السلام عليكم...لاتنسو اختي بدعائكم
رحمة رب العالمين أوسع، أم رحمة يوسف؟.. يوسف بشر، وقد ارتكب إخوته في حقهِ جريمة، ولكن بكلمة واحدة أصلحوا أمرهم مع أبيهم..
وكذلك بالنسبة لنا نحن العصاة الغرقى في المعاصي، بإمكاننا في ليلة من الليالي أن نخاطب رب العالمين، نقول: يا رب!.. عفوكَ!.. عفوكَ!.. عفوك!.. انتهى الأمر!.. {ما يَفْعَلُ اللَّهُ بِعَذَابِكُمْ إِن شَكَرْتُمْ وَآمَنتُمْ وَكَانَ اللَّهُ شَاكِرًا عَلِيمًا}. م
مريم//من عرفت عندي تكيس علي المبايض حمدت الله وشكرته چنت كلش خايفة لا يطلع عندي مشكلة متتصلح طلعنه من الطبيب قلقه
شافني رعد مهمومه ركبنه السياره سأل:
ـ ليش القلق حبيبتي؟
ـ چانت امنيتي اصير ام
ـ ترة بعدج صغيرة والعمر كدامچ
ـ بس انت چبير واذا هسة متخلف شوكت تلحك تشوف اطفالك يكبرون كدامك
ـ شسالفة سويتيني شايب تری بحیلي ولا تجعيده بوجهي وشعري كد ماثخين ولاينفرگ
ـ اهو رعد عفيه مو وكت مداهر
- لا تشيلين هم حبيبتي منا لچم شهر اذا ما صار حمل نشوف غير طبيبة
ـ يعني منسوي طفل انابيب
ـمريم الانابيب للحالتهم متأخرة واحنه ستونه متزوجين ماصارلنه سنة وشغلتج ميحتاجلهه هالقلق
ـ اعرف هواي عدهن تكيس صار سنين وما صار طفل عدهم
ـ يصير حبيبتي يصير
ـ زين ليش متقبل على الانابيب
ـ مريم تعرفين بيه بهيچ امورعقلي قديم ابد ما اتقبل الانابيب واحنه منحتاج للعملية وبعدين احنه عدنة الائمة ببختهم يصير عدنه عشيرة جهال
ـ والنعم منهم بس صار جم مرة اروح كربلاء ونجف وانخيهم وماكو!
ـ اولا لا ليش تبجيين.. صبر حلو بعدنه بداية المشوار
وان شاءالله ما يقصرون ويانه
ثانيا راح اخذج انتي ونورة ونروح گصادة للعسكريين نزور وطلبي منهم
ـ صددددك للحسن العسگرررري راح تأخذنه لسامراء
ـ قابل سامرة بغير دولة حتى متصدكين ولو جنت ضاملچ مفاجئة بس انتي مستعجلة علي رزقج وجنت انتظر جنسية نور تتغير واخذكم سوية للرضا عليه السلام بس ما صارت
ـ رررعد راااح تاخذني للرضا
ـبس تكمل جوازاتنا نروح لسامرا گصادة ونرجع نزور الكاظم عليه السلام
،،، الفرحه ما شالتني اريد ابچي واضحك بنفس الوكت طبك سيارته رعد واخذلنه عشى وحسب حساب احمد ويانه…
رجعنه للبيت وحجينه لنوارة الصار
ـ ان شاء الله ميردلكم حاجة الإمام الحسن العسكري ولا الرضا ولا موسى بن جعفر
رد رعد:
ـ جنت اتمنى اخذج ويانه لإيران يانورة
ـ لاتخليهه ابالك روحوا انتوا وادعولي
ـ بس انتي ويانه من نروح للعسگريين والكاظم
ـ طبعاااا رجلي علي رجلكم
ـ بس رعد وين نعوف نورة واحمد
ـ احمد يضل هنا ما عليه شي الولد صار زين واكدر اعتمد عليه ونوارة اخذها لأرشد خصوص التزامه بالأيات القرانیه
-انت بسبب احمد تدخل الجنة.. تروح ادور اله حليب جمل منو يسويها؟
-لااااا يسووها العنده ضمير يسوي كلشي والماعنده ضمير ينعدم فعل الخير منه..
والجاي اسوي الاحمد مو اله اليه تجيني حسنات بيوم القيامة لاتعد، اذن منو متفضل على منو؟
-صح كلامك.
-من جربنا طريقة صديقي الروحاني لمدة(٤١)يوم قرينا على راسه ١١مره سورة الرحمن ومره سورة الانفال تحسين من خلصنا(٤١)يوم احمد صار احسن، بنسبة٣٠ بلميه فلازم نكرر عليه كل(٤١)يوم القراءة الى ان يطيب بأذن الله تعالى
ردت نوارة
ـياخويه اصلا احمد صار شخصية ثانية من يوم الذكرته فوكها نطيته الثقه التامة يدير سوبر ماركت ونطيته غرفته الخاصة وحياته الخاصة.
ـ لا نواره كولي سبحان الغير اخوج وخلاه يتقبل احمد ويخليه بالسوبر ماركت.
ـ لان عرفت بي داخلة طفل وهالمتلازمة يحتاجلهه ناس فاهمين يتعاملون وياه انو هو انسان طبيعي لكن من صغره اتعرض لتعنيف وضرب واذية رغم امه الله يرحمها هواي حاولت اداري بس ماكدرت بسبب الناس بالشارع يتنمرون صار الصار الولد ما بي اذية ابد.
ردت نورة:
ـ هو بعده معتبرني صديقة نوار ممعتبرني بنية كل ما يشوفني يتعامل ويايه گأنو ولد.
ـ عقلة عقل طفل بعدة من ياكل الجبس ويطلع بي هدية يفرح ويگوم يگمز ومن يطلع كارتون يتربع ويكعد يتفرج ومن يدخلون جهال يحب يلعب وياهم مرات أشوفه يتصرف مثل الزلم ومرات أشوفه يتعارك ويه الجهال على نستلة.
ـ مريم لا تضلين تباوعيلي هيج.
ـ والله ما شوف بيها شي بس انتي مكبرة الموضوع.
ـ شنو يابنات شكو شدتحجون؟
ردت نورة:
ـ ماكو شي رعد مرتك ضارب عقلها.
ـ ياااا صدك اني ضارب عقلي؟
ـ غير افتهم شكوو؟
ـ يعني شكو بيها اذا انجمعوا احمد ونورة بالحلال
ـ گلتلج مستحيل تصير لان تلعب نفسي بعدني ممتخلصة من فكرة كوني رجل وصرت انثى وتريديني افكر برجل واتزوج مستحيل من عاشر المستحيلات
ـ شنو هالحجي مريم ولا الولد اصغر منها بسنتين
ثانيا هويته بعدهه تقرا ذكر معناهه اذا تزوجت وصار طفل راح يبقى بدون هوية ذكر ومتزوج ذكر من غير المسائلة القانونية الراح تركض ورانه وثالثا متلازمة توريت وراثية.
ـ بس نورة بنت والبنت الها وقت وتكبر مو مثل الرجل.
ـ وانا قانعه بقسمتي يامريم لا اكدر اتقبل احمد ولا اكدر اتقبل غيره تكدرين تكولين صرت من جماعه المضربات عن الزواج وانه عايشة حياتي حاليا كلش مستمتعة بيهه حققت جزء من احلامي ويكفي عندي عائلة مثلكم اخ يحبني بكل حالاتي واخت مثلج ممحسستني بشي وخلتني اندمج بالمجتمع واحمد اعتبره اخوية الصغير واذا راد يتزوج انا اروح اخطبله واختارله بنية تخاف الله بي وان شاء الله انتم تترسون البيت اطفال والله العظيم احلى عيشة والف الحمد لله والشكر.
ما انسى أخوتي رعد وارشد وصادق وخواتي انتي وام ريتاج شأريد من الله بعد حتى يصير طمع.. بس اتمنى الله يسهل لجنسيتي وتتحول بشكل قانوني انثى حتى اروح عمرة لبيت الله هاي امنيتي الاتمنى احققها…
،، مرة الايام وأخذنه رعد للنجف نزور ورجعنه لكربلاء ووراهه بيومين طلعنه للعسگريين گصادة بحملة رحنه وزرنه وطلبت مراد مناك من اني وطفلة اجيت للعسگريين وراهه مكدرنه نجي بعد جانت الاجواء كلش حلوة وامان شي فوق الخيال رعد اشتره حلال مشاكل ووزعه بالحضرة طلب مراد أثنينه طلبنه مراد علمود طفل ونورة همين طلبت مراد بقينة يوم كامل ورجعنه بالطريق
رعد عاف الحملة كلهم اريد اروح للكاظم واخذلنه تكسي وللكاظم رحنه… من الطريق تعبنه وردنه نروح لفندق نرتاح بي بس شلون بنورة يافندق اليتقبلها.
