البطل المغمور

البطل المغمور "بداية النهايه"💗

#البطل_المغمور2  "زهور القمر"
#جمان_فريد
#الجزء_الخامس_والعشرين "بداية النهايه"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
وطلع خبر موت بشر...
الخبر اللي ريح نوال بالمرة...
لكن وجع بنتها وولادها...
وكونه مات مقتول وانتهى هالنهايه... موته اثار جدل كبير في الشارع الليبي..
لأنه كان مسؤول في الدوله واحد كبار رجال اعمال وشخصيه مرموقه ظاهريا...
فاتح بعد ماشبه تعافى وصله خبر موت بوه ماتألمش هلبه ماكانش في بينهم ود ولامشاعر ولافي قرب من اي نوع طبيعي جدا يكون شعوره اتجاهه جامد..
بس الطريقة اللي مات فيها خلات شكوكه اللي في عقله تتأكد..
الشكوك اللي ماقدر يشارك بيها حد حتى اقرب اصدقائه..
زياد...
🍁ومن جهة تانيه..
"لتوا ماوصلتله شي تعرفوا لو يعرف يحرق الدنيا كلها"
:لاياوردة لو عرف بروحه يحرقنا حني بس لازم يعرف وانتي تقوليله..
الوردة"جميلة الباسطي" بقلق؛مافيش غير هكي وربي يجيرنا منه..
🍁🍁🍁🍁
وفي دار مسعود الرايس اللي كان يتواصل مع اسعد عن طريق الهاتف..
الرايس؛زي ماتعرف الصفقه بتم يوم الجمعه بتخش البضاعه بنفس الطريقه اللي خططلها شارون شيطان..بجديات الولد هدا دماغه سم...المهم حني حنحطوا الاحتمالات كلها قدامنا بش ناخدوا احتياطنا...
"اكيد يارايس كل شي حسبت حسابه "
تنهد الرايس وقال؛بعد يوم الجمعه يايرجع الرايس لسابق مجده ياينتهي..
"الرايس ماينتهيش ع قد ماحاولوا ينهوه"
ابتسم بتهكم وهز راسه وهو ساكت...
🍁🍁🍁🍁🍁
"توا معاش في سبب يخليك تقعدي هني"
نوال بضيق:مش عارفه ياخالي في شي مازال مش مريحني..
"انتي خايفه بزياده بس تعالي اقعدي عندي راهو حتى مهاب مش عاجبه هالحال"
نوال:حتى اني مش عاجبني مثقله ع الناس ومرات تجيهم من وراي مشاكل..
"خلاص معاش في مشاكل بعد مات بشر..وبعدين ولادك جوني هني يحسابوك جيتيني بعد العزي اضطريت نكذب عليهم ونقول ولت سافرت"
نوال:احسن..اصلا عارفتهم علاش يدوروا فيها يبوا يتقاسموا حق القصر ماهو الوحيد اللي قعد بإسم بشر..ع العموم تو نقول للمحامي يتفاهم معاهم اساسا معاش نبي نقعد فيه بعد اللي عرفته..
"ع راحتك..اللي يهمني انك تلمي حوايجك انتي وبنتك وصغارها وتجوني طول"
تنهدت نوال وهزت راسها بإيجاب..
🍁ومن دار نسيبه..
للدور الاول...
كانت ماجده مع البنات الصغار ومنهم بنيات نرجس..
تلعب معاهم وتساير فيهم وتغير في جوها معاهم..
بينما نرجس اللي كانت حاسه بضيق شديد..
لقت روحها قدام دار سارة...
وبعد تردد..دقت الباب...
"تفضل"
فتحت نرجس الباب وقالت؛نقدر نخش.؟
التفتت سارة وشافتها ابتسمت وقالت؛تفضلي..
ابتسمت نرجس وخشت سكرت الباب..
سارة اشرتلها ع السرير وقالت؛قعمزي..
مشت نرجس وقعمزت وهي مبتسمه بإحراج بعدين قالت:حسيت روحي مضايقه هلبه ونبي حد نهدرز معاه...ان شاء الله مانعطل فيك على شي؟!
سارة بإبتسامه؛لالا ماعندي شي مهم..
نرجس:اكيد؟
سارة بإبتسامه؛كنت نكتب في مقالة الشهر ومازال قدامي وقت نكملها فيه..
نرجس بإبتسامه؛ايه قالتلي ماما انك تكتبي في مقالات في وحده من الجرائد الالكترونيه..قريتلك اخر مقال عن الام اثر فيا هلبه كلامك عن امك..
