#البطل_المغمور2 "زهور القمر"
#جمان_فريد
#الجزء_السادس_والعشرين "بداية جديده"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
كلهم قدام التلفزيون حاطين ع قناة محليه جايبه الأخبار...
"خليل الذي استطاع ان يكون مثالا يحتذى به وبطلا وطنيا دون مبالغه..سيقضي عشرة اعوام في السجن بعد تخفيف الحكم عليه في قضية الاتجار بالمخدرات وترويجيها..
من امام القصر العدلي...بثينة الهادي...طرابلس"
امه بعد ماتم الخبر قعدت تزغرد بنبرة صوت باكيه..
بعدين جت لمرته وضمتها وقالت:عادي حتى عشرة سنين راضيين بيهم خير ونعمه من ربي يعدوا زي الريح
ونسبيه ودموعها ينزلوا قالت؛اللي يهمني انه تبرأ قدام الناس وكلهم عرفوا من هو خليل..
وتهاني تبكي بفرح وهي تقول؛ان شاء الله يسامحني وخيي ع قلته عليه وعلى ظني فيه..
صالحه بإبتسامه؛وانتي وين كنتي تعرفي بنتي ..
تهاني:مفروض ما شكيتش فيه ..
نسيبه بعدت عن عفاف وقالت؛صدقت خالتي انتي كنتي ماتعرفي شي...واهو الحمد لله عرفتي والناس كلها عرفت..
عفاف وهي تشوفلها:المهم خوك..
ابتسمت نسيبه وقالت؛حتى هو يعرف...
كلهم تفاجئوا.
عفاف بدهشه؛يعرف!؟؟
🍁🍁🍁🍁🍁
"مانبيش اسمي ينذكر ولانبي حد يجيب سيرتي"
راجح؛بس اللي درته تستحق عليه الشكر والتكريم..
هيثم:لالا لاتكريم وع غيره خلاص شكرتوني وجه لوجه قبل يكفي..ارجوك وصل الكلام هدا لمعالي الوزير.
راجح بإبتسامه؛براحتك دكتور..
هيثم؛هي مالا مانزيدش نعطلك السلام عليكم...
راجح وهو مبتسم؛وعليكم السلام...
ومشي هيثم لسيارة جهاد وركب معاه...
جهاد بإبتسامه؛هاه نمشوا..
هيثم وهو مبتسم؛امشي...
تحرك جهاد طول...وبدي يقول...
جهاد؛ان شاء الله غير ترضى عليا امي بعد نخش عليها بهالأخبار..
هيثم:قاعده واخده منك موقف؟
جهاد هز راسه وهو ساكت.
هيثم؛عندها حق ماتعرف شي معليشي تو مع الوقت تلين وترضى..
جهاد تنهد وقال:ان شاء الله...
هيثم ابتسم وقال؛اهو توا تقدر تفتح الورشه مرة تانيه وترجع لسابق عهدها وخير من قبل يخي..
جهاد بإبتسامه اسف:ايه بس حنكون فيها بروحي من غير خوتي..واحد بيقعد في الحبس 10سنين والتاني7سنين..
هيثم:وانت قدها تو تكبر الخدمه خلال هالسنوات ويطلعوا خوتك ويفرحوا باللي درته...
جهاد بإبتسامه حسرة هز راسه وقال؛إن شاء الله...
🍁وبعد طول مسافه..
وصلوا قدام حوش خالد..
نزلوا الزوز من السيارة...
جهاد فتح الباب وقال:تفضل دكتور...
هيثم تنهد بإبتسامه ومشي خش للحوش..
وجهاد خش بعده وسكر الباب...
جهاد؛تفضل للمربوعه دكتور..
هيثم؛لا حتى هني باهي اساسا نبي ناخدها منكم اليوم ونردها غدوة ان شاء الله..
جهاد بضحكه؛تمام..
ومشي خش داخل...
وهيثم قعد يمرر في نظره ع الجنان ويستنى...
🍁خش جهاد داخل وهو يقول:امي..
عفاف مابتش ترد..
وصالحه قالت؛خش ولدي خش..