ـ اكلك رعد ماكو داعي للفندق
،، رغم نورة رفضت بس ماقبلنه نعوفهه رحنه للحمامات العمومية غسلنه توضينه وطلعنه للأمام قبل الفجر الزيارة خفيفة ماكو احد تجنن الزيارة صلينه وقرينه قرأن ودعينه بقينه من قبل الفجر احنه بالإمام.. صار الفجر وصلينه وبقينه گاعدين كل شوي نزور شبعنه من الامام ولو الزيارة مينشبع منها للساعه عشرة الصبح يله طلعنه گعدنه بمطعم واتريكنه وانطلقنه لكراج النهضة ورجعنه لبيتنه.
جايبين صوغه لأحمد ويانه رعد اشتراله علك وقميص من العسكريين واشتراله بنطلون من الكاظم …
واني اشتريت لبنت اخوي سلمان ملابس اطفال من سامراء والكاظم زورتهم وجبتهم ويايه.
لان جايبه صوغه الاهلي رحنا الهم سلمنه عليهم شفت غفران لونهه مخطوف ..
شبيج غفران شنو مريضة؟
ـ لا تخلين ابالج ان شاءالله ماكو شي.
ـ شنو ماكو شي فهميني شبيج؟
ـ والله شكلج .. بس شاكين بيه غدة سرطانية بصدري
ـ ستررررررك ررربي شنوو غدة سرطانية مين اجتچ ووولج ماخابرتيني وحجيتي
ـ غير نتأكد يله اكلچ خو موبس افزعج
ـ وشطلعت التحاليل؟
ـ غدة سرطانية ولازم اشيلهه قبل لاتكبر
ـ شوكت طلعت النتائج؟
ـ البارحه بالليل جبنة النتائج.
ـ ومعرفتي تخابريني ؟
ـ عدكم سفر ليش انغصچ ان شاءالله ماكو شي.
ـ ان شاءالله بس شوكت تسويهه العملية؟
ـ الجمعة الجايه.
ـ لعد ماروح ابقي يمچ.
ـ لا اسمعي يمي امي وامج وسلمان ..
ـ شلون اعوفج.
ـ اني بس محتاجة للدعاء اكثر يامريم..
مريم/بقيت اراجع للطبيبة علمود علاج التگيس صرت اتعالج علاجين علاج الي تكتبه الدكتورة وعلاج اخذنا من سيد معمم كاللنه ابقوا كل يوم ردد عقب كل فريضه
("اللهم لا تذرني فردآ وانت خير الوارثين"
اللهم انك انت الرزاق الكريم ارزقني بالذرية الصالحة من حيث لا احتسب يارب العالمين
اللهم انك انت السميع البصير استجب دعائي وابصر بحالي يارب العالمين استجب دعائي اللهم انك انت الرزاق الكريم ارزقني واكرمني بالذرية الصالحة يا اكرم الاكرمين يارب العالمين يامجيب الدعوات اجعلها ساعة استجابة الدعاء، واستجب دعائي يارب العالمين .....ولا حول ولا قوة الى بالله الحي القيوم الاحد الصمد رب السماوات والارض ورب العرش العظيم وهو على كل شيء قدير))
مرت اكثر من اربع اشهر ونص من زيارة السامراء والتزامنا انا ورعد بلورد بس ماكو نتيجة
مره طلعت انظف الطارمة بس حسيت الم ببطني وصدري..عرفت هاي اعراض دورة هاي دارت سنه على زواجي وشهرين وماكو حمل كعدت ابجي بسگته
وشهريه رجعت تتخربط يمكن تكيس رجع
تأخرت عليه عشرة ايام ومانزلت بس الوجع
مااشوف اله اجتني نورة جايبه بيدهه خاشوكه راسا مسحت دموعي وعدلت كعدتي
ـ اكلج مريم شوفيلي طعم الدولمة طيبه تحتاج ملح حامض شي؟
اخذتها منهه
ـ الله شنو هالطعم يذوب بالحلك
ـ صدك والله واخيرا ضبطتهه
ـ مستووية اروح اصبلي ماعون
ـ متنتضرين رعد بس اكلچ چنتي تبچین
-لا عیني ليش ابچي ويله حبابه اريد صحن دولمه ماانتظر رعد
ـ خابري احس روحي متت من الجوع
ـ هسة اروح للمحل واصيحله اصبري ..
راحت نوره تصيحه وانه ركضت للجدر فتحته شميت الريحة ادوخ من كثر ما طيبة حضرت الصينية وخليت الخبزات وشلت الجدر مانتضرتهه تبرد
احس روحي كلش جوعانة خليت الخبزات على الجدر والصينية ولزمتهه وكلبتهه رغم الجدرية چبيرة شوي وثكيله بس لان مشتهية دولمة ما حسيت بثكل
خليتها على الميز طلعت من ثلاجه الخضرة والطرشي گفخت بخشمي ريحه فلفل باوعت ماكو فلفل حار… جريت اللبن وطركته وعصرتله ليمونه مديت السفرة بالهول وكمت انقل بيهم واجتي نورة ويايه تنقل بالأكل..
ـ راح اسوي صينية لأحمد ورعد يتغدون رعد ميكدر يعوف المحل جايتهم بضاعه
ـ اكلچ نورة شوفيلي ماعدنه فلفل طرشي
ـ عدنة طرشي
ـ لا اريد فلفل
ـ هسة اشوف عدهم بالمحل
ـ زين اكلچ شوفيلي لبن شنينة ابو الغاز
ـ اي اكو البارحه جابوا وجبة جديدة
ـ حبابة بطل چبيررر بارد يكون ويه الفلفل
ـ شنو هاي من شوكت تشربين شنينة وتاكلين فلفل طرشي؟
ـ روحي رايحه عليهن نورة بسرعه هاي الدولمة مالتج ضربت براسي
ـ زين يابة زين.. بس ترة انتي صارلچ چم يوم مو على بعضچ هواي تشتهين
ـ اعوض هذيج الايام الما اكلت بيها شي
سوت صينينة وراحت وجابتلي فلفل ولبن وماكدرت انتظر رعد بلشت بالاگل ونورة تباوعلي ..
-اهوووو یانوره اااشلون بيچ جم مرة كلتلج لاتباوعين عليه من اكل.
ـ سالفتج مو خاليه!!
ـ هاي لان اكل بیها سالفه.
ـ لا طريقة اكلچ مال وحدة حبلة.
سدت نفسي من هيچ حچت…
-اووف اشكرچ اگوم احسن
ـ لج مو قصدي شيي هاي شبيچ بس انتي من شوكت تاكلین فلفل؟ ومن شوكت تشربين لبن ابو الغاز چنتي مو هلكد تحبي وبعدين حتى الدولمة تاخذين جم لكمة وتكومين
ـ كلتلچ دا اعوض الايام الفاتت.
ـ لا تعويض ولا شي روحي حللي وشوفي.
ـ خاف متعرفين بس التحبل متشتهي تاكل
ـ خاف متعرفين انتي مو كل الحبالات سوية .. رجعي اكلي خلي ياكل النونو
ـ ردت ابچي من حجيهه صدك اني حامل خاف انصدم ويطلع ماكو شي
ـ اكلي اليوم العصر نروح نشتري اختبار حمل وسوي بالبيت اذا حمل كولي لرعد واذا لا ابقي ساكته
خلصنه غدة ولمينه گل شي ويه العصر اخذنه اذن من رعد وطلعنه للسوك مرينه بصيدلية وأخذنه احسن نوعيه اختبار حمل عنده وطلعنه ثاني يوم لازم اسويهه على الريك ماكدرت انام من القلق خايفة لا انصدم صليت الفجر وبقيت كاعدة للصبح واجتي يمي نورة دخلت الحمام وسويت الاختبار وقريت التعليمات انتظرت كم دقيقة حسب المكتوب وشفت النتيجة… حــامــل
ماصدكت روحي خاف غلط خاف ممضبوط دكت الباب عليه نورة
ـ وينج شطلع
ـ فتحت الباب ممصدكة .. نورة طلع هذا حامل
ـ هذا حامل شنو وولچ اانتيي حامل اااالف مبررروك
ـ مااريد افرح خاف يطلع جذب
ـ انتي هيج متشائمة؟
ـ صارلي كومة انتظر نورة معقولة صرت حامل بس عندي اعراض العادة الشهرية
ـ عادي والله انا شايفه نسوان اخوتي همين هيج اليوم تروحين للمختبر تحللين وتطمئنين
ـ حضنتني وهنتني وانا بعدني خايفة اصدك .. اكلج نورة لاتكولين لرعد
ـ لعد منو يروح وياچ
ـ انتي عوفي اخوج ماريدة يتأمل
ـ عنيدة.. ميخالف بس اكعدي گلشي ممطلوب منج انا انضف واطبخ وارتب انتي كعدي واتفرجي وكنكي
ـ فرحانة نورة
ـ شنو هالحجي يول شبيج طبعا فرحانة وراح ادخل اصلي صلاة شكر لله
ـ لعد شلون راح تصير فرحه رعد
ـ حبيبتي.. ان شاءالله من يثبت الحمل توفون النذورة العليكم ..
