ولكنني أحببتك🥺 💛

3

#ولكنني_احببتك3
#نون_علي

يوم العقد من الصباح اخواتي صحوني قالو لي النايمه ليها شنو قومي قومي مسافه ما صحصحت لقيت البيت ماشاء الله كترت ناس بقيت بعاين بلا وعي يعني الناس ديل عارفين العرس حصل تحت ظروف شنو ف ليه منفعلين كده؟!! بقيت مركزه مع نفسي ده نفس عمر الكنت بدعي ربنا بيهو طيب ليه ما مبسوطه مش ده العرس الأنا كانت عايزهو ليه حاسه نفسي ما مبسوطه يمكن لو ما كان مجبور علي و دايرني من تلقاء نفسو كان الوضع اختلف وكان هسي الأرض ما واسعاني  من الفرح  بس الحمد الله لخير،، قطعتني امي بتقول لي انتي لسه يا نون  العقد فطور وانتي لسه ما مشيتي الكوفير ولا عملتي اي حاجه،، اتذكرت يادوب انو ما ح نعمل حفله بس جرتق وانتهينا،، اخدت  نفس حاولته اتمالك نفسي وما انفعل وابكي في النهائية وافقت علي الموضوع ده وانا راضيه على حس عمر عايز كده فوافقت ..
كان في معلومه قريتها انو التنازلات البنقدمها لناس مع مرور الزمن بتتحسب اختيار شخصي من عندنا،، بس انا عندي ما بمررور الزمن ،من هسي احتسبت لي اختيار شخصي...

احداث العرس كانت رسميه شديد يعني ما زي ما اتخيلتها او زي ما بقرأ في الروايات لالا الواقع مختلف لا صورو لي لحظات العقد ولا عمر اتصل بي عشان يبارك او عشان يقول لي خلاص اتلمينا في بيت واحد متأكده الموضوع بالنسبه ليهو فرض كفايه بفهم انو ما يخذل ابوي في الوصيه،، حاجه معروفه في عمر دمو حار في المواضيع الزي دي  ومستعد يقدمها علي حساب سعادتو،،، في الكوفير كانت معاي صحبتي "إيناس" يعني والله كل ما اعاين لي إيناس دي بتهون علي كتير  هرمون سعاده في وشها 💛🌹،، فكان بتضمني  وبتحاول تخفف من التوتر الفيني،،وبقينا منتظرين منتظرين  اتاخرو شديد  لدرجه اني زهجت قربت اتصل ب عمر اقول ليهو لو ما جاي قول عشان ما انتظر ساي لكن تاني قولته ابطل شفقه،،،،،،،بقيت منتظره لحدي ما  اسمع صوت شيماء وهي تقول وين العروس العريس بره،،، ست الكوفير قالت ليها جاهزه من قبيل اتاخرت،، قالت ليها  اي مع العقد،، بعد شوية جات داخله من شافتني بقت تزغرد قالت لي ماشاء الله ماشاء الله التوب قاعد فيك لكن،، بقيتي لي مرا مرا والله يا نون،،، حاولته بالقوة ما ابتسم، قالت لي اطلعي اطلعي عمر منتظرنا،،إيناس وقفتها قالت ليها كيف يعني تطلع ليه ما يجي هو يسوقها،، شيماء قال ليها المفروض والله دقايق طيب،،، عاينت لي إيناس  قولته ليها  ما كان في داعي.. نطلع وخلاص،، قالت لي انتي اسكتي بس،، ما تعملي لي فيها البت المغلوب في أمرها انتي نفسك يجي يشوفك بس غالبك تقولي كده ف انا اختصرته عليك،،،،، فعلا عايزهو يجي يسوقني بس خجلته والله،، بعد مسافه اسمع تاني الزغاريد والباب يفتح من شوفت عمر قربته ادردق ليهو في الواطه واجيب اهلي كلهم يدردقوا ليهو،، والله ياخوانا السمح سمح ب كل حتى الجلابيه السمنيه بقت لي حلوه عندو ولا لفت الشال ياخوانا كده كتير علي  لمن لقيت نفسي سرحت فيهو كسرت عيني طوالي وبقيت بحسبها في، راسي هسي لو كان ما عرسني؟! لو ما كان في وصيه كان ح يضيع من يدي كده؟؟! ويمشي يعرس، تسنيم لالا ده ابعد من خياالو و خيالها،،،بالجد في حاجات بتجي في مصلحتنا وصالحنا نحنا 💛،،، بعديها  جاء مسكني من يدي لمن مسكها حسيت دقات قلبي مسموعه للناس كلهم عاين لي مسافه من غير اي كلام ساقني ومشينا... كنت منتظره منو  اي تعليق او اي حاجه يقولها بس  ما مشكله كفايه علي انو ماسك يدي حاليا....