ولكنني أحببتك🥺 💛

4

#ولكنني_احببتك4
#نون_علي

بعد ما دخل الشنط بقيت واقفه لسه  ما عارفه اتحرك امشي علي وين؟!،،، لمن لقاني واقفه جاء علي قال لي تعالي قعدنا في الصاله  في زي كراسي جلوس كد متقابلات قعدنا فيهم اتكلم بعد مسافه وانا اعصابي باظت خلاص،،، بعديها قال لي شوفي يا نون بصراحه انا ما كنت متخيل في يوم نجي انا وانتي نقعد القعدة دي وخاصه انك مرتي،،، تصدقي مرتي دي زاتها حاسيها صعبه علي شويه،، سكتت ما عرفته ارد كيف،،، هو واصل قال لي ما يا بت الناس انا بالجد ما بقدر اعتبرك مرتي ولا باي شكل من الأشكال بعدين ما تنسي انا مربيك،،، لمن قال مربيك قربت اقول ليهو يادي النيلة واليوم الاسود الفكرت فيهو تربيني كل شويه شغال لي انا ربيتك انا ربيتك فهمنا ما عندك كلمة غيرها،،، لمن لقاني لسه ساكته اخد نفس طويل وقال لي ح نعيش زينا زي الاخوان يعني التعامل عادي في حدود لحدي ما نتخارج من الموضوع ده وزايد انتي في غرفه وانا في غرفه،،، كلامه دا نزل زي الصاقعه في قلبي،،، رغم اني كنت متأكده انو ده الحايحصل بس كان عندي امل،، انو نظرته لي تتغير،، بس برضو ما رديت ليهو قال لي وبخصوص التوب بتعرفي تطلعيهو براك؟؟!!،، قالها بمنتهى الاستهتار و الاستخفاف ،،، لدرجه حسيت نفسي ح ابكي قدامو بس اتماسكت قولته ليهو انا ما شافعه!!! قال لي لالا من الناحيه دي انا متأكد.😏،،، سكت قال لي تمام الغرفه الأول علي يديك اليمين دي حقتك ،، والجنبها ح تكون حقتي،، يعني عشان لو خوفتي بليل،، و كمل كلامه وهو واقف و ايوة صحي طول ما انتي ما شافعه اعملي حاجه ناكلها ،الاكل عندك في المطبخ،،، وفات خلاني بغلي بغلي يعني هو عايز يثبت شنو بكلامو ده اني ما بعرف اعمل حاجه ياخ اي شافعه اها وريني ح تعمل شنو،، لالا تمام يا عمر ما ياهو يا انت يا انا  ،، بعد ما دخل غرفته،، دخلت الغرفة القال  لي  عليها اول حاجه بقيت بتأمل في الغرفه  ظريفة ظريفة شديد والله  عجبتني وخاصه انو فيها جلسة كده للقراية 🌸دايره اطلع اتوب  لمعت في عيني فكره خبيثة اترددت كتير اني اعمل كده بس قولته مالو مش قال انا شافعه،،، ربطت ربطة التوب قوى لمن حسيت نصي انقطع وخليتها ربطة صغيره بحيث يصعب فكها،، اذكرت في ريحه كده وصتني امي عليها مشيت كبيتها فيني كب الحاله امي قالت لي مفروض شهر تقعد معاك لكن ماشاء الله من اول مرة انتهيت منها هو زاتو  الفتيل صغير كده ليه،،، بعديها بقيت  بشجع في نفسي واتوكلت طلعت دقيت باب الغرفه حقتو ،، فتح لي الباب زي الزول المتوقع اني ح اجي اتكل علي الباب قال لي خير مالك؟؟؟! قولته ليهو انا انا... كلامي الفي راسي كله طار للحظة قربت اكفت نفسي كف عشان تاني تجيني افكار زي دي،، قال لي مالك؟!! وليه لسه ما طلعتي التوب ده؟؟! رفعت راسي عاينت ليهو لقيته ماشاء الله غير وانتهى متين هو؟؟! قال لي نون؟؟؟؟؟؟؟؟ قولته ليهو اااا ست الكوافير ربطت لي التوب قوى وم عرفت افك الربطه كيف!!!،،، ضحك ب استخفاف كده قال لي ما قولته ليك التوب ده ما ح تعرفي ليهو،، لمن شاف ملامحي اتغيرت ضحك ومسكني من يدي قال لي تعالي تعالي دخلني لي نص الغرفه كده ،، وقال لي هو لسه بيضحك طيب يا ستي ما تزعلي هسي نفك ليك الربطة الشريره دي 🤣🤣🤣،،،، سكت رغم انو  في جزء  فيني مبسوط من كلامه و جزء مغيوظ،، فعلا زح طرف التوب وبدأ يفك في الربطه و ماشاء الله الريحه الكبيتها فيني الله يديها العافيه انتشر في الغرفه كلها ما كبيتها فيني كب لكن😎💅🏻،،،لمن غلبو يفكها قال لي كدي دقيقه وقرب مني  زياده بقى زي الزول الحاضني ❤️،،، هنا انا طشيت بقيت بشوف عمر ده اتنين وخاصه صوت انفاسو في وشي وريحة العطر حقو دوختني لدرجه اني رخيت في وقفتي،،،هو بس مركز مع الربطه شويه كده قدر يفكها،، بس لسه ما اتحرك من جنبي،،،المفروض اتحرك انا لكن وين اتجمدت في مكاني،،بعد شويه لقيت انو بيميل بجسمو علي،، حسيت نفسي بت في كامل انوثتي وانا قادره أثر علي عمر كده  يعني عمر شخصيه معروف جبل ما بيهزو ريح وانا هسي زعزعت الجبل من مكانه عديل،، وانا في قمة التوتر داك ابتسمت،،، وياريت ما ابتسمت مجرد ما لاحظ لي ابتسامتي،، قرب زياده ودنقر ب وشه علي وشي بقى يعاين جوا حبات عيوني وضحك بالجنبه كده قال لي انتي قايله نفسك قادره تاثري فيني؟؟؟!،،،والله يخوانا انا بقيت قدر السمسمه،،، رفع راسو قال لي احسن تمشي غرفتك،،، طوالي  اتحركت سريع سريع ونسيت التوب اتعترت دايره أقع مسكني قال لي واضح ما قادره تمشي،، مع جملتو دي لقيت نفسي مرفوعه من الأرض شالني ودخلني الغرفه حقتي،،  ،،، من غير اي كلام طلع،،، و هنا انا  اتنفست الصعداء،، وااااي وااااي واااااي الليله لاااا ده شنو العملتو ده وووووواااااي،،، بقيت منفعله مع نفسي زي الما نصيحه،،، قولته عشان اخفف من التوتر  احسن ادخل استحم فعلا  استحميت  وجيت رقدته نومته طوالي  اصلا الاكل طار لي في راسي   لحدي المغرب انا نايمه لمن صحيت ساعه بستوعب انا وين!!،،، بعديها قومت اتضويت وصليت....