،، رحنة العصر للمختبر وحللت دم وطلعت حامل هنا وگفت ادموعي تجري ماصدكت نفسي ودي اصيح اصرخ راسا نورة اخذتني للدكتورة مالتي
قرت التحاليل واخذتلي سونار
وكالت:
-ماما انتي حامل بالشهر الثاني بعدچ ما قبطتي نطتني فيتامينات ومقويات وكلتلي اراجع المستوصف علمود التلقيحات بطريق رجعتنة للبيت متحملت اسكت اكثر خابرت رعد ما شاله يجوز ماسمعه دزيتله مسج..
ـ ابنك يسلم عليك يكول مشتاق لبابا..
رعد/چنت ملتهي وية الناس ابيعلهم عايف تلفوني على الشحن شفته رن مالحكت اروح اشيله لان عندي زبون يتأخر من يشتري خلص طلع....افگر مریم
مسگینه تاکل بنفسها علمود الحمل رحت اخذت التلفون حتی اعرف منو اتصل شفت المتصل مریم
ردت اتصل وقريت الرساله من مريم…
شنوو ابنك يسلم عليك
راسا خابرتهه خفت على اعصابها تنهار لان ميصير طفل..
-هاآااشبيج حبيبتي؟
ـ اني حامل..
ـ حامل؟ انتي وين هسه
ـ راجعين اني واختك من الطبيبة
ـ يعني صدددددك
ـ والتحاليل ويايه وصورة السونار راح تشوفه بكد الحمصاية
ـ اللهم صل على محمد وال محمد
راح اروح للمخبز بهالمنسابة اوزع خبز العباس
ـ تريد نسوي كباب؟
ـ لالا ماريد تتعبوون انا عندي جبن عرب والافران يمي اخذ خبز والخضرة هسة اجيبهه بس تنظفوها وتلفون الخبز
ـ ان شاءالله
ـ الف مبروك حبيبتي گلتلچ ربي والائمة ميردون احد، خايب اليروحلهم گصادة مايخيبوونه.
،،، مرة الاشهر متعبة لان عندي سكر بس نورة ورعد ابد ماقصروا ويايه كل فترة سلمان يزورنه هو وغفران وريم همين تجي بس ريام ماتقبل تجيني حتى بابا خطية همين اجى للحلة علمودي كلهم زاروني الا ريام رغم تعرف تعبانة بحملي
كل يوم اندعي ربي يسهل عليه ولادتي
خوفي على طفلي وخوف رعد عليه وخوف نواره على رعد وخوف احمد علينا صرنه حلقه طيبه ورحمه وسند البعض...
نياتنه ما اختلفت حبنا البعض مانقص ابد رجولة رعد اثبتت موقفها مو بس ويايه
حتى ويه اخته واحمد.
قلبه الطيب وشهامته وغيرته ويه الگل زادت حبي وتعلقي اله
حبه الاخته وحنيته عليها. احتوائه الأحمد
احس ربي صدك يحب رعد.. لان محتوي اكثر اثنين العالم رافضه نوره اخته وحالتها واحمد وحالته
رغم العالم يشوفهم مذنبين ويتنمرون عليهم بس رعد يشوفهم نعمه ورحمه وطيبه، خلاني حتى انه اشوفهم مثله
وهنا عرفت العلاقة الزوجية مو علاقه عاديه انما علاقة إنسانية لان كلشي بيها مبني على احترام الانسان للأنسان
شگد چنت اشوف كبار السن محبتهم البعض كأنما هسه مزوجين لان علاقتهم إنسانية..
وهذا الحسيته برعد چنت اگول عنه یحبني لمجرد شهوه يجي يوم ويمل منها او تتلاشى بسبب عملته ويايه لكن مواقفه واحتوائه اليه والمرضي اثبتلي كما يقول تعالى:
{ وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ}
فالسكون ، و المودة، و الرحمة ؛ كلها أمور قلبية.
خمس اشهر عليه منتظره ابني حسن ينور حياتي...
.....
.........
لا حُب مثل حبِ الله إن أحَب عبده ؛
اللهم حبكَ ..ثم حبكَ ..ثم حبكَ ..؛
لاحب عبد من عبادكَ .. "
( كانَ فيما ناجى الله عز وجل بهِ موسى بن عمران عليه السلام ان قال لهُ : يا بنَ عُمران كذبَ مَنْ زَعَمَ انهُ يُحبني فإذا جَنه الليل نامَ عني أليس كل مُحب يُحبُ خلوة حَبيبه )
غفران//بعد ولادتي منتبهت على نفسي اشلون صرت اضعف ..وحتى صدري من بدت اوجاع تصير بيه منتبهت عليه زين
الى أن مره من المرات جاي ارضع بنتي وحسيت اكو شي صلب ، الحاح سلمان انطلقنا للطبيبه وتبين عندي التهاب بالغدد اللنفاوية التهاب حاد الدكتوره قيمة وحده منهن سرطانيه
الحزن سيطر علينا اول ما اجه ابالي خوفي على بنتي...اللحظه احبطتني لكن اعتمادي على رب العالمين ودعم سلمان اليه خلاني اشوف نفسي مريضه كأنما مرض أفلاونزا عاديه
بديت رحلة العلاج قبل اي تدخل جراحي
الرحلة چانت صعبه گلش حاولت اسیطر علی نفسي والتزم بالعبادات ورود العافیه
((لا حول ولا قوه الا بالله العلي العظيم
اللهم صل على محمد وال محمد))
رغم أحساسي بألم بمنطقة الصدر بس چنت آگول مجرد شد عضلي بسبب الغدد
الى ان الدكتوره كالت اشك أنتي مصابة (بسرطان اللمفومة اللاهودجكينية)خفت
خذني سلمان الامير المؤمنين عليه السلام
شايل بيده سمانه..فرش شالي بالحضره وكعد بيده السبحه كعدت وراه قراه دعاء المشلول لزم بيده السبحه ويردد بحرقه ودموع الاول مره اشوف هيچ یبچي
((نادي عليًّا مُظهِرَ العَجائِبِ
تجدْهُ عونًا لك في النَّوائِبِ
كُلُّ همٍّ وغَمٍّ سَنجلي
بِولايتِكَ يا عليُ يا عليُ يا علي))
يردد حتى كد ما قراء دخت ودي انام رضعت بلممه سمانه شبعت نيمتها بلكاع
يمي حس بيه تعبانه طلع البطانية من الجنطه ولان هواي نسوان مدده خلاني انام على فخذه وسترني يجوز ربع نص ساعه نمت فزيت لكيته بعده يردد بلورد
كتله
-خلينا نزور ونرجع..
-صار ياصبر كلبي...
هل كلمة من يحچيها اتاذى عليه يحبني وانه على ساعه اموت صرت افكر بيه اكثر من ما افكر ببنتي. رجعنا لبيتنا مريت على امي عيونها عليه من البچي حمره
خليت يمها سمانه لان اليوم موعد تحديد مرضي نهائي دخلت كل الكاعدات يمي مصابات بس انه اكتشفوا مبكر خفت لا يطلع مرضي مثلهن ومثل شك الدكتوره
(سرطان اللمفومة اللاهودجكينية)
المريضات يحچن عنوآلم العلاج الكيميائي وحده گالت خلال 6 جلسات بدأ شعرها یوکع وصار راسها اصلع
الثانیه تسولف عن غثيان الجلسات بدیت انرعب وافقد احساسي بتحمل ردت اكوم گللت وحده من المصابات
-اشلون تحچن هیچ هذا الحچي يحبطكم
بالعكس اتخيلن هذا التعب الشديد والألم انو انتي راح تبقين قويّة وقادرة تتخطين العلاج الكيماوي ليش لان مصير الجلسات تنتهي
ثانيا اعتبرن المرض هو رساله النا لان قبل المرض شكد چنا نشتگي من بلاء او من احد خذلنا او اذانا ،شگد نبچي من موقف
او حاله بس تالي يطلع بچینا شي وقتي
ليش لان ماكو ديمومه لاي شي حتى هذا المرض وخلن ابالچن وتیقنن أن الله لطفه خفي،ما تدركه ضآلة أبصارنا.
لا تكرهون شيئ اختاره الله النه
لان على البلاء تؤجر،
وعلى المرض همین نؤجر،
وعلى الفقد نؤجر،
وعلى الصبر نؤجر،لان الله سبحانه هو رب الخير فما يچي منه إلا بخير ..!
