛مش عارف..هكي..هني حاجه...وحط يده ع صدره وقال..تقول جبل...محطوط هني..
شبحوا لبعض بخوف..
وعيشه قالت؛بقولي كان ترفعه ياعبدالله للبلاد يغير جوه خير..
هز عبدالله راسه وهو يشوف لخوه بقلق:إن شاء الله..
فجأه سمعوا باب الحوش انفتح..
عيشه:جمعة ومرته روحوا..
شبحوا فم الصاله..
خشوا عليهم جمعه وجيهان اللي كانت تمرر في نظرها عليهم بقلق..
عيشه:خيره وجهك هكي ولدي؟!
سعيد قعد يشبحله بخوف..
جمعه بألم:عمي خالد..
حط سعيد يده ع راسه..
أمنه ودموعها عبوا عيونها:خيرها!؟
جمعه نزل عيونه وقال؛توفى..
كلهم انصدموا..
وامنه طول نزلوا دموعها وهي تشوف لجمعه .
سعيد قعد يخبط ع راسه وهو يقول؛قلتلكم قلتلكم..خالد..خالد...خليتوه يموت ومانشوفه..خليتوه يموت ومانشوفه..وقعد يخبط ع راسه وبدي يبكي..
جمعه فتح القرآن في تليفونه وجي لعمه يجري..
حط التليفون حداه وشد ايديه وضمه بقوة..
وسعيد يبكي ويقول:خالد...خالد..
وخوته يشبحوله وهما مازال مش مستوعبين اللي سمعوه..
شريط ذكرياتهم مع خالد قعد يمر قدام عيونهم...
واكثر شي تفكروه تخليهم عنه ومقاطعته نهائيا اللي خلتهم يتبروا منه ويطلعوه من العيله..
واللي خلت خالد يغير لقبه بش مايضرهمش بأفعاله...
لكن مهما كان ومهما صار يقعد خوهم الصغير اللي قعد مدفون ليه في القلب حب خاص ماقدروش يعبروا عنه ولايعطوه..
واهو سيب هالدنيا بدون مايرجع يجتمع فيها بيهم مرة تانيه..
🍁🍁🍁🍁🍁
"سكروا البيبان كلهم بابنات باب الكوجينه الخارجي يامريم باللفتات.."
مريم من الكوجينه:حاضر عمتي..
طلعت عفاف وسكرت باب دار الدروج بالمفتاح وخشت وسكرت الباب بالمفتاح..
ع طلعة مريم من الكوجينه؛تصبحي ع خير عمتي..
عفاف؛قدامك كل خير بنتي..
ومشت مريم لدار تهاني بتبات معاها..
ونسيبه بتبات مع عفاف في دارها...
والحاجه صالحه عندها دار هي وحفيدها عرفه..
خشت عفاف للدار لقت نوسه متكيه..
عفاف؛غدوة من العشرة لازم نكون في المعمل عندي وجبتين..
وخشت السرير..
نسيبه:معاك الحاجه صالحه ولا؟
عفاف:ايه..
فجأه..سمعوا صوت تخبيط قوي ع باب الحوش الخارجي..
ناضت نسيبه قعمزت وهي تقول:يالطيف!
نزلت عفاف من ع السرير وطلعت من الدار ونسيبه وراها..
لقوهم كلهم طالعين من ديارهم..
تهاني بخوف:شن هدا يام!؟..
سمعوا صوت التخبيط مرة تانيه بعدين سمعوا صوت عياط..
كلهم انفجعوا..
عفاف حطت شاربتها ع راسها ومشت بسرعه طلعت..
وهما وراها...
وين طلعت من الحوش سمعت عياط وحده تقول..
"آه ياخالد اه ياوخيي"
جمدت عفاف في مكانها..
ونسيبه حطت يدها ع رقبتها وهي تشوفلها بصدمه..
والباب يدق بقوة...
نسيبه مشت طول فتحت الباب..
خشوا خوات خالد ونساوين خوته...يبكوا..
وامنه اخته تعيط وتقول؛عفاف...خالد مات ياعفاف...
تسلل البرد في كل جزء من تهاني..حست روحها صقعت مع بعضها..