سارة وعيونها تعبوا دموع:مهما نكتب عنها مانوفيهاش ربع حقها..مرات نحس ان فالدنيا هادي مافيش زي امي بكل..لافي حنها ولاعطفها ولاحبها ولاطيبة قلبها..
نرجس؛كيف كانت علاقتك بيها؟
سارة تنهدت وقالت؛عندي بيها مجموعه علاقات..مرة امي.
مرة صاحبتي...مرة موجهتي...امي كانت زي مية المطر اللي تنزل عليه ترويه وتخليه يكبر ويخضار...
نرجس؛محلاه تعبيرك..
ابتسمت سارة..
نرجس بإبتسامه:علاقتي بأمي كانت عكس علاقتك بأمك...بس في الفترة الأخيره تغيرت يعني صار في تقارب..وضحكت بإحراج وهي تحط في شعرها خلف وذنهل..
سارة:امك تبان شخصيه مثقفه وواعيه هلبه..
نرجس هزت راسها وقال:ايه مثقفه عندها دار كتب قرتهم كلهم..واغلبهم لكتاب غربيين..بس في المده الاخيره بدت تقرا في كتب دينيه بس..لما طلعنا من حوشنا رفعتهم معاها هما بس..بعد ماولت تقرا فيهم تغيرت فيها هلبه حاجات للاحسن..
سارة وهي تسمع لنرجس شن تقول قعدت تفكر في كلامها
وحست ان ورا التغيير اللي طرأ ع امها شخص واحد مافيش غيره...
وهالإحساس ضايقها وخوفها..
نرجس بدموع؛تمنيت لو بابا استغل فرصة وجوده فهالدنيا وصلح من نفسه قبل ليفوت الاوان..بس مع الاسف فات خلاص..ودموعها نزلوا..
وسارة تأثرت بكلامها..
نرجس وهي تمسح في دموعها؛بابا كان بعيد علينا هلبه بعيد بجسده وروحه..بعده هدا خلا في داخلنا فراغ كبير بالذات اني..عكس ماما الفراغ اللي خلاته قدرت تعبيه لوقت طويل ماما نواره داده مصريه حنينه هلبه ونحبها موت..بس بابا ماقدر حد يعبي مكانه... واني حاولت نعبيه..حبيت واحد كان مهتم بيا اهتمام مافيش منه حبيت اهتمامه هلبه..وانعميت بيه عن كل عيوبه...لما جي خطبني اهلي رفضوه واولهم بابا بس اني تمسكت بيه هلبه...
وهما رضخوا للأمر الواقع ووافقوا..وتزوجنا..وبعد الزواج تأكدت ان الفراغ اللي يخليه الاب في حياة بنته مايقدر يعبيه حد...ونزلت عيونها ودموعها ينهمروا منهم...
سارة بحزن:فعلا مايقدر حد يعبي مكانه..بابا كان بعيد علينا هلبه كنت ديما نحس ان عايش في برج عاجي يشوفلنا من فوق ويحكم علينا من بعيد...بعده علينا كان مخلينا نفكروا ان الفراغ اللي خلاه امي قدرت تعبيه بس بعد اللي مرينا بيه تغيرت علاقته بينا للنقيض واكتشفنا بعد عرفنا صح ان مكانه ماقدر ياخده حد..
مسحت نرجس دموعها وشافتلها بإبتسامه وقالت:ربي يحفظه..
سارة؛آمين يارب..
تنهدت نرجس بعدين قالت بضحكه:بنسألك سؤال خاص شويه..
سارة بإبتسامه:أسألي عادي..
نرجس:امم..انتي مرتبطه..
سارة بضحكه:مخطوبه..
نرجس بدهشه؛جد!
سارة هزت راسها بإيجاب..
نرجس:عن حب؟
سارة:ايه عن حب..بس مش زي المعروف يعني ماكانش في بينا علاقه...مشاعر ومن بعيد بس وسيله التواصل الوحيده بيناتنا الكتب..كان ديما يبعتلي في كتب مع اخته وراهو مافيهاش رسائل ولاكلام ولاأي شي....
نرجس بإبتسامه؛حلو..
سارة بضحكه؛بس عندي ليه صورة..
نرجس ضحكت بعدين قالت:نشوفها عادي..
سارة هزت راسها بإبتسامه وطلعت الصورة من الكتاب ومدتها لنرجس..
خدتها نرجس وشافتها ابتسمت وقالت؛وسيم هلبه...ومدتها لسارة..
سارة خدتها وهي مبتسمه..
نرجس:ربي يكمل عليكم بالخير..
سارة بإبتسامه؛آمين...
🍁🍁🍁🍁
"صدقني يامجاهد المره هادي غير المرة اللي فاتت"
مجاهد؛اساسا المرة اللي فاتت ماتمنتيش يصير هكي ولاينتهي الموضوع بهالشكل..
