# زينة
للكاتبة زهور _الروح
#المقدمة
...........................
يوم جمعه الساعة 9ص
ف احد أحياء سكنية بالعاصمة طرابلس وتحديدا ف احد منازل سكنية بسيطة
كانت ف صالة هذا منزل مرا ف نهايات الأربعينات من عمرها مقعمزة بملاية الصلاة بعد م صلت صلاة الصبح وكملت تسبيح تقرأ ف سورة الكهف وبعد م وصلت ف آخر آية منها(قُلْ إِنَّمَآ أَنَا۠ بَشَرٌ مِّثْلُكُمْ يُوحَىٰٓ إِلَىَّ أَنَّمَآ إِلَٰهُكُمْ إِلَٰهٌ وَٰحِدٌ فَمَن كَانَ يَرْجُوا۟ لِقَآءَ رَبِّهِۦ فَلْيَعْمَلْ عَمَلًا صَٰلِحًا وَلَا يُشْرِكْ بِعِبَادَةِ رَبِّهِۦٓ أَحَدًۢا )
سكرت مصحف وحطتها ع طولة الي كانت تتوسط صالون وضمت ايديها وفركتهم ببعض ورفعت يديها وبدت تدعي من قلبها ومخلص دعائها كان لولدها كأي ام حنونة تدور ع راحت أولادها
حليمة: زينة ..خوك شكلة مزال م ناضش صلى ترا سلم بنيتي شوفيه
زينة:باهي ..تو نشوفة خلي نحط سكر ف شاهي بس
حليمة:متكتريشي منه ي بنتي
زينة:اها به.. انشالله يام
بعد م حطت ثلاث ملاعق من سكر وسخنت شاي شوية مرة ثانية وبعدين حطتها ع سفرة فطور الي كانت مرتبة بطريقة حلوة وبسيطة واكيد لقطات زي اهيا م تخلاش من تصوير، زينة عجبها تنسيقها للفطور فخذت كم لقطة ليها
وبعد كملت حطت تليفونها ع رخام مطبخ وطلعت من كوجينة ومرت بالصالة لقت امها تدعي تمنت ان ربي يتقبل دعائها وصلت لحجرة خوها وفتحت باب واستغربت حجرة كانت مظلمة يعني م ناضش لصلاة الفجر خشت وفتحت باب ع اخير وسكرت مكيف وفتحت روشن ع اخير وهدا شي ضايق خوها الي بدي يتقلب يمين ويسار وحط ايدا ع عيونة لما أشعة شمس انعكست على عيونة
زينة:سادك نوم هي نوض ويولك لو طلعت مش مصلي
محمد:تي باهي هي نايض حتى جمعة م تخلوشي حد يرقد
زينة:هي سلم خوي نوض صلي مع انك كان لازم تصلي فجر لان صلاة فجر مهمة فهي خير من دنيا ومافيها
محمد:حاضر لكن اسمعي م تقوليشي لأمي اني م صليت بديرلي محاضرة طويلة مش ناقص اني ساد انتي تو
زينة:يااام..مم.ممم غملها فمه بيديه باش تسكت
محمد:تي اسكتي تو تفضحي بيا نايض خلاص
وناض خش للحمام"اكرمكم "جري
زينة:ههههه..عرفتة دواك اني
وطلعت من حجرة وهي تضحك
_________________
عيلة حاج عبدالله
..عبدالله "متوفي"..مرته حليمة الي بتكون ام زينة ومحمد مرآة طيبة وف حالها وناس تعرفها من طيبتها تحب ولادها هلبة م فيش حد م يشكرش ع أخلاقها طيبة اي لكن ف حق م تعرفش حد
...زينة 25سنة تقرأ ف كلية طب..البنت كبيرة لعيلة عبداللة ،اسم على مسمة بنت سبحآن من صورها فأحسن صوره ولكن اسمها ماكانش ينطبق ع شكلها بس كانت زينة اخلاق وطيبة قلبها م تلقاش زيها وهادية وقوية م تحقش دمعتها بالساهل
محمد 14سنة يقرأ سنة ثانية اعدادي..ولد صغير أو زي م يقولو اخر عنقود او اخر دلوع بس هو م كانش دلوع أمه كان دلوع اخته زينة الي م ترضى فيه دكة شوكة
___________________
بعد بنايتين من حوش عيلة عبدالله
بالضبط لفيلا الي كانت ع طابقين
ف طابق ارضي
خديجة:رتاج.. رتاج ..
رتاج كانت تكنس فجنان:نعم ماما
خديجة:سيبي الي فيديك وامشي حديدي سورية ابوك واخوك هزار
رتاج اتكت ع مكنسة وحطت يدها ع خصرها ورفعت حاجبها يمين:باهي سورية بوي فهمتها بس هزار مهوش صغير بش اني نحددلة حوايجة والي أصغر من يحدد بروحة
خديجة:امشي قوليليهو الكلام اهوا وانتي تعرفي مؤيد م يحبش حد يلمس حوايجة
رتاج: كان يتزوج ويريحنا
هزار :سلام عليكم...صباح خير يام وقدم بأس راسها وشبح لرتاج بطرف عينة وهزلها براسه متع سمعتك
خديجة:وعليكم السلام..صباح نور ي غزال امه وليدي سمح
رتاج بتوتر :هههه..صبح..صبح..و الصبر يامي ومشت باش تحدد حوايج قبل ليتكلم خوها
هزار قعمز حدا أمه : وين بوي خوتي .