تنهد بإبتسامه ومشي للصاله وقف قدامها وقال؛السلام عليكم..
كلهم ردوا عليه ماعدا امه:وعليكم السلام..
هو ابتسم وقال؛مرت خوي..
نسيبه؛نعم؟
جهاد؛الدكتور برا يراجي فيك..
نسيبه من شوقها لخوها ولهفتها عليه نست انها حامل وناضت بسرعه ومشتله تجري..
وصلت في الباب شافاته واقف وحاط ايديه ورا ظهرها..
لما شافها ابتسم..
وهي ابتسمت ودموعها نزلوا ومشته بسرعه وارتمه في حضنه..
وهو ضمها وقعد يطبطب عليها وهو يقول؛ليك وحشه يازعيم..
هي ضحكت وقالت من بين دموعها:استاحشتك هلبه هلبه...
هو يمسح ع ظهرها بصمت...
والكل يشبحولهم من ورا ستار روشن دار صالحه وهما مبتسمين ومتأثرين..
هيثم بعد وشد وجهها وباسها ع راسها بعدين قال؛هي تروحي معاي اليوم..
نسيبه هزت راسها بإيجاب وهي مبتسمه..
هيثم:تمام بري وتي روحك واطلعي نراجي فيك برا..
نسيبه؛5بس..
ومشت بسرعه لدار الدروج وخشتلها وهو مش طلع برا..
ولحظات وطلع جهاد بعده...
•••وفي حوش هيثم
ماجده؛غير كان قعدتوا تغديتوا بس..
نوال بإبتسامه؛مافيهاش كيف خالي حالف الغدي يكون عنده..
ماجده بإبتسامة زعل؛والله خدينا عليكم وع بنيات بنستاحشهم هلبه..
نرجس بإبتسامه؛نمشوا ونجوا ع بعض زيارات راهو خلاص ولينا عيله وحده.
ابتسمت نوال..
وسارة ابتسمت بضيق...
•••برا
درست سيارة الاشهب خال نوال فم الباب..
شافه هيثم وهو واقف مع جهاد:عن اذنك جهاد لحظه..
جهاد؛خود راحتك دكتور..
مشي هيثم لسيارة الاشهب وهو نازل منها..
هيثم:استاذ اشهب..
الاشهب؛اوو دكتور هيثم كيف الحال..
وبدوا يسلموا ع بعض ...
ع طلعة نسيبه من الحوش..
وخر جهاد وخلاها تمشي لحوش خوها وهو خش داخل وسكر الباب..
هيثم؛هي تفضل ..
الاشهب؛يزيد فضلك..
التفت هيثم شاف اخته قال؛تعالي نسيبه..
ابتسمت ومشت وراها..
هيثم فتح الباب...وخلا الاشهب يخش هو الاول وبعدين هو وبعدهم خشت نسيبه...
سكر الباب وهو يشوف في الشناطي برا...
بعدين انفتح الباب وطلعوا نوال ونرجس والبنات الصغار..
ووراهم سارة وماجده..
اللي لفتت انتباه الأشهب هلبه...
نوال وهي طالعه جو عيونها في عيون هيثم لاحظت فيهم نظره غريبه هو طول غيرهم وقال بإبتسامه:اهم واتيين يراجو فيك..
سارة بفرح؛عمتو!
ماجده وهي مبتسمه اشرتلها تجي..ونسيبه مشتلهم طول...
الاشهب؛بارك الله فيك دكتور تعبناك معانا..
هيثم؛مافيهاش تعب..المهم الامور كلها تمام توا والجميع بخير..
الاشهب؛الحمد لله..
نوال:مرة تانيه نشكركم ونطلب تسامحونا ع الربكه اللي تسببنالكم فيها..
ماجده؛نرجس تفاهمي مع امك..
ضحكوا..
والاشهب يشوفلها بإبتسامه..
نرجس؛طبعا اني مش مودعه حد لأني مازال نبي نشوفكم ونبوكم تجونا..
الاشهب؛عندها الحق..واني عازمكم يوم الجمعه ان شاء الله ع المزرعه..يناسبكم..
هما شبحوا لهيثم..