راجح؛مافي شي انتهي يامجاهد حيبدا كل شي من اول وجديد وخير من قبل..
مجاهد؛كله واقف عندي على راي دانيه ياراجح..
راجح ابتسم وقال؛ورايك انت؟
مجاهد ابتسم وقال؛رايك فيك انك راجل يفرح اي حد بنسبته..
راجح بإبتسامه قال؛بارك الله فيك...
🍁ومن المربوعه لصالة شقة سدينه..
اللي كانوا موجودات فيها سدينه وبناتها وجيهان وامها...
عواطف؛انتم ربي يهديكم كبرتوا الموضوع كان خليتونا حليناه بيناتنا..
سدينه بإبتسامه؛ماتواخذنيش وخيتي الموضوع كبير بروحه مانبيش نفكرك بكلامك اللي قلتيه اكيد متفكرتيه..
رتاج وهي تشبح لأمها كيف تدوي كانت فرحانه ملاحظه تغيير ع امها كبير سلبيتها خفت عن زمان..
جيهان بإبتسامه؛مانبوا نتفكروا شي ..الصفحة هادي نبوا نقلبوها خلاص..
عواطف؛ايه زي ماقالت جيهان..
سدينه؛والله لو دانيه قالت بتقلبها نقلبوها..
رتاج وهي تشوف لأمها قالت في نفسها"تبي بوسه ياسدو"
عواطف كانت عاصرة ع روحها ليمه زي مايقولوا ع خاطر ولدها ومتحملتهم...
جيهان بإبتسامه؛هاه يادانيه شني؟
دانيه شبحت لعواطف شويه بعدين ابتسمت وقالت:حصل خير واللي فات مات..
عواطف ابتسمت بالسيف..
وجيهان قالت؛هاه شنو قولكم ياخالتي سدينه..
سدينه بإبتسامه:خلاص قلبنا الصفحه..
ضحكوا...
وجيهان قالت بإبتسامه؛ربي مايجيب زعل مرة تانيه ويكمل عليكم بالخير..
كلهم قالوا :آمين.
ماعدا دانيه اللي كانت مبتسمه بخجل وتأمن ع الدعاء في قلبها...
•••••••••••
"وتو بعد ماتريحنا من ناحية دانيه بتشقوا بيا شويه"
سدينه:علاش ياغالي شن تبي..
مجاهد؛مانبيش موضوعي يمشي بكلمه وخلاص نبي ندير حاجه رسميه...فضانيه ونلبسها دبله يعني الامور هادي اللي انتم تفهموا فيها..
رتاج؛مش مشكله ياغالي لكن انت تعرف عندهم جارهم متوفي نحس فيهم مايقدروا يديروا شي.
مجاهد؛فضانيه بس يارتاج تقعميزة رجاله وشراب شاهي وكل حد يمشي ع حاله..وانتم تمشوا يوم تاني تلبسوها دبله..
سدينه؛نقولك حاجه اجلها لين اختك تطلع من العده..
رتاج؛لالالا يام ع خاطري ماتأجلوا شي مانبيش نوقف لمجاهد في حاجه خلوه يدير مافي خاطره ويفرح وخيي..
ابتسم...
سدينه بإبتسامه؛خلاص مادام انتي تبي هكي خلاص تو نتصل بماجده ونتفاهم اني وياها ونقولك شن يصير...
مجاهد.تنهد وهز راسه بإيجاب ..
ورتاج قالت؛ع خير ان شاء الله..
🍁ومن الصاله لدار البنات..
اللي كانت فيها دانيه تحكي بفرح لسارة في اخر الاخبار..
دانيه؛فرحانه ياسرو بنطير من الفرحه..
"دوم فرحانه يارب ربي يكمل ع خير حماتي العزيزة"
دانيه بضحكه؛اجمعين يامرت خوي الباهيه...
🍁🍁🍁🍁
تحول في خواتمها من يدها وهي واقفه قدام الزيانه.
وهو خش بمق القهوة متاعه وقال؛ايه ماقلتيش وين كنتي دوري..
جيهان:مش قتلك ماشيه مع امي مشوار..
جمعه:قلتي وسألتك وين قلتي بعد نروح نقولك..
التفتت وشبحتله بإبتسامه وهي تقول:مشينا نخطبوا لراجح..
رفع حاجبه وابتسم من فرحته بالخبر بعدين قال؛وبسرعه لقيتوله وحده تانيه؟..وشرب من المق..
جيهان؛مادورناش بش نلقوا ولوا هو ودانيه..
وهو حاط المق في فمه جمد في مكانه وقعد يشبح لجيهان بصدمه..
