- كنت نحكي ل صاحبي ونقوله :
انا مش المناسب ليها ..
حاولت نشكل روحي ، زي ما كنت نحب نشكل الطين ف حصة الرسم وانا صغير بس توا ما قدرتش ..
حاولت نكون مناسب ل قلبها ، حاولت نخليها تشوفلي ع إني الشخص اللي ح تكمل معاه باقي حياتها بس ما قدرتش ..
باعدت ع اللي تكرهه ، مع إني مؤمن هلبا ب إن اللي يحبك ح يتقبلك زي ما انت ، بس استغنيت ع إيماني ب هالشيء من فرط حبي ليها ، وباعدت ع كل شيء تكرهه بس ما نفعش وبرضو ما قدرتش ..
تصدق .. لحظات هلبا كنت نحس ان تحبني ، بس ف كل مرة يطلع إحساسي غلط او فاهم تصرفاتها غلط ، حاولت نخليها تحكي ع اللي ف داخلها اتجاهي ، بس ف كل مرة كانت تتهرب من الموضوع ، كل ما نحاول نشوف شن ف قلبها ، نلقى روحي فاشل ومش عارف نتصرف ، وتنتهي محاولتي ب ما قدرتش ..
صوتها .. كان يقول ان مرتاحة ف الكلام معاي ، بس كلامها كان يقول العكس ، كلامها كان يحسس فيا إني شخص عادي ، وما كانش باين بين حروفها شعور مختلف ..
فاشل ف ان نكتشفها فيها هلبا حاجات .. مع إني حافظها .. حافظ روتين يومها .. حافظ ذوقها ف الماكلة واللبس .. حافظ كلماتها المميزة .. وحافظ شكل ايديها .. والخطوط اللي فيهم .. ومشيتها .. وحتى طريقة كلامها ، هي كانت تحب تتكلم ب ايديها .. ولاني كنت مركز فيها وفيهم فا حفظت شكلهم .. وصلت بيا ان نحاول نعد رموش عيونها .. اصلا مذكراتي كلهم فيهم رسومات متاع عيون .. واللي هما عيونها .. !
ف يوم .. لقيت البنات متجمعين عليها وكانت تبكي .. ما عرفتش نتصرف .. نتصل بيها مقفل .. قعدت نشوفلها من بعيد .. تمنيت لو قدرت نمحيهم كلهم ونكون جنبها .. نسألها ، ولا نقعد ساكت ما نبيش نعرف غير نمسح دموعها بس .. ف نفس اليوم ف الليل اتصلت وردتت .. ولما سألتها ، قالت ان كانت تبكي لان ما جاوبتش كويس .. !
نقولك وما تضحكش ؟
انا وقت ما فهمتش كيف قعدت نتمنى ان ياريت انا كنت ورقة امتحانها بس الساهل ، ولا كنت دكتورها ، اقل شيء ما كانتش ح تبكي لان ما جاوبتش .. ضحكت ع روحي يومها .. بس اللحظات الغبية والحلوة اللي زي هاذي اللي خلتني نعرف كويس قداش ما انا نحبها .. !
- شفت ل صاحبي ، لقيته حاط راسه ع الطاولة وراقد .. كاتبلي ف ورقة "قوللها نحبك وخليني نكمل نومي" .
مع ان كنت نشوف فيه إنسان غير عاقل .. بس فكرت ف كلامه .. انا ماعمريش فكرت نعترفلها ، لان كنت كل ما نحاول ندير حاجة نفشل .. بس خديت ب كلامه ، واتصلت وطلعت اللي ف قلبي ، حسيت روحي زي الاطفال اللي يخافو يقولو الحق وينضربو .. !
- لكن اللي صار ، ان سمعت الرد اللي كنت نتمنى نسمعه من بداية قصتي معاها ، وهكي كملنا مع بعض انا وأمك حياتنا ،.💍❤💙
#نور الحياة❤
