*#سيلا《16》*
*(من_بلد_النصاري)*
*#بقلم_سندس_مالك*
سمعتا كتير عن الجلد بالسوط بس ماحصل شفته على الحقيقه ابدا ، كانت اول مرة اشوف الجلد البحكوا عنه الناس و التقليد الاسمه ( البطان ) وفيهو العريس بيقوم ويجلد فيهو اهله ؟
اول مابدا الجلد دة جسمي هبط عديل ، ما اتحملتا اشوف المنظر بس قعدتا مجاملة لفاطمة صحبتي ، لكن الموضوع كان مستمر و النسوان بزغردتوا و الرجال يبشروا والشباب بتضربوا؟
دة تعذيب؟ و الاولاد مبسوطين بيهو ؟ لحدي ما واحد من اهل العريس ضهرو كبى دم وهو كان لسه مواصل؟ انا ما اتحملتا المنظر وارتبكتا وماكان عندي طريقه غير اني اطلع برة العرس دة ، طلعت برة الشارع و وقفتا بعيد وبكيت ! ماحصل شفتا منظر زي دة في حياتي ومامتعودة اشوف منظر بالطريقه دي ، وما حبيت العادة دي ابدا لأنه دة تعذيب بالنسبه لي ، وقفتا ابكي واقش دموعي بالمناديل ..
لحدي ما اتفاجأ بصوت زول بي وراي بضحك ، اتلفت القاهو محمد! قلت ليهو بزهجة البضحكك شنو؟
قال لي شفتك متسحبة من مقعدك براحة براحة ، عرفت انك خلاص ماقادرة تعايني ، قلت ليهو هم بعملوا كدة ليه؟
قال لي الجعليين معروفين بي شهامتهم ورجولتهم و اصلهم البخليهم كرماء و ما يقبلوا الانحناء ، اهل المتمة بالذاات معروفين بالمروءة والشجاعه وعزة النفس و التواضع يعني ناس لازم يثبتوا انهم اهل حارة ، عشان كدة في المناسبات عند الجعليين في العادة دي ، اصحاب العريس واهله بيتجلدوا عشان يثبتوا للعروس واهلها انك في يد امينة ، وراك رجال بفدوك بي مالهم ودمهم ، العريس بضرب بالسوط و اهله الرجال بقيفوا وما بحسوا بي الضرب دة ابدا و البزيد حماسهم الزغاريد و البشاير ، دة بخلي العريس يفتخر بي اصحابه واهله انهم ناس ركازة و تقيلة ، و بخلي العروس تحس بالحماية ! شعور الحماية يا سيلا انك وراك راجل حيحميك بي ماله و دمه و مستعد يفديك بي روحه، العادة دي بتطمن اهل العروس انه بتهم عند قبيلة فيها رجال ..
انا كنت بسمع فيهو و لسه ببكي ، قال لي تعالي و مشينا وقفنا في باب الخيمة نتفرج على العرس جوة فشفتا البنات برقصوا و الاولاد ببشروا ليهم ، محمد اشر بي يدو على واحد من الاولاد قال لي شايفه الود داااك؟ اسمه مجتبى دة ود عمنا و بحب بت جيرانا اسمها بسمة ، هسي شوفي حيحصل شنو ! وقفنا شوية كدة وبعدها شفتا مجتبى ماشي على جهة بسمة الأشر لي عليها محمد و شال منها الشبال و بعدها اتلموا فيهو الرجال و بدوا الجلد و هو يبشر ليهم ، و النسوان يزغرتن لسه ! قلت ليهو دة شنو هسي؟ قال لي دة يعني انه دايرها زي اتقدم ليها كدة قدام الناس ، و البعمل الحركة دي بعدها بتجلد عشان يثبت لحبيبته انه حيفديها بي دمه و ماله ، و عشان كدة مجتبى حيمشي ينقط للفنانة البتغني ديك، قلت ليهو ينقط ؟ قال لي حيختى ليها قروش و هو لمن يخت ليها قروش دة بيعني انه شغال ما عاطل ، شغال في التجارة او الزراعه او غيرو .. قعدتا اضحك قلت ليهو يعني هو كدة وراها انه هو عندو قروش؟ قال لي ايوة عشان هي تطمن ، قمتا ضحكت وقلت ليهو يادوب الجلد عجبني ، قال لي من بقى فيها قصص حب و كدة ، غايتو البنات ديل مخهم واااحد ، عاينت ليهو وابتسمتا و في قلبي قلت ليهو فعلا كلامك صح ! ..