هي رجعت شافت للمرايه وقعدت تحول في عقدها وهي تقول؛قتلك يحبها ومايسلمش فيها...
نزل المق وشد عليه بقوة..بعدين مشي طلع من حداها..
وهي مازال تحول في حاجاتها ..
فجأه سمعت صوت حاجه تكسرت..
ابتسمت بمكر وعيونها تعبوا دموع وقالت بصوت منخفض:ان شاء الله تطربق المهم لغيري اني مش حتكون ياجمعه...
🍁حب امتلاك🍁
🍂ومن حب الامتلاك...
للحب من طرف واحد...الموت البطيء كما يسميه البعض..
حب مريم لجهاد...
جهاد اللي بعد موت بوه خش حاله نفسيه خلاته بعيد عن الكل وقته كله في الخدمه ولو طلع منها يمشي للجامع كان اول من يخش واخر من يطلع...وصلاته كلها دعاء لبوه..
والمسافه بينه وبين مريم كانت كل مالها تزيد تكبر...
🍁🍁🍁🍁
ويوم الاربعاء..
كانت تلبيسة دانيه..وهالمرة داروها في فيلا رتاج..
وجابوا لدانيه دبل احلى من الاولات..وبدل التعليقه طقم ذهب ناعم وحلو يليق بدانيه اللي كانت حاسه انها اسعد وحده في هداكا اليوم..مافي حد ع وجه الارض عايش السعاده اللي هي عايشتها...
ويوم الخميس..
كانت فضانيه وتلبيسة سارة...
في حضور نوال وبنتها...وكذلك خالها اللي تعرف على هيثم مؤخرا وتراجع عن فكرة مرواح بنت اخته لحوشه بعد ماأقنعه هيثم ان الوضع مازال خطير ولايستنوا لين يشوفوا شن يصير الأيام الجايه..
كانت سارة في هداكا اليوم عايشه احلى شعور..
وهي تلبس في رمز الرابط المقدس بينها وبين اول انسان حباته في حياتها..فارس الأحلام اللي مافيش بنت ماتتمناش يكون نصها التاني بأخلاقه ورجوله وشخصيته وتدينه..
حست انها ولت كامله بيه لأنه يشبهها...حست انها معاه حتعيش في سعاده مالهاش حد ولانهايه...
🍁🍁🍁🍁🍁
"يعني امتى نطلع من هني مليت منه وضعي هدا"
الدكتور:الاسبوع الجاي ان شاء الله..
فاتح:ايه الاسبوع الجاي امتى بالزبط.؟!
الدكتور؛الأحد ان شاء الله..راك تنسى انت تعرضت لطعن مش حاجه ساهله ممنوع تطلع من هني قبل ليولي حالك باهي..
تنهدت بضيق وهز راسه وقال؛باهي باهي....دكتور..
الدكتور:نعم..
فاتح:جيبلي المصحف..واشرله ع مكانه...
شاف الدكتور لمكان المصحف..ابتسم وخداه وعطاهوله..
فاتح خداه وقال:شكرا...
الدكتور؛العفو...بعدين مشي طلع..
وفاتح فتح المصحف وبدي يقرا...
🍁🍁🍁🍁
الساعه السابعه والنصف مساءا...
نازله هي وياه من الدروج يهدرزوا..
مريم؛مشروع فاشل يامعاذ صدقني البنت رافضه وماليها مايعطوهاش..
معاذ:انتي تقولي هكي صدقيني غير تقوليلهم خوي يبي يخطب بنتكم تشوفي فرحتهم..مايصدقوا يلقوا حد طق بابهم..
مريم :انت اللي ماتعرفش..
معاذ:مش فاهم انتي شن مشكلتك مش تبيني نجيها من الباب واهو جيناها من الباب...قولي الحق مريم قولي ماتبيهاش حتى انتي ولا..
مريم عقدت حواجبها وقالت؛علاش!؟
معاذ؛يعني بعد ماعشتي وسطهم وشفتي مصايبهم تقولي مش ساد اني علاش يدبس فيهم خوي معاي..
عكرشت مريم وجهها وقالت؛موعا اطلع روح اطلع الليل ليل..
ضحك وطلع من دار الدروج وهي معاه..
شويه خبطت راسها وقالت؛حي نسيت ماعين امي..راجي شويه.
معاذ؛باهي سقدي روحك..
خشت مريم لدار الدروج..
وهو مشي للجنان وقعد يمشي فيه ..
فجأة سمع صوت تهاني وهي تقول:قوي الميه يانوسه..
هو وبكل جرأة او بالأحرى وقاحه..
قرب من مصدر الصوت..وشبح من ورا الحيط..
