Bakas sa mga matang nangingislap
kung gaano kang kaytagal nagpanggap,
kung paanong sinuong mag-isa ang landas ng hirap
tungo sa araw ng iyong pagtanggap.
Binigo ng mga pangako, alaala nga’y tukso,
mga gunitang nakapanlulumo’y umaaligid sa ’yong kwarto;
pinaglalaruan ang kinukulayan mong mundo,
pinaniniwala kang lahat ay ’di totoo.
Ngunit ang diwang ito’y nais makiusap,
hayaang balutin ka sa aking mga yakap,
kukumutan ng aking pagtanggap
sapagkat ang kaligayahan mo, para sa ’kin na’y sapat.
Tatak sa isipang ika’y mahiwaga,
higit pa sa materyal na bagay ang tunay mong halaga;
hindi ka nararapat magpaalipin sa tanikala,
sa mga gapos ng nakaraan, ika’y pakakawala.
Hali ka’t tayo’y lumipad.
Lumakbay sa ating sariling mundo’t magliwaliw magdamag;
ligaya’t pag-asa ang alay kong pagmamahal,
kung iloloob ng Panginoon, tayo ay magtatagal.
Kaya kapit, mahal.
Paninindigan ang sinimulang ugnayan.
Ilalaban ang bawat isa,
sapagkat sa kabila ng dulo ng walang hanggan
ikaw at ikaw lang
ang nag-iisang tahanan,
pahingahan,
ang pakakasalan,
at ang kahulugan
ng aking pagmamahal.
YOU ARE READING
Between: A Collection of Poems
Poetry"When love knows no distance nor space, but the space in each of their hearts for someone they love." "Between" is a collection of poems that talks about the love between two lovers whom were separated by seas and mountains but were together in love...
