#راهنت_عليك4
( كاليه )جزيرة الموت
يمكن سمعتو بيها والله اعلم ، بس الاستعجال و الضغط الكنا عايشنو في الفترة الفاتت من ما وصلنا على ايطاليا حرفياً في المرحلة دي تحديداً ما بينفع ،
حتستعجل يبقى حتموت مافي خيار تاني !
و عشان تكونو في الصورة ، هدفنا من وجودنا في كاليه انها معبر عشان نقدر نصل بريطانيا .. و من لحظة دخولنا على المخيمات حقت الاجئين في كاليه اللي هي تبع المنظمة ، وقتها كنا واقفين الاربعه معانا منذر و محمد ، حصل بينا كالاتي :
سراج ( بي قلق ) : اتوقع كلنا عارفين الحيحصل ! ( وجه نظرو تحديداً على محمد و منذر ) !
انس : انا عارف تماماً
سراج : انت عارفك و واثق منك تماماً يا انس لكن ...!!!
انس : طيب يا منذر و محمد حا اكون واضح معاكم !! انا من البداية كنت رافض فكرة انه نكون مرتبطين بي زول في تحركاتنا ، لان الفيهو دا كلو عبارة عن مخاطرة ، و كون نربط اهدافنا او خططنا بي زول تاني لاقدر الله ممكن يتضرر منها دي حارة ، انحنا يادوب بنقدر نتحمل مسؤلية قرارتنا دي في روحنا !
المهم ...#قاطعو
سراج : المهم فعلاً ان الاستعجال و المخاطرة في ال chance (فرصة) مشكلة ممكن تنهي حياتكم الاتنين ، ياريت تحسبوها صح ، و كلامنا مجرد نصيحه ، ما فرض رأي علىً زول فيكم !
و عشان نحصل على الفرصة او chance دي م معروف نقعد في كاليه كم شهر شهرين تلاته ستة سنه عديل اكتر .. بالجد م معروف !
منذر ( بي خلعه ) :
يا مان شهر شنو و شهرين شنو ! دي ما حساباتي يا زول ! انت فاهم غلط ! يا محمد اتكلم معاهو انت مش قلت معاذ صحبك في اسبوعين مشى !
انس : اسبوعين ! شكلك ما حسبتها صح قبل تركب البحر دا ! ( عاين لي سراج ) النوع دا متهور و ما اظن يسمع النصيحه انا ماشي اشوف برامج الصفوف دي شنو !
محمد : كلمتك يا منذر الشغله دي انت وحظك لكن الافضل نتمهل !
منذر : يا زول البقعدنا المدة دي كلها في المكان دا شنو !؟. مافي كلام بالشكل دا ! بعدين انحنا لسه ما مشينا على الجانصات بتتكلمو ساي انتو !؟
محمد : يعني الكلام دا من وانحنا في السودان شبعونا بيهو شبع الناس القدامنا ! يعني الناس ديل كلهم كذابين ! و كان هي ساهله كدا ما كان جينا لقينا الناس ديل كلهم في كاليه !
سراج ( مسك منذر من كتفو ) :
خليك راجل واعي و مسؤل ، اي نعم كل العملناهو مخاطرة في مخاطرة بس جازفنا بي روحنا بما فيه الكفايه ، و في كاليه بالذات لازم تهدي اللعب شوية ! و طالما وصلنا كاليه سوا ، ما داير نخسر زول فينا لحد ما ندخل بريطانيا و نبصم هناك ! فهمت علي !!
