سنتحد مهما كذبنا (كرونيك كاملة باللهجة التونسية)

الحلقة 06

وقد تبين في نهاية المطاف أن كل أمان وسكينة الدنيا هي في حضنك وبين يديك ❤

هزت عينيها فيه تقحرلو وبعدها ضربتو على صدرو
اسماء: شيضحك فيك بربي انا حالتي الله اعلم بيها وانتي تضحك بكل دم بارد مخيب وجهك بالحق
شدلها يديها وهو مزال يضحك قربها منو لزها لصدرو يمسحلها دموعها
خليل: قدما شفت نساء في حياتي مريتش وحدة كيفك تبكي على فيلم مش حقيقي والاحداث من وحي الخيال يمكن لو كانت معانا رحيل راي مبكاتش كيفك
اسماء: ههههه شعني نعمل ملي انا صغيرة ودموعي ديما على الرموش فيسع طيح جاب ربي في حياتي صوحبت ولا حبيت مكانش راني قتلت روحي طول ههههه
الدقايق لي بعدها رجع الصمت خيم عليهم هو يعاود كلامها في مخو شايخ من فكرة انو مصوحبتش في حياتها كاملة اعجابو ليها في كل مرة يزيد ويطور وهو مش شالق بروحو اما هي كانت مستمتعة في حضنو تسمع دقات قلبو الهادية حاسة بأمان كبيير وهي يين يديه حركت راسها بالشوية تنفض الافكار المنحرفة لي سيطرت عليها هي تحس في نفسو سخون يضرب في رقبتها هزت عينيها للتلفزة تتفرج من زهرها البطل يبوس فالبطلة شهقت بالشوية بلا متشلق على روحها وغطات عينيها بيديها وخليل شاف اللقطة وشاف حتى ردة فعلها تبسم وحب يبدل السوجي باش ميحرجهاش اكثر
خليل: علاش عمرك لا صوحبت؟
اسماء: هكاك منحبش نخون ثقة بابا لي كرس حياتو الكل على خاطري
سكتت شوية وكملت كلامها بعدما تقلبو ملامحها لحزن كبير : اما فالاخير عملتها وخنت ثقتو
خليل وهو يكبس عليها اكثر كأنو يحب يدخلها بين ضلوعو: هاذي متتسماش خيانة خاطر صداقنا انا وياك مكتوب يعني معرسين على سنة الله ورسوله ونهار تتكشف الحقيقة انا راح نكون معاك ومستحيل نسيب يدك بالكل كيما بدينا الثنية مع بعض شنكملوها مع بعض 
رعش قلبها وسط صدرها من فكرة انها تتكشف وكل حاجة تعمل فيها طيح فالما اما رغم هكاك مندمتش بالكل بعدت عليه بشوية وهزت راسها خزرتلو
اسماء: شنطلع نرقد تعبت.. تصبح على خير
خليل: على خير
اسماء تحكي:
طلعت هاك الدروج وهموم الدنيا الكل فوق كتافي ماوصلت للبيت وترميت عالفرش حتى حسيت عمري شتطلع غمضت عينيا بالقوي ورجعت فتحتهم نخزر لرحيل لي راقدة بجنبي هي الوحيدة لي منسيتني كل الهم لي انا فيه هزيت يدي عديتها على طول شعرها نتبسم في لحضة تذكرت أول نهار تقابلت انا وخليل وقررنا نعرسو كنت نقري فالروضة كي العادة وكي لحق وقت الخروج بقيت مع التلامذة نستنا حتى يجو اولياءهم يهزوهم بحكم هوما صغار برشا ممنوع نخرجوهم حتى يجي الشخص المسؤول عليهم وقتها كان الجو بارد برشا والمطر تصب صوت الرعد عامل حالة الولاد الكل خرجو ما بقات كان رحيل قعدت بجنبها نستنا بوها يجي يهزها باش نروح لدار نشوف فيها ترعش شوية من الخوف من الرعد وشوية غايضتها من بوها لي وخر عليها خايفة