قال لي تدخلي ؟ قلت ليهو لا عايزة اقيف برة ، قال لي ليه تاني في شنو؟ قلت ليهو مافي حاجة بس ساي ، و انا كنت مبسوطة بي وقفتنا لاني من بعيد شايفه نونا بتفتش عليهو و مالاقياهو ، كنت منتظراها تشوفو معاي ..
محمد كان بعاين لي وانا ما منتبهة وفجأة قال لي انتي عارفة لو كنتي بتتسمي اسم عربي فكان يسموك سندس ، قلت ليهو سندس ؟ يعني شنو سندس؟ قال لي يعني حرير رقيق ، هو طبعا اسم اسلامي و معناه حرير اخضر رقيق و دة اللبس البلبسوهو اهل الجنة ، عاينتا ليهو وابتسمتا .. قلت ليهو طيب اي زول بكون شايل اسمه صح؟ زي مابقولوا الناس كدة صح ؟ قال لي عشان كدة قلت ليك انه اسم سندس لايق عليك شديد ، قلت ليهو يعني انت شايفني رقيقة لدرجة الحرير؟ قال لي انتي لو ما حساسة ما كنتي بكيتي عشان المنظر دة ! انتي مش بكيتي بس انتي انهرتي عديييل من البكا ، قمتا ضحكتا وهو بحاكي فينا ..
لحدي ما كبست علينا نونا بدون اي صوت ، قالت ليهو محمد انت واقف هنا وخالي اخوك براهو ؟ قال ليها ضيفتنا خافت و كانت بتبكي ، عاينت لي وقالت ليهو محمد اخوك منتظرك خليك من الأمور الفارغه ، يمكن انا نجحتا فعلا في حرقة اعصاب نونا لأنها اول مرة كانت تتكلم بالطريقه دي مع محمد ودة كان باين من خلعته بيها ! و انا هنا قررت انسحب و أستأذن من محمد و اجري ادخل لأني حسيت بيهو غضب و في خشمه كلام ماداير يقوله قدامي ، دخلتا جوة و ابتسامتي زااايدة ، و هو بدا يتناقش معاها سألها انتي كيف تتكلمي معاي كدة وقدام البت الضيفه؟ قالت ليهو انت ماشايف انها بتحب تخترع ليها مواضيع عشان تلاقيك ؟ قال ليها نونا انتي جنيتي؟ دة كلام شنو الفي راسك دة؟ قالت ليهو هسي البطلعها برة شنو عشان تقيف معاك؟ قال ليها افهمي اول انها جات طلعت عشان الجلد و كانت بتبكي ، قالت ليهو بتبكي ؟ والله؟ وانت ابوها و لا اخوها عشان تطبطب عليها ؟ قال ليها نونا ما داير كلام فارغ ، قالت ليهو انت ماشايف نفسك بتعمل في شنو ؟ قال ليها نونا البت دي صغيرة ما تختي عقلك بي عقلها ، بعدين يعني انتي هسي غيرتك دي من شنو ؟ قالت ليهو انا ماغيرانه منها ولا شيء لكن ما ارتحت للصقتها فيك ، قال ليها نونا البت نصرااانيه ؟ نصراانيه ! عارفة يعني شنو نصرااانية ، يعني مستحيييل افكر فيها تفكير سااي، فمخك دة ما توديهو بعيد و غيرتك ماعندها لازمة اساسا ، قالت ليهو اي عارفة ما ممكن تعرسها بس ممكن تتراد ؟ ولا ما كدة ؟ رفعت ليهو حواجبها وسألته هسي انت بترتاح معاها في الونسة ولا لا ؟ محمد بقى بتمتم لأنها سألته سؤال غريب بس كلامها صح ، قال ليها برتاح معاها في الونسة و بشوفها بت لطيفه لكن زيها زي بقيت البنات ، نونا عاينت ليهو وقالت ليهو لكن انا ماحاسة انها زي بقيت البنات بالنسبة ليك و يامحمد يا أنا يا البت دي ، و اعتبر اني بت جاااهلة وصغيرة زيها ما كبيرة و ما عندي عقل عديل ، و الاختيار ليك و طلعت الدبلة و ختتها ليهو في يدو ودخلت ..
انا ما كنت شايفه من بعيد البحصل شنو هناك ! لكن شفتا ملامح محمد متغيرة و راسه جايط و بعاين لنونا و هي ماشة بعيد منه ..
انتهى العرس و نحنا رجعنا البيت ونمنا .. كنت متشوقه اعرف الحصل شنو ! بس ماقدرت اعرف حاجة لانه مالاقيت محمد تاني ، شلت التلفون الصباح وضربتا ليهو و ما ردا علي تلاته مرات ..