لقي تهاني تسقي في الشجر متاع امها..
باهي اللي تهاني متعوده تلبس حجاب حتى لما تطلع للجنان..
وهو منسجم يتفرج عليها وناسي نفسه..
ع خشة جهاد للحوش..
كان خاش وفيده كيسه معبيه شوكلاته ميلكا..شبحلها وابتسم..
بعدين شبح القدام وتلاشت ابتسامته لما شاف معاذ كيف واقف وكأنه يبيت..
قعد يمشي خطوة ورا التانيه لين وصل وراه وشافه في من يشوف...
كل جزء في جهاد ولعت فيه النار..
طيح الكيسه من يده...وهبط ع ظهر معاذ بيده فجعه..
وجبده ومعاذ اللي انفجع قعد يقوله وهو يرعش:ماتفهمنيش غلط مش قصدي..
ضربه ع فمه بقبضه يده وهو يقول:ياكلب...ياحيوان..ياقليل الشرف
معاذ:والله رايدها بالحلال ..ومالحقش يكمل كلامه وتجبه الضربة التانيه..وجهه كله ولاينزف..
ع نزلة مريم من فوق سمعت الدوشه طلعت من الدروج شافتهم انصدمت..
ورا الحوش..
نسيبه بخوف:شن في!؟
صالحه؛خيرهم اللطف..
وتهاني تسمع في العراك وهي خايفه..
بينما عفاف كانت واقفه في روشن دار الحاجه صالحه تشوفلهم ومعاها عرفه..
جهاد:تعرف ياكلب كان مازال ريتك خاطم من الشارع نقصلك رجليك..
وجبده لباب الحوش ومعاذ يقوله: جهاد مايجيش هكي ياراجل...حني نسابه..
جهاد بغضب:الله يلعنها من نسبه..
وفتح الباب ولوحه برا وسكره بقوة..
ومشي بسرعه للجنان من جهة الكوجينه ومريم لحقاته تجري..
وصل في تهاني شدها من ذراعها وقال:في بينك وبينه حاجه الكلب هدا!؟
تهاني بخوف:لالا اقسم بالله لا.
شدها بقوة لين وجعها وهو يقول:قولي الحق..
ونسيبه وصالحه واقفين يتفرجوا بخوف ع تهاني..
تهاني دموعها نزلوا وهي تقول:والله العظيم والله ياجهاد مافي حاجه والله..
مريم بخوف؛مافي شي بيناتهم ياجهاد خوي يبي يخطبها هو قالي اليوم نفتح معاك الموضوع....
جهاد طلق اخته والتفت لمريم وقال:اللي يبي يخطب يبصبص عليهم درت معاك هني اني قبل لناخدك!؟ لا وفوق هكي الباشا ماكناش عاجيبنه ويعزر فينا تعزير...
مريم بلعت ريقها وقالت؛انت اهدى وتعالى معاي نحكيلك..
جهاد بعصبيه:لاتحكيلي ولانحكيلك اللي داره خوك الحقير اللي ماعنده لاشرف ولاناموس ماينحكاش فيه..لا وبكل صحة وجه يقولي حني نسابه النسابه يديروا لبعضهم...تفوو ع نسبة زي هادي..
ومشي بعصبيه من حداهم...
فات من جنبها بعد مازي عادته ضربها في مقتل...
مش معروف كان ينلام جهاد في حالة زي هادي او ينعطاله العذر..
يعني في النهايه هو زيه زي اي راجل او خل نقولوا زي اغلب الرجاله..صعب يتأقلم ويرضى ويتناسى...صعب جدا..
واي شي يصير معاه مقصود وغير مقصود يذكره..
ويخليه غصب عنه يعبر عن المكبوت في داخله...
بس..اللي زي مريم..مجبورين يتحملوا الام آثامهم طويلة المدى اللي ماتنتهيش ابدا...
"بنتي ماتعدليش ع كلامه قاله وهو حامق"
هادي الحاجه صالحه وهي تحاول تخفف عن مريم المها من الكلام اللي سمعتاه..
بس في صوت تاني غاضب زاد قوة هالألم..
عفاف بحده؛شن شاف خوك يدير ؟
مريم شبحتلها وهي مازال مصدومه..
عفاف؛يبصبص على بنتي النذل هدا..
صالحه؛مادخلهاش المراة ياعفاف..
عفاف بغضب ؛لا دخلها اللي مدخله خوها للحوش وهي عارفه نيته..مش راقده ع وذاني اني وكذا مرة لاحظت شبحات خوك وحركاته..
مريم حاولت تتكلم ماقدرش وكان فمها تلصق ع بعضه..
نسيبه؛خلاص عمتي خشوا داخل الناس يسمعوا فينا..
