#البطل_المغمور2 "زهور القمر"
#جمان_فريد
#الجزء_العشرين "أول الراحلين"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐
في الجنان..
تكنس تطوعا منها ماحد قاللها دير شي..
هي تبي تكسب العيله وتبي راجلها يكون ديما راضي عنها..
في هلبه زيها..يعني مش حالة نادرة..
هو خش للحوش مروح مشوار كان يدير فيه شافها وهي تكنس..
قعد يشبحلها وهو مبتسم...لاحظ انها بتقرب من غصن شجرة من مركزة عليه لو وصلت فيها حيخدشها او ينوش عيونها..
قدم بسرعه ولين كانت خلاص حتوصل فيه هو رفعه فوق..
وهي لما شافاته قدامها انخلعت..
رضوان بضحكه؛يابنتي قوليلي تشوفي غوله؟!..
هي حاطه يدها تحت رقبتها من الفجعه وقالت؛لا غير الدنيا كانت هاديه ومافي حد وانت طلعت فجأة..
ضحك ووخر بعدين قال؛فوتي..
هي تحشمت وكملت كنس ولما فاتت...هو مشي قعمز تحت الشجره وقال..
رضوان:دنيا انتي شن شهادتك؟
دنيا؛اني خديت الشهاده الثانويه السنه اللي فاتت..
رضوان:ومش مفكره تكملي قرايتك..
دنيا:ضرار مايبيش..
ابتسم وقعد ساكت..
وهي مازال تكنس..
رضوان؛انتم قداش اخت؟
دنيا وقفت وقالت:اربعه..
رضوان؛كلكم متزوجات..
دنيا؛لالا في وحده مخطوبه عرسها مازال..
رضوان؛كان زيك خلوها تفسخ اني ناخدها..
ضحكت..
رضوان بضحكه؛واخيرا ضحكناك...
وقعد يهدرز عليها..وهي انطلقت معاه وقعدت تهدرز..
وامه في دارها تسمع في هدرزتهم وبصارته وتضحك...
عادي سلفها زي خوها..شن فيها كان هدرزت عليه وهدرز عليها وضحكوا مع بعض...مافيها شي...عادي...!
ومش بس هدا العادي..
وقف وقال؛والله لايمل يادنونه..
ابتسمت بخجل..
وهو قال؛ خسارة غدوة مسافر..
هي قعدت تشبحله بدون ماتعلق..
رضوان:تليفونك عندك..
دنيا:ايه..طلعاته من جيب التوته وهو يشوف للحنه في ايديها..بعدين شبحلها وقال؛هي سجلي رقمي..
دنيا؛باهي..
وقعدت تسجل في الرقم..ماهو ارقام سلافها كلهم عندها زي ماسلفاتها عندهم رقم راجلها..
يتصلوا ببعض ويهدرزوا عادي..عادي جدا..ماهو سلفها زي خوها...!
بعد ماسجلت الرقم قال:ماتقعديش برا سادك صقع..
دنيا ابتسمت وقالت؛باهي...
هو ابتسم ومشي خش..وهي بعد ماردت المكنسه في مكانها وخشت للحوش...
🍁🍁🍁🍁
الساعه الخامسه مساءا..
السمي معبيه غيوم....والجو بادي يصقع..
الشتي خلاص خش..
وهي واقف قدام باب الفيرندا الزجاجي..
حاطه ع كتافها شال وفي يدها مق بابونج تشرب فيه..
وهي تفكر في سبب زيارة هيثم..والكلام اللي قاله..
كانت في قمة الخوف...ومش مستوعبه لتوا طلع فعلا لطليقها السابق علاقه بمافيا المخدرات..
التفتت شبحت لجهه معينه..
بعدين مشتلها..وصلت في دروج ينزل تحت...
نزلت منه وتوجهت لصالة استقبال الضيوف..
فتحتها وخشت...مررت نظرها عليها وهي تتذكر الحفلات والعزايم اللي دارهم زمان..
وتذكر في الناس اللي كانت تجيه..
واسعد بالذات تفكرت لما كان يجيهم وهي مش متحمله وجوده...
لاهو ولاأي حد من معارف راجلها..
•••••••••
نوال؛كل ليلة يجيك هدا شن القصه بشر..
بشر وهو يطلع في ظرف من الخزنه:امور خدمه ماتخصكش..