خديجة: بوك مشي لشركة هو وخوك رؤوف
هزار:أنشالله خير صاير حاجة
خديجة: لا لا كان رؤوف ماشي باش يجيب شوية وراق هوقال نخطم ونشوف شن دارو
هزار هز راسة بإيجاب وسكت
خديجة كانت تتشوفلة وتنهدت بصوت مسموع ليه
شبحلها لقاها تشوفلة بنظرات عارف معناها كويس
خديجة كيف جاية بتتكلم"حنينة..حنينة" ع نزلت كنتها وحفيدتها توأم
خديجة: سمحاتي تعالن ي عيون حنينة انتن
هزار زفر براحة
اسماء:السلام عليكم
هزار وخديجة :وعليكم السلام
اسماء:كيف حالك عمتي ...وكيف حالك هزار
خديجة:كويسين حمدلله وانتي كيف حال اماليك
اسماء:حالهم باهي يسلمو عليك
هزار ناض:اني ماشي تو هي وباس بنات خوه وطلع
اسماء كانت تبع فيه بعيونه لين فات :عمتي كلمتيه
ف موضوع بنت آسية
خديجة: كنت كيف بنكلمة...بس وتنهدت..عارفة بيرفض زي الي قبلهم
اسماء:بنقولك حاجة حاسة ان ف وحدة ببالة
خديجة:ولا كان هكي باهي بس علاش م تكلم
اسماء رفعت يديها بمعنى منعرفش
_____________
عيلة حاج منصور رازي
الاب منصور وريث وحيد لعيلة الرازي...مرته خديجة
مرة طيبه وحكيمة
الاولد الأربعة
*الكبير رؤوف38سنة يشتغل مع ابوه ف شركات الرازي ...مرته وحبيبته واخيرا ام بناته اسماء 29سنةمتخرجة من كلية لغات وحاليا ربة بيت وهذا شي كانت من رغبتها شخصية ...بناته توأم جوري وجويرية4سنوات
*وبعده بيجي إلياس36سنة دكتور جراح...مرته سامية او بنت خاله27سنة... زواج إلياس وسامية كان زواج تقليدي م كانش بيناتهم اي مشاعر
سامية كانت تحب هزار هلبة وزواجها من إلياس اكبر خدعه او كذبة تعرضتلها من هذه الدنيا تزوجت من إلياس ظننا إنها حتتزوج من هزار كان أهل إلياس يبو يزوجه قبل ليسافر لألمانيا خوفا من ضياع ولدهم ف دول غرب لان إلياس كان يحب ألمانيا وزاد تعلقه بيها اكثر لما قري فيها قرر بوه وأمه يزوجه باش يكمل قراية غادي هو ف بداية موافقش بس لما خيروه ف قراية غادي تزوج
وحاليا هما ساكنين ف ألمانيا .
*وبعدها هزار 35سنة متخرج من كلية هندس بس واخد شهاده هكي وخلاص ويشتغل ف أعمال حره اشتغل ف حلاقة واشتغل شيف مطعم لين كبر اسمه وحاليا يفتح ف مقهى.. شخصية هزار مش زي خوته بكل شخصيته مختلفه عصبي وبارد وصعب ونادر م يضحك.... عازب لان زي ما قالت أسماء ان ف وحدة بباله وصعب هلبة يوصللها الي هيا زينة هزار مش بس يحبها لزينة هو يعشقها عشق هالحب الي كبر معه زينة تعتبر حب طفولة ليه ولكن مشكلة ان زينة تشوف فيه كيف خوها وهدا شي يصعب وضع عليه نظرات اخوه الي تكنها زينة هي سهام فتاكة بنسبة ليه وخايف يعترفلها وتبعد عنه لان ف بعدها الموت بنسبه ليه ..
*مؤيد عمر 33سنه يشتغل مع خوه رؤوف ويشوف ف خوه الكبير رؤوف قدوه ليه متخرج حتى هو...عازب وطيب هلبة ومنظم وم يحب حد يرتبله حاجات وهو اكتر شخص حنون ع اخته رتاج
*اخر عنقوده رتاج 25سنة تقرأ كليات اللغات قسم لغة عربية....بنية كيوت وطيبة وسمحة ورفيقة زينة وصاحبتها الروح بروح قرو من ابتدائية مع بعض ومتفرقوشي ف مدرسة حتى كرسيهم كان واحدكل وحده مكملة لتانية "ويا محلاها الصحبة الي زي هكي"زينه هادية خجولة وطيبة ورتاج قوية عفوية وفرفوشة.
وبهكي تكون تمت مقدمة وفي هلبة شخصيات تانية رئيسية حتظهر حسب أحداث .
دمتم ف امان الله
وصلو ع حبيب خلق نبينا محمد صلى الله عليه وسلم
