𝘸𝘢𝘵𝘦𝘳𝘮𝘦𝘭𝘰𝘯 𝘴𝘶𝘨𝘢𝘳 | 𝘫𝘢𝘬𝘦𝘩𝘰𝘰𝘯 ✅

- ၃

Recommend song - [ The moon song - Beabadoobee and pig ]

-

စေ့ထားတဲ့ခြံတံခါးကိုတွန်းဖွင့်ပြီးဝင်လာတာနဲ့ပဲ ခြံထဲကကြက်ကလေးတွေရဲ့ပကျီပကျာအော်သံကိုတန်းကြားရတော့တယ် ။ တစ်နေကုန်ပျောက်နေတဲ့သူတို့ရဲ့ပိုင်ရှင်ကြောင့်ဗိုက်ဆာလောက်ရောပေါ့ ။ ဂျယ်ယွန်းကဘန်ဂျမင့်လက်ကို သာသာလေးဖြုတ်ချပြီးသူ့ကြက်လေးတွေဆီအရင်သွားတယ် ။ ‌ခြင်းနားမှာဆောင့်ကြောင့်ထိုင်လိုက်ပြီး အစာခွက်ကိုယူလို့ အစာကိုလက်တစ်ဆုပ်စာဖြန့်ချပေးလိုက်တာနဲ့ ကြက်ပေါက်ကလေးတွေရဲ့အော်သံဟာတိတ်ဆိတ်သွားလေတော့တယ် ။

နောက်ကနေခြေသံတရှပ်ရှပ်ကြားရတာမို့ ဘန်ဂျမင်ဟာအသံတိတ်လျှောက်လာတာမှန်းသူတန်းသိတယ် ။ လှည့်မကြည့်ပေမယ့် ဘန်ဂျမင့်မျက်နှာအနေအထားကိုသူရိပ်မိပါတယ် ။ ပါးချိုင့်လေးတစ်ဖက်ထင်အောင် ဘန်ဂျမင်ဟာပြုံးနေလောက်ရောပေါ့ ။

" သေချာကြည့်ဖူးချင်နေတာ

ဘန်ဂျမင်ကဘေးမှာထိုင်ချရင်းပြောလို့လာတယ် ။ ကြက်လေးတွေကိုပြောမှန်းသိတာမို့ ဂျယ်ယွန်းကပြုံးလိုက်တော့တယ် ။ သူဟာဘန်ဂျမင့်ကိုချောင်းချင်မှသာ ဒီကြက်လေးတွေကိုအဖက်‌လုပ်ကြောင်းပြောပြရင်တော့ ဆူများဆူဦးပေမလားနော် ။

ခြံထဲမှာလူးလာကူးသန်းနေတဲ့ လေပြေလေးတွေဟာ ဟိုးအဝေးကအဝါရောင်ပန်းတွေအနံ့ကိုသယ်ဆောင်လာခဲ့ဟန်ပေါ်တယ် ။ ဘန်ဂျမင်ကဂျယ်ယွန်းရဲ့ခေါင်းကိုခပ်ဖွဖွလေးလာကိုင်တယ် ။ ဂျယ်ယွန်းရင်ထဲငှက်တစ်ကောင်ဖြတ်ပျံသွားတယ် ။ ‌ဇင်ယော်လေး ။

" ဂျယ်ယွန်း "

အိမ်အဝကအမေ့အသံကိုကြားလိုက်ရတဲ့အခါ ဘန်ဂျမင်ကချက်ချင်းပဲသူ့လက်ကိုဖြုတ်ချလို့မတ်တပ်ထရပ်လိုက်တယ် ။ ဂျယ်ယွန်းကထိုင်နေရာကနေဘန်ဂျမင့်ကိုတစ်ချက်ပြန်မော့ကြည့်ပြီးမှ သူ့အမေဆ‌ီထသွားတယ် ။

" ဘယ်တွေပျောက်နေတာတုန်း တစ်နေကုန်နီးနီးပဲ "

အမေကပြောရင်းနဲ့ဂျယ်ယွန်းကိုကျော်ပြီး ဘန်ဂျမင့်ကိုတစ်ချက်ကြည့်တယ် ။ သူတို့နှစ်ယောက်ဘယ်လိုသိကြလဲဆိုပြီး အမေကသိချင်နေတဲ့ပုံပါပဲ ။