من صدمتها قعدت تشبحلهم بعد استيعاب..
اما امها وهي تشوفلهم قدامها اللي تبكي واللي تعيط...
شبح الذكريات القى بظلاله عليها..
وسبحان الله..ذاكرتها هالمره جابتلها الأيام الحلوة بس..الذكريات الحلوة اللي تحساب روحها نستها...
اول مرة شافاته ليها...
بدايات حبهم لبعض..
اول سنه زواج....
الذكريات اللي ضحكها فيها خالد...
الذكريات اللي حن عليها فيهم خالد..
الذكريات الحلوة معاه بس...
اما تهاني..
جي بين عيونها اليوم اللي روح من المستشفى في حادثه مشكله زياد ورفيق..
الكلام اللي صار بيناتهم...ضحكاتهم...لحظة حلوة كانت نادره في حياتها مع بوها...
الى جانب ذكري وين تخطر عليها تخليها تحس اتجاه بوها بحب كبير...
لما كانت طفله صغير في حجره وهو يمشطلها في شعرها...
لفت ومشت لدارها وهي تسمع في صوت البكاء والعويل..
خشت لدارها وسكرتها عليها..
وخشت لسريرها...رقدت ع جنبها الأيمن ضمت ايديها وحطتهم تحت خدها...ودموعها ينزلوا سيل...
🍁اصوات العياط..
الشارع كله سمعها..
واولهم حوش هيثم..
ماجده وهي نازله من فوق تبكي:خالد ياهيثم تسمع فيهم يعيطوا ويقولوا في اسمه..
هيثم بأسف؛إنا لله وإنا إليه راجعون..
سارة ودموعها ينزلوا:بنمشوا بابا.
هيثم غير عيونه عنها وهز راسه بالموافقه..
مشت سارة تجري خدت عبايتها ووشاح من ع الشماعه وطلعت..وماجده وراها وهي تساوي في وشاحها...
وهو قعد مقعمز يفكر شن المناسب يديره في حاله الهادي...
🍁فهالوقت..
خشوا خالته وبنته لحوش خالد..
من الزحمه في الجنان...جو عيونه ع عفاف..
وهي مقعمزه ع كرسي ومربعه ايديها وتبكي بصمت..
جتها ماجده وهي تقول؛عظم الله اجركم..
ناضت عفاف وهي تقول؛شكر الله سعيك..
حضنتها ماجده وعفاف تساير فيها مسايرة..
اما سارة بعد ما سلمت ع عمتها قالت؛وين تهاني؟.
نسيبه ودموعها ينزلوا؛خشت لدارها..
طول سارة مشت خشت داخل..
وهما قعدوا يشوفوا لآمنه اخت خالد وهي تبكي وتعيط؛ياناري عليك ياوخيي ياناري ياريتنا غير تصافينا ياوخيي ياريتنا غير ريناك وسلمنا عليك وكلمناك وكلمتنا ياوخي ..خيي ع الدنيا خي الله يلعنها..
والرجاله وافقين برا يسمعوا فيها وقلوبهم مفطوره من الألم..
🍁في دار تهاني..
سارة فتحتها وخشت عليها وهي تقول:تهاني!
تهاني شبحتلها بعدين ناضت قعمزت وهي تقول؛بوي مات ياسارة..مات واني مش حاسه بيه..
قعمزت حداها سارة وضمتها وهي تقول ببكي:إنا لله وإنا اليه راجعون..
تهاني؛حاسه بشي غريب مش فهماته ياسارة....حاسه روحي نبي نعيط ونبكي لكن مش قادره ياسارة..
سارة قعدت تبكي وهي ضم فيها بقوة..
وتهاني ع حالها...دموعها صح ينزلوا..بس حالها مش حال المفجوعه في بوها...
🍁في نفس الوقت
كانت مريم في دار الدروج تتصل بجهاد..
"ايوه مريم"
رشفت وقالت؛قاعد في الحوازة؟
"ايه خيره صوتك؟"
مريم بألم؛جهاد..بوك توفى....
معاش في رد..حتى انفاسه معاش سمعتهم.
مريم بقلق؛جهاد..
