قصص دينيه وعبرة (3)

تنميه زوجيه

في جملة غريبة بتتقال من بعض الأزواج لما تنفجر زوجاتهم فيهم وبتحصل مشاكل , فيكون رده متعجبا
- انتي زعلانة ليه هو أنا حارمك من حاجة !
أو
- أنا عمري ما قصرت في أكل ولا شرب
.
في ستينات القرن الماضي الدكتور "هاري هارلو" عمل تجربة نفسية بشعة جدا علشان يوصل لإجابة السؤال الأبدي هل الأكل والشرب يُغني عن الحاجة للعاطفة والرفق ولا لأ
التجربة كانت إنه بياخد قرد حديث الولادة ويحطه في قفص فيه هيكلين لقردة
الهيكل الأول في جزء شبيه بصدر الأم بس باقي الجسم معدن وجاف وقاسي جدا
والهيكل الثاني كان لقردة ماعندهاش طعام للقرد بس جسمها كان مريح ودافيء
وساب القرد الصغير وبدأ يتابع النتيجة
.
إللي حصل إنه حاجة القرد الصغير للطعام طبعا لا يمكن الاستغناء عنه , فكان بيقرب بحذر جدا من الهيكل إللي فيه اللبن ويشرب لحد ما يرتوي , وبعدها يبعد عنه ويروح ينام في حضن الهيكل الدافيء المريح ,,, واستمر على كدة لفترات طويلة
.
الجزء التاني من الاختبار هو معرفة
" هل الكائن المُطعم هو ممثل الأمان والحماية للقرد الصغير ولا الكائن إللي بيمثل الدفيء والرفق"
.
التجربة إنه فجأة الطبيب هاري هارلو دخل هيكل شكله مخيف جدا بيتحرك للقفص وبدأ يراقب القرد هايتصرف ازاي

المفاجأة إن القرد الصغير هرب بسرعة ناحية الهيكل إللي بيمثله الدفيء والراحة علشان يحتمي بيه مش الهيكل إللي بيقدمله الطعام !
ومع تكرار التجربة كانت دايما بتظهر نفس النتيجة
لحد ما تم وقف التجربة لوحشيتها
.
وصايا النبي صلى الله عليه وسلم للرجال ناحية المرأة كانت كلماتها بديعة معبرة
" رفقا بالقوارير" ,,, " اتقوا الله في النساء" ,,, "استوصوا بالنساء خيرًا"
"إن من أكمل المؤمنين إيماناً أحسنهم خُلقاً وألطفهم بأهله"
"خيركم خيركم لأهله وأنا خيركم لأهلي"
"كل شيء ليس من ذكر الله عز وجل فهو لهو ، أو سهو ، إلا أربع خصال: ........... وملاعبته أهله"
فلو دققت لوجدت أن معظم وصايا الرسول بالنساء تدور حول الاعتناء بالجانب النفسي قبل الجسدي
.
أما الإطعام نفسه فلا يحق لك المن به لأن من أساسيات واجبك والواجب لا يُتفضل به !
وإنفاقك على زوجتك حتى تستقر الحياة له عدة أوجه
انفاق المال , انفاق الحنان , وانفاق الرعاية والاحتواء
فلو نقص جانب منهم حدث خلل في علاقتك بزوجتك حتى تجدها وقد انفجرت بعد وقت لغير سبب ظاهر .
#تنمية_زوجية.