مشاعرهم

P.. 1

خليني اعرفكم على نفسي..
اني كمال عمري هسه 28 سنه
حبيت ارويلكم قصتي ويه اجمل واول واخر.. حبيبه مرت على حياتي
اسمها ورد
وجانت بعيني اسم على مسمى.. جنت اخجل اباوع عليها من كد ما هي مثاليه.. وشكد ما عدلت بنفسي احسني ناقص كدامها
لهاي الدرجه؟  اي واكثر
وعيونها؟.. لا ماحچيلكم
ماعدها عيون بس عدها كواكب اذا اباوع عليها اروح لغير عالم
ماعدها شعر بس عدها ليل براسها
جنت اذا التقي بيها بنص جمعه عائله.. احسنا بوحدنا
ما ابالغ اذا اكوللكم انو هي غطت على كل البنات.. بس بنضري!
جانت كل ما تبتسم انقهر بداخلي واغار عليها
لان من ابتسامتها.. اني حبيتها
تحب الشعر الشعبي تحب الكتب وتحب الگهوه
وجنت نفسها احب كل الاشياء الي هي معجبه بيها
بس شي واحد جان مختلف ب اهتماماتنا سوه
....
انو جنت احبها
الحجي هاذ كله جان قبل 12 سنه
يعني من جان عمري 16 متخيلين!؟
جنت احبها كل هاذ الحب واني عمري 16 سنه
اووه نسيت اكوللكم شغله.. احنا گرايب
ورد بنت عمي
جنت احسب كل اسبوع ثانيه وره ثانيه علمود ينمجع اهلي واهلها ببيت واحد
واشوفها وتبتسملي
جنت اطمح اصير شاعر.. بس علمود تحبني
وهسه صرت شاعر.. بس علمود اتذكرها بكل قصيده
ومره بيوم السبت..
2010/5/27
جان الكل مجتمع لحد ما عمي ابو ورد كال..
(يمكن ان شاء الله اذا الله اخذ امانته.. امين يحميها لورد..)
امين.. يصير اخوية الجبير الي اكبر مني بسنتين
بوكتها مكدرت اسكت وسألته لعمي:ليش تحديدا امين؟
عمي رد علية وهو يضحك وكلي..:
ليش انت متدري انو امين ناهي على ورد؟
طفت الدنيا بعيني بذيج الثانيه
جنت اشوف نفسي ورده بصف ورد.. وذبلت
باوعت عليها واني بكامل خيبتي واتمنى.. انو يكون بعينها ولو نضره حزن ممكن تنطينياها.. بس جانت مبتسمه..
ابتسامتها الي جانت كلشي بالنسبه الي هي الوحيده الي بهذاك الوقت.. قتلتني
و الي دمرني انو هي جانت تدري انو اني احبها.. بس ما جانت تمنعني انو اخلي حبي اكبر الها.. واهديه الها بعيد ميلادها.. الي هو
5/28
يعني باچر.. جنت متوقع اهديلها حبي واعترافي ابها بانو شكد اني احبها وشكد اتمنى تبادلني نفس الشعور
بس هديتها شي ثاني.. رحيلي
سافرت لاربيل اني واحد اصدقاء ابوي علساس انو ادرس هناك واتوضف.. بعدين ارجع
وبعد ما وصلت للبصره وفتحت تليفوني دگ ورديت..
ورد:ليش م اجيت لعيد ميلادي و ودعتني قبل متروح
كمال: مو كعدنا على دجله؟
ورد: هاي قبل عيد ميلادي باسبوع
كمال:  ما يفرق
ورد: .. كمال
(من وكتها لا اراديا بجيت..
من سمعت اسمي على شفاهك اجه..
وانت ما رديت بس احجي واكول
انت ما رديت بس گلبك حچه..)
كمال:  ها؟
ورد:  راح تتذكرني؟
كمال: چذب اذا اكلج اي
ورد: تصبح على خير
قفلت تليفوني وكعدت ابجي.. وجانت اخير مكالمه النا
.. من فشلتني كبال روحي وكابلت روحي وبجيت