"شن تقولي اني اليوم كنت عنده مافيه شي..كيف مات!!؟"
مريم ودموعها ينزلوا:كنت عنده..!؟
🍁جهاد..بعد ماسمع سؤالها نزل تليفونها..
وقعد يذكر اللي صار فالزيارة...
الكلام اللي قاله..ردة فعل بوه..
اصلا ماكانش فيه ردة فعل...الراجل كان جامد من صدمته فاللي يسمع فيه..ماقدرش يرد بكلمه..
حط يده ع جبهته ودموعه غرقوا عيونه وقال:قتلته!
نزل يده ورفع عيونه فوق وقال:قتلته ياربي اني قتلته...!..
نزل عيونه ومرر نظره حواليه وهو مصدوم ومش مستوعب..
حط يده ع فمه وانفاسه متسارعه...
كان ياخد فيها بصعوبه...الدموع بدو ينزلوا..
وبكاه ولى بالصوت...
شد ع قبضة يده وحطه في فمه وقعد يعض فيها بقوة وهو يبكي بالعبره..
طاح ع ركابه وهو يبكي بألم وحرقه...
وبين عيونه شكل بوه وهو يكلم فيه...
حول يده وصرخ بأعلى صوته صرخه كادت تشق السمي..
صرخة ألم..الم من يكوا في جرحه بالنار...
🍁وحال خليل كان اسوء من حاله..
وهو محبوس في داره ويبكي بحرقه شديده..
ماباش يخلي حد يخش عليه...
الخبر فجعهم والهم..
بالذات زياد اللي قعد حتى هو في داره بروحه هارب بدموعه عن الأنظار..
موت خالد وجعه...وذكره بموت امه..وقعد يفكر في وقع الخبر ع تهاني كيف حيكون...!
🍁تهاني اللي كانت في حضن سارة..
هاديه..بس دموعها مابطلوش نزول..وسارة تمسح ع شعرها وتقرا في القرآن...
🍁ليلة قاسيه ومفجعه...كانت طويله ع قد الحزن والالم اللي فيها..
ومع هذا عدت...وجي اليوم اللي بعده...
وكان بعد الظهر وقت الجنازة...اللي حضرها هيثم ماقدرش يقعد عنها...
صلوا ع خالد...
وخوته وجهاد كانت اصوات بكاهم مسموعه في الصلاة ماقدروش يتحكموا في مشاعرهم...
🍁اصحاب القلوب القاسيه تستنكر دموع الرجال...وتقول بجهل كيف راجل يبكي!!؟..وكأن الله حرم البكاء ع الرجال!؟
موقف زي هدا يبكي الحجر الأصم..موت ع قطيعه كان مابكاش البنادم ع حال زي هدا ع قلبه السلام...!🍁
بعد الصلاة..
رفعوا خالد لأخر منازله في الدنيا...
القبر...حطوه فيه...وجهاد وهو يبكي كان ينزل عليه فالتراب هو وعمامه ومعاهم جمعه...
بعد ماتغطى القبر بالتراب...
الناس شويه شويه بدوا يمشوا...
لين ماقعد حد ع القبر غير جهاد وعمه سعيد..
ومن بعيد جمعه وهيثم يشوفوا فيهم...
كان سعيد يمسح ع تراب القبر وهو ساكت..
ويسمع في جهاد شن يقول..
..بالله عليك سامحني...والله ماقلت اللي قلته الا فلحظة غضب..طارتلي منك طلعت عن طوري وقلت اللي قلته..مهما كان انت بوي مفروض مانديرش معاك هكي مفروض مانقولش اللي قلته...ياريتني ماجيتك ياريت ربي خداني اني ولاخلاني نوصل فيك...كيف بنعيش توا..كيف قولي كيف ندير....
وسكت وهو يبكي بحرقه..
وعمه يشبحله ودموعه في عيونه ومازال يمسح ع تراب القبر...وكأنه يمسح ع خالد وهو راقد في قبره...
هيثم؛عمك الكبير هدا؟
جمعه شبحله وقال:ايه...
هيثم هز راسه وقعد ساكت..