﴿ فمَا ظَنگُم بِرَبِّ العَالَمِينَ ﴾
گلما تجزعن من المرض حطن ايدچن علی قلبچن
ورددن بخشوع بقلبٍ راضٍ، وکلام صادق ((رضيت يا رب)
ابتسمت انه والبنات المثل حالتي ودخلت لدكتوره كأنما شي بارد على گلبي شرحت
الها استمراري على العلاج وحتى گلت الها التزامي بزيارة عاشوراء بعد كل فريضه لان چنت بس ورا صلاة الفجر اقراها
ابتسمت الیه وهنا گالت الیه بوجه حلو
-الغدد او الكتل حسب اخر تحاليلچ بعد ما تصنفه ككتلة مسرطنة بس للأمان لازم نبقی انتابع صحتچ بشكل دوري بعد الانتهاء من العلاج
-لیش دگتوره
-احسن حتی تتجنبين أي مضاعفات أو أضرار وتبقین بالجانب الآمن، وماترجع علیچ الغدد
طلعت ابشر سلمان چان كاعده يم مكان الرجال ومايمه بس اثنين زلم شياب كتله:
-الدكتوره دكول تقاريرچ وصلت الصبح وجسمي استجاب العلاج بهذا الشهرين او اي عدد سرطانيه ماكووو رفع راسه تناوع اليه وعيونه نملت دموع مااشوفه اله ساجد بحيث الكل على موقفه تفاجئ
طلعنا من العيادة اشترينه جكليت وبالطريق سلمان يقراء ورد.. نادى علي مظهر العجائب..
وزعنا الكل النعرفهم...رجعت بشرت الكل
حتى عقيله باركت اليه...بس الاول مره اشوف اخوي منتظر هلكد مقهور من سالته كال:
-غفران ما تعرفين سيد مجتبى من تشوفي
لحيته طولانه بحيث من سمعنا وصية اخوه خلصها نحيب وبچي الدمع من لحيته ينزل انهار جدامنا بس محتفظ بكعدته وثگله موت اخوه گلفه نص شبابه
-حقه لا تنسی خوتهم حلوه
-اي والله..الله يرحمك ياسيد مهدي ودعت عقيله بوستها كالت:
-هاااا مو گتلچ سید مهدي كال ماعليها شي بس ماصدكتوني
سكتت عنها لان هاي حالتها وهذا وضعها
ركبنا السياره البيتنا كلت السلمان عليها
گال
-عووفوها علی حالتها خلیها تتخیله موجود ویاهاا
-مو السالفه صارت ما صخه
-بلعکس احلام اليقظة العدها هاي عقلها سواه حتى يبني جدار يحمي نفسه من الجنون لان هي بعدها لسى ممصدكه او مقتنعه تدريجيا راح تتقبل الفكرة لكن مو هسه مستقبلا هسه هي عايشه اليقظة بأصولها..
-مقهورة عل اطفالها
-هي ام كفوئه جاي توازن بين اطفالها وبين رغبات عقلها الدكتوره لتعالجها كالت:
المهم من هذا كلشي انا احبچ یاصبر گلبي
-حبتك العافية ياابو سمانه
وصلنا للبيت بشرنا عمتي والبنات..صعدنا الغرفتنه رحت للحمام اسبح...واسمع صوته اشلون ينيم سمانه...
طلعت لكيته مخلي سمانه بغرفتها كعدت امشط شعري اجى عليه الفرحه بوجهه
گالي
-فرحان كلش
-انه همين
كمت اله..لزمت ايده بستها رفع ايدي باسها گال:
ياصبر گلبي..انا مؤمن وعابد اعشق الله فلا استطيع ان أطيلُ النَظَر في عَينيكَ
-ليش موو انه زوجتك
-لان حَرّمَ اللّه ما يُذهِبَ العقل وعيونچ تاخذ عقلي
طكيته بصدره ابتسم وهمس بصوت شاعري يسلب الفؤاد
-شنو اطلبین مني هل لحظه؟
جاوبته:
-گلي انتي احلى بنيه بالعالم
-انتي احلى ابنيه بالعالم وانا اسعد رجال لان عندي انتي...ولوماانتي بحياتي ودنيتي چان هسه انا شخص تعیس الحظ
-بس هيچ شو بخیل بالحچي؟
-يصير اگلچ انتي الدعوه الثانيه بعد طلبي ان أكون من عباد الله الصالحين
-بس
-انت الشكر الاشكر الله عليه من أسجد سجود مستحب الرب العالمين انتي دعوة امي النقيه من تدعيلي يارب ارزق سلمان مره صالحه طيبه
-هااا
-لا حبي مو وقت هااا لان هسه وقتنا
لازم اردد(اللهم لا تجعل الشيطان علينا سبيلا))
هل كلمه وراها ندخل بأمواج من العاطفه والحب والتفاهم والاحترام لان زواجنا انه وسلمان ماچان ينقاس بالماديّات ولا حتى بجمال ولا المظاهر احنا من قوله:
"يغنيهم ﷲ من فضله" اغننا الله سبحانه بالود والرحمة والرئفة بحيث گلبي
يردد كل يوم بكل وقت من اوقات حياتي
اللَّهُ واحد..
القران واحد
والقلبُ واحد..
وحبيبي الاخير بهاي الحياة واحد هو انت
ياسيد سلمان لان كلامه غزله ماله مثيل
حتى من اشوفه تعبان اويجي من الشغل
واسأله شلونك ياابو سمانه ؟
يجاوبني جوابه الدائمي والوجداني
غفران قلبي ياغفران ذنبي ونصف ديني اتعافى وصير زين بنظره من عيونچ
........
......
مجتبى// حقهه ام علي ترفضني
لان.. لا انا متقبلهه تصير گ زوجه الي
ولا هيه متقبلتني..
اثنينه ممتقبلين بعض و نشوف سيد مهدي بنصنه واكف مو بس نستصعب هالخطوة نشوفهه مالهه داعي
طول هاي الفترة وجدي غضبان عليه وعلى عقيلة لان الوصية واجبة التنفيذ بالشرع والدين واحنه منقبل نلتزم بالوصية
كل حياتي گرستهه لبنتي واولاد اخوية قسمت الاسبوع وخليتلهم يومين اتفرغ الهم تماما الي اخذهم انا وعمتي وازورهم لو اطلعهم متنزهات او جولة بالسيارة ونشتري ونلعب
احاول قدر الإمكان ما خليهم يحسون بفقدان ابوهم سيد مهدي ولا اخلي بنتي تحس بفقدان امهه لان همين عاشت وياهه كم شهر من بعد وفاة اخوي واخذت عليهه شوي…
بهالأشهر شفت ميسم اكثر مما شفت اهلي ما بقى مكان ماطلعتلي بي .. گأنو تتقصد تتواجد بالمكان الاتواجد بي ان گان بالشغل بالمستشفى او قريب من الشركة او بالشارع وتبقي عينهه بعيني او تحاول تختلق فد شي تسوي حتى تخليني اشوفهه وانا تماما متجاهلهه لان اغلب الاحيان اكون لابس نضارة شمسية فمتكدر تميز شفتهه او لا …
مشاكل بيت عمي ابو عامر ماخلصت يومية طالعيلنه بمصيبة شكل گلش انقهر على امير واخوته لان صاروا يخجلون من ابوهم وامهم وهالشي گلش صعب على الطرفين يتحملوا…
هواي تعبوا جدي بهالفترة من القضايا الرافعيهه عليه بس وكلت ثلاث محامين ويه محامينه و گلهم معروفين والهم اسمهم بالقضايا احيانا ربنا يستر ويجي امير او احد اخوته او وباقي ولد عمي ينبهونه على اهاليهم شيريدون يسوون ونتلاحك للمصيبة قبل لاتوگع…
امي هواي تغيرت بعد وفاة سيد مهدي گلش ذبلت وصارت من امرأة تسولف وتناقش وتدخل بحوارات ويه المقابل ..
الى امرأة ساكته مالهه خلك شي حتى ويه احفادهه گوة تضحك بس لخاطر تشوف ضحكتهم گلش متمزقة بداخلهه
دائما دمعتهه بخدهه وتبجي من تكون وحدهه او حتى من تكون گاعدة بيناتنه اشوفهه بغير عالم رايحه..
عمتي زينه تحاول متخليهه بهالوضع وتبقي تختلق گلام وسوالف وياهه بس اغلب الاحيان امي فاصلة عنهه ومتجاوبهه صرت اشوفهه متخوض بنقاش ولا الها بسوالف النسوان مثل قبل
اذا اضيع امي اشوفها مگابله صورة سيد مهدي تحاچي وذا بليل قايمه ليلهه مهما كان بارد صايمة نهارهه بعز الحر..
يومية تهدي ثوابات لابوية واخوية تطبخ وتوزع او اقل شي تمر ولبن تنثر الحبوب وتخلي طاسات مي على السطح وبالحديقة للطيور بثواب ابوية واخوية..
كل هذا بصمت منهه تماما تغيرت المراة الحيوية والتضحك للهوى الطاير الجانت بزمن سيد مهدي اختفت ..