عفاف مشت لبنتها وخدتها من يدها وقالت؛لو يولي من خوك عشرة فوق بعض بنتي مايطول ظفرها.
ومشت خشت هي وياها...
طاحوا دموع مريم وهي تبع فيهم بعيونها..
نسيبه؛مادوريش كلامهم توا انقال في لحظه غضب..
مريم شبحتلها شويه بعدين لفت ومشت.
ونسيبه وصالحه يشبحولها بحزن...
هي كانت تمشي ودموعها ينزلوا...وخاطرها موجوع لأقصى حد...مكسور...لأجزاء مجزئة..
وقفت لما جو عيونها ع كيسه الشكولاته..
قعدت واقفه تشوفلها هلبه....
شوية وارتسمت ع وجهها ملامح البكاء..
مشتلها وقعمزت ع روس صباعها وقعدت تلم فيهم وهي تبكي بالعبره..
تلم فيهم وتبكي بحرقه وقهر...بعدين ناضت وهي فيدها..
وكملت طريقها لدار الدروج ومزال تبكي بعبرتها.
كل شي حواليها..كل شي يصير معاها يقول ان استمرار هالزواج مستحيل..
وان علاقتها بجهاد انولدت بش تموت...
مريم توا فقدت الأمل تماما...وايقنت ان قصتها مع جهاد خلاص قاربت ع نهايتها....
🍁🍁🍁🍁
وعدا هاليوم....
وجي اليوم اللي بعده...
كان يوم الجمعه..اول زياره لخليل...والزائر مرته..
نسيبه من الصبح كانت متوتره ومش قادره تهدا بكل وهي تتخيل في ردة فعل خليل لما يشوفها...
جي موعد الزيارة..ورفعها جهاد ومعاه امه..
لما وصلوا..
نزل معاها جهاد وخش هو وياها لين وصلها لنقطه معينه بعدين طلعوه وخلوها تكمل بروحها..
وقفت قدام باب غرفة التفتيش تستنى في دورها...
شويه وطلعت وحده مختمره..
وهي خشت بعدها...
فتشوها تفتيش دقيق..
ولقوا عندها القوانتيات..
نسيبه؛والله مافيهم حاجه هاه عندك هما فتيشهم كان لقيتي فيهم حاجه احبسيني..
:قلنا ممنوع حني ولا من قبل ماتخشي هني قالولك الكلام هدا ولا..
نسيبه:ايه قالولي..لكن هادي حاجه خاصه نبي نوصلهاله اني..
:ممنوع..
نسيبه برجاء؛بالله خليني اني نوصلهاله بالله عليك سهرت عليهم.ليالي والله العظيم..اول حاجه نديرهاله بإيديا بالله اجبري بخاطري تربحي اني اصلا ماتنهنيتش بيه تلاته ايام وخدوه مني..حتى لما عرفت روحي حامل فرحتي كانت ناقصه..دموعها نزلوا وهي تقول..مش طالبه اكثر من هكي بالله عليك خلي ندخلهم..
غمضت عيونها وتنهدت بعدين فتحتهم وقالت:باهي..لكن ماتخلي حد يشوفك درقيهم في كمام عبايتك.
ابتسمت نسيبه وهي تمسح في دموعها وقالت؛بارك الله فيك ربي يكثر من امثالك ويجبر خاطرك..تعرفي اني لتوا مانعرفش حامل بشني لكن طلعت بنت بنسميها ع اسمك..
ضحكت وقالت؛ماننصحكش..
نسيبه بضحكه:انتي غير قوليه مرات يعجبني....
🍁🍁🍁🍁
"خليل خالد جمعه...زياره..
خليل خالد جمعه...زيارة"
طلع من داره وهو مستغرب من اللي بيجيه زياره بعد هالمده..
العجيلي؛طيب فيك في من تفكرك وجاك..
ع خشة واحد من العناصر؛خليل هيا..
هز خليل راسه ومشاله بعدين طلع هو وياه...
🍁في غرفة الزيارة الكبيره..
كانت نسيبه مقعمزة وتمرر في نظرها ع المكان والناس اللي فيه...
عيونها تبتوا ع المختمره اللي مقعمز قدامه راجل من هيئته يبان ملتزم...
🍁عقيل؛وردة اليوم بالذات مانبيش نسمع كلام ينرفزني
وردة:كلام الحق ينرفز مالاشنو..هدا كله لأنه تكلمت ع ولدي اللي هو ولدك اللي ديما دايره كبش فداء طبعا ماهو هو ولد ورده..مش ولد نادرة بنت العيلة..نادرة اللي باعاتك وتزوجت غيرك وخلاته يربي صغارك اللي ناكرين وجودك..