نوال:طبعا اللي تبيني نعرفه نقول ولاماتبنيش نعرفه تقولي مايخصكش..
بشر؛نوال مش فايقلك...
ومشي طلع من الدار...
وهي مشت سكرت وراه بقوة من الغضب...
••••••••
طلعت من الصاله وسكرت بابها..ورجعت ركبت من الدروج وهي تفكر..
وصلت فوق وقعدت تمشي...وكلام هيثم يرن في وذانها..
《شن ممكن يكون شكل العلاقه اللي تربط رجل دوله في هداكا الوقت بضابط شرطه انعرفت خيانته بعدين!؟
نوال بصدمه؛صح بشر استغل منصبه هلبه وكان يمشي لناس في امورها من تحت الطاوله زي مايقولوا..لكن ماتوصلش للمخدرات..ولده قريب راح فيها بسببها..
هيثم؛مرات يكون هدا ثمن الإثم قاعد يدير فيه رجعله في واحد من صغاره》
مسحت دموعها...وشبحت فوق...بعدين مشت ركبت للدروج قاصده دور الثاني...وصلت فوق ومشت لمكتبه...
وقفت قدامها وتفكرت....
•••••••
نوال بصدمه وهي تبكي:حي عليا يابشر..ولدي ولدي اني مدمن يابشر...حطت ايديها ع وجهها وتقول..لاياربي مانبيش نصدق...
بشر بألم كان يشبحلها وقال؛كله ليه ثمن..
حولت ايديها وقالت؛شن قصدك؟
بشر عقد حواجبه:قصدي اهمالنا ياهانم طالقينه يدير مايبي..وشن مايطلب يكون قدامه..وكان اعترضت وقلت لا تقعد تزني ع راسي لين نعطيه هدا كله بش تفتكي من دوشته ويهج من قدامك..
نوال:طبعا بتحط اللوم عليا اني بالك بتلوم روحك اكيد الغالطه الوحيده واللي تتحمل كل شي قاعد يصير بروحها نوال...
••••••••
فاقت وين قعدت تتردد في وذنها جملة...
" كله ليه ثمن.."
نوال بصدمه؛معقوله سنين عمري هادي كلها راحت مع مجرم تاجر مخدرات واني غافله عنه..! وين فطنتك يانوال وين يالماحه ياذكيه يلي مايعدي عليك شي..!
"نوال هانم"
التفتت وشبحت لنوارة..
نوارة؛الأستاذ اشهب جاي يتعشى هنى؟.
نوال وهي تشوفلها حركت راسها بالنفي..
نوارة هزت راسها ومشت..
ونوال معاها بعيونها و وهي تتفكر...بعدين جي بين عيونها موقف قديم حتى هو..
《نوال؛علاش فضيت الشراكه انت وبشر قولي الحق خالي مادرق شي...
الاشهب وهو يحاول يدير روحه عادي؛ماتفاهمناش يانوال تفكير بشر يختلف عن تفكيري..كل حد وليه مبادئه في الشغل..
نوال:وتوا بس عرفتوا ان مبادئكم تختلف !؟
الاشهب؛ايه يانوال وتوا سكري ع الموضوع هدل مانبيش نتكلم عن الخدمه حتى فالحوش يابنتي》
غمضت عيونها وحطت يدها بيناتهم...
ع جية نرجس؛ماما...
نزلت يدها وفتحت عيونها وشبحتلها..
نرجس مدتلها الهاتف وقالت؛بابا..
قعدت تشبح لهاتف بنتها..
نرجس:خودي ..
نوال مطت شورابها لداخل بعدين خدت التليفون وردت عليها..
نوال؛ايوه بشر..
"اهلا..شن الأخبار"
نوال؛تمام الحمد لله..انت شن داير توا..
"اهو ساعه تانيه ونخش العمليات"
نوال:تنوض بالسلامه ان شاء الله ربي يشفيك..
"الحمد لله...قالوا مشيتي لفاتح"
هي رفعت حواجبها وقالت:ايه من قالك..
"نرجس"
شبحت لبنتها وقالت؛اها..
"احسن مادرتي احسن مادرتي"
نوال:تمام لاباس عليك..ومدت التليفون لبنتها مشت لدارها..
ونرجس مشت لدارها وهي تكلم في بوها...
