ولكنني أحببتك🥺 💛

2

#ولكنني_احببتك! 2
#نون_علي💛🌸
طلعت من البيت وانا ما شايف قدامي. زهجت وكرهت نفسي كره يعني  نون دي متربية على  يدي كيف كيف اجي اعرسها  لكن ما مشكله... كلهم دايرين العرس ده انا بتمو ليهم... تلفوني  اتصل لقيت دي  تسنيم اخدت نفس ورديت.. قالت لي وين انت  من قبيل بتصل بيك!،،، قلت ليها معلش بس في موضوع كان لازم اتمو،،، قالت لي بخصوص نون،، سكتا مسافه قلت ليها ايوة،، قالت لي بصوت متقطع  يعني الوصية ح تتمها؟؟  قلت ليها ما عندي حل؟؟  انفعلت قالت لي طيب انا وين؟؟! وريني انا موقفي شنو؟؟! وين وعودك الوعدتها لي،،وبقت تبكي قلت ليها لالا ما تبكي اسمعيني انتي عارفاني إني انا دايرك انتي وما ح ابقى لي زول غيرك  وبخصوص نون دي سنة بالكتير بطلقها بس انتي اهدي... بعديها قفلت منها يعني الحمد لله انا من مشكله لمشكله،،، غايتو عمي العملها فيني ما اظن عملها في زول قبل كده... ياااخ من بين أخواتها ديل كلهم يختارها هي؟!،، نون دي متين بقت على العرس،،، وكمان انا المربيها بتذكر لحدي هسي لمن كانت شافعه طوالي معانا في بيتنا اصلا بيتهم ما بعيد مننا يعني نفس الشارع،، حتى لمن تجينا انا ما ببقى قصاد اخوي "مازن" الفي نفس عمرها ما حصل اهتميت بيهو زي ما اهتميت بيها هي،،، وبعدين مش العرس ده انا بتمو ليهم...
_________
من جانبي انا
بعد اليوم داك ما شوفت عمر ولا لمحتو لدرجه حسيت نفسي مفروض أتراجع بس تاني بتشجع وبقول مستحيل ابوي ده يختني في الموقف ده من غير ما يكون متأكد من سعادتي في  تفكيري داك جاتني امي وقالت لي بعدين الناس ديل ح يجيبوا الشيلة والعرس ح يتم بعد شهر.. لمن لقتني ساكته ضمتني عليها قالت لي يا بتي استحملي اها الفي يدنا شنو ده ابوك وديل اعمامك وريني نعمل شنو؟!،، لمن لقيتها متحيرة حاولت ابين ليها الموضوع عادي قلت ليها لالالا يا أمي أنا ما زعلانه ولا حاجه وبعدين دي رغبة ابوي يا أمي.. قالت لي دي الحاجه الوحيده المصبراني على العرس ده،،، بعديها اخواتي جوا وبقوا يتكلموا عن تحضيرات الشيلة والعرس وكذا... "

" بعديها الزغاريذ والنسوان والجوطه والحبسه و الايام بتجري جري زي الزول الساكيها وانا كل يوم بتوتر زياده  اصلا عمر ده بسمع بيهو سمع،،، وشيماء اختو بتجينا مرات مرات يعني دي الوحيده القريبة من سني  يعني انا 18 وهي 20  سنه وصحبتي وبتكون معاي طوالي بس هسي عشان العرس في بيتهم ،،، حتى اخوي الكبير احمد شوف بقيت ما بشوفو كتير مع موضوع العرس ده.،،،تفاصيل العرس ما كانت ظابطه شديد كونو معظم أهلنا عارفين العرس ده بتوصية من ابوي مع ذلك كانوا مجهجهين،، اما بالنسبه لي الايام بتتوال ورا بعض ايوة متحمسة بس كمان خايفه لدرجه انو حنة عروس ما كنت دايره اعملها بس اخواتي أصروا انها تتعمل وكذا فوافقت ليهم بعد تعب....
