سنتحد مهما كذبنا (كرونيك كاملة باللهجة التونسية)

الحلقة 04

أعرف ومتأكدة أن وراء ضحكتك المستمرة و احاديثك المزعجة جرح كبير بقلبك 🥀

ما سكتتها كان بالسيف وزادت وعدتها انو غدوة تعدي معاها نهار كامل روحت بكرهبتها تسوق بزربة كان تلقا طير بيها تحب توصل في اقرب وقت خاطرها وخرت برشا مع انو بوها وصاها متبطاش اما الله غالب كي تكون مع رحيل معادش تحس لا بالوقت لا بالبلاصة دوب وصلت دخلت تتسرسب لدار على طراش صوابعها باش متعملش حس ويشلقو بيها اما لقات بوها يستنا فيها فالصالة يشرب فالتاي عينيه يتحلو بالسيف من نعاس دوب شافها سكر التلفزة وعمللها بيدو ايجا
نور الدين: شعل الضو وايجا بنتي
هزتلو براسها باهي شعلت الضو وقربت قعدت قدامو على طرف الديفون تخزرلو وتستنا فيه يبدا يصيح عليها ويعارك يكبلها سعدها على الروطار هذا الكل اما هو حط يدو على كتفها وحكا معاها بصوت حنين وخافت كي العادة زاد من عذبها اكثر
نور الدين: غدوة باش نهز خالتك رشيدة لدارهم ونقعد معاها يومين بوها تاعب ومريض ميجيش نخلوه وحدو تحب جي معانا ولا تقعد هوني وحدك فالدار؟
اسماء جاوبتو بلا تفكير : براو على رواحكم انا عندي خدمة فالروضة ولاهية مع الرواية الجديدة اتوة نقعد هوني وحدي وصلو سلامي لعم سليم وقولولو ربي يشفيك
نور الدين: باهي براحتك غدوة صباح نخليلك مصروفك فوق الفريجيدار كي العادة
اسماء: يا بابا يهديك راني بخدمتي وشهريتي وفلوس الروايات كي تتباع الكل يوصلوني علاش حتى تعطيني مصروف
نور الدين: حتى وتكون عندك عشرين شهرية انا هو لي باش نصرف عليك وندللك وانتي خبي فلوسك اتوة تلقاهم كي يجي ولد الحلال
البسمة تمحات من شفافها على هالسيرة ووجها تقلب قامت من بلاصتها باستو من راسو
اسماء: ربي يخليك ليا يا غالي هاني ماشية نرقد تصبح على خير
نور الدين: وانتي من اهلو
تبسمتلو بالسيف وكركرت روحها لبيتها سكرت الباب وبدلت دبشها ترمات طول في فرشها مخها يهز ويجيب الندامة تنهش فيها من كل شيرة مش مخليتها ترتاح ما هزها النوم وغفات كان بالسيف