وهيثم قال:يوم الجمعه عندي عمليه بعد الغدي بس مافيش مشكله نتغدا ونتوكل للمستشفى..
ابتسمت نوال ..
الاشهب؛خلاص في انتظاركم يوم الجمعه...
هيثم بإبتسامه؛إن شاء الله...
وسلموا النساوين ع بعض..
بعدين مشوا بيطلعوا...
نوال لما فاتت من قدام هيثم كانت منزله عيونها لوطا..
يدوب ابتسم وغير عيونه عنها..
وسارة معاه بالحركه وحست صدرها ضاق بقوة....
خشت للحوش طول بدون مايلاحظها حد...
بعدين خشوا نسيبه وماجده مع بعض وهما يهدرزوا..
وهيثم وقف في الباب....سقدهم لين تحركت سيارة الأشهب..
بعدين خش وسكر الباب..
▪▪▪▪▪
◇اني لهداكا الوقت ماكنتش فاهم اني شن قاعد يصير معاي..او كنت نهرب من فهمه...خوف من هلبه حاجات..هلبه حاجات وكان عندي حق نخاف منها...
▪▪▪▪▪
🍀🍀🍀🍀
وجي يوم الجمعه...
ومشوا لمزرعة الأشهب..
الاجواء كانت فيها حلوة....
والعيلتين كانوا منسجمين مع بعض...
تعرف مهاب ع هيثم وعجبه هلبه..بس بوه كان كل ماله اعجابه بماجده يزيد..
مراة راقيه ومحترمه وضحوكه...وحديثها ممتع...
وهي ماكانت مركزة ولامنتبهه ع شي عاجبها جو المزرعه وعجبها التنسيق متاعها وديكورها...
نوال:كله ذوق خالي الاشهب يحب الاجواء هادي..
ماجده بإبتسامه؛وهو في مايحب الاجواء هادي!؟
نرجس؛تعالوا نوريكم شجر اللوز احلى حاجه هني..
ماجده بإبتسامه:هيا هي..
ومشوا مع بعضهم ومعاهم سارة اللي من قبل ماتجي وهي مضايقه...اساسا ماكانتش تبي تجي...
مر عليها هاليوم بصعوبه..وكانت طول الوقت متحفظه وساكته...ونرجس ركزت عليها..
🍁🍁🍁🍁
تاني يوم..
في المدرسه..
دانيه:وعلاش هكي تفكري يعني شن شفتي ع بوك؟
سارة ودموعها في عيونها:نظرات عيونه..اني حافظه نظرات عيون بابا كويس بعد وفاة ماما الله يرحمها حتى وهو يضحك الحزن يبان فيهم...النظرة هادي تغيرت يادانيه ولت فيهم حاجه حلوة..
دانيه:تبيهم ديما يقعدوا حزينات؟
الكلام وجع قلب سارة هلبه شبحت لدانيه وقالت ودموعها ينزلوا:نبي ماما يقعدوا فيهم ديما مانبيه يشوف لحد غيرها..
تنهدت دانيه وشبحت القدام وقعدت ساكته..
سارة حتى هي شبحت القدام وقالت:مانقدرش نتحمل فكرة ان بابا ممكن يدخل لحياته مراة تانيه غير ماما..معقوله حوشنا تكون فيه مراة تانيه غير ماما!...ياربي مش قادرة نتحمل حتى التفكير في حاجه زي هادي.
دانيه؛مش حاسه انك انانيه هكي؟
سارة سكتت شويه بعدين رشفت وقالت:ايه انانيه في حاجه زي هادي اني اكبر انانيه..
دانيه سكتت ومابتش تناقشها اكثر..فاهمه شعورها واللي تحس بيه توا...صعب جدا..صعب تتقبله..
🍁زي ماجمعه مش قادر يتقبل انها ولت لغيره بعد ماحس روحه انه خلاص بيوصل فيها..
بس كل شي تبدل في لحظه..والحظ جي معاكسه تماما..
"خلاص ياراجل انسى وفكر في عيلتك"
جمعه؛الكلام من بعيد ساهل..
