زينة

الحلقه السابعة

#زينة
للكاتبة زهور _الروح
الحلقة_السابعة
..................... .................. .............. .......
11:30م
واقف ف غرفته وهو ماسك ورقه ويفكر ف الكلام إلي دار بينه وبين صاحبه
...قبل ساعات...🌃
هزار: بنسافر!
شافله زياد بقلق م يبي صاحبه يكرر نفس الي دار !!
الموضوع اشبه بأنك تترك قلبك ببلد وانك تسافر بجسدك!!
ابتسم زياد بهزوء:يعني تبي تهرب!!
غمض هزار عيون وسند براسه ع سيارة:فرق اني نبي ننسحب او ننسى الي صار!!
زياد بعصبيه مكبوته:انت امتى حاربت باش تنسحب؟
زاد هزار غمض عيونه...
.وكمل زياد يقول:انت خايف ي هزار خايف تقدم خطوة لقدام وهاجس خوف هدا انت الي بانيه!!
عايش ف وهم خسارة وفقد..الي هما من اساس مش موجودين ...الحب مش انك تحس بمجموعه مشاعر حلو تجاه شخص وتكون مكبوته!!!
الحب هو تضحيه ..الحب انك تعرف شن تبي !!
وانت ي هزار مش عارف شن تبي..تارة تبي تكنلك زينة مشاعر حب نفسها الي انت تحسهم تجها
..وتارة تبي انها بس تكون موجودة بحايتك ولو بأي صفة كانت..حبيبة اواخت
هزار:كلامك فيه تشكيك!
زياد:مش تشكيك ..بس موضوع انك انت لازم تحزم امرك
...اما إنك تنسحب من  قبل م تحارب حتى!!
..او تكون جندي مناضل الي يسعى ورا مكسبه...
تنهد هزار اكثر وقعد ساكت كلامه لصاحبه وضح هلبه حاجات !!
بس هاجس خوف م تحولش!
...ف وقت حاضر..🌃
تنهد هزار وهو مقعمز ع سرير ويشوف للورقه الي فيده ودقات قلبه متسارعة...
يسافر ويتركها ويحاول ينساها.... وهدا هو عين مستحيل!!
او انه يسعى ويحارب باش يكسب قلبها!!
قعد يشبح للورق لدقايق وهو يفكر..
وف اخير  عصرها للورقه ف قبضته وحطها ع يسار صدره بتحديد جه قلبه !!
هزار وهو مغمض عيونه وقال بصوت ماليه عبره
" حنقعد نحبك لاخر نفس"
..................... ........... ............
كانت مقعمزة  ع سرير ولابسه ملايه صلاة وتقرا ف قراءن ...
بعد اليوم الشاق ومتعب م لقت ملجأ غير لجوء لله !!!
وكيف لا وهي انصدمت من اكثر شخص وثقت فيه
كانت تقراء وقلبها مقبوض ع موجوع بس قرأن كان كدواء مسكن لروحها مجروحه...
حست بأنها غبية وتافها!!
شعور خذلان الي استولا على باقي مشعرها رسملها الم كبير ف ذاتها !!
ف شي بداخلها يبرر لتصرفه ..ان انفعال طبيعي لانها اخفت عليه!!
بس ف شي من كبرياء يقول..ان هي كانت ف حياة شخص كدخيله مش مرغوب فيها!!
وهي تقرا حست بجفا ريقها وسكرت مصحف باش تشرب ولما شافت لابريق المياه الي من عادتها تعبيه قبل لا ترقد فاضي تنهدت وناضت باش تعبيه من مطبخ وهي ماشي ليه مرت من غرفه خوها لقاته فاتح ضي تنهدت وكملت طريقها للمطبخ ولما
وصلته فتحت ثلاجه وطلعت شيشه ميه وعبت ابريق متاع ميه ...
ومشت باتجاه شيشمه وعبتها لشيشه ورجعت حطتها ف ثلاجة ...
وكيف جايه تولي لحجرتها شافت ضي حجره خوها مفتوحة :اكيد يقرا.. امتحاناتهم قربت !!
وكملت طريقها لغرفتها...
... .... ..... ........ ......... .......
اما ف غرفة خوها فكان والع ضي ومقعمز ع كرسي وحاطط قدامه كتاب رياضيات المادة الي يعشقها!! ....
بس مش قادر يركز....
٠خوفه وقلقه ع غياب سهى مفاجئ شاغله باله...
يحاول يطمن روحه انها كويسه ..
بس من داخله خوف قلبه مش مريحة..