فايقة على صوت الرافاي ينوقز هزت يدها بالسيف سكرتو ورجعت تقلبت للشيرة لخرى تحب تزيد ترقد اكثر خاطرها البارح سهرت لوجوه الصباح وهي تخمم في حل للمصيبة لي دخلت روحها فيها ما لقاتلها لا ساس لا راس كل فكرة جيها تقول هذا هو الحل اما كي تدرسها مليح تلقاها متهورة ومش موزونة بالكل تأفأفت وقامت بالسيف راسها باش يطرشق من الوجايع مشات غسلت وجها وهبطت للكوجينة شربت حبة دوليبران بالكشي ترتاح شوية من وجيعة راسها مشات لبيت بوها ملقات حد غادي عرفتهم مشاو رجعت للكوجينة صبت لروحها كاس قهوة شربتو هكاك بالواقف ومشات لبيتها لبست حوايجها وخرجت ماشية للروضة حطت اغنية متاع فريوز تلهي بيها روحها باش متخمم في حتى شي خايب دقايق وكانت غادي هزت ساكها ودخلت أول حاجة جات عليها عينها هي رحيل ضحكت في وجها وقربت باستها
اسماء: هيا عزيزتي برا شد بلاصتك احسن ما يشك فينا شي واحد
رحيل: تي بربي علاش مخبيين انك ماما نحب الناس الكل تعرف انو عندي أم مزيانة كيفك 😞
اسماء: عزيزتي حكينا فالموضوع هذا برشا مرات وقتلك انو بوك مخبي الموضوع على خاطر خدمتو تطلب الشي هذا
رحيل : باهي هاني مشيت
هزتلها براسها ومشات نظرتها وبسمتها الموجوعة منجمتش تمسحهم من مخها عدات بقية النهار على اعصابها قلبها واجعها على هالملايكة لي دخلت في حكاية وكذبة كبيرة معندها فيها حتى ذنب ما تعدا وقت خدمتها كان بالسيف وكي لحق وقت المرواح وجا خليل يهز رحيل وصلتهالو اسماء حتى ليدو وسلمت عليه خلات رحيل دخلت للكرهبة وتكلمت معاه
اسماء: الليلة بابا ومرتو ماشيين يباتو عند نسابهم على هذاك باش نقعد وحدي...
قبل ما تكمل كلامها قص عليها فهمها شنوة تحب تقول وحاشمة على هذاك داخلة بعضها ووجها مغصور
خليل: معنتها الليلة بايتة معانا
اسماء: كان منقلقكمش بالطبيعة
خليل: توة هذا كلام مرتي وروحي راك
اسماء: خللليييل
خليل: ههههه باهي اكهو نفدلك معاك اركب خلينا نمشو رحيل شتفرح بيك برشا
اسماء: لا براو على رواحكم انا شنتعدا نجيب حوايجي ونجي
خليل: باهي اتوت
هزتلو براسها تتبسم ومشا كل واحد شد كرهبتو هي مشات لدار بوها هزت ساك دبشها وهو مشا لدارو عامل جو خاطر رحيل شتفرح برشا معاها اليوم شوية وقت ولحقتهم كانو يتسناو فيها رحيل قريب طير من الفرحة وقت عرفت انها شتبات معاهم عشوية كاملة عداتها تلعب في بيتها وكل شوية تهبط تجري للكوجينة وين اسماء تحضر العشا تعنقها وتبوسها وبعد ترجع تطلع تلعب تقول عليها مش مصدقة... خليل كان قاعد فالصالة حاطط البيسي بين ساقيه عندو خدمة وكي كملها مشالها للكوجينة يحب يعدي اكثر وقت معاها يملا عينيه بشوفة وجها المزيان وضحكتها الجذابة حديثها الراقي لي يبين قداش هي مرا واعية ومثقفة لحضات كيف هاذي متتفلتش خاطرها مش دايمة وباش يجي نهار وهي تمشي
خليل: اسماءو شمحضرتلنا مرتي الحادقة للعشا
اسماء تكلمت وهي تتفقد فالطنجرة بلا متتلفتلو: لوبيا باللحم وسلاطة مشوية وعملتلكم ڨاتو بالشكلاطة للسهرة
خليل سند روحو على الطاولة وبقا يخزرلها: تعرف عندي قداش على شعور العايلة المتكاملة والضحكة من القلب ريحة الماكلة فاوحة في الدار ام حنينة لبنتي تعوضها على النقص لي عاشتو في حياتها صحيح حاولت برشا نكون البو والام لرحيل اما منجمتش.. وجودك معانا عاطي روح ودفا للدار متنجمتش تتصورهم.. عندي برشا مشفتش رحيل فرحانة وتضحك من قلبها للدرجة هاذي يعطيك الصحة لوجودك معانا وفي حياتنا
حطت كل شي من يدها وتفتتلو قربت منو ابتسامة حلوة وحنينة على شفافها هاذي أول مرة يحكو فيها من يوم عرسهم بلا بلادتو ولا عياطها ونرفزتها
اسماء: انتي افضل اب ممكن تحصل عليه رحيل خاطر بالحق كنتلها الاب والام كل هالسنين صحيح منعرفش سبب طلاقك انتي وامها الحقيقية اما متأكدة انك زوج مثالي زادة بالنسبة ليا.. انا عشت خمسطاش سنة من عمري بلا ام ونعرف مليح شنوة معناتو اليتم على هذا باش نعمل لي نقدر عليه رحيل متعيشوش.. هيا يا رويجلي المزيان تحرك حضر الطاولة الدراما مش مواتيتك حتى طرف
ضحك على كلامها وقرب منها قطع المسافة لي كانت بيناتهم طبع بوسة طويلة على جبينها عندها الف معنى منجمش يوصلو بالكلام وبعد بالشوية هز الطباق وخرج بيهم للجنينة وين باش ياكلو خلاها متمصمرة في بلاصتها والدوخة لاعبة عليها