جانت تشكي بأستمرار من راسهه وعيونهه ومن اريد اخذهه للطبيب ماتقبل تكول هسة انام وارتاح مابية شي اتعارك وياهه اريد اجبرهه اخذهه للطبيب ترد عليه بصمت قاتل تخليني اكره نفسي لان عليت صوتي عليهه رافضة شي اسمة طبيب نهائي وماكدر انطيهه وصفة من عندي لان ماعرف علتهه شنو
الى ان بيوم جنت مخنوك ضايج وين مااروح الحزن داير ميدور..طلعت برة شغلت الماطور اغسل الكراج وجدي نايم وعمتي يم امي جوة
مرتاح لان ريماس دزيتها يم عقيلة جلبت بيهه متعلقة بمرة عمهه واولاد عمهه غسلت الطوس لتخليهم امي للطيور نشفتهن وخليت بيهن حبوب
غسلت السيارة وسديت بابهه و سمعت صوت ضربة قوية بالبيت مثل شي انهبد بالكاع ووياهه صرخة عمتي زينه شمرت الصوندة ودخلت اركض شفت امي مددة راسهه على الدرج صاير
تقربت لكيتها مغمى عليهه وعمتي تحاول تشيلهه تخبلت من هيج شفتهه لزمت ايدها امسدها..ماتتحرك ولان صايره ضعيفه بسرعه كدرت اشيلها.طلعت ارگض للسيارة عمتي زينه جابت عباتهه وحجابهه وخلته فوك امي التفتت عليهه وكلتلهه
-اناااا اخذها عمة ابقي يم جدي
-لااا عمه لااااا ترى بيبيتك هنا لااتخاف .. سدت باب السيارة وطلعت للمستشفى بعدها ممستفاقه وصلنه شلتهه ونزلت وخليتهه على السدية الاطباء كلهم يعرفونة صرنه وجوه مألوفه يمهم من گد المصايب المرت علينه
انتضرنه الاطباء بين معاينه سريريه كالو تحتاج اشعه سويت اشعه...جبتها للطبيب كلي ابسرعه تحتاج فحص طبيب نضر مختص ..
مفهمت شنو بيهه ومحد يريد يوضح تعبت من المستشفى وهوستهه وقعت على خروج امي ورجعنه للبيت ...
امي تون من الالم والوجع ومغمضة عيونهه متكدر تفتحهه
كلت لعمتي تحضر ملابسهه راح اخذهه لبغداد وانا اقيم بيها، طلعنه بالليل لبغداد وصلت للعمارة وغيرت رأيي طلعت لأقرب فندق نزلنه بي انا وامي وخابرت صديقي طبيب العيون واتفقت باجر اخذهه لعيادته
صار ثاني يوم واخذتهه فحصهه وشاف الاشعه ..
ـ الوالدة كان عدهه التهاب بعيونهه
ـ والله ياخوية جانت تشكي من راسهه دائما وشكد اتعارك وياهه حتى اخذهه لطبيب يكشف عليهه بس جانت ترفض الى ان صار الصار وجبتهه
ـ والله ما اعرف شكلك بس نازل على عيونهه المي الازرق بالاضافة ارتطامهه بمكان صلب ادى للاسف لفقدان البصر بالعين اليمنى تماما وضعف البصر بالعين اليسرى
ـ يعني شنو فقدت بصرهه بعينهه اليمنى دكتور عملية تصحيح اي شي سوي بس رجع عيون امي
ـ العملية لعمرهه بهيج وضع صعبة لو تفيدهه العملية بدون متكلي يامجتبى راسا اكلك وقع على دخولهه بس متفيدهه مجرد تتحمل الم واذية العملية وماراح يتحسن شي
ـ اسفرهه للخارج
ـ تريد تسفرهه براحتك بس اخذهه حجايه مني .. حاله امك ميفيدهه حتى السفر
ردت امي:
ـ شسوي بعيوني بعد يا وليدي بمنو اكحل الشوف بيهن؟
ـ يعني انا ما استاهل يمه؟
ـ شلون متستاهل وانت البقيتلي بهالدنيه بس خليني هيج قانعه بنصيبي الحمد لله على كل حال…
ـ من عرفت ماكو فايدة بعيون امي ما قبلت تضل ابغداد ورجعنه طول الطريق جانت تبجي وتكول هاي حوبة عقيلة لان هواي اذيتهه على حياة سيد مهدي بقيت اصبر عليهه
ـيايمه هذا شلون حچي يعني حوبة عقيلة تبين بيج ومتبين بأم عامر؟
ـ يمة كلمن حسب ذنوبه وغلاته عن الله سبحانه التبين بيهم الحوبة بالدنية هاي رب العالمين يريد يغفرلهم والحمد لله من بينت بيه هسة ولا بالقبر شيحمل الذنب يايمه ماادري بيا عقل جنت من اذيت هاليتيمة؟
ـ كولي ياالله حجية راح ابقى اسأل وبلكي الكه علاج لعيونج الحلوة بس لاتنقهرين يمة بعدچ شباب تری ماخاشه العمرين
ـ اذا صدك تريدني ما انقهر.. اسمع كلام جدك
ـاهووووو یاحبیبه؟ رجعنه لهلموضوع
ـ ماكو احد يحافظ على ولد اخوك مثلك
ـ عقيلة ما قاصرة يمة وثبتت باخر اشهر هيه كدهه وگدود
ـ بالله الكريم انتوا اثنينكم لاتحترمون سيد مهدي ولا عدگم دين حقيقي لا احترمتوا وصية شخص متوفي ولا طبقتوا الدين الاسلامي لان الوصية واجبة التنفيذ.
،،، بقت امي تحجي عليه طول الطريق وانا ساكت وما سكتت الا وصلنه للبيت…
وصلت للبيت لكيت جدي مخابر عقيلة ومرزلهه ومتعارك وياهه على نفس الموضوع
هاي كل فترة هيج يهيجون علينه ويحجون علينه لان ممنفذين الوصية اتلكوا امي وعرفوا بحالتهه وعقيلة خابرت على امي تسألهه عن صحتهه
مرة الاشهر ورغم مصاب امي لكن بعدهه على نفس وضعهه تاخذ هدومي وتغسلهن بيدهه متقبل احد غيرهه يغسلهن…
رجعت من الدوام سبحت وغيرت ملابسي طلعت من الحمام اريد اروح لغرفتي وسمعت امي بغرفتهه تبجي وتدعي الله يگصر عمرهه وتعاتب ابوية واخوية لان راحو وتركوهه …
انقهرت من گلام امي ودكيت الباب عليهه ودخلت لكيتهه فارشه السجادة وكاعدة تبجي..
ـ ليش يمه انتي همين تريدين تعوفيني ميكفي ابوية واخوية وانوب انتي؟
ـ كلبي محترك وليدي گسرة الضنة گسرة متنحمل
ـ ليش انا مو ابنج يمة يعني مالي خاطر يمج فد نوب
ـ لاتعتب مجتبى انت واخوك نفس المعزة بكلبي لا احد منكم فضلته على الثاني ولا فرقت بينكم وانت تدري بس يايمة شوف عقيلة الماعاشت وية اخوك غير جم سنة ينعدن على اصابع الايد الوحدة شلون متدمرة عليه ..
آشلون تريد تشوفني وانا الحبلت والربيت والداريت وگبرتگم كل شبر بنذرر يمة الخراب الجواية ماصار جوة مرة
ضگت لوعه فقد الرجال الحنون الخايف الله الصايم المصلي وانتهت حياته بطلق براسه وصدرة واخذة الموت مني ..
گرست حياتي الگم انتو ضنايه الاثنين وضوه عيوني ونضرهه جنت اشوف الدنيا بيهم جنت عايشة لخاطركم ولاجلكم بس يمة متحمل فقد اخوك…
گوة اتحملت فقد الوولف وگوة عديت هذيج المرحلة الصعبة جنت احارب نفسي لخاطركم بداخلي ابجي ولازم ارسم الضحكة على وجهي حتى لاانت واخوك تشوفوني ابجي وتكابلوني وتبجون بس هسة ما اگدر اتحمل بعد يمه
صبري خلص ومل الصبر مني وجزع الضنه غالي الابن عزيز حرگة بالگلب متنطفي توجر جوايه شوف اخوك صارله شكد متوفي فوك السنة بس ما اكدر اطفي ناري لا یبرد عزا گلبي هي السيده الزهراء
عليها السلام عن لسان الشاعر
(انا الوالده والقلب لهفان ادور عزا ابني وين ماچان))..