جمعه؛علاقتك بيهم تغيرت بعد اللي صار مع خليل ورفيق؟
هيثم شبحله بعدين غير عيونه لجهاد وقال:عظم الله اجركم وغفر لميتكم...
ولف ومشي...
وجمعه معاه بعيونه لين اختفي من قدامه..
بعدين رجع شاف عمه وولد عمه...
🍁🍁🍁🍁🍁
في احد المطاعم المشهورة في العاصمه....
"نبي نسألك سؤال واحد وتجاوبني بصدق وصراحه المرة هادي"
الأشهب بإستغراب؛اسألي..
نوال خدت نفس وقالت:علاش فضيت الشراكه بينك وبين بشر زمان انت كنت متحمي هلبه شن اللي صار بش تراجعت..
الاشهب وهو يحاول يخفي ارتباكه:شن فكرك بيه الموضوع هدا توا!! وبعدين اني جاوبتك زمان يانوال...
نوال:اسفه خالي مااقتنعش..انت لو تبي درق شي ع بشر بش تحافظ ع زواجي منه زمان..توا خلاص انفصلنا وكل حد مشي ع حاله ماعندك شي تخاف عليه..
الاشهب بإنزعاج؛كان نندري منادتيني ع خاطر الموضوع هدا ماجيتش..
وجي بينوض هي شدت يده بقوة..
هو قعد يشبحلها...
وهي تشوفله بنظرة اصرار ممزوجه بتوسل..
غمض عيونه بإستسلام بعدين فتحهم وقال:باهي تو نقولك لكن بشرط..
نوال ضمت ايديها لبعض وقالت:نسمع فيك..
الأشهب:ماديري يجيبلك المصايب يانوال ماتدخليش روحك في مشاكل كبيرة ضرك..
نوال؛لهالدرجه اللي بتقوله خطير..
خالها بجديه؛ايه..
نوال هزت راسها وقالت:باهي..
هو تنهد وقال:زي ماقلتي اني كنت متحمش في شراكتي مع بشر لأنه رجل اعمال ناجح ووصل للأماكن بش الواحد يوصللها لازم يتعب هلبه..وياريتني ركزت وقتها ع الحاجه هادي..المهم..صدفه..او نقولوا في حد جابلي معلومه ان بشر...سكت شويه بعدين قال...خاش في اعمال مشبوهه تجارة مخدرات وسلاح..
ضمت شواربها بأسف وألم..
الاشهب؛طبعا مشيت واجهته نكر ولما ضغطت عليه هددني..واني يعني طبيعي جدا بنخاف ع نفسي صغاري عيلتي وعليك انتي بنت اختي..
نوال:هدا علاش تباعدت علينا فتره..
الاشهب؛ايه تهديدات بشر خوفتني لاني هداكا اليوم شفت وجه تاني لبشر وجه يخوف هلبه..
نوال بإستياء قعدت تشبح في الفراغ ودموعها في عيونها..
الأشهب؛نوال خلاص انتي انفصلتي عنه انسي اللي سمعتيه مني..ماتخلنيش نندم..
شبحتله بعدين هزت راسها وقالت؛ماتخافش اصلا انتي مانقدر ندير شي خلاص...
شد يدها وطبطب عليها باليد التانيه..
هي ابتسمت بالغصب ودموعها في عيونها....دموع حسرة واسف ع احلى سنين عمرها اللي راحت ع الفاضي..
🍁🍁🍁🍁
وفي حوش اهل العزاء..
كان زحمة بالناس...وهذا الغير متوقع بالنسبه لعيلة خالد..
بعد الجنازة ياما صار في خواته...
اللي كانت تهاني تشبحلهم بإمتعاض.
مش قادره تصدقهم..مش متقبلتهم..
تخلوا عنهم وعنه السنين هادي كلها وتفكروه لما مات!
معاش قدرت تتحمل..شبحت لنسيبه وقالتلها:نبي نركب لشقتك عادي..
نسيبه شبحتلها شويه بعدين حدت يدها في جيبها وطلعت المفتاح وعطتهولها..
خداته تهاني ومشي خشت لدار الدروج وسكرت وراها الباب..
ونسيبه تشوف للباب وهي تفكر في حالتها..