اسماعيل:القصه مش قصة من بعيد ولامن قريب..انت توا راجل متزوج وبيجيك عيل في الطريق معاش وليت ملك نفسك...توا انت بتولي اب..تعرف شن يعني اب؟!
جمعه؛تعرف انت؟!
اسماعيل ضحك وقال؛مش عن تجربه بس بوي خلاني نعرف معناها كويس..الأبوة انك تنسى نفسك وتذكر صغارك بس...
الكلام اللي قاله اسماعيل لمس قلب جمعه وخلاه بحس بشعور غريب وحلو...خلاه يبتسم تلقائيا ابتسامه خفيفه..
اسماعيل بإبتسامه؛صدقني لما يجي ع خير وتشوفه حتضحك من وسط قلبك..
جمعه ضيق عيونه وقال؛قداش عندك عيل من قبل..
اسماعيل بضحكه؛نوض نوض نمشوا نشربوا قهوة في القهوة اللي هني..
جمعه تنهد وقال؛نوض...
وناضوا الزوز طلعوا من حجرة المدرسين وهما مازال يهدرزوا وقدر اسماعيل يغير جو جمعه شويه ويطلعه من الحاله اللي كان فيها...
🍁هي هادي الصداقه🍁
"تو هي هادي الصداقه يادكتور دير في بطولات من وراي واني اخر من يعلم!"
هيثم بضحكه؛بطولات شني ياراجل..وبعدين انجبرت نسكت الوضع تطلب هكي..
احسان؛باهي احكيلي كيف صار بالزبط؟
هيثم تنهد وقال؛هكي كل شي صار بروحه...يعني ربي قدر نكون مع خليل في ليله من الليالي الراجل يفضفض ويطلع مافي داخله...تايب..نادم ..وضميره واجعه ومش مرتاح...حتى بعد اللي داره بوه لما تحمل عنهم التهمه وعطاهم فرصه يبدوا حياة جديده مش مرتاح..قال انه يبي يدير شي يكفر بيه عن ذنبه..وهني اني خطرلي انه مش حيقدر يرتاح من وجع الضمير الا لو حاول ينقد ناس تعرضوا لنفس المصير...ولأني كنت قريب لابوكراع ونعرف الراجل هدا..مش من الوزراء اللي يقعد مقعمز ورا كرسيه ويعطي في الاوامر وتنزله ميزانيه تلت ارباعها في جيبه والربع اللي قعد للناس اللي تخدم تحته...الراجل كان ديما في الميدان وكل قرش في الميزانيه صرفه ع قطاع الشرطه كله..تأكدت ان راجل زي هدا حياخد بيد خليل ويساعد زي ماخليل يساعدهم..صار في الاول لقاء مع ضابط اسمه راجح خير الله وبعدين معاه هو...والباقي تعرفه..
احسان؛اكيد عشت ع اعصابك..
هيثم؛قريب انجنيت..لولا لطف الله وتثبيته ليا..
احسان؛اهو الحمد لله كله مشي ع خير وتخلصت من هم كبير..
هيثم تنهد وقال:الحمد لله...ايه...خبرني عن حالك شن داير كيف كانت سفرتك المدة اللي فاتت..
احسان؛كويسه..مفيده..نفعتني شويه بس مش هدا المهم توا..
هيثم؛شنو المهم؟
احسان رشف من القهوة بعدين ابتسم وقال:قررت نتزوج..
هيثم رفع حواجبه وقال:هي نفسها؟
احسان؛اكيد..يعني صار بينا تقارب مشتيلها مرتين ولاتلاته للمستشفى وتفاهمنا..وبعدين تعرفت ع خوها وخضت معاه صولات وجولات بش اقتنع يعطيني فرصه نشوف بوها..
وتلاقيت اني وياه وهدرزنا وبعد جهاد..وافق يعطي بنته لراجل ارمل...
هيثم؛تو انت تقول جاهدت مع بوها وخوها ومش عارف شني...وولدك؟
احسان؛خيره ولدي اني بنتزوج ولاهو؟
هيثم؛كيف تقول هكي!يعني انت مش نفكر في شعور ولدك واللي بيحسه لما تجيبله مراة تاخد مكان امه؟!
