عطوه صلح💔🔞

البارت الثاني

بقلم الكاتبه: فاطمه حسن 🖊💗
تبارك ..
من عمري 8سنوات واني احب محمود .. يمكن تستغربون من صغر عمري بس اني فتحت عيوني وهمه يكولون تبارك لمحمود ..
جان من يجينه عيب نطلع يم الولد فجنت اتختل ورة الباب واباوعله من ثقب المفتاح ..
شكد تمنينه ببساطه عقلي وتفكيري وبصغر عمري ..
ماعرف مفهوم الحب بمعناه الصريح بس جنت احب من يجينه وابقى اتفرج عليه من بعيد بالختله ..
كبرت شويه وصار بيناتنه نظرات وحركات تحسسني بدفئ وحنيه هالنظرات الي يخصني بيهه ..
اهتمامه زاد وجياته زادت ..
تعودت اشوفه كل اسبوع .. يجي يداهر ويشاقى .. غزل العيون هو كان كل الي يربطنه من بعيد .. لاحاجاني كلام صريح ولا لمسلي ايدي ..
اهتمامه الزايد وشقاه ودلاله الي صار محط انظار اهلي ولان هو ابن عم ابويه فرحبوا اهلي بالفكرة .. فكرة انو اكون من نصيب محمود ..

وانخطبنه وكان اسعد يوم بحياتي .. ايام الخطوبه .. بالتحديد 3اشهر استمرت خطوبتي .. جنه نلتقي گدام اهلنه عزومات فقط بدون طبه وطلعه ممنوع هالشي .. دلاله الي زاد عن قبل .. تقريبا جنه يوميه نتشاوف وصرت مااكدر بدونه واحسب يوم يوم لزواجي علمود اصير اني وياه ببيت واحد واشوف كبال عيني طول الوكت .. اي بهل بساطه جان مفهوم الحب عندي .. خطيبي حلو وصاك اشوفه ويشوفني ونسكن ببيت واحد واقوى شي ممكن يصير انو يبوسني بخدي .. صدقآ هيج جان مفهومي للحب والزواج ..

من صارت المشكله ماتأثرت هواي .. صارت مشكله العشيرتين والفصل والگعده الشغل الشاغل بين كل ثنين گاعدين يحجون .. الّا اني .. اسمع طراطيش كلام بس بالي ابد مو يم الموضوع ابد ابد .. الكلام الاسمعه مو ابالي ولا اركز بتفاصيله ..
كل الي يهمني عرسي وخطيبي واحسب يوم يوم علمود اتزوج حبيبي ..

من بلشت المشكله صار اسبوعين ولحد الان ماشفت محمود .. هالفترة ابد مااجه ..

صارت گعده ثانيه .. ساده تدخلوا بحل ثاني بديل ..
قللوا المبلغ للنص وويه المبلغ بنيه .. هالبنيه تصير عطوة صلح بين العشيرتين والطرفين قبل بهل حل ..

المبلغ بعد تقليله للنص دبروه وانطوه لعائله المغدور ..
وعشسرتنه طلبوا بعد شهر ثاني علمود يدبرون بنيه ..
العشيرة اللخ مقبلوا انطوهم بس 15يوم ..

الاجواء متوترة بالبيت ماعرف ليش ..
لحد هسه ممتفقين ع البنيه الي راح تصير عطوة الصلح بين العشيرتين وبما ان القاتل من عائلتنه يعني لازم البنيه من بيوت الاخوان اقصد عمام القاتل ..
همه 3اخوان ..
الجبير عنده 3ولد واحد منعدهم هو الي قتل الولد من العشيرة الثانيه وعدهم اخت صغيره بوقتهه جان عمرهه سنتين ..
وابويه الوسطاني .. عنده اني مخطوبه واختي عمرهه 8 سنوات واخوان 2 واحد اكبر مني وواحد اصغر مني ..
عمي الصغير الثالث عنده بس بنات وبگصه اختي يعني اعمارهن تتراوح من 8 سنين ليجوة ..
وعمام ابويه وولد عمه هم خواتهم بيهم المخطوبه ومعقوده وبيهم الصغيرة كولش مو بعمر زواج وبيهم المطلقه ..
يتبع....♥️