🍁🍁🍁🍁
"ارفعي هي"
سارة برجاء؛يارب مايرده عليا..
ومشت بتعطي لبوها طاسه السحلب..
خشت عليه الصاله وفيده جهازه اللوحي يشوف فيه..
سارة؛تفضل بابا..
هو شبح لطاسة السحلب...خداها بدون مايشبحلها..
سارة؛بابا..
اشرلها بيده تمشي..
هي سكتت بضيق وحزن وهو قعد يشرب في السحلب..
ع جية جنان؛بابا..
شبحلها..
مشتله وهي تقول:شوف بابا ظفري كيف تكسر ماقدرتش نحوله حار..
هو حط الطاسه والجهاز وقال:تعالي..
مشتله خداها قعمزها في حجره وقعد يشوف لظفرها بعدين نادى؛خالتي..
طلعتله ماجده من بار المطبخ؛نعم..
هيثم؛بالله قراضة الظفار..
ماجده؛هي لحظه بس..ومشت..
هيثم؛وبعدين شن الظوافر هادم مش قلت قصيهم..
ع جية ماجده بالقراضه؛قالت نبي بابا يقصهم هو بس اللي يعرف انتي توجعي فيا ياخويله..
ابتسم هيثم وقال؛تمام تمام..
وبدي يقص في ظوافر جنان وخالته تشبحله...
وقلبها واجعها عليه يخدم برا وداخل ماأرتاحش بكل وبناته بدوا يتعلقوا بيه هلبه وهدا اللي مخوفها..هي تبيه يتزوج لأنها تعرف الراجل لازم تكون معاه مراة تعاونه تشيل معاه الحمل تكون معاه في مواضع ماتكونش فيها اي مراة لراجل غير زوجها..
وبدت بشكل جدي تفكر تزوجه...
🍁🍁🍁🍁
"كيف تتجرأ تكلمني ع حاجه تخصني كيف تدخل في شي مايخصهاش"
جمعه؛وطي صوتك احسنلك..
جيهان:لا مش منقصه صوتي..وبعدين خواتك كيف يخشوا لشقتي من وراي...
جمعه؛مافي يقدر يخشها الشقه وحني مش فيها التصرفات هادي مش لخواتي..
جيهان رفعا حواجبها وقالت:اها معناها امك يومها لما جابت الشغاله..
جمعه بنظرة تخوف:جربي توصلي في أمي بكلمه وشوفي شن يصير فيك..
هي خافت ومعاش قدرت تتكلم برغم انها نظراتها ليه كانت حاده..
جمعه؛وبعدين عندهم حق..برغم اني ماشكيتش لأن هدا مش طبعي بس اني اغلب وقتي لوطا لأني مش طايق نقعد فهالفوضى..وراك تقوليلي اني في حوش بوي مانمش في شي وماندير شي لاني مش قادر نتخيل كيف وحده في عمرك امها ضملها في دارها..
عيونها تعبوا دموع وهي تشبحله بنفس النظرات..
جمعه؛ديري لروحك..اني لصبري لحدود يابنت الناس..واهو حذرتك واني نحذر مرة وحده بس..
ومشي خدي مفاتيحه من ع الزيانه وطلع من حداها..
وهي نزلوا دموعها...وقعدت تفكر بخوف في تحذيره ليها...
🍁🍁🍁🍁
"هو فنجان قهوة اشربيه وولي اقري"
دانيه وهي لاهيه بالكتاب:لالا مش وقته بكل يارتاج..
رتاج؛بتقتلك هالقرايه..
ومشت طلعت من حداها وسكرت الباب..
وهي غارقه في الكتاب وتقرا...بعدين خدت تليفونها واتصلت بوحده من مجموعتها متاع البحث...
🍀🍀🍀🍀🍀
واستمرت دانيه لأيام تشتغل ع البحث ومعاها زميلاتها في الحوش ع التليفون وفي المدرسه وجه لوجه..
لدرجه ان سارة خلتها ع راحتها مابتش تشغلها لان عارفه ان حكاية البحث ولت بالنسبه ليه تحدي لازم تربح فيه..
🍁التحدي اللي قاعد مواصل فيه خليل وهو في الانفرادي بعد ماسمحوا يدخلوله كتب ومذكرات الدراسه هو كان غارق فيها...فيه حاجات كانت صعبه عليها خلاها ع جهه لين يطلع ويقرا فيها مع زياد..