احسان قعد ساكت شويه بعدين قال:مش في كل لازم تساير صغار بالذات في الامور اللي تخصك..هو لو مارضاش توا سيوره يرضى بعدين..واني عارف المراة اللي اخترتها مش حتكون شر عليه لو شكيت انها ممكن تكون هكي ماكنتش فكرت فيها..وبعدين اني مش حنكمل عمري بروحي..هو سيوره يكبر ويتزوج وتولي عنده حياة مستقله وحينساني وقتها اني شن ندير !؟ نقعد مبوم بروحي..نموت مرات ومايندري عليا حد؟! اعتقد من حقي نفكر في نفسي زي مانفكر فيه..
هيثم:ماتواخذنيش ع اللي بنقوله بس ماكانش في بينك وبين زوجتك المشاعر اللي تخليك تراجي شويه تانيه ع الأقل؟
احسان؛هدا مالاش علاقه بهدا ياعزيزي..الحب شي والزواج شي تاني..الزواج يعني سكن استقرار اكتمال..والحب ممكن يجي بعده..
هيثم:القلب مايحبش الا مرة وحده..
احسان ابتسم تهكما وقال؛ياصديقي..يادكتور القلب انت..اكبر كذبه عششت في عقول الناس الفكرة هادي..ان القلب يحب مرة...لا القلب يحب اكثر من مرة مادامه مازال ينبض..مادامك مازال..تتوجع وتبكي..وتفرح وتضحك..معناها تقدر تحب مرة تانيه....واي حد شفته قعد ع ذكرى حد اعرف انه مالقاش من يقدر يلفت انتباه قلبه زي حبه الاول..صدقني لو لقي حيحب مرة تانيه..
اهو نجيبلك مثال من اللي حياته ليا قدوة ودليل..
الرسول عليه الصلاة والسلام والسيده خديجه...اللي يقرا عن قصة حبهم يقول ان الراجل هدا اللهم صل عليه لايمكن يحب بعد المراة هادي..
وبعد ماتوفت بكم سنه تزوج مرة والسبب كان رعاية بيته وبناته..وبعدها تزوج تاني..والمراة اللي خداها هادي حبها حب لايمكن وصفه لدرجة انه كان يعبر عن حبه ليها للعلن السيده عائشه..برغم انك لو قارنت بيناتهم حتلقى اختلاف كبير...
قلب الرسول حب السيده خديجه وقعد بعد موتها وفي ليها مش انه ماحبش بعدها ولاتزوج لا..في انه يود من يودها ومن كانت توده..حطلها في قلبه ركن خاص بيها خلاه ماينسهاش..ولاينسى اللي داراته ع خاطره...ومع هدا قلبه حب غيرها وحب لايوصف....
هيثم وهو يسمع فيه شن يقول كان يمر قدام عيونه قصة حبه مع اسيمه كلها للحظه دفنها...ومش عارف علاش بعدين خطرت عليه نوال...تفكر كل شي صار بينه وبينها من لما عرفها لاخر لقاء كان بينهم في المزرعه..
احسان؛هدا علاش نقولك المقوله هادي ولامش عارف شن هي كذبه كبيره وكلام غير واقعي تماما..
هيثم هز راسه وقال؛تمام..بس هني الموضوع ليه علاقه بولدك ونفسية ولدك..الولد في سن مراهقه رد بالك ياإحسان تهمل نفسيه..
احسان بإبتسامه؛مفكر في كل شي ماتشغلش بالك...ايه انت قولي معاش صار معاك شي جديد لجين مالجين وقعد يضحك..
هيثم تفكر اخر موقف صار بينه وبينها ضحك وقال؛اشرب قهوتك اشرب مش فايق للتسهويك متاعك..
واحسان قعد يشرب في القهوة وهو يضحك...
🍁🍁🍁🍁🍁
"مش عارفه من لما روحوا حبسوا ارواحهم في الدار ومعاش طلعوا"
"تلقيها حاجه خاصه بالخدمه ياماما"
عواطف:مش عارفه وجه بوك بالذات ماريحنيش..