هو حط يده ع يدها وابتسم وشدها بقوة وهو يقول:ماتلعبش بعداد ياورده..
ورده من ورا الحمار دموعها ينزلوا من قوة آلامها الداخليه والخارجيه...
طلقها وقال؛ولدك اللي هو ولدي مايصيرله شي وبوه معاه..
وردة قعدت تشبحله وهي ساكته..
ومن غيظها وقهرها منه مكر فيه مابتش تقوله ع حقيقة الفلاش اللي خدوه من البشر..
فجأة انفتح باب غرفه الزيارة..شبحتله..
شافت خليل طالع منه قالت؛شارون..
عقيل بدون مايلتفت:شفتي دماغه الولد هدا كنز..
🍁وخليل يدور بعيونه لين جو ع نسيبه..
لما شافها ماصدقش عيونه..وقلبه فر فران..
وهي تشوفله بآبتسامة شوق وحب ودموعها ينزلوا..
قدملها خطوه ورا التانيه وكل خوفه انها تطلع سراب لو قربلها تبعد..
لكن اللي صار العكس كل مايقربلها تقرب..
لين ولى قدامه..
خليل بعدم استيعاب؛نسيبه
نسيبه بضحكه ودموعها ينزلوا؛نوسه نوسه مش نسيبه...
ضحك من فرحته ومسح عيونه قبل ماينزلوا دموعه وقال؛كيف!
نسيبه؛شن اللي كيف متوقع اني مانجيش نشوفك بكل..اني كان ماجيتش اليوم اشبح شن صار فيها..استاحشتك موت..
هو ابتسم بحب وشد يدها وقعمزها وقال:مش مصدق اقسم بالله..
نسيبه:يعني فرحت؟
خليل:فرحت وبس!! شويه الكلمه هادي ماتجي شي قدام اللي نحس بيه توا..
ابتسمت نسيبه بفرح وقالت:قولي شن حالك شن مداير شن صاير فيك..
خليل بإبتسامه؛الحمد لله معاه هو صابر ومتحمل وقاعد واقف ع رجليا..
نسيبه؛ونعم بالله..
خليل؛انتم شن دايرين كيف عايشين شن صار فيكم وقاعد يصير قولي الحق نوسه..
نسيبه؛اجوبة اسئلتك هادي انت تعرفها والله كلهم اجابات صادقه..ايه عمتي تسلم عليك وبعتتلك معاي حاجات خليتهم برا..وفي حاجه تانيه مني اني...
طلعت من تحت اكمام عبايتها الواسعه زوز قفازات صوف ومدتهوله وهي تقول بإبتسامه حلوة ع وجهها البشوش:هاك..
خليل رفع حاجبه اليسار وقال بضحكه:كيف دخلتيهم هني!؟
نسيبه بضحكه وهي تغمز:مرتك مايصعب عليها شي بإذن الله..
خليل بضحكه:قولي كيف من غير يلقوهم معاك وهما يفتشوا؟!
نسيبه بضحكه:عسلت المفتشه بكلمتين على كم دعوة وتذبيله عيون واني نتصخفلها دخلتني..ههههه..سالتها قتلها شن اسمك قالتلي نجميه قلتلها جيت بنقول نسمي العيل ع اسمك كان جت بنت لكن ماصارش..
خليل بضحكه:تي غير كيف عسلتيها بس؟!
نسيبه بضحكه:قالتلي سميها ع امي نورا...قلتلها امك اسمها نورا وانتي اسمك نجميه!!قالتلي الله غالب امي سمتني على امها..
ضحك خليل..
نسيبه:المهم اتفقنا كان جت بنت نسميها نورا ودخلتني بيهم..
خليل بضحكه وهو مضيق عيونه:اما انتي..
نسيبه بغرور مصطنع:بش تعرف شن عندك..
خليل ابتسم وقال:عارف..
هي ابتسمت بإستحياء ونزلت عيونها لوطا..
هو شد يدها وقال:باهي علاش ماخليتهمش مع باقي الحوايج يدخلوهم هما بعدين..
هي شبحتله وتنهدت بإبتسامه وقالت:ماهو هادم اني درتهم بإيديا..علمتني امك..
قعد يشبحلها بنظرات..كلها حب..وامتنان...والدموع غرقتهم..وطول لبسهم وهي تشوفله بنظرات تشبه نظراته..
بعد لبسهم قال:مش من فراغ قال الرسول خير متاع الدنيا الزوجه الصالحه..انتي كنزي..وثروتي..واحسن شي ملكته في دنيتي..وشكر ربي ليا..ماطلبت شي في دنيتي اغلى منك وربي عطاك ليا وعطاني معاك كل شي حلو..