لمن صحت فاطمة من النوم لقتني قاعدة في الحوش بشرب في الشاي ببسكويت العرس ، صبحت علي وسألتني نمتا كيف وانا فعلا كنت فترااانه ونايمة بتعب و جهد كبير ، قلت ليها صحيت معسمة وماقادرة اقعد عديل قالت لي اي اصلا الاعراس دي بتهد الحيل عديل كدة ، قلت ليها فاطمة نونا ما ضربت ليك ؟ قالت لي لا ما ضربت لي ليه مالها؟ قلت ليها شكلها كانت متناقشة مع محمد امبارح ، قالت لي سيلا قولي في شنو ؟ قلت ليها مافي شيء لكن هي لقتنا واقفين برة انا اساسا كنت برة ومحمد هو الجاني ، لكن هي شكلها زعلت لانها قالت ليهو قدامي كلام فارغ ، فاطمة عاينت لي ونططت عيونها نونا قالت كدة؟ قلت ليها اي شكلها وصلت الحد ، قالت لي سيلا انتي عملتي شنو بالجد؟ قلت ليها حاكون عملت شنو مثلا ، براها هي جات زعلانه من بعيد ومافاهمة شيء ، شكلها غيورة اساسا .. فاطمة عاينت لي وسكتت و شكله لأني ضيفه عندهم مادايراة تشاكلني و تزعلني ، بعد قعدنا شوية في الحوش وانا قايمة جاتني رسالة من محمد صباح الخير ، و ضرب لي فاطمة في نفس الوقت يسالها هل انا صحيت فردت عليهو وهي بتعاين لي بتقول ليهو اي صاحية و جنبي قال ليها خلاص انتظري معاها لاني عايز اتكلم معاها ، فاطمة استغربت من البحصل وانا زاتي بقيت مافاهمة شيء ..
قعدنا زي ساعه كدة وبعدها جا محمد داخل علينا في الحوش ، سلم على ام فاطمة وابوها و نحنا في الحوش ، طلع سلم علينا وقال لي فاطمة تجيب ليهو قهوة بن تقيل ، مشت تحضرها ليهو و بقينا انا و هو في الحوش ..
قال لي اصبحتي كيف؟ قلت ليهو تمام وانت ؟ قال لي كويس الحمد لله و كان ظاهر على وشه انه زهجان او زعلان ؟ ..
قال لي سيلا انتي عارفة اني بريدك و بحترمك زي فاطمة و واحد صح ؟ قلت ليهو صح ! قال لي حصل مرة غلطت في حاجه معاك؟ قلت ليهو لا ، قال لي هل اتجاوزتا حدودي معاك ؟ قلت ليهو لا ؟ قال لي حأسألك سؤال دغري و واضح لاني زول دغري اساسا ، قلت ليهو وانا خايفه من السؤال وبرجف بجوة و برة اسال ؟؟
قال لي انتي عندك مشاعر اتجاهي ؟ حاسة بي حاجة تانية غير الخوة و الصداقة؟
من يومي وانا مابعرف اكذب و خصوصا في قصة المشاعر دي ما حصل بينتا لي زول اني بحبه وانا بكرهه و لا حصل قلت لي زول انا بكرهك وانا بحبه فما كان في يدي غير اني اقول الحقيقه ..
هزيت ليهو بي راسي وقلت ليهو ايوة ، بالنسبة لي في ..
اتفاجأت بي رسمية محمد في السؤال البعد ماعرف انه في مشاعر عندي اتجاهه ، فقال لي بكل رسمية ردي علي بوضوح ؟ قلت ليهو انا حاسة اني بحبك ، ماعارفة الحاجة دي صح او غلط لكن انا بحبك .. سكت مسافة وقال لي يمكن انتي بتتوهمي انك بتحبيني ! سميهو اعجاب لكن ما ممكن تحبي زول بختلف معاك في حاجات كتيرة! قلت ليهو بزعله انت شايفني شافعة؟ انا ما بعرف اميز بين الحب و الاعجاب ؟
قال لي السبب البخليك تحبيني شنو طيب؟ انا عملت شنو عشان تحبيني؟
قلت ليهو ماعملت شيء وماعندي سبب ..
من طريقة كلام محمد عرفتا انه عايز يحددها معاي ، صلح قعدته وقال لي سيلا اسمعيني وياريت تسمعيني بدون ما تسيئء فهمي ..
#كل عام وانتو بألف خير ياأجمل متابعين❤
سندس مالك
--------------------------------------
---------------------
*☆يتبــــــــــــــــــــــــــــــــــــــــــــع☆☆*
*بــــــــــــــيــــــــــــــــــــجــــــــــــــة*