🍁راجح بإنفعال:كيف اني اخر من يعلم كيف السنين هادي كلها تعلم فيا شي مادرتش ربعه..
عثمان بألم؛كنت مضطر ع خاطر جيهان اختك كانت طفله رضيعه لوما دارتش العمليه تموت تصدق ان بوك وقتها عمليه بسيطه زي هادي عمليه فصل المريء عن القصبه مش قادر ندفع حقها...جازفت وخشيت لعالم البورصه كنت نبي ندير فلوس بأي شكل..رهنت الحوش بعت السيارة وخشيت بفلوسهم ولأني كنت غشيم خسرت كل شي..في اليوم اللي امك جابت فيه جيهان اللي كنا نستنوا فيها بالساعه والدقيقه بنت ع خمسه اولاد..ومن هني..بدت ناخد في الرشاوي مقابل خدمة نقدمها لفلان ولاعلان ودرنا عملية اختك و دفعنا رهن الحوش وخدينا السيارة..وخدت يدي ع اللهت زي مايقولوا..
ابتسم تهكما وقال..وكنت كل مانغوص في الفساد اكثر نترقى في خدمتي..هكي كانت ماشيه بلادنا راهو...
وقعدت ع هالحال لين جاني في يوم عرض حتى في الحلم ماحلمتش بيه مليون دينار..مقابل اني نطلع خالد جمعه من الحبس ونلبس تهمته لحد تاني..
الموضوع كان كبير وخش ع الافتراء ترددت هلبه..وترددي كان يخلي في المبلغ يزيد ونفسي الأماره تغويني...واستسلمت ودرت مايبوا وخديت الفلوس اللي قعد نصرف فيهم بعد سنوات بش ماحد يلاحظ شي..وبعدفترة سيبت الخدمه...
راجح وهو مصدوم؛نبي نصدق ومش قادر! بوي اني انت انت بوي تطلع.........والله ماني قادر نقولها..
بوه قعد يشبحله بأسف والم وندم..
راجح؛لو كنت تعرف شن كنت نحس لما ينادوا فيا الرائد راجح عثمان خير الله...كنت فخور اني ولدك اكثر من فخري بنفسي واي انجاز نديره...لكن اكيد توا انت عارف اني شن نحس....مانقدرش نقول تقعد بوي مهما كان..المهم توا احمد ربي ان القضيه القديمه ومافيش عليها ادله قويه دينك...كان هدا رانا توا قعدنا في فضيحه وسيرتنا ع لسانات الناس العافن والباهي منهم...احمد ربك..
بس قعدت حاجه اخيره بنقولها..عشت عمري واني نرفع في راسك فوق..وانت عشت عمرك بش تقصرلي رقبتي في يوم من الأيام...ربي يسامحك هدا ماعندي ليك..
ومشي طلع من حداه..
وبوه بعد ماطلع رجليه معاش حملوه..قعمز ع كرسي المكتب متاعه..وكلام ولده مازال يتردد في وذنه..وخلاه يبكي بألم وندم شديدين....
🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀
بعد مرور شهرين...
"كملتي رحي الصالصه يادانيه"
دانيه:ايه يام...
مقبوله؛قعدت الطعميه والخبزة المرحيه تو اني نديرهم..
رتاج وهي مقعمزة ع الكرسي وتاكل في التمر:كتري كثري مرت بوي كتري ماتخليش يدك مغلوله لعنقك..
سدينه فنصت فيها ودانيه قعدت تضحك بتكمان..
اما مقبوله تجاهلتها وقعدت تخدم عادي..
رجعوا لهوا بالتجهيزات لشهر رمضان...
ورتاج مازال تاكل في التمر وتتفرج عليهم..
فجأة بدت تحس الم...بس تجاهلاته لأنه مش جديد عليها خصوصا انها في شهرها وكذا مرة جاها هالانذار الكاذب..
وتكرر هالانذار باقي النهار وهي تتجاهل فيه لعند ماحست بروحها مش قادرة تتحمل ...
فتحت الباب وطلعت من الدار وهي تقول بألم شديد؛بنموت يادانيه بنموت خلاص..