نسيبه بضحكه ودموعها ينزلوا:قصدك حبستك هادي كل شي حلو!؟
خليل:حبستي هادي احسن حاجه صارتلي بعد خديتك..
ومسحلها دموعها..
نسيبه بضحكه:الكوانطي يخبش.
خليل بتسهويك؛يارقيقه انتي..
فنصت فيه نسيبه وقالت:ماتخلنيش نقلب ع الاندر تيكر...
خليل قعد يضحك بدون بصوت وحط يده ع فمه..
وهي مازال تفنص فيه وشاده ضحكتها..
🍁🍁🍁🍁
الساعه التاسعه ليلا..
في احد مقرات الشرطه في العاصمه..
كان واقف قدام مجموعه من افراد القوات الخاصه...
يوصي فيهم...
رضوان بوكراع؛اليوم يومكم..اليوم يومنا كلنا..حطيح اليوم واحده من اكبر عصابات تجارة المخدارت في شمال افريقيا المنظمه اللي بكل اذرعها الموجوده برا حتسقط الليله...
تار...ليا سنين حاطه ظهري وماشي بيه ومعاهد الله ان ناخده منهم واحد واحد ع اللي داروه ومازالوا يديروا فيه لليوم..
مع الساعه 12 ليلا حتبدا العمليه....استعينوا بالله واستعدوا واحتسبوا اللي بديروه الليله عند الله سبحانه وتعالى قبل كل شي..واللي يقضى له بنهاية اجله في هاليوم..اسأل الله تعالى ان يجعله من الشهداء...
🍁🍁🍁🍁
وتمر الساعات..
واسعد والرايس ع اعصابهم يستنوا في خبر عن الصفقه.
ومن جهة تانيه كان هيثم حتى هو ع اعصابه يراجي في خبر من راجح...
ونوال اللي كانت عارفه بكل شي ماقدرتش ترقد من القلق تراجي تكون الليله اخر ليله ليها مع الخوف والقلق..
🍁"نبيك تدعيلي دانيه ادعيلي وبس"
دانيه وهي تحاول تخفي قلقها:ربي يكون معاكم وينصركم ويحفظك لينا يارب..
"آمين"
وبعد ماسكرت منه ماقدرتش ترقد غمضه..
وهي تحوقل وتستغفر..وتصلي النبي..وتدعي من قلبها..
🍁🍁🍁🍁
العمليه كانت كالتالي..
القبض ع رجال الدوله والضباط اللي يخدموا لصالح المنظمه...
وحدات من الشرطه..حاصرت مبنى المكافحه بالكامل وخشوله بش يقبضوا ع الضباط الخونه...
ووحدات اخرى من الشرطه حاضرت فندق يدار فيه في احدي العمل اجتماع يخص صفقة الليله..
تحاصر كله بالكامل..وخشوله بش يقبضوا ع المتورطين..
الباقي خدوهم من عقر دارهم...
اما عن المكان اللي بتصير فيه الصفقه..
صار اشتباك عنيف بين الشرطه وافراد المنظمه..
وفي هذه الأثناء في السجن...
كانت الدنيا كلها ظلام في ظلام وقت نوم النزلاء...
خشوا الزوز للمهجع اللي فيه زياد..
وجو قدام قدام داره..هو فتحلهم الباب خشوا وسكره وراهم..
بس عقيل اللي ماقدرش يرقد..حس بيهم وطلع يشوف شن في...
في دار زياد..
خليل:المعلومه متاعك اتفقت مع شكوكهم  90 في الميه هو نفسه..
؛اني الحق شكيت فيه من اول ماخشيت بس مادامش شكي من اللي شفته منه وللأسف مشت عليا حتى اني..
زياد؛باهي شن يصير كان طلع هو نفسه اللي قلت عليه...
🍁الجمله هادي مجرد ماسمعها الرايس..
لف وبسرعه مشي لدار وخشلها وسكرها عليه.
وبسرعه طلع التليفون واتصل بأحدهم..
الرايس؛ياحيوان قول الفلاش خديتوه ولالا..
ماقدرش يجاوبه..وينهال عليه الرايس بشتائم بذيئة والفاظ نابيه..بعدين سكر عليه واتصل بوردة اللي ردت تقول وهي مفجوعه؛انتهينا يامسعود انتهينا..
هو قعد جامد عن اي ردة قعل...
بعدين طول سكر عليها واتصل بأسعد..
الرايس؛ابدا يااسعد وماتسألني عن شي كله واضح..
وسكر عليه وهز راسه بوعيد...

#بداية_النهايه
#البطل_المغمور2

....يتبع...