هیچ یصیر گلب الام المضيعه شباب ابنها
ـ يمة يعني انا ما استحق تحاربين لخاطري وتعيشين لجلي؟
ـ شلون متستحق ولك مجتبى شلون هيج تحچي بس ياوليدي اصلا هالنفس اليصعد وينزل بيه لخاطرك انت
بس انت اب وشكد متريد تصير عاطفي ما راح تعرف شعور الام الحقيقية التحب اطفالهه وتستقتل علمودهم انا خايفة يايمه اافقد بعد احباب بهالدنية الگشرة وولگ والله وبعد ماعندي حيل وصبر وقوة اتحمل فقد الغاليين
،، حضنتهه وهي تبجي وتنوح.. حاولت ما ابجي واتذگرت سيد مهدي من جان يصبرهه على فقدان ابوية جان ميبچي حتى لايزيد الطين بلة گوة حبست دموعي والله حقهه هو اخوية وانا هيچ جزعت من الدنية شحال هو ضناهه…
سكتهه وابتسمت بوجهه وحاولت اطيب خاطرهه وهي هم سكتت وگامت لمت سجادتهه.. امي مثلي ماتنسى شماتت ام عامر بستشهاد اخويه فدائما اسمعها تدعي بحركه بعد صلاة الليل بهذا الدعاء
((يا من لا يخفي عليه انباء المتظلمين .و يا من لا يحتاج في قصصهم الي شهادات الشاهدين .و يا من قربت نصرته من المظلومين..ويا من بعد عونه عن الظالمين
قد علمت ، يا الهي، ما نالني من(( فلان ابن فلان)) مما حظرت و انتهكه مني مما حجزت عليه ، بطرا في نعمتك عنده ، و اغترارا بنكيرك عليه .اللهم فصل علي محمد و اله ، و خذ ظالمي و عدوي عن ظلمي بقوتك ، و افلل حده عني بقدرتك و اجعل له شغلا فيما يليه ، وعجزا عما يناويه .اللهم و صل علي محمد و اله ، و لا تسوغ له ظلمي ، و احسن عليه عوني ، و اعصمني من مثل افعاله ، و لا تجعلني في مثل حاله .اللهم صل على محمد و اله ، و اعدني عليه عدوي حاضرة ، تكون من غيظي به شفاء ، و من حنقي عليه وفاء اللهم صل علي محمد و اله ، و عوضني من ظلمه لي عفوك ، و ابدلني بسوء صنيعه بي رحمتك ، فكل مكروه جلل دون سخطك ، و كل مرزئة سواء مع موجدتك .اللهم فكما كرهت الي ان اظلم فقني من ان اظلم .اللهم لا اشكو الي احد سواك ، و لا استعين بحاكم غيرك ، حاشاك ،فصل علي محمد و اله..وصل دعائي بالاجابة ،و اقرن شكايتي بالتغيير
اللهم لا تفتني بالقنوط من انصافك ، و لا تفتنه بالامن من انكارك ، فيصر علي ظلمي ، و يحاضرني بحقي ، و عرفه عما قليل ما اوعدت الظالمين و عرفني ما وعدت من اجابة المضطرين .اللهم صل علي محمد و اله ، و وفقني لقبول ما قضيت لي و علي ، و رضني بما اخذت لي و مني ، و اهدني للتي هي اقوم ، و استعملني بما هو اسلم .اللهم و ان كانت الخيرة لي عندك في تأخير الاخذ لي و ترك الانتقام ممن ظلمني الي يوم الفصل و مجمع الخصم ، فصل علي محمد و اله ، و ايدني منك بنية صادقة و صبر دائم . واعذني من سوء الرغبة و هلع اهل الحرص ، و صور في قلبي مثال ما ادخرت لي من ثوابك ، و اعددت لخصمي من جزائك و عقابك ، و اجعل ذلك سببا لقناعتي بما قضيت ، و ثقتي بما تخيرت .امين رب العالمين ، انك ذو الفضل العظيم ، و أنت علي كل شي ء قدير))
كد ماسمعتهه تقرا بصوت يكسر حفظته وصرت مثلها اقرأ بعد كل صلاة الليل
الامور بحياتنا ماشيه واكفه حتى عمتي زينة لساها مصره تگرست حياتهه لابوهه وامهه هواي ييجون يخطبوهه خصوصا بعد ماطلعت سنوية سيد مهدي بس هي ترفض الزواج واصلا متقبل لحد يفاتحهه بهالموضوع رغم جدي وبيبتي وحتى امي هواي حجو وياهه ..
ولو اغلب اليتقدمولها ارامل وعدهم اولاد او مطلقين او هو يريد احد يداري لان جبير بالعمر ف جوابهه بدال ما اداري الزوج لو اولادة ويجوز مايرضون عني وتصير خلافات انا بغنى عنها اداري ابوية وامي اولة بصحتي وعافيتي واحصل اجر وثواب انا محتاجتها لاخرتي..
بيبتي اجتي وعاشت ابيت جدي بعد ماچنت يم اولادهه صح تحب ابو عامر لان يداريهه بس ماچانت راضيه علی تصرفاته هو وزوجته فعافتهم ورجعت لبيتهه رغم الخلاف بينهه وبين جدي نوعا ما بعدة قائم بس مثل منگول
خد وعين مرة جدي يسكت عنهه
ومرة هي تسكت عنة…
مره حنفية الحمام تلفت ونگسرت ودخلت اسويهه صرت خبرة بهيچ امور من بعد عين سيد مهدي چنت متيه الدنية گلهه بوجود عضيدي واخوية ..
خلصت وگعدت شوي العب وية رموسه
اجني بيبتي وامي گعدت يمي
كالت بيبتي
ـ بيبي مگافي الطفلة همين تريد ام
ـ يعني شلون تريد ام؟
ردت امي
ـ يعني شوف حالك واتزوج
ـ وليش اتزوج واجيبلهه مرة اب الله يعلم شتسوي بيها
ـ لا يمة مو گل اصابعك سوية
ـ حبيبة هالطفلة امهه مارحمتهه تتخيلين الغريبة ترحمهه
ماعرف منين تجیبن هسوالف رحمه الاهلچن
-لیش ولیدي انت هم شاب وحلو عندك حال ومال المن يبقى
اخذت ريماس الحضني
-يبقى الهاااي بنيتي كله الها حالي ومالي وشبابي مااريد اي ام تاذيها لو بكلمه
راسن اجت عمتي زينة بيدها صينية فواكهه كالت:
ـمو كل مرة اب ظالمه وريماس لا تنسى بقت فترة طويلة يم عقيلة؟
والى هسة رموسة تروح يم عقيلة وشوف اشلون اداريهه وتموت عليهه
تنرفزت وجاوبتهة
ـياعمه وشدخل عقيلة بالنص ؟
ـ هاي هم غريبة عن بنتك
ـ لا مو غريبة هاي مرة عمهه تصير وترى عقيله مو مثل اي وحده عقيله تخاف الله
بكل خطوه بكل فعل تسوي فهي تصير مرة عمها
ـ ترة ام عامر همين تصير مرة عمك تتصور هيج دارتكم؟
ردت امي:
ـ وين يمعودة چانت ادز جهالهه يكتلون ولدي من چانو صغار سبحان شلون گبرو وعقلوا
عرفت مقصدهن لان گل عقلي عبالي يردن يقنعني ازوج وحده من العلاوي
گتلهن:
ـحبيبات عقيلة الله يستر عليهه عدهه دين وتخاف الله وين انا اللكة مثل عقيلة؟
جاوبت عمتي:
ـ وليش ادور و تلكه والمرة جاهزة
ـاوووف شتريدن توصلن بگلامجن؟
ردت بيبتي
ـ لم مرة اخوك وصيرو بيت واحد
ردت امي
ـ والله صح محد مثلهه راح تحب بنتك ولا يجي احد مثلك يحب ولد اخو
وكفت متعصب وبهدوء جاوبتهم
ـ التحچو مستحيل مستحیل مستحیییل
وشي اقرررب من الخيال لااااا انا متقبلهه ولاهي متقبلتني كااافي هل حچيچ حچي
-لاااا تتعصب يمه انت وليدنااحنا الخاطر بنتك وانت هم تريدلك مريه تسامرهاااا تكعد يمهااا
-يمه يمه مووو شرط اريد مره تسامررني اناااا بعدني ممستوعب موووت اخووووي وبنتي مووو الا نتزوج هاي عايشة بيناتنه ست ايام يمي يوم يم جهال مهدي الله يرحمه نفس الشي يمي ويم امهم والحياة ماشيه
ردت بيبتي:
ـ يعني لا تريد مرة اخوك عقيلة
ولا تريد تتزوج وتستقر؟
ـ بيبي فدوه اااااااحد گلج انا مامستقر؟
الحمد لله عايش بحياة هواي شباب يتمنوهه الحمد الله عيشتي نعممممممه
ردت عمتي زينة:
ـ بس هاي وصية اخوك يا مجتبى وحرام متتنفذ متشوف ابوية شكد ماخذ على خاطرة منگم
ابتعدت خطوات امسح وجهي شديت شعري من ورى اريدهم يفهمون
ـعمه يعني شلون اجبر عقيلة تتزوجني؟ ترة رااااجع تعبان ياعمتي فدوة لاتفتحون هيچ موااااااضيع ييمي مابيه حيل مناهد
ردت امي
ـ فهمت قصدك يعني اذا عقيلة تقبل تنفذ الوصية.
