السيرة النبوية

3 يلا صلوا على النبي ^_^ نكمل حكايات الصحابة وحبهم للنبى ❤

كان في واحدة ست أسمها " أُم سُليم " دي تبقى أم أنس بن مالك الصحابي الشهير .. أم سُليم لما النبي دخل المدينة ( هي نصارية يعنى من الأنصار ) كان عندها ابن صغير عنده 10 سنين اسمه أنس فراحت للنبي عليه الصلاة والسلام وكانت كل ست من الأنصار تروح تدي للنبي هدية فأم سُليم معهاش فلوس .. طيب تعمل إيه !! تروحله وتقوله : " يا رسول الله إن صوحيباتي من الأنصار كل واحدة منهن أهدتك هدية وليس عندي مال أشتري هدية وليس عندي أغلى من ولدي أنس فأتخذه خادما يا رسول الله " .

فبيحكى أنس وبيقول : " عشت مع النبي ووالله لم يقل لي يوما قط لم فعلت هذا ولم يقل لي لماَ لم تفعل هذا ! "
مرة واحدة بس النبي قاله ممكن تروح تعمل حاجة وأنس وقتها كان صغير فبيقول أنس :
" فخرجت فلقيت أصحابي يلعبون فقعدت ألعب معهم ونسيت كلام النبي ولعبت لوقت طويل " والنبي كل ده مستني .. فالنبي لقاه أتأخر فخرج يشوفه فين فلقاه عمَّال يلعب ،
فأنس بيقول : " والله جاءني من ظهري وأحتضنني وخبأ عينيَّ وقال : من أنا ! فقال أنس : رسول الله " .. فأنس دوَّر وشه ولسه بيقوله والله نسيت وحيتأسف وكده ، قام النبي قاله :
" يا أُنيس لا عليك .. يا أٌنيس ( بيدلعه ) هلا تفعل ما طلبته منك " ، فقال له : " أفعل يا رسول الله " وطلع يجرى ❤

كان فيه صحابي من الصحابة اسمه " زاهر " .. زاهر ده من الصحابة المعدودين أوي اللي شكلهم مش جميل لأن أغلب الصحابة كانوا جٌمال جدااا :)
وزاهر مكنش إجتماعي أوي كان منطوي شوية ودايما بيقعد لوحده كان بيحس إن الناس مش بتحبه فمرة النبي عليه الصلاة والسلام عايز يمزح مع زاهر .. فزاهر كان في السوق بيشتري حاجات فالنبي يعمل إيه ! يجيله من ظهره عليه الصلاة والسلام فيحضنه ويغمي عينيه الإتنين وقال : " من يشتري هذا العبد ؟؟ من يبتاع مني هذا العبد ؟؟ " .. فزاهر أتخض وقاعد بيحاول يفك نفسه منه ويقوله : " أرسلني أرسلني !! "

فزاهر بيقول : " كنت كلما أحاول أن أفك نفسي منه كان يشتد أكثر " .. لأن النبي قوي عليه الصلاة والسلام ( كان في قوة 40 واحد زي عمر بن الخطاب ، وعمر كان قوى وضخم جداً لدرجة أنه كان ماشي جنب صحابي مرة وكحَّ جامد الصحابي أُغمي عليه من الخوف ، والشيطان كان بيخاف منه وبيمشي من الطريق اللي عمر مايمشيش منه ، فكان النبي يقول : " لو سلك عمر فجاً لسلك الشيطان فجاً آخر ") ومع ذلك النبى عمره ما أستغل قوته دى وما ضرب رسول الله رجلا قط إلا في المعركة وما ضرب رسول الله امرأة قط !!

فقال زاهر : " فشممت كفه فعرفت أنه رسول الله " ، عارفين عرفه منين ؟! ( أصل بيقولك النبي مش زينَّا النبي مسام إيديه مش بتفرز عرق زى العرق بتاعنا ، دى بتفرز مسك بجد ! وكانت كفه ألين من الحريركأنما أخرجت من علبة عطر ! )
فقال زاهر : " فلما عرفت أنه رسول الله جعلت أدخل في حضنه " ويزق ضهره فى حضن النبي فالنبي فهم وضحك ووسع إيديه .. فقال زاهر : " تبيعني يا رسول الله ؟! "
فضحك النبى صلى الله عليه وسلم ^_^ ، وقال زاهر : " يا رسول الله لئن بعتني لوجدتني كاسدا يا رسول الله " ( علشان هو مش جميل شكلا يعنى ) .. فقال النبي : " لا يا زاهر ولكنك عند الله غال :) " .