يوم الحنة لقيت  اخواتي جايبين لي فستان منفوش بس ما شديد لونو اسود ما طويل من فوق لحدي الكتف ويدينو تلت اربع  في الأول ما عايزه البس بس اخواتي قالو لي يوم واحد في العمر  ضحكت بإستهتار الفكرة مافي يوم واحد ولا اتنين الفكره في فكرة العرس زاتها بعديها عملوا لي مكياج بسيط وتسريحة،،، كانوا  واقفين في المواضيع دي كلها  شيماء و اخوتي لحدي ما انتهينا بس بقينا منتظرين متين اطلع،، اخواتي طلعوا خلوني وشيماء  قالت لي في حاجه من بيتنا دايره اجيبها واجي قلت ليها ح تخليني براي يعني؟!؟ قالت لي يا بت اخليك براك شنو هندا بيتكم مليان ناس بس ما تخافي  هسي بصل واجيك طيب ،،، قلت ليها تمام،، قالت لي اقفلي باب الغرفه دي عشان النسوان ما يتلموا ليك هنآ،، قلت ليها تمام،، فعلا مشت،، بعد شويه كده سمعت صوت الدلوكة حسيتها في قلبي،، دقايق كده الباب دقاا قلت معقوله شيماء تكون جات راجعه بالسرعة دي لمن فتحت الباب لقيت دي تسنيم بت خالة عمر،، سلمت عليها عادي قالت لي شايفك فرحانه؟!
_نعم
_شنو النعم!! ما انتي عارفه انو عمر عايزني انا ومرتبط معاي جاية هسي عاملة لي فيها ما عارفه
وقفت مسافه بعاين ليها.... كذابة لو قلت ليكم ما اتصدمت لالا انا حسيت نفسي شويه وح أقع من طوليي،،، اتذكرت إني دايما كنت بصادف عمر بتكلم بالتلفون رغم انو الموضوع كان بحرقني بس ما جا في بالي ولا لي وهله كده انو يمكن يكون مرتبط مع تسنيم..
هي واصلت وقالت لي مالك سكتي أتفاجأتي صح؟؟! زي ما انا اتفاجأت  بأبوك والوصية حقتو قال شنو قال يعرسك انتي لعمر يعني والله ما شوفت ابو برمي بتو ساي كده،،
انا مع كلامها ده ما قدرت اتماسك قدامها طوالي كفتها ما اديتها طريقة عدلتها بالتاني قلت ليها ابوي ده ما تجيبي سيرتو في لسانك،،، وإذا انتي مرتبطة بعمر انا ح ابقى مرتو تاني وريني ب ياتو عين ح تقيفي قدامي،،،، جات دايره تهجم علي قالت لي يا بت الكلب انتي سرقتيهو،،، قبل ما تلحق تعمل لي حاجه شيماء جات لمن لقت تسنيم منفعلة جات مسكتها طوالي قالت ليها يا تسنيم انا مقدرة الظرف حقك بس الأمور ما بتتحل بالطريقة دي؟؟! قالت ليها  وهي بتعاين لي بكل حقد،، ياتو طريقه انتي ما عارفه بت عمك دي كفتتني؟! لآلا والله ما بخليها ما بخليها،، بقت تكورك ،، فجأة الغرفة اتملت واخواتي وامي،، الغريبة إنهم ما كانوا متصدمين بيها،، زي كأنو كل الناس دي عارفه وانا لالالا،، قعدت في أقرب سرير وبقيت بعاين ليهم وهم بهدوا فيها يعني عملت كمية من الدراما العملتها... مافي داعي ليها شويه اسمع صوت عمر يقول ياخوانا خير،،،لحدي اخر لحظة كنت عامله فيها يا جبل ما يهزك ريح بس من سمعت صوتو اطرافي كلها تلجت  وفي نص الجوطه دي كلها بقيت بفتش في طرحة ولا توب،،فجأة حسيت الحركة وقفت وتسنيم الكانت بتبكي سكتت.. كلهم متحيرين يعاينوا لي  لافة في الغرفه زي الزول الرايحه ليهو حاجه،، شيماء جات جنبي وانا لسه بفتش شيماء جات قالت لي نون مالك؟؟! دايره اجاوب ليها وانا لسه بعيوني بفتش قلت ليها يا شيماء  طرحتي دي كانت هنا ما شوفتيها؟؟! مع كلامي ده لقيت اخواتي