انو يكون نساها هوني قربت منها نمسحلها على شعرها نهدي فيها بديت نحكي معاها نحاول نخرجها من حالة الذعر لي هي فيها شوية وتأقلمت معايا رجعت تحكي وتضحك حتى هي.. خمس دقايق عشر دقايق نص ساعة ساعة كاملة وبوها مثماش حتى بديت نتقلق كنت باش نهزها معايا لدار ولي حب يصير خليه يصير مبقاتش الفكرة هاذي في مخي وفيسع نسيتها وقت سمعت صوت متاع فران كرهبة تشد يالقوي طليت من الشباك شفت واحد يقرب من باب الروضة حالتو متبينش بالكل انو واحد بكامل قواه العقلية حتى انو خوفي زاد لحضات وسمعت الباب تفتح الدم جمد في عروقي ورجعت نرعش كيف قصبة اما الخوف الكل مشا وقت شفت رحيل قامت تجري ترمات في حملتو وسمعتها تحكي معاه
رحيل: بابا علاه طولت هكا خفت برشا هوني
&&&&: سامحني ياروحي كانت عندي خدمة ومنجمتش نخرج بالحق سامحني اميرتي هيا خلينا نمشيو
هزتلو براسها ورجعت تجري هزت كرتابتها من قدامي ومشات معاه وهو معبرنيش حتى بشطر عين تقول مش انا لي بقيت معاها حتى لهاذ الوقت كان مكنتش راه بنتو بقات فالشارع والله اعلم شنوة صارلها
اسماء: لحضة
كلمة خرجت مني بلا منحس على قد ما تعصب فاللحضة هذيك تلفتلي يخزر بإستغراب تقول عليه توة وين لاحض وجودي هوني بقيت نهز فيه ونحط بنظراتي شعرو طويل وداخل بعضو عينيه حمر ومنفوخين تقول عليه كان يبكي الكرافات متاع الكوتسيم لي لابسو وحطوطة على كتافو بشكل عشوائي شطر قفال السورية متاعو مفتوحة لحيتو داخلة بعضها وجهو اصفر وتاعب عينيه محوقة بالحالة هاذي مستحيل ينجم يتلها بطفلة قربت منو بخطوات بطيئة وعينيا مزالت تحوم عليه لدرجة حسيت بيه دخل بعضو
اسماء: تنجم تخلي رحيل تمشي للكرهبة نحب نحكي معاك زوز كلمات على انفراد سي....؟
&&&&:اسمي خليل دقيقة
سكتت وانا نشوف فيه هبط على ركبتو مسح على خدها وطلب منها تسبقو للكرهبة وهي فيسع نفذت امرو
خليل: تفضل مدام شنوة تحب تقول
اسماء: الحقيقة كلمتك بخصوص رحيل حالتها مطمنش بالكل تبدلت برشا تقول عليها مش نفسها رحيل القديمة صارت نهار وطولو وهي شاردة نقاطها تراجعت وزيد متحملش حد يقرب منها ولا يحكي معاها طول الوقت ساكتة وجابدة روحها ياريت تحاولو تحلو مشاكلكم بعيد عليها ولا شوفولها دكتور نفسي في اقرب وقت
ستنيتو يجاوبني ولا يعطيني سبب تغيرها اما هو هزني وحطني بنظراتو كأنو يقولي مادخلش وخرج من الكلاس نهار هذاك عصبني برشا وحسسني اني منسوى شي اما حملتها في عظامي وسكتت ونهار لي بعدو
حملتها في عظامي وسكتت ونهار لي بعدو جا حتى لعندي والمرة هاذي هو لي طلب مني نحكو ياخي محبيتش نحشمو ووافقت مشينا قعدنا فالقهوة لي مقابلة الروضة طلبت قهوة وقعت نترشف منها نستنا فيه يحكي
خليل: فالاول حبيت نطلب منك سماح على الفازة لي عملتها البارح محقيش حقرتك بالطريقة هذيك سامحني خاطر كنت معصب برشا