اما مريم كانت حدا امها ونساوين خوتها اللي جايين يعزوا..
لكن قلبها وعقلها مع جهاد تبي شن صاير في حاله وتطمن عليه...
🍁وجهاد فهالوقت..
كان في الطريق راكب مع جمعه وعمه سعيد..
جمعه مرة مرة يشبحله من المرايه...
يلقى فيه سارح في عالم تاني...
وصلوا للزنقه وخشوا...
شافوا الخيمه منصوبه قدام الحوش...
درس جمعه بحداها...
جهاد لما السيارة وقفت استاقظ..
شبح قدامه شاف الخيمه...قلبه تقطع...
لما نزلوا عمه وولد عمه من السياره قعدوا يشبحوله...
هو غمض عيونه وفتح باب السيارة..
قعد لحظات بعدين فتح عيونه ونزل وسكره...
مشي طول للخيمه..
وجمعه حاوط عمه من كتافه ومشي بيه للخيمه..
🍀🍀🍀
ومروا يومين من العزي..
البكي خف والدموع انكفت...
خواته مازال متأثرات...بس عفاف كانت عاديه...
وتهاني حابسه روحها في شقة نسيبه ماتبيش تشوف عماته او أي حد من عيلة بوها...
ومافي حد فكر يجبرها تنزل لوطا تقابل الناس..وماكانت تقابل في حد غير سارة...
🍁اما خوها خليل فقاعد حبيس حجرته في الحبس مايبيش يطلع منها..
والوضع هدا ماكانش عاجب اسعد لأنه بيعطلهم عن خدمتهم...
🍁من جهة تانيه..
وصل الخبر لرفيق في ثالث يوم من الوفاة...
صارت في حالة في الحبس جن من الصدمه كان يبكي ويعيط ويخبط والمساجين اللي معاه كانوا متعاطفين معاه هلبه..بس ماقدروا يديروله شي..خلوه يطلع اللي في قلبه بش يرتاح..
🍁🍁🍁🍁
الساعه الخامسه والنصف عصرا..
مجاهد وهو يتغدا ع الواقف:باهي تو نرفعكم وتوا رواحكم..
سدينه؛باهي تغدا انت لبين ماوتينا ارواحنا..
ومشت طلعت من حداها وتوجهت لدار بناتها..
فتحت الباب وقالت؛قال باهي هي نوضوا وتوا ارواحكم..
دانيه:باهي باه..وناضت بطلع جلابيتها من الدولاب..
سدينه:حتى انتي نوضي وتي روحك ..
رتاج بتردد:ضروري يعني!؟
سدينه؛حتى انتي تعرفيهم ويعرفوك وبعدين كان طلعنا بتقعدي بروحك وخوك رشيد في الجامع..وبوك بيمشي مع مقبوله للمراجعه...
دانيه:نوضي وتي روحك رتاج نوضي..
تنهدت رتاج وقالت:باهي..
سدينه:خفوا رواحكم...
ومشت طلعت وسكرت الباب...
🍁🍁🍁🍁
مقعمز ورا مكتبه وهو يقول..
هيثم؛ترا شوف قداش مازال حاله برا..
الممرض:لحظه بس..
ومشي طلع..
هيثم رفع يده وشاف الساعه..رفع حواجبه...
ع خشة الممرض..
شبحله...
الممرض:دكتور في وحده برا قالت تبي استشارة بس..
هيثم؛قوللها تجي غدوة للدكتورة امال..
الممرض؛مصرة عليك انت دكتور قالت جاياتك بالتعني.
هو عقد حواجبه بإستغراب..مط شواربه للاسفل بعدين قال:خليها تخش..
الممرض؛حاضر...
ومشي طلع...
شويه وخش وخشت وراه..
هو لما شافها استغرب هيئتها مراة لابسه ملايه من غير خمار ونظارات مغطيات عيونها..
هيثم وهو عاقد حواجبه بإستغراب:تفضلي..
#حال_الدنيا
#البطل_المغمور2
....يتبع.....
عارفاته جزء قصير سامحوني واعتبروه تعويض بسيط عن الايام اللي فاتوا