وخاصة للوضعها وهي مريضة سكر...
وف لحظه هادي تمنى لو كان يملك وسيله تواصل معها خارج اسوار مدرسه...!!
سكر كتاب وتنهد وتكئ بضهرة ع كرسي:ي رب احميها لي!!
........ .......... .......
ف صباح يوم تاني ...
"الله يبارك ..الله يبارك ي بنتي "
هادي تبريكات خديجة بعد سمعت بخبر حمل اسماء
ابتسمت اسماء وهي تشوف لعمتها كيف فرحانه بخبر حمل وم تعرفش بموضع خطورة الحمل ع حياة جنين وحياتها هي!!
اسماء بابتسامه:الله يبارك فيك عمتي يتربى بعز جدوده انشالله!!
تعبو عيون خديجة بدموع وهي تقدم باتجاه اسماء وباست راسها بعمق:سامحيني يبنتي سامحيني...
وهني تعبو عيون اسما بدموع وبد ينزلو وقدمت وباست راس عمتها وضمتها:ا!.شش ..لا ي عمتي انتي م درتي شي ..واهو ربك راد يجمعنا ويألف قلوبنا انا وانتي...
وقالت اسماء بمزح:حي.. ي عمتي تو يشوفني رؤوف ويقولي ديما تبكي امي...
ضحكت خديجة:خلي يجي  بناخدو منه احلى زرده ..اها
ومررت اسماء نظرها ع صاله:كلهم طلعو ولا..
خديجة:اي ..خلي نجيبلك عصير عنب من ثلاجه يساعد دم
اسما باحراج:لا..لا ي عمتي مش ضروري ...
شافتلها خديجه بطرف عين:هني روحك ي مراة
..وعصير عنب طبيعي كويس لصحتك ولولدك
..وناضت خديجه للمطبخ..
وقعدت اسماء تمرر نظرها ع مكان وهي محرجه هلبا من عمتها!!
وبعد م جابت عصير وشربته..
اسماء:بيولو إلياس وسامية يوم جمعه !
خديجة:اي ..وتنهدت..إنْ شاء لله
وكملت تقول ..وحتى  زياد روح!!وغريب ان هزار قالي امس بيجي بس م جاشي!!
تنهدت اسماء وهي ساكتة ..
وشافتلها خديجة:نفكر نعزموهم كلهم مرة وحده بكره .
اسماء:المشكله مش ف زياد ي عمتي مشكله ف خالتي بدريه ..الي واخدة موقف منك...!
تنهدت خديجه:لكن حنعزمهم ونشوف شن يصير!
تنهدت اسماء وهي تذكر لما سافر زياد بعد رفضاته رتاج شن دارت بدريه ...
هديجة:واي قبل لننسى بنمشو لحماتها لخيتي ...
اسماء باستغراب:علاش خيرها...
خديجه بحزن:تعبت..ورفعوها للمشفى..قالو مريضت قلب هيا.
اسماء:لاحول ولل قوة الا بالله....وامتى بنمشوا
خديجة:العصر ..اتصلي براجلك واسأليه ..بيفضى للعصر...
وناضت..
خلي نشوف زريعات ..ونسقيهم.!
خدت اسماء تلفونها ..
واتصلت برؤوف....
....... ......... ........ .........
ف كليه لغات ع خشه سيارة عقيله للكليه شاف رتاج نازله من سيارة دقق ع ملامح شخص الي يسوق ف سيارة ولما عرفه من ابتسم ونزل من سيارة وهو مبتسم ،..
وقدم اين وصل لمكان سواق شاف لمؤيد وهو يبربش ف تلفون ..ودق ع نافذه سيارة ولما سمع مؤيد صوت رفع راسه وشاف لقزاز سيارة
وابتسم ..ولما حول عقيله من باب
فتحه مؤيد ونزل
مؤيد بابتسامه:اوو ..استاذ عقيله ...
ابتسم عقيله وهو يصافحه:كيف امور ي باش مهندس
ابتسم مؤيد هو يشوفله:كل ماشي..والحمدلله
عقيله:كويس بكل..وكيف حال عيله
مؤيد:تمام ..وانت كيف حالها حناك سمعنه بالي صار
تنهد عقيله وهو يذكرها:تعبانا شوي ..بس وضعها حالي مستقر
هز مؤيد راسه:ربي يشفيها انشالله
عقيله:انشالله..خلاص لما شفتك قلت خلي نسلم وتو اعذرني عندي محاضرة..
هزله مؤيد راسه ولما فتح سيارة تذكر:قبل لننسى ..