🍁زياد اللي تقرب هلبه من خالد وقاعد يعتني ويخاف عليه وكأنه بوه..وخالد في الفتره قلبه واكله ع ولده ويخمم عليه وخايف لو يضيعه اسعد ويريح ضحيته زيه زي هلبه سبقوه...
🍁وماكانش عنده ادنى علم باللي صار لرفيق اللي رحلوه لسجن في تاجوراء بعد اعترافه باللي داره في مرته واثبات التهمه عليه..وقرار الترحيل لهداكا السجن كان وراه رضوان بوكراع اللي كان يبي رفيق يقعد بعيد عن خليل وشغلهم معاه...
🍁وجهاد..جوه خوت سجى للورشه وصارت بينه وبينهم مشكله انتهت بسؤال جهاد خوتها عن السبب اللي دفع رفيق يدير فيها هكي خصوصا انها كانت برا الحوش وقتها..
وهما اللي كانوا يبوا يديروا اي شي بش يبعدوا عنهم الشبهات كانوا عاجزين يديروا لأختهم شي بعد الحاله اللي وصلتلها..
المراة خلاص عقلها شبه راح ووضعها كان يرثى له...
وامها ليل نهار تدعي ع رفيق...
ومافي حد سعيد ومرتاح باللي صار مع رفيق غير سارة..
🍁في مجمع العيادات...
••مجاهد؛عندك حق تاخد مني موقف..بس نقولها ومش متحشم فيها متمسك ببنتك هلبه لأني عارف مش حنلقى زيها صعب جدا نلقى زيها في وقتنا هدا ومعذور في اي تصرف نديره...
هيثم قعد يشبحله وهو مضيق عيونه بإبتسامه بعدين قال:امتى تقدر تجيب اهلك؟
ابتسم مجاهد بفرح وقال:والله لو عليا بعد ساعه تانيه...
ضحك هيثم ضحكه خفيفه..
مجاهد بإبتسامه؛يوم الخميس ان شاء الله..
هيثم؛كويس يوم الخميس ماعندي شي..
مجاهد كان بيطير من الفرحه بس قدام هيثم حاول ع قد مايقدر يثقل روحه...
بس وين روح للحوش...
صوت الزغاريد طلع مقبوله وهي تجر في كروسة مجيد جري..
وين وصلوا في الصاله مجيد قال؛خير دعوتك كلبتي..
سدينه بفرح:فرحانه بولدي بيتزوج خلاص..
مجيد شبح لمجاهد وقال؛نويت خلاص..
مجاهد بإبتسامه؛ايه خلاص..
هز مجيد راسه بإستسلام وقال: ع خير ان شاء الله.
مقبوله اللي كانت محروقه انها فات بنت اختها؛ولقيت وين تسكن؟!
قام مجيد عيونه وشبحلها..
وكلهم وجهولها انظارهم بحده...
مجاهد ابتسم بجديه وقال:اني ان شاء الله بندير العرس بعد عام يعني من هني لهداكا الوقت نكون بنيت وكملت بعون الله..
سكتت وهي تسحن...
ورتاج:واني باش ماتبي نعاونك..
مجاهد؛مانبي منك شي غير تردي بالك من روحك انتي بس..
ابتسمت رتاج...
سدينه:الحمد لله ياربي اللي عشت وريت هاليوم..
مجاهد؛وبإذن الله تعيشي لين تشوفي صغار صغارنا..
ابتسمت سدينه بحب وعيونها معبيه دموع وقعد تمسح ع ذراع مجاهد..
🌼اما عند سارة...
"تبصري!"
ماجده بضحكه؛بصارة عينك توا قالي الخميس جايين ان شاء الله..
سارة قعدت مسهمه في خالتها وهي مش مصدقه..
حاسه روحها في حلم من احلامها بيه..
يعني حلمها حيتحقق خلاص وترتبط بفارس احلامها..
بالراجل اللي ياما كتبت عنه وتمنتاه واخيرا ربي استجاب دعائها وحيجمع بينهم بالحلال!
حتولي عن قريب خطيبته...خطيبة مجاهد..!
ماجده؛سارة..سويرة...
استاقظت سارة وقالت:امم!
ماجده بضحكه تعجب:تليفونك يرن..