تتزوجهه ؟
-لااااا مو مسالت تقبل بس اعرف عقيلة مستحيل تقبل يتم زواجنه تحت اي ضرف گان ف حجيت ويااااااكم بهيچ ثقة تامة
-ابني انت يرادلك ولد من صلبك
ـ ليش يمه ليش ماهمه ولد اخوي ولدي وهاااا عوود اذا تقبل عقيله بيه عادي ماكو مشكلة خو مو افرض نفسي عليها بحجة وصية...
ابتسمت عمتي جاوبت
ـ خووووووش يصير خير
فتحت عيوني عليهم شهل قابليه والملحه ماهتميت لكلامهن طلعت من البيت حتى مااوصل الطريق مسدود ومشت الحياة
مرة الايام وصارت تجيني تهديدات غير مباشره مره ورقة مكتوبة بالطابعه وبيها رصاصة يهددوني بالقتل او يهددوني ببنتي يخطفوهه ويحثوني اخذهه واسافر و اذا ماسافرت حياتنا معرضة للخطر.
التهديدات چانت تجي من رقم تلفون اسيا ومن قدمنه بلاغ وللقاضي وهالهوسة طلع الرقم گلك ومابي اسم مبيوع بالاسواق السوداء والورقة جنت اشوفهه ملزوكة على سيارتي بحيث صار شغلي الشاغل اطلع افتر على سيارتي وافتشهه قبل لا اطلع للشغل
وحتی ومن اوصل للدوام الكة الورقة ملزوكة علي احد بيبان السيارة الخلفية
من يجيني تهديد امي تتخبل وجدي يتهستر ومن خبرت الشرطة ميطلع اي دليل الشك واصابع الاتهام كلها لبيت ابو عامر بس ماعندي اي دليل عليهم
اسلاحي قدمت بيه طلب حتى يترخص حصلت موافقه وصار سلاحي مرخص
لان عاندت وبقيت بكربلاء رغم ضغوطات امي وجدي عليه ماهتميت
مرة الايام وجنت بالشركة مالتنه عدنه مناقصة جبيرة احاول اخذهه گاعد ويه المحامي ونتناقش واجاني تلفون من المحامي الثاني اللازم قضايا عقيلة وجدي ضد ام عامر گلي:
-ترى الجماعه رافعين قضية گلش جبيرة على عقيلة والوالدة وجدك …
-صبررر ترى فتهمت قصدك صاير شي چبير فهمني شنو هالقضية بس؟
-عندي هسه مرافعه راح ادخل
-ماااشي جاييك للمحكمة..
عفت المناقصة بيد محامي الشركة وطلعت ارگض بعدني ماصعدت السيارة واشكال التلفونات ادك عليه…
تناوعت منو يتصل طلع جدي رفعت التلفون..
الو ها جدي
ـ عوف گلشي من ايدك وتعال مصيبة جبيرة ووگعت على روسنه
ـ شنو يمعود شگو شصاير؟!
ـ تعال لبيت عقيلة بسرررعه مو وكت شرح
ـ جاي جاي بالطريق لفت الفلگة وگبل لبيت عقيلة ارید اصبر گلبي وما اتوتر
دائما اردده ويبرد قلبي::
"يا أعز مذكور واقدمه قدما في العز والجبروت،
يا رحيم كل مسترحم، ومفزع كل ملهوف اليه،
يا راحم كل حزين يشكو بثه وحزنه اليه،
يا خير من سئل المعروف منه واسرعه اعطاء،
يا من يخاف الملائكة، المتوقدة بالنور، منه
أسألك بالأسماء التي يدعوك بها حملة عرشك ومن حول عرشك، بنورك يسبحون شفقة من خوف عقابك، وبالأسماء التي يدعوك بها جبرائيل وميكائيل واسرافيل الاّ أجبتني وكشفت يا الهي كربتي، وسترت ذنوبي، يا من أمر بالصيحة في خلقه فاذا هم بالساهرة يحشرون، وبذلك الاسم الذي احييت به العظام وهي رميم، احي قلبي، واشرح صدري، واصلح شأني، يا من خص نفسه بالبقاء،
وخلق لبريته الموت والحياة والفناء، يا من فعله قول وقوله امر، وامره ماض على ما يشاء،
أسألك بالاسم الذي دعاك به خليلك حين القي في النارفدعاك به فاستجبت له وقلت يا نار كوني بردا وسلاما على ابراهيم وبالاسم الذي دعاك به موسى
من جانب الطور الايمن فاستجبت له، وبالاسم الذي خلقت به عيسى من روح القدس، وبالاسم الذي تبت به على داوود، وبالاسم الذي وهبت به لزكريا يحيى وبالاسم الذي كشفت به عن ايوب الضر، وتبت به على داوود وسخرت به لسليمان الريح تجري بأمره، والشياطين، وعلمته منطق الطير، وبالاسم الذي خلقت به العرش، وبالاسم الذي خلقت به الكرسي، وبالاسم الذي خلقت به الروحانيين، وبالاسم الذي خلقت به الجن والإنس،
وبالاسم الذي خلقت به جميع الخلق، وبالاسم الذي خلقت به جميع ما اردت من شيء، وبالاسم الذي قدرت به على كل شيء،
اسألك بحق هذه الاسماء الا ما اعطيتني سؤلي
وقضيت حوائجي يا كريم وصل على محمد وآل محمد))
ركنت سيارتي لگيت سيارة اهلي طابگة ويمهه سيارة امير ابن عمي احس گلبي صار برجلي مااعرف شلون طبگت السيارة ونزلت ارگض ..
الباب الخارجية مفتوحه دفعته ودخلت لكيتهم گلهم گاعدين بالهول وامير اخوته موجودين بس عقيله ماوياهم…
رميت السلام بصوت مبحوح والهث تعب
-السلام السلام عليگم شنو صاير فهموني؟
ردوا السلام گلهم
ورد جدي بنتر ..
ـ تعال يالعنودي اقرا هاي الاوراق اليوم جابهه المحامي من المحكمة
شبخت الكل حتى اخذ الاوراق منه…
-شنو يا اوراق شگو؟
ـ اقرة وشوف بعيـــــنك
اخذت الاوراق وقريتهه عمامي قايمين دعوة على جدي وعلى عقيلة وعلى امي
استغربت
-شنوو جدي ولدك قايمين دعوة بالجملة علينة زين مارافعين دعوه على الجوارين
ـااانا شحجييييت شكلت قبببل
ـاصبر ياجدي خليني اجر نفس و اقرا ..
هاااي دعوة تاهميك بزهايمر
وهاي دعوة على امي عدم اهليتها لتربية اطفال لان شبه عميه
ودعوة على عقيلة سبب هي شابه وتعيش وحيده بلا زوج
كعدت على التخم افرك راسي
احس صدمه مابعدهه صدمة بالنسبة الي
شنو من بشر لايتعض ولايهاب رب الكون
-جدي شنــــــــو شنووو هالحجي
رد بصياح
ـ موووو حچيييت مووو گلللت اثنييينگم طررررشان وعميااان صرررتوا محد منگم سمعني ولا ااحد عبرررني ولا التزمتتوا بووصية اخوووگ ولاهذييچ التزمت بوصية زوجهه
وهااااي النتيجة
انا سووني مزهمروااامك عميية وامهم طعــنوو بشررررفهه
ـجدي يعيط ويصيح منهار وانا صافن على الاوراق
رد امير:
ـ ماعرف مين اودي وجهي منگم من سوالف ابوية
ردت عمتي زينه:
ـ ابوگ بدون امگ گلشي ميعرف يسوي بس حسبي الله ونعم الوگيل عليهه يعني الله سلبهه صحتهه وبعدهه بهيچ جبروووت
ردت جدي:
ـ زينة.. لاتحجين هيج وية امير واخوته دتشوفيهم واكفين ويانه وديتعذرون شيسوون بعد..
،، التفتت على امير..
ـ ولگ انت شنوو من بشرر مچنت تعررف بهالگلام
ـ لا والله ابن عمي ابد لا احنه ولا نسوانه تتخيل نعرف انا واخوتي ونضم عليكم؟
ـ استغفر الله ربي…
طلعت التلفون وخابرت المحامي فهمت منه اليوم مستلم التبليغ وراسل النسخ النه ..
ووشنو دليلهم؟
ـ دليلهم صور وشهود سيد
ـ صور شنو شهود شنوو؟
ـ مستغلين التقارير الطبية عن جدك وامك
ـ ومرة ااخوية شلون طعنوا بيها.
