كنت وستكون وستظل أجمل مصيبة وغلطة ضيعت حياتي من اجلها 🥀
تلفونها قدامها ينوقز وصوتو عامل مسد بوها يخزرلها هازز حاجبو يستناها تفيق من احلام اليقضة متاعها باش تهز مسكين على نياتو ماشي في بالو تخمم فالرواية متاعها وغاطسة في افكارها لدرجة مش شالقة بالتلفون ميعرفش انو الهم والغم لي هي فيه مش مخليها تخمم في حتى شي.. كي كثرت على ماوصاوها ومحبتش تفيق على وضعها قرب منها نخزها من جنبها بالشوية تلفتتلو مضيقة عينيها مش فاهمة شبيه دلوح على راسو واشارلها على التلفون بعينيه
نور الدين: الشخص لي يطلب يكون يندب في وجهو على المصبيبة لي بلاه ربي بيها وتجبر على انو يطلبها
ضحكت تخبي في ربثتها وهزت التلفون يدها رعشت وهي تشوف في نومروه فالايكرو متاع التلفون والاسم لي عملتهولو مكتوب بالخط العريض "مـصـيـبـتي" ولي مخوفها اكثر انو بوها يعرف شكون لي يطلب وحتى خايفة انو يقرا افكارها وينجم يفهم شنوة تخمم فيه توة عدات لسانها على شفافها ترطب فيهم وحكات تتلعثم
اسماء: سامحني بابا طلبوني من دار النشر اكيد حاجة مهمة
هزلها براسو باهي وهي تسرسبت هربت لبيتها هزت عليه وهي حاطة يدها على قلبها من الرعبة
اسماء:الو وي خليل
خليل: ألو اهلا بمرتي المزيفة
اسماء: يزي من المساطة متاعك وقولي علاش طلبتني صارت حاجة؟
خليل: شبيك تحكي هكا لا يكون داركم شلقو بحاجة
اسماء: لا مصار شي اما كيف طلبتني كنت مع بابا على هذاك دخلت بعضي
خليل: باهي سامحني محقيش طلبتك بلا ما نسأل اتوة المرة الجاية شناخذ حذري اكثر
اسماء: باهي وعلاش طلبت؟
خليل: الحقيقة رجعنا من الروضة و رحيل عاملة حالة بالبكا تحب تشوفك خاطر اليوم فالروضة محكيتوش توحشتك
اسماء: يعيشلي بنتي لي توحشتني عديهالي نحكي معاها وبعدها نلبس ونجي
خليل: باهي نتقابلو ممبعد مالا
رحيل: ألو سلام ماما اسماء
اسماء: اهلا ببنيتي المزيانة علاش البكا توة
رحيل: توحشتك برشا وبابا محبش يطلبك ولا يخليني نقابلك
اسماء: بوك هذاك يا نهار نشدو ندڨدڨو بطريحة نكسرلو عظامو
رحيل: ههههه اهوكا يسمع فيك خاطر عاملينو انترفون وهو قاعد قدامي
اسماء: ياميمتي ملا فضيحة حتى لتوة باش تحل فمك ياطفلة.. خليل عزيزي والله نفدلك وبرا متاخذش عليا
خليل: حتى انا شاهي نعطيك طريحة من اول نهار قابلتك فيه 😐
اسماء: هاي طلعت القلوب عند بعضها.. كعبورتي بنتي المزيانة معادش تبكي وتوة نجيك طيارة باهي؟
رحيل: باهي ماما
سكرت عليها تتبسم شايخة عليها وعاجبها كيفاش توحشها وتحب تشوفها احساس الامومة لي تعيش فيه معاها يعتبر احلى احساس جربتو في حياتها.. دوب تفكرت بوها البسمة تمحات من شفافها بالسيف عليها بقات ماشية جاية فالبيت تخمم في كذبة تقولهالو باش يخليها تمشي.. قبل ما يدخل خليل لحياتها كانت تكره كل الناس لي يكذبو وتعافهم مكانتش مقتنعة انو الكذب حل للمشاكل خاطر حبل الكذب قصير وقدما كذبو وغطاو على كذباتهم شيجي نهار ويتكشفو وقتها شنوة يسلكهم من العقاب اما من نهار تعرفت عليه وهي كذبة ورا اختها وعلى شكون؟ على بوها لي معتبرها اغلى حاجة عندو فالدنيا هاذي بوها لي مدللها ومشيخها ينحي من روحو ويعطيها يموت ويفنا على ضحكتها هي توة تكذب عليه بالسيف عليها تنهدت مش عارفة كيفاش شتكمل المهزلة هاذي خليها تكذب وتكذب حتى يجي نهار تتكشف فيه وقتها شنوة يسلكها من عقاب بوها... فتحت الباب راجعة للكوجينة اما ملقاتهمش غاديكا ولات بدلت طريقها للصالة لقاتهم قاعدين جنب بعضهم يتفرجو في فلم كوميدي متاع عادل امام
اسماء: بابا طلبوني من دار النشر وثما وراق مهمة لازمني نوقع عليها قبل ما تبدا الرواية تتطبع نجم نمشي؟
نور الدين: اي برا امشي اما رد بالك توخر برشا خاطر غدوة صباح تخدم فالروضة
عملتلو براسها باهي براسها وقربت باستو من راسو وزادت باست مرت بوها من خدها ومشات لبيتها بزربة لبست حوايجها وركبت في كرهبتها شوية وقت وكانت قدام الباب فتحت ساكها تلوج فيه على المفتاح فتحت الباب وهي تنادي على رحيل وكي ملقات حتى جواب طلعتلها طول لبيتها دقت الباب ودخلت لقاتها قاعدة ترسم وبوها قاعد بجنبها يلعب معاها ويضحك من عينيه ظاهر قداش يحبها ومهتم فيها دوب شافتها قامت تجري نقزت عليها حملتها
أنت تقرأ
سنتحد مهما كذبنا (كرونيك كاملة باللهجة التونسية)
Short Storyحــــصـــــريـــا و لــأول مــــــرة: سَــنَـتـَحـد هـما كـذبـنـا بــقــلــمــي: رنــيـــمـ بــن زيــد ممنوع النقل دون اذني أو اقتباس اي فكرة من الكرونيك ♕وما أنا إلا فتاة بريئة لا اجيد كذب ولا خداع وليشهد العالم أنك صرت لعنـتي وفي كل مرة رأيتك ف...
