Pain [Completed ]

1

තනාශි ලයි ගෙදර අද ලොකු උත්සවයක් . චූටි තනාශි අද ලොකු කෙල්ලෙක් වෙලා . උදේ හයයි ගානට තිබුන නැකතින් චූටි තනාශි ව කිරි ගහක් යටදී නාවලා , සුදු රෙද්දකින් වහගෙන තනාශි ගේ ලොකු අම්මා තනාශි ව ගෙදරට ගෙනාවා . ඇවිත් සුදු රෙද්ද අරිනකොට අම්මා හිටියේ පත්තු කරපු පහනක් අතේ තියාගෙන .

තනාශි ට හරි සතුටුයි .ඒත් තනාශි දන්නේ නෑ හරියටම මේ මොකක්ද වෙලා තියෙන්නෙ කියලා . මොකද චූටි තනාශි ට තාම වයස අවුරුදු දහයයි . පහවසරේ ඉන්නේ .ඒත් මොකක් හරි ලොකු දෙයක් එයාට වෙලා කියලා නම් තනාශි ට තේරුනා .

තනාශි ගේ ආච්චි  කියපු විදිහට මේකත් එකවිදිහක මගුලක් තමයි .ඒත් තනාශි ට තිබුන ලොකුම ප්‍රශ්නේ උනේ මගුලක් නම් කෝ මනමාලයා කියලා

' හැම කෙල්ලෙක් ම මනමාලයෝ එක්ක මගුලක් ගන්න කලින් මෙහෙම මගුල් ගෙයක් ගන්නවා '

තනාශි කියන්නේ ගොඩාක් ප්‍රශ්න අහන ලමයෙක් නෙමෙයි . එයා එයාගේ වටේ ඉන්න අයව ගොඩාක් විශ්වාස කරපු කෙනෙක් . ඉතින් ඒ උත්තරේ තනාශිට හොදටම ප්‍රමානවත් උනා .

කොහොමහරි ඉස්කෝලේ දී තනාශි ලොකු ලමයෙක් වෙන එක ගැන එයාගේ යාලුවොන්ගෙන් අහල දැනගෙන ඉදියා .
එයාගේ යාලුවා කියපු විදිහට

' යට ඇදුමේ රතු පාටට තිබුනම තමයි එහෙම වෙන්නේ'

ඉතින් තනාශි ගිහින් ඕක අම්මගෙන් ඇහුවා . හැබැයි ලැජ්ජාව නිසා යාලුවා කියපු එක කිව්වෙ නෑ

ඉතින් තනාශි ගේ අම්මගේ උත්තරේ උනේ

' ඔයාගේ මූනේ සුදු ලපයක් දාපුවහම තමයි එහෙම වෙන්නේ '

තනාශි ගේ අම්මා හිතුවේ තනාශි තාම චූටි නිසා ඒව ගැන දැන්ම දැනගන්න ඕනේ නෑ කියලා . ඒත් ඉතින් චූටි තනාශි අවුරුදු දහයෙදී ලොකු ලමයෙක් උනා .

එදා එයාගේ ඇගේ කාටවත් පෙන්නන්න එපා කියපු තැනකින් ලේ යනකොට , බයවුනු තනාශි හිතුවෙ එයාට ලෙඩක් කියලා . ඉතින් එයා ඒක මුලින්ම කිව්වෙ තාත්තා ට

' තාත්තේ මගේ මෙතනින් ලේ එනවා '

ඔන්න ඉතින් ඊට පස්සේ අම්මා දුවගෙන ආවා . හැමෝම හරි සතුටින් ... ලෙඩක් හැදුනම මිනිස්සු මෙච්චර සතුටු වෙන්න බැරිනිසා චූටි තනාශි අම්මගෙන් අහින්සකව ඇහුවා එයාට මොකද වෙලා තියෙන්නෙ කියලා

' ඔයා ලොකු ලමයෙක් වෙලා දෝනී '

තනාශි ගේ අම්මා තනාශි බදාගන්න ගමන් එහෙම කිව්වා .