_______-______
من جانب عمر
من البدايه وضحت ليها طبيعة العلاقه بيناتنا رغم أنها ما كانت متفاعله معاي بس قولته احسن تكون علي علم اني من ناحيتي مافي اي مشاعر اتجاها،،بس هي برضو كانت ساكته فقولت اشغلها ليها على الاقل يمكن تتكلم معاي،، بس الحال في حالو حتى لمن قولته ليها موضوع الاكل ما كان قصدي غير ترد علي لكن شكلها حالفه، فحاولت استفزها بكلمة شافعه وفعلا  حصل الداير بس اختصرت في كلامها شديد  يعني قالت لي انا ما شافعه،، كنت منتظر  تكمل كلامها بس اكتفت بى كده،، قومته طوالي منها ، يعني انا والله زاتي ما عارف نفسي من ناحيه دايرها تبعد ومن ناحيه ما دايرها تبعد،،،غصب عني نون بتخليني متناقض في نفسي مع انو ما حصل كنت مجهجه في قراراتي الا  معاها،، دخلت الغرفه وانا كلي امل  تجيني،، مسافه ما غيرته هدومي سمعت صوت الباب بيني وبين نفسي انبسطت والزاد انبساطي انها  قالت ما قادره تفك ربطة التوب،،،واضح انها ما بتقدر تعمل حاجه من دوني،،،،تاني حاولته استفزها لمن حسيت انها ح تتراجع قولته ليها سريع سريع وانا بضحك تعالي طيب دخلتها جوا،، بديت افك ليها في الربطه بس برضو قربت منها عشان اقدر افكها ريحتها وصلتني،،،كذاب لو قلته ما أثرت فيني ولا نون ملامحها مساعده عشان اجرب كل ما حرم عليه في الماضي بس تاني استغفرت وبديت اعد الاعداد من النهايه للبدايه لحدي م اتفك،، ما قدرته اتحرك،، حسيت نفسي مربوط بيها ولا اراديا بديت أقرب منها لمن لمحت ابتسامتها عرفت انو دي كانت ناوايها من البدايه ابتسمت وخليت وشي قصاد وشها عشان ازيد من توترها والعب ب اعصابها اكتر ،،، فقولته ليها بكل بساطه قايله نفسك قادره تاثري فيني؟!؟،،، للحظه حسيت نفسي احرجتها شديد فقولته ليها احسن تمشي غرفتك  اتعترت بالتوب كانت دايره تقع،، الا مسكتها والتوب وقع،، ابقى ما انسان لو ما أثر علي وخاصه القميص الملبسنو ليها،، يعني الناس ديل قايلين العرس ده بالجد ولالا وجادين في الموضوع لدرجه مريحنها،،، ما لقيت نفسي الا وانا شايلها احسن اطلعها من غرفتي سريع سريع،،،،، دخلتها غرفتها وطلعت من غير ما اقول ليها اي شي،،،، أول ما دخلت غرفتي بقيت لافي فيها من غير أهداف ماشي وجاي ماشي وجاي... وهكذا،،، لمن رقدته نومته،، صحيت علي صوت تلفوني لقيت دي تسنيم،، فصلت الخط وتاني اتصلت وتاني فصلت الخط،،، انا لمن بفصل الخط مش عشان ما  دايره اتكلم معاها بس نعسان لمن لقيتها كترت اتصالها رديت عليها،،، قالت لي لحقت تنسيك حبيبتك تسنيم،،، قولته ليها  انتي هسي متصلة عشان كده،، قالت لي لالا واضح انها  قدرت تتحكم فيك،، قولته ليها  انتي مجنونة ولا شنو انا مافي زول بيقدر  يتحكم فيني،،، لمن وصلتني صوت  شهقات بكها،،، اخدت نفس في النهايه انا الزوله دي مرتبط بيها هي ونون الدخيله علينا ف شينه في حقي ابقى عليها انا والقدر،،، اعتزرت ليها وبقيت اتونس معاها،، اتذكرت نون ..طلعت ؟لقيتها لسه ما طلعت قعدت في الصاله  واصلت ونستي مع تسنيم،،، يعني مهما حصل لازم ما انسى اني انا العرضت فكرة الارتباط لتسنيم انا الكنت عايزها  من البدايه ولو لا موضوع نون ده  كان عرستها هسي،،،ف ما معقوله اخليها او اهملها بي طريقه من الطرق،،،، شويه كده اسمع صوت نون،،، لالالا آله الا الله،،، لالا هي لو دايره تقتلني تقول،،، كانت لابسه بجامه تلت اربع زايد انو حبسة العرس نفعت معها،، جات ماشيه ب جنبي من غير ما تتكلم معاي ودخلت المطبخ،، والله نون دي محفظنها بس ما مفهمنها يعني  فهمها شنو عايزة تصل لي شنو،،، سمعت صوت تسنيم بتقول عمر أنت معاي،،، بكره ح تجي توصلني للجامعه مش،،، قولته ليها الفتره  دي كلها ما عندي طريقه،، قالت لي عشان نون؟!؟ قولته ليها لالا ما عشان كده بس العرس جاء فجاء وانا كنت مهمل في الشغل  فداير الحق الفات عليّ كلو،، قبل ما اخليها ترد سمعت صوت حاجه اتكسرت من غير اي تفكير جريت على نون.....