اسماء: مش مشكل مصار شي انا كي تكلمت خاطرني نعتبر رحيل كيف بنتي وحبيت نعاونها لا اكثر لا اقل وتوة كان كملت كلامك نجم نمشي؟
خليل:لا مزال مكملتش تنجم تقعد عيشك
اسماء: باهي تفضل نسمع فيك
خليل: انا ومرتي طلقنا قبل عامين وقتها بقيت في ألمانيا وامي لي كانت لاهية برحيل اما وقت جاتني خدمة في تونس تجبرت اني نهبط مع رحيل وحاولت من وقتها نكونلها الأم والأب رحيل كانت صفا وامورها مريڨلة اما كل شي تقلب وقت رجعت امها وحبت تاخذها بالسيف حاولنا برشا نمنعوها وانا وقفت في وجها ياخي رفعت دعوة حضانة مش محبة في بنتها اما خاطرها منجمتش تتحمل فكرة اني عايش متهني في حياتي من وقتها حالة رحيل كل يوم لتالي ومعادش تاكل حتى القراية تجيها بالسيف البارح كانت أول جلسة وللاسف هي تفوقت فيها خاطر جابت اتهمات فارغة وحاولت تلصقهالي المحامي قالي انو ممكن ناخذ الحضانة اذا وفرت الضروف المناسبة لرحيل باش تعيش بإستقرار يعني دار مستقرة وخدمة وزادة نكون معرس انا عندي كل شي كان العرس
اسماء: يضهرلي فهمتك تحبني نلوجلك على عروسة مش هكا؟
خليل: الحقيقة لا مثماش وحدة تنجم تعاون رحيل قدك انتي تعرف حالتها مليح وهي تحبك برشا وفالدار ديما تحكيلي عليك... كان تحب على عرس وخطبة وصداق نعملهملك الكل عرس سبع ايام وسبع ليالي خطبة مصارتش وصداق لي طلبتو تلقاه
فتحت عينيا على وسعهم مش مصدقة الشي لي نسمع فيه نتفضت من بلاصتي وهزيت ساكي
اسماء: لباس في مخك ولا برا امشي داوي واضح فيك هبلت
خليل: مادموزال عيشك انا مستعد نعمل اي حاجة على خاطر بنتي.. متتسرعش خمم مليح عيشك
قحرتلو بنظرات قوية وزربت في خطواتي هاربة منو مش فاهمة الوقاحة هاذي الكل منين جايبها بالنسبة ليا العرس حاجة مقدسة خاطر حياتنا باش تتقلب 180 درجة للباهي اذا عرفنا نختارو الشريك لي يستحق نقسمو معاه حياتنا ونشاركوه تفاصيلها البسيطة يكون مصدر قوتنا والهامنا يقبلنا كيف ما احنا ويعشق كل تفاصيلنا الخايبة قبل الباهية... ولا تتقلب للخايب كان خترنا شخص يحب ياخو اكثر مما يعطي ما يهتمش بمشاعرنا وما يهمو كان في روحو... النهار هذاك تعدا عليا ارزن منو مثماش خصوصي بعد الحديث لي دار بيناتنا معاد عيني لا في خدمة لا في تدريس نحب نغم راسي ونرقد نهرب من تأنيب الضمير لي ينهش في عظامي كلما جي عيني في عين رحيل لي تتبسمي فرحانة على غير العادة شكيت انو هو قاللها باش يعرس بيا على هذاك عينيها تلمع من الفرحة مش عارفة كيفاش شنجم نشوفها بعد اليوم تتوجع وانا عارفة انو سبب الوجيعة هو كسران خاطرها لي انا سبب فيه فالليلة هذيك عينيا متغمضوش النوم حلف يزورني وانا نخمم في رحيل وكي طلع النهار اول شي عملتو ستنيت رحيل عند الباب وكي شفت بوها جابها قتلو نحب نحكي معاك وخبرتو اني موافقة نعرس بيه على شرط يكون عرسنا عالاوراق منغير ما يعرف حد وبعدما يربح الحضانة نخرج من حياتهم بأقل اضرار