التفتت وشبحتله بعدين خداته لقت دانيه تتصل..
فتحت الخط وجاها صوت دانيه وهي تقول..
"مرت خوي شن جو"
حطت سارة يدها ع فمها وهي تضحك بدهشه..
توا بس صدقت واستوعبت...
🍁🍁🍁🍁
خش للشقه
وهي مقعمزة تقرا في الصالون فات جنبها سلم ومشي طول للدار..
هدا حاله من لما صار اللي صار يروح من الخدمه..يدوش ويطلع من الحوش يمشي للحوازة...ويروح في اخر الليل ويرقد..
عايش حالة تشبه حالة العزله..
وحالته هادي واجعتلها قلبها عليه ومضايقتها هلبه..
ناضت ومشت لدار النوم وقعدت تراجي فيه لين يطلع...
طلع...
شافها قدام بس فاتها ووقف ع المرايه وهو ينشف في شعره..
مريم بحزن؛علاش دير هكي..
ولا كلمه..
مريم؛جهاد مش باهي ليك اللي دير فيه..قعمز معاي فضفض احكي اللي في خاطرك وماديرش في روحك هكي..
حول الفوطه وبدي يمشط في شعره.
مريم ؛جهاد...
حط المشط وشبحلها ؛شن تبي نحكيلك شن تبيني نقول..اللي صار وانقال فيه ماينحكى يامريم..اني مش قادر نحط عيني في عينك..متحشم نشبحلك مش نحكيلك..
مريم بدهشه؛متحشم!! منك جد جهاد انت متحشم مني اني!!؟
جهاد:في فرق كبير يامريم مافيش مقارنه...
مريم؛في الغلط مافيش فرق ومقارنه...وبالنسبه ليا مايهمني حد غيرك انت...انت اللي عشت معاه هالفتره وعرفته..راجل بمعنى الكلمه متربي اكثر من اللي ليا ومن دمي...ماعندك علاش تتحشم مني ياجهاد...
ولأول مرة بعد ايام...ارتسمت ع وجهه ابتسامه امتنان..
قرب منها وباسها ع راسها وقال:اقسم بالله تستاهلي كل خير تستاهلي اللي خير مني الف مره..
وهي تشوفله بإبتسامه قلبها وجعها لين دمعوا عيونها..
بس دارت روحها عاديه..
خدت يده وقالت؛برا توا قعمز قدام تلفزيون خل نمشي نديرلك عشي ماصارش..
جهاد؛لابري قرايتك تو نطلب من برا..
مريم:بلااسراف وتبزعيق زايد مايصير شي كان نضت خديت راحه ودرت حاجه نحبها..هي برا اطلع اطلع وقعمز وين ماقتلك..
ضحك...ومشي طلع وهي دف من ظهره..بعدين طلعت وراه وهي تضحك...وقلبها من داخل موجوع...
🍁🍁🍁🍁
ومرت هالليله..
ويامطولها من الليله ع سارة ومجاهد..
مش قادرين من شده الفرح..واخيرا ربي قرب بينهم وحيصير بينهم رابط رسمي بعلم الجميع..
بدون علاقه محرمه في الخفاء...بدون خيانه لثقة الناس اللي يحبوهم..
بدون مايخونوا الله سبحانه وتعالى...
الحب الطاهر حتى وان حكم فيه النصيب..
يقعد ذكرى جميله نقيه...وتقعد اول مرة عرف فيها الواحد معنى الحب الحقيقي...
~~~~~~
♡ الحمد الله ماجربتش نعيش علاقه حب خارج الاطار الشرعي وهادي نعمه من ربي وممتنه ليه هلبه عليها..بس متأكده مهما عاشوا الناس اللي دارت علاقات في الخفاء من لحظات في نظرهم حلوه مش حتكون احلى من اللي عشته في هديكا الليله...ابتسمت وقالت...حاجه ربي يشوفلها بعين الرضا شن بتكون يعني..ولاأحلى
~~~~~~
🍁🍁🍁🍁
"شن هدا؟"
ضرار:حبوب منع حمل.
دنيا؛لاضرار حني تفاهمنا حاجه زي مش حناخدها اني نعرف كيف نتصرف صدقني العام هدا مافيش صغار يعني مافيش صغار..حبوب مش حناخد ياضرار
