واقفة قدام الشباك عينيها تتفرج لبرا فالجو لي تقلب كانت شمس محلاها وسخانة فجأة صارت مطر وريح قوية... كيف حياتها بالضبط كانت فرحانة وشايخة بالنجاح لي هي فيه مرتاحة البال بلا حتى مشاكل ولا وجيعة راس خاطيها دعاوي الشر اما ملي طل عليها وجهو ما شافت نهار خير بعدو كل يوم وجيعة راس تأنيب ضمير خوف من كشفان الحقيقة كذب وخديعة... تنهدت وقربت من المكتب الصغير لي محطوط فالكوان متاع بيتها ساقيها الحفيانة تستحلا برودة الارض وكأنها طفي شوية من الحرقة لي في قلبها دورت عينيها عليه تشوف فالوراق لي متراكمة فوقو بحسرة كبيرة من نهار صار لي صار في كل مرة تهز قلم تحس روحها اكبر فاشلة في الدنيا كأنها عمرها ولا كتبت... قعدت على حرف الكرسي هزت ورقة فارغة وستيلو حاولت تخرج كل فكرة سلبية في مخها وتخلي كل تركيزها فالشي لي تكتب فيه وقت حست انو افكارها تخربطت ووفات حطت القلم وهزت الورقة تقرا فيها شوية وترسمت علامات الخيبة على وجها افكار مش متناسقة عبارات مخربطة تعبير ركيك شدت الورقة هذيك بين يديها قطعتها وريشتها طروف طروف خرجت غلها الكل فيها ورماتها فالبوبال لي قدام المكتب متاعها قاطع تفكيرها صوت مرت بوها تناديلها
رشيدة: اسماء يا اسماء... ايجا بوك رجع من خدمتو ويحب يشوفك
نفخت بعصب وقامت من بلاصتها حاولت تمحي كل آثار الحزن والضياع من عينيها وترسم في بلاصتها علامات الفرحة تبسمت ابتسامة خاوية وكذابة وخرجت عندو لقاتهم قاعدين فالكوجينة كي العادة هو يترشف كويس تاي منعنع وياكل فحبة خوخ ومرت بوها اندرا شنوة تعمل عند الڨاز
اسماء: مسيتك بالخير يا احلى واغلى بو في أريانة كاملة
نور الدين: اهلا بأفضل كاتبة في تونس كاملة شنوة عاملة فالوراية الجديدة
قبل ما تجاوبو ترسمت بسمة حسرة على شفافها وسبقتها تنهيدة: هاني معاها ياروحي ونوعدك اول واحد يقراها هو انتي
نور الدين: نتشرف بالشي هذا
تبسمتلو بالسيف وقربت هزت كرسي قعدت قدامو تهرب في عينيها منو مش قادرة تحط عينها في عينو بعد الغدر لي غدرتهولو...قاطع تفكيرها وحسرتها مرت بوها لي قربت منها وهي هازة في يدها صحن كبير حطتو فالطاولة وقربتهولها هزت عينيها فيه تخزرلو
رشيدة: هاذم كعبات مقروذ عملتهم البارح العشية على خاطر قاعدة نشوف فيك مش تاكل بالباهي الايام هاذم ياخي انتي غفلتني ورقدت قبل مايطيبو هاني خليتلك بايك كولهم وكي تكملهم زيد كول هالعضمتين لي روّبتهملك بزيت الزيتون باهيينلك بنيتي
اسماء: يعيشك ياخالتي رشيدة ويعلي من مقامك
تبسمتلها وهزت يدها تمسح على راسها وتحركت ماشية تكمل عشاها مخليتها تاكل وتغص فاللقمة حبهم ليها واهتمامهم الكبير بيها خلاوها تعاف روحها وتموت الف موتة مع كل لمسة وكل جاست مزيان يعملولولها
أنت تقرأ
سنتحد مهما كذبنا (كرونيك كاملة باللهجة التونسية)
Short Storyحــــصـــــريـــا و لــأول مــــــرة: سَــنَـتـَحـد هـما كـذبـنـا بــقــلــمــي: رنــيـــمـ بــن زيــد ممنوع النقل دون اذني أو اقتباس اي فكرة من الكرونيك ♕وما أنا إلا فتاة بريئة لا اجيد كذب ولا خداع وليشهد العالم أنك صرت لعنـتي وفي كل مرة رأيتك ف...