يتهامسوا و شيماء بتحاول ما تضحك.. امي وباقي الشعب مستغربين فيني،، للحظة اتمنيت الأرض تبلعني،، عاينت بجهة عمر لقيت نظراتو غريبة قبل ما افهم لقيت تسنيم جرت جري لعمر قالت ليهو وهي بتبكي نون نون يا عمر كفتتني بس بس عشان جيت ابارك ليها،، وبقت تبكي زياده.. واصلت قالت ليهو وريها إنك كنت عايزني وريها يا عمر انها جات واخدت مكاني خليهم يلغوا الحفله دي ،، قال ليها بصورة امر كلكم تطلعوا بره خلوا لي نون،،، امي قالت ليهو يا ولدي؟؟ قال ليها معلش بس خلوني مع نون دقايق ما تنسوا انا المربيها،، تسنيم عاينت لي بشماتة وطلعت،، طبعا انا بقيت بعاين لي شيماء، نظام ما تخليني معاهو سوقيني معاكم،، لكن طلعت،، واضح انهم كلهم بخافوا من عمر  بعد ما طلعوا انا طوالي أقرب سرير قعدت لانو لو ما قعدت بقع من طولي،،الليله وااابعليكي يا نون  الكفوف دي ح ترجع ليك زي ما هي.. استلمي اها،، ماهو اكيد  ما ح يرضى في تسنيم،، اتحرك جايي علي لمن وقف قصادي قال لي مش قلت ليك لمن اتكلم معاك تقيفي،، قال بصرامة اوتومتك لقيت نفسي وقفت هنا ظهر فرق الطول يعني انا قدامو صفر على الشمال،، قال لي من بين اسنانو  كنتي عايزه تطلعي الحفله بالفستان ده؟؟! رفعت عيني مستغربة يعني ده كل همو للحظة حبست نفسي دايره اضحك بس الموقف نهائي ما مناسب وخاص انو بعاين لي بنظرات لو عليهو يخنقني قال لي ردي يا هانم يا محترمه وقلت ليهو سريع سريع كلهم نسوان والله!! قال لي بالنسبة لي ناس الساونات برضو نسوان،،،قبل ما يخليني ارد قال لي الحفله دي ح تتلغي،، طبعاً حسيت انو رغبة اطلب تسنيم طوالي عاندتاا قلت ليهو لالالا ليه تتلغي،،، قاال لي بسيطة  بفستانك ده ما بتطلعي و اذا دايره تضربي رأسك بالحيطة دي اضربيهو،، يعني انا كل مرة عمر بصدمني قلت ليهو مشكلتك الفستان بس؟؟! قال لي ليه في مشكله تانيه؟؟! سكتت قلت ليهو طيب ح البس طرحة قال لي لو دايره الحفلة دي تتم.. من اساسو ما تلبسيهو!! قلت ليهو كيف كيف طيب انا ح اعمل شنو،، قال لي ما تعملي اي شي انا ح الغي الحفله.. للحظه قربت اقول ليهو خلاص الغيها.. بس اتذكرت تسنيم كده ح تحس نفسها انتصرت علي لالالا نهائي ما بخليها،،، قلت ليهو خلاص ح البس واحد تاني،، قال لي بإستهتار ضروري يعني؟! قلت ليهو كيف؟! قال لي انتي عارفه ظروف عرسنا ف ما تسرحي شديد،، واصل طوالي قال لي بخصوص تسنيم انا ما ح أسألك عملتي معاها كده ليه لأني متأكد انك ما ح تنجبري تضربي مالم عملت ليك حاجه،،وايوة خلي في بالك انو تسنيم دي ح تكون زوجتي المستقبلية ف اكيد ما ح ارضى فيها عشان تختي احتياط المرة الجايه.... وطلع على كده... خلاني مصبغة في مكاني مسكت دموعي بالقوة... في النهايه انا ال جبتها لي نفسي بس والله ما شوفت عين قويه زي عينو انا بعد يومين ح ابقى مرتو على الاقل يراعي لشعوري اخدتا نفس قلت بكره يحبك يا نون انتي لازم تواصلي عشان حبك ليهو،، شيماء واخواتي اول ما شافوا طلع جوني قال لي قال ليك شنو،، حاولت ابين مافي حاجه قلت ليهم ولا حاجه بس ح اغير الفستان ده قبل ما يدخلوا معاي في مناقشات دخلت الحمام...