دانيه وهي شادتها بتوتر تقول:خودي شهيق وزفير..
ورتاج تنفد في كلامها...
ع جية رشيد؛هي تعالي مجاهد يستنى لوطا..
وشد يد اخته وهي شدت في يده بقوة..وقعدوا يمشوا فيها هو ودانيه لين طلعوا من الشقه..
ع طلعة سدينه تجري وهي تقول:بالشويه عليها..
🍁ونزلوا كلهم لوطا...
ولقوا مجاهد فم العماره..
مجاهد:ساعدي روحك ساعدي روحك....
ورتاج تأن بألم..
مجاهد بتوتر؛ساهله ساهله تو تفوت..
وفتح رشيد باب السيارة الخلفي وقعمزوها داخل..
وسكروا الباب..
ودانيه مشت قعمزت جنبها من الجهة التانيه..
ومجاهد وسدينه ركبوا من القدام..
وتحرك طول...ورشيد قعد بالسيارة بعيونه..
السيارة اللي فاتت من قدام محل حسام وهو يشوفلها بإبتسامه وعيونه يلمعوا؛شكلها خلاص...وتو بيضحكلك الحظ ياحسام..خل نمشي نقول لأمي...وخش بسرعه للمحل بس يكلم امه بالتليفون...
🍁🍁🍁🍁
"واخيرا رينا وجهك"
مريم بضحكه قعمزت حدا امها وقالت:كان مش بوي حلفلي والله ماطلعت وراي قرايه سنه لقدوم..
بوها:خودي راحه مرة مرة..
مريم؛لا ياغالي تقدير كويس في كلية الطب مايبيش راحه يبي ثني ركاب بس..
امها:توا جاي رمضان قطع الماكله والشراب معاش يمشي خلاص..كان ماسمنتك مانبداش اني هي..
بوها بضحكه:حطاتك في راسها..
مريم بإبتسامه قالت؛يستر الله..
وخدت فنجان القهوة وناضت..
بوها؛وين وين وين!
مريم؛مابيتش نحثنك قعمزت شويه..والله ماعندي وقت يابوي.
بوها:خلاص ع راحتك بري اقري بري ربي ينجحك يابنتي..
مريم:آاامين يارب...ومشت من حداهم..
وهما يشبحولها لين درقت عنهم..
شبحول لبعضهم بحزن بعدين قعدوا يشربوا في قهوتهم وهما يفكروا بصمت..
🍁🍁🍁🍁🍁
"اااه ياربي اااه بنموت"..
سدينه ودموعها في عيونها؛بعيد السو.. نرتحملي بنيتي تحملي..
ودخلوها لغرفة الولاده..
سدينه؛يارب كون مع بنيتي وسهل عليها..
دانيه:آمين..ماشيه نجيب ميه تبي يام..
سدينه حركت راسها بالنفي..
ودانيه مشت بتأخد ميه..
وهي ماشيه رن تليفونها..
شافت المتصل حطت السماعات في وذاتها تحت الشاربه ومشت قعمزت وفتحت الخط وردت..
دانيه؛السلام عليكم ساره..
"وعليكم والسلام..وينك مش جايه؟"
دانيه:لالا مش جايه مش مع رتاج المستشفى بتجيب..
"الله..ياعمري بتولي خاله"
دانيه بضحكه؛ريتي..
"ربي ينوضها بالسلامه هي والبيبي"
دانيه:آمين..بس تعرفي شنو سارة..واني المستشفى نشم في ريحتها ونشوف في الدكاترة كيف يمشوا ويجوا بالبالطو الابيض تخيلت روحي للحظه وليت زيهم..الله..مش مصدقه امتى تعدي هالسنه ونخش الكليه..
"وووك غرت..دنوني اسقطي ع خاطري خل نخشوا مع بعضنا"
دانيه بتهكم؛شن رايك نبطل بدال مانسقط بش مايقولوش عليا ساقطه..
سارة بضحكه
"ايه هكي احسن"
دانيه:مصح فنزوزتك..
وسارة تضحك بعدين قالت.