ـ مستغلين طباتهه وطلعاتهه للطبیبه النفسیه ومكان عملهه همين جايبين شهود منه وبالاضافة للشهود الجايبيهم من يم جيران بيت الاخت ام علي…
ـ منووو هذوول الشهوود فهمني ياجيران كلهم نعرفهم وعلاقتنة طيبة بيهم وبعدين نكدر نثبت هي رايحه لدوامهه ماريحه تلعب منا ومنا
ـ تتصور ماقدمت طعن بساعيتهه طعنت بالقرار آصلا قبل لاآنطيك الخبر طعنته
لگن المشگله هالمرة چبيرة
-لیش؟
-جايبين الشهود من نفس مكان عملهه ومن جيرانكم هالشي يكدرون يقلبون القضية كلهه لصالحهم
ـ غير افتهم منو هذووول؟
ـ الشهود سريين ماقبل القاضي يكشف عنهم لحماية حياتهم
ـ شنو السالفة عمي قابل قضية سياسية ومتكتمين؟
ـ سيد مجتبى الادلة مرفقة بالدعوة اقرة وشوف السالفة مو بس شهود وصور السالفة داخل بيهه شخصية جبيرة
( ابو دولار))
ـ منو هذا انوب
ـ اسأل ولد عمك خوية همه یعرفون دمارات ابوهم
ـ لاتكلي اسأل.. اانت فهمني
ـ راس بالدولة ويشتغل بالمحكمة
ـ زين منگدر ننقلهه لغير قاضي اومدعي او اي واحد لاخ
ـ نكدر نطلب هالطلب لكن من هسه اگلك مرفوض الا نثبت عليهم الرشوة والفساد ونثبت اكو واسطة بينهم وهالشي مستحييل نكدر نثبته
والا يكون طلب تغيير القاضي مجرد كسب وقت مو اكثر
ـ اكلك انت وين؟
ـ انا بالمحكمة
ـ اصعد سيارتك وتعال لبيت سيد علي ابن اخوي تندلة هالسالفة مو مال تلفون…
سديت التلفون وكعدت انتضرة على نار ..
كلهم يحچون عليه وعلى عقيلة بس عمتي زينة تهون علينه
وامير واخوته خجلانين من فعايل ابوهم تالي اترخصوا من عدنه وراحو يشوفون ابوهم شمسوي كال امیر:
-راااح احچي وياهم واضغط عليهم بلكي اكو حل واخذ نصيحة جدي،اتزوج مرت سيد مهدي الله يرحمه، هنا مو تلصمون
ابوي حتى امي وامة محمد
تناوعت اله بضوجه خلى وراح كمت لغفت ردن قميصي احس الوسيعة ضيكه
گتلهم:
ـ شسالفه لاتگبرون الموضوع وهو سهل حتى لو ثبتو عدم اهليه عقيلة وهالشي راح يكون حسابهم ويايه وانا اعرف شلون انتقم منهم بس لاتنسون انا عم الجهال وانا الوصي عليهم
صاحت امي
ـ والتهمة قليلة وولك هاي طعن شلون بعلوية درة شلون باخوتهه حتى لو اغلب الناس يعرفون ام علي شريفة وعفيفة بس راح تبقى بصمة بمرة اخوك انسحبت منها الوصاية لهل سبب
ـ استغفررر الله
المحامي دخل وسلم راسن كال:
ـ لنفرض جدلا اخذت الوصاية الك متتذكر تهديدات القتل المرت عليك بهالاشهر
ـ ماكدروا يسوون شي انت كلت طول هالاشهر يهددون زوبعه بفنجان
رد جدي:
ـ يافهيم هاي تهديدات القتل عدهم زلاطة
ـ والحل؟ شنو الحل
ـ انا والمحامين صارلنه من الصبح ندور مالگينة غير طريقة وحدة؟
ـ هيه؟
ـ تتزوج انت وام علي حتى تكدر تحافظ على زوجه اخوك من التهمة وتكدر تحتفظ بالاطفال
ـ يعني اذا اتزوجتهه ماراح يقتلوني؟
ـ احنة صار شهور مدنكدر نثبت منو اليهددك اهل طلليقتك همه جهه متنفذه لكن مجرد عقدك الشرعي على ارملتكم راح رأسا ارفع دعوة ضد عمامك لان شكد رفعت دعاوي ضدهم القاضي ما اقتنع لان المقصود بقضايا عمامك عقيلة وجدك
ماجايبين سيرتك ابد فكلشي راح يتغير لصالحنه ونكدر نسوي تعهد بعدم تعرض واي شي يصير عليك يحاسبون
جاوبتهم
ـ لازم اكو حل ممعقوله تنسد هيج
رد المحامي:
ـ المرافعة بعد عشر ايام شوفو نفسكم واستشاروا باقي المحاميين اذا تريدون
رد جدي
ـ شنو معنى عنادكم .. اااام عليييي يا اااام عليييي وووينج
،طلعت ام علي لابسة العبائة والحجاب والنقاب اجتي وكفت يم الباب..
كالها جدي
ـ سمعتي الحچيناه لو انتي بغيرر عاالم ياابنتي طاعنيچ وانا تعبت وهذا لعنودي يريدون يقتلوا اولااادج راح يضيعووون استوعبي عاد
جاوبت برود:
ـ الكاتبة الله يصير
ـ اااااستغفر االله لا انا خاف طلعت من الجلطة هذيج هاي مستحيل اطلع منها سلامات
ـ سلامتك جدي
ـ يابنتي اافهمي واعقلييي زوجج الله يرحمه من وصى هالوصية مو عن جهل يابنتي ماكو غير حل
ـ اكو حل ثاني ياجدي اسهل
،،فز كلبي من كالت اكو حل ثاني
گتلها:
-عفیه ماااتجیبها اله نسوانها سعفينة بي بلكي الله نلگة حل
ـ احنة كل مشاكلنا ومصايبنه وتعبنه ودمارنه من ام عامر وزوجهه
ردت امي:
ـ اي والله من هالمصيبتين
ـ اي ياجدي صح شنسوي الله بلاني بولد عاق
ـ احچي شنو براسچ؟
رد جدي:
ـ كلتلكم ماكو غير زواجكم يكسر شوكتهم
گالت عقیله:
ـ اليكسر شوكتهم ..
هو قتلهم اقتلهم واخلص واخلص اولادي منهم وانتو ابقو دارو اولادي….
نترت
_ووچ شنو هذا الحچي ضيعين روحج على ناس ماتسوة
رد عليه جدي
_ام علي هذا مو حل ولامنطق وضيعين روحچ قبلي بالوصيه
_والله وداعت ابو علي وجمرت گلبي وحرگته مااصير الغيرة ولاا اسمى بأسم غيره كااان من يگووون لهنا وگافي ربي موجود
هو اليتگفل باليتامى...
-عقیله خلینا بس علی الورق
-حتی علی الورق مااكدر وانه هناا گاعده
وعقیله الدخلت محاکم وشرطه مو عقیله
الفقیره
بهل لحظه دخل ابو عقيله وابن عمها ياسين كال ابوها:
-بنتي هذااأ ابن عمچ قبل رادچ من چنتي
زغيره وهسه بعد رايدچ هو یحمیچ
رفعت النقاب وصاحت
-انت اووو ابن اخوووك اطلعوو من بيتي
لااااا ابلغ الشرطه عليك واخيسكم سجن
هسسه عرفتني بنتك وووانت طول عمرك
محملني مووتت امي وكارهني تشوف دم سنونك ولااا تشووفني
اسمعووو كلكم الكاعدين والواكفيييييين
انا لبوة سيد مهدي لبوة ذاك الطااااهر
وللموت ابقى مرته.. ام الساده ناذره عمري
اربي بس أبناء الساده...
اليعيني هلا بيه وليجيب طاري الزواج لو مهما يكوون اكرهه مثل كرهي الام عامر.
- كوني مثلما كانت زينـب شامخة الآباء صلبة الإرادة طاهرة النفس والعفة .
حافظـي علـى ارث زينب فهو الإسـلام و إلاسلام بدون طهارة نفس دون احتشام "إسلام ناقص"صلاتك كلامك جوهرك
،عبائتك زيارة عاشوراء رسالة زينب لكِ حتى تتتذڪري دائما {إنكِ زينبية}
تنويه.. هذه الاحداث مو معناها القصة انتهت،، لان الابطال بعدهم عايشين والحياة مستمرة لكن من نهيتها معناها الى الان ماكو شي جديد،، انما مجرد روتين وشغل وبيت وساعة عركات وساعة طلايب وساعة راحة،، حالهم حالنا، لذلك لهنا وننهي، يجوز يكون اكو احداث قوية يجوز مفرحة يجوز محزنة محد يعرف القدر والمكتوب الا الله ذاك الوقت يجوز اذا الابطال وافقوا راح نكتب جزء ثالث، لكن اكيد مو هسه ويجوز اذا حدث مهم نطلع نسوي بث وتسألون على راحتكم لهنا وانتهت القصة.. ومن الله التوفيق
أنت تقرأ
عشق المومنين(أبناء الساده)
Spiritualitéتجملت او كنت جميل يبق جمال أخلاقك ٲعـظم هذا ماسنجده في أووووول ملحمة عراقيه دينيه،سايكولجيه،روائيه في عالم القصص..فما مابين دين والتدين مابين العشق والمعشوق مابين المسبحه والتربه مابين،القرآن،دعاء،مابين النفس,وحديثها يظهر الشاب هاشمي النسب علوي الا...