"ماذا سيحدث لو تغيرت الاحداث او تبادلنا الأطراف فأصبحت انا لا أحبك وانت متيم بي؟؟؟؟!!
__________________
من طرف عمر
أصعب موضوع كان الشيلة دي،، يعني انا في رأيي مافي داعي للمواضيع دي كلها لكن ما مشكله تميت ليهم فهمهم كلو لحدي يوم حنة نون ما جاء في بالي اصلا تعملها يعني الانسانة دي عايشه الدور بكلو،،،برضو  مشيت الموضوع لحدي ما جات اختي شيماء قالت لي تسنيم متشكلة مع نون  وحالفة الا تضربها اتحركت بسرعه عليهم حقيقي  كنت خايف على نون مش عشان انو هي مسكينة وتسنيم بتقدر ليها وكذا.. لا والله بس نون لو قامت عليها عادي ممكن نرفعها جنازة تسنيم،،،،،، وفعلا لمن وصلت هناك لقيت نون قاعده بكل أعصاب بارده في السرير والناس كلها بتحاول تمسك تسنيم منها للحظه ابتسمت لانو انا ربيتها كده انو هي لو ما غلطانة ترفع راسها بس ما لدرجه دي انو اعصابها تكون في تلاجه لمن قلت في شنو يخوانا؟!!  مسافة ماتميت كلامي نون بدأت تلف في الغرفه لمن قالت عايزه طرحه يادووب ركزت لي ال هي لابساهو لالا دقيقه هي كانت عايزه تطلع كده قدام الناس؟؟! دي جنت ولا رأسها فصل.. لالا  دي مصدقه نفسها اني اخليها تطلع كده؟؟!! بقيت مركز معاها معقولة دي نون؟! قبل ما أتم تأملي تسنيم جذبت انتباهي عقليا كده بس عيوني لسه على نون سبحان الله من صورها 💛،،، قالت لي كفتتني وكذا،، تاني ما ركزت مع كلامها بس قلت ليهم اطلعو بره،،، مجرد ما طلعوا لقيتها قدامي في السرير،،، بقيت ماشي في اتجاهها زي الزول الما واعي هي فعلا سحرتني بس اتذكرت انو دي نون دي الشافعه الكنت بلعبها،، سحبت الأفكار سريع من راسي وقفت قصادها،، كل ما اتخيل انها كان ممكن تطلع بالفستان ده بحس نفسي عايزه اقفل الغرفه دي عليها لا زول يشوفها ولا حاجه توريني ح تعمل شنو،،، لاحظت تبدل ملامحها لمن قلت  ليها ح اعرس تسنيم وكذا حتى معالم وشها كانت بتدل على انها ح تبكي،، فواصلت كلامي  سريع سريع،، بعترف اني بضعف قدام عيونها لو شوفتها بكت قدامي بحضنها طوالي فعشان اتفاده الموضوع ده  واتخارج ،،،،في النهايه دي زي بتي واختي في نفس الوقت فموضوع العرس  ده كلو غلط في غلط. لكن ما مشكلة سنة بالكتير  واطلقها 
ما حبيت الغي الحنة عشان ما ازيدها عليها زياده بس بشرط انها تغير فستانها الزفت داك....