"خلاص خل بنصكر توا ابعتيلي رساله لما تجيب"
دانيه؛باهي..سلام..
"سلام.."
وسكرت دانيه..
فهاللحظه تقدم ناحيتها شخص وقف قدامها وقال:تفضلي..
رفعت عيونها وشافتله واستغربت بعدين شافت للشيشه الميه..
:مريضة سكر صح..
دانيه شبحتله بريبه..
هو ابتسم وقال:واضح..تفضلي..
هي خافت منه وخدت الشيشه..
وهو قال بإبتسامه؛تنوض اختك بالسلامه هيا والبيبي..
ومشي وخلاها تبع فيه بعيونها بعدم استيعاب وقالت؛خيره هدا!!؟
بعدين شبحت للشيشه..والتفتت شافت لتلاجه الميه..
تنهدت ومشت خدت منها شيشه تانيه..
بعدين مشت لأمها...
وصلت فيها لقتها فرحانه وطاربه..
دانيه بفرح؛هاه شنو؟!
سدينه بفرحه؛جابت ولد والزوز حالهم باهي الحمد لله..
دانيه بضحكه فرح؛ياروحي واخيرا جي كنعان..
عكرشت سدينه وجهها وقالت؛الله يسامحها شن هالاسم هدا..
ودانيه تضحك وهي تقول:كنعان ..كن عان...هي قولي وراي سدو..
سدينه؛بري عليا غادي...
🍁🍁🍁🍁🍁
الساعه الثامنه مساءا...
في احد الأحياء الراقيه في العاصمه طرابلس.
في وحده من الفلل...
فيلا عيت الحاج عبدالرؤوف..
كانت مرته مليحه مجتمعه باختها وصغارهم حواليهم وهما يسمعوا لوحده من نكت ولد اختها السامجه..
:قالك مرة في صاحب كوشه كسر الساعه متاعه علاش؟!
كلهم قالوا؛علاش.
؛ع خاطر شد الدقيق يعاكس في الدقيقه..
قعدوا يضحكوا..
وامه قالت؛كان نعرف من وين تجيب فيهم هالنكت التافهه...
مليحه؛خل الولد في حاله والله مافي واحد فاهم الدنيا الصح زيك ندوره ديما انت تضحك وجوك مليح..مش زي بعض الكزم..
ولدها شبحلها..
نادر:تلقح الحاجه ياسمعه..
اسماعيل؛خليها تلقح ع حسابها..
نادر؛لا كان ع حسابها خل نلقح حتى اني معاها..
ضحكوا واسماعيل قال؛والله ماني رايقلك..
نادر ضربه ضربه خفيفه ع كتفه وقال:شنو منو؟
مليحه؛ع قصة المصنع هدا خايف بعد ماياخدوه الورثه يلزوا بوه ع اساس عبدالرؤوف واقف حاله ع خدمتهم اللهم لك الحمد ربي مغرقنا في خيره..
اسماعيل؛مش مسألة فلوس هي يام..يام المصنع هدا بوي بناه ع كتافه سنين تبيه بعد خدمة السنين هادي كلها يطلع منه مطرود؟
خالته؛يستقيل..
اسماعيل:مش هاين عليه..
نادر؛غير دقيقه انت علاش تسبق في الاحداث من قال يستغنوا عنه بوك لما يشوفوا اللي داره للمصنع مايفرطوش فيه..
مليحه؛يسلم فمك ندوره والله قتله نفس الكلام...
خالته؛تفائل سلم ولدي وماتتشامئش وان شاء الله يصير ماتبوا..
نادر؛خلاص فكها عاد.
تنهد اسماعيل وقعد ساكت..
نادر:تي ياسر ياراجل طبقت خلوقي..نقولك اسمع هادي اسمع..
اسماعيل ابتسم بإستسلام وقعد يسمعله..
نادر:قالك مرة في واحد......تنين..تلاته..وقعد يضحك..
وخالاته يضحكوا معاه..
واسماعيل وهو مبتسم قعد يحرك قي راسه يمين ويسار بأسف...
#بدايه_جديده
#البطل_المغمور2
...يتبع...
