ولكنني أحببتك🥺 💛

5 الجزء الأول

#ولكنني_أحببتك5
#نون_علي
‎أقرب أمجاد ركبته،،، بتاع الامجاد قال لي ماشه وين،،، قلت  ليهُ بس اتحرك اتحرك سريع،، قال لي وين لكن اتحرك؟؟؟؟؟؟؟!!  قولته اي مكان اتحرك وتاني اانا بوريك،،، قال لي يا بت الناس اتحرك بلا وجهه معينه يعني؟؟!!،،، بتكلم معاهو وانا كلي برجف قولته ليهُ أتقدم. لحدي الاستوب ان شاء الله،،،  حتن الراجل اتحرك،،، في اللحظه دي بالذات عقلي كان واقف ما عارفه افكر كيف طيب امشي وين اعمل شنو؟؟؟ يمكن اتهورته بس مستحيل  اتواجد في مكان اكون  متهانه فيهو  حتى لو علي حساب نفسي،، بقيت افكر في الموضوع يعني حاجه زاتها ما منطقيه  ياااخ نحنا حتى عرسنا كان قبل يومين ودي  اول طلعه لينا كعرسان من جانبي انا طبعا ف ما معقوله تسنيم تكون معانا فيها،،،، ايوة عمر هو بيحبها ودايرها ويمكن انا الداخله غلط بس ده كمان ما جواز ليهم عشان يتعامل معاي بالطريقة دي لو كان بيحبها ما من حقه اصلا يغلطني ويصدقها هي من غير ما  يسمعني،،، قطع تفكيري بتاع الامجاد قال لي يا بت الناس وصلنا الاستوب قولته ليهو واصل لحدي الاستوب الجاي،،، قال لي انتي ما توريني وجهتك وين قلت ليه لف بي الخرطوم لحدي م اقرر امشي وين،،، بتاع الامجاد استغرب فيني قال لي  انا  زول بشتغل  عشان رزقي مش عشان اقعد افسح في الناس،،، طبعا اتغظته بس قولته ليهو رزقك كامل بسلمه ليك،، قال لي تمام،،بعد ما قبلته منه بقيت ببكي،، هو ركز معاي  و قال لي انا ما عارف الزعلك شنو بس أأكد ليك مافي حاجه بتستاهل تزعلي عليها لو الحياه هي المزعلاك مفروض تكون انسانه واقعيه وعارفه انو يوم عليك ويوم ليك  يعني مستحيل تمشي  معاك سويه من غير مشاكل،،، وبعدين لو ما حصلت ليك مشاكل ما ح تحسي بطعم الفرح لمن يجيك،،، انا القدامك ده بكره بيشيلني القدر  عشان كده بحاول افرح نفسي براي و الفي يدو القلم  ما بيكتب علي نفسه الشقى،،، وقفت قولته ليهو بس مرات كتيره نحنا بنتخت في مواقف مافيها خيار كده ولا كده لالا هي بتتفرض عليك يا اما تعيشها يا اما تتهرب منها،، يعني كأنها واقع معاش نحنا مفروضين عليهُ سواء رضينا او ضربنا رأسنا في الحيطه  ياها ح تحصل ح تحصل،،،، سكت مني وما عقب علي كلامي،، قولته احسن ارجع البيت ومنها اعرف اتصرف كيف،، اديتو العنوان،، وصلني لحدي البيت،، ونهائي ما شال مني القروش قال لي نصحيه مني  لو قعدتي تباري في الزعل والنكد عمرك ما ح تشوفي للفرح لون،،، واتحرك مشى،،، وقفت بعاين للعربيه حقتو مستغربه  يعني زي كان بيعرفني حتى انا ما خفت ولا عملت اي رد فعل اتجاهو كاني كنت محتاجه زول يتكلم معاي او ما كنت خايفه من اي حاجه تحصل لي لانو ما اعتقد  في أسوأ من الحصل لي الليله، بعدين لسه في ناس زي ديل؟؟!،ولا انا حظي رماني ساي!!، ،،، ، عاينت لي تلفوني لقيت  اكتر من عشرين مكالمه فايته من عمر قفلته تلفوني ودخلت البيت خلي تسنيم ديك تنفعو ان شاء الله بالعافيه،،، بس غلطانه انا الكنت فارضه نفسي عليهو كنت قايله كده ح يحبني او يشوفني ب زاوية اني كبيره وكذا بس ما نفع،،، من اول يوم انا بعلن استسلامي لا عايزهو يحبني ولا حاجه خلاص انا الفيني كملت والله،، موقف واحد هزاني كده  طيب لو عمل لي كذا موقف هو وتسنيم ح يحصل شنو.....،!!