بعديها يوم الخميس مباشرة امي كانت مصرة تعمل حنة لي ما اعترضت لانو الموضوع بالنسبة لي ما واقف على الحنة براها فخلاص رجالة بتموا للنهايه،، المغرب كده اي حاجه كانت جاهزه حتى اصحابي ماشاء الله التقول عريس بالجد يعني،، قبل ما أقعد للحنة لقيت اخوات نون وامها و شيماء كلهم قاعدين هنا ااي هم البيتهم ما بعيد يعني خطوتين كده بس نون خلوها مع منو،،، ناديت شيماء قلت ليها نون معاها منو،، قالت لي ما عارفه ،، قلت ليها كيف يعني ما عارفه؟؟!! قالت لي خلاص برسل ليها مازن.. وجاده ودايره تمشي مسكتها من يدها قلت ليها نعم نعم مازن منو؟؟! عاينت لي باستغراب قالت لي مازن اخونا مازن يا عمر؟؟؟!! قال لي لو مازن ح يمشي ليها نلغي الشغلة دي كلها،، اتهجمت وقالت لي كيف ليه في شنو هو بس ح يحرسها،، قلت ليها ده كلامي،، قالت لي خلاص خلاص  برسل ليها واحده من اخواتها،، قلت ليها لالا ما وحده يمشوا كلهم ولا يا شيماء والله الغي الحنة دي واريحكم كلكم،، قالت لي انت يا عمر قول داير سبب بس؟! قلت ليها قلتي كده؟!؟ قالت لي تمام تمام برسلهم ليها،، فعلا بعد دقائق أخواتها كلهم مشوا قال اخلي ليها مازن،، انا  زمان كل ما اشوفهم يتونسوا مع بعض بقرب اضربهم ببعض خليها لمن اديهو فرصة من دهب...
أحداث الحنة كانت عاديه غير ابشر يا عريس ابشر يا عريس من بعيد لمحت تسنيم يعني والله انا غلبني ال اعملو حيلة لمن جات تبارك لي كان واضح إنها بتبكي حاولت اطمنها قلت ليها بصوت واطي في النهايه انا باقي عليك انتي يا ستهم 🌹
_____________
من ناحيتي انا
حفلة الحنة حقتي  كانت عاديه كل ما أحاول ابتسم بتذكر كلام عمر لحدي ما انتهت الحفله وانا بتبسم بالقوة وزدتاا ابتسامتي لمن شوفت تسنيم،،، انتهت الحنه وانا ما فهمت ليها حاجه،،، تاني يوم طوالي كانت حنة عمر امي واخواتي كانوا  بتشاوروا البمشي ليهم منو قلت ليهم امشو كلكم  قال لي كيف يعني نخليك براك قلت ليهم كده... كده دايره نون ... وبعدين لو حصلت اي حاجه هندا البيت قدامي ،،، اتحيروا قلت ليهم امشوا والله ساعدوا شيماء،، بعد مناقشات قالوا لي خلاص نمشي نشوفها ونجي راجعين ليك قلت ليهم تمام ما مشكله،،،،بالله ما تموا ساعه لقيتهم جو قلت ليهم في شنو؟؟! قالوا لي شيماء حنستنا انو نرجع ليك وكذا قلت ليهم ليه ياااخ كان تصروا انكم تقعدوا قالت لي لاااااا احسن نجي نقعد معاك وامي زاتها هسي بتجي ورانا... استغربت بس تاني ما ختيت في بالي ،، هم واصلو في ونستهم قالو لي تسنيم مستلمه البيت على حسابها التقول بيت ابوها،، سكتتت يعني انا ما ح اتفك من الاسمها تسنيم دي،،، خليتهم يطلعوا وبقيت ابكي والله كتر علي يعني دي الحالة انها البدايه...  بياتو حيل انا ح اواصل للنهايه،،!!!
يوم العقد او ممكن اقول يوم الدبيسة  على قول عمر...

"و أحببتك بقلب يتيم فأما اليتم فلا تقهر" 💛