شافله عقيله باستغراب
مؤيد :نبيك تشرفنا ع جمعه ..مرواحه خوي!!
عقيله بابتسامه:انشالله يوصل سالم ..إلياس ولا؟
مؤيد:اي..بتجي را حلفتك بطلاق!!
اها..بترضى يتشردو صغار !
ضحك عقيله:ولا يهمك ..تلقاني او ناس ..
مؤيد وهو يركب سيارة:هي ..السلام..
ومشي لشركه ....
اما عقيله وهو ماشي جو بين عيونه هدا موقف الي جمعه مع صاحبه شعر طويل!!!
فشي داخله محسسه بذنب لان لو شو م صار تقعد عرض لشخص !!
بس حاسس بمشاعر تانية تجاها غير ذنب!!
وهدا شعور الي م لقاله تفسير!!
......... ........................ .............
"وهدا الي صار بتفصيل"
تنهدت اميرة وغمضت عيونها وفتحتهم بألم:مش عارفة شن نقدر نقول ي زينة...
بديت نتحشم حتى اني نعتذرللك مواقف خوي ال زي زفت!!
زينه:لا ي اميرة انا همري م نلوم انسان ع اخطاء غيره ..
ي بال صاحبتي ..
بس عموم قتلك لان مش عارفه هزار شن ناوي يدير تاني ..
او حتى مدى الي حيقعدها  خوكي ف حبس...
تنهد اميرة مرة تانيه:خايفه يطلع ويكون ناقم عليكم زوز هدا خوي اني بروحي م نعرفش شن يشتغل ومع من وحتى لو رزقه حلال او حرام ...
وانتي تعرفي ظروفنا مصروف بيت اني وامي شايلينا!!
وبوي ..دمعو عيونها...ه
هو اكثر شخص موجوع مرات تلقيه يبكي بدرقه عنه من قهرة او حتى عجزه!!
شافت امير لزينه:بوي ..ابتسمت..بوي الي كان كل يوم صبح يمشي للمعمل وم يرجع الي ف وقت عشا
كان شغله بالنسبه ليه اهم شي
تلقيه يضحك ويهدرز علينا كان انسان منعوش بالحياة كان ديما يقولي م دام طب حلمك اجري وراه وم تخلي اي عوائق تصيبك..
ومن بعد حادس الي داره ..ولا انسان تاني!
كان مفعم بالحياه ..ولا عايش ع هامش...
ممكن قدامنا يبان قوي ومتماسك..
وحطت اميره يدها ع قلبها وهي تشوف لزينه ودموعها بدي ينزلو..بس اني حاسه ..حاسه بحزنه
نبرة صوته قبل..تفرق هلبه ع تو..
بس هو لحد تو يحاول يتماسك ويقول"ف قضاء ربك كله خير ليا حتى لو بان عكس لناس"
وخوي الكبير..الي من مفروض يكون سندنا ..هو من بدايه كان عاق..وزاد بعد اعاقة بوي ليا شهور م شفته وتو سمعت بخبر حبسه منك!!
قهر بوي وامي ..كله بسببه ..
ومسحت دموعها وتبتسمت:اسفه ازعجتك بمشاكلي
شافتلها زينة:استغفرالله..ي اميره خيرك م هو صديق وقت ضيق..
كلمه تحسي بأنك تعبانه ومضغوطه تعالي احكيلي اشكيلي واني نساعدك..او ع اقل نسمعك ..تمام..
ابتسمت اميرة ومررت نظرها ع مكان وبعدين شافت لساعه من تلفونها:هي وقت محاضرة!!
شافت زينه لساعتها:حي..حي..استاذ خليل مش حيدخلنا بسرعه نوضي
وخشو وهما يجرو...
........... ........... ............
ف مدرسه المجد
كانت سهى ماشيه لحجره معلمات وهي شادة كراسات فصل وف نفس لحضه الي كان محمد جاي وحتى هو شاد كراسات فصل شافو بعض
ابتسم محمد وهو يشوفلها وقدم بسرعه
واما سهى ابتسمت وقعدت تراجيه حداه باب
ولما وصل
محمد بدون مقدمات:وينك امس ..خيرك غايبه ..صارلك شي!!
ابتسمت سهى:وعليكم السلام ورحمه الله...
ابتسم محمد بارتباك :اسف امس دورت عليك وم لقيتك..
ابتسمت سهى وزادت دقات قلبها ف خفقان:صارلي ظرف خلاني نغيب!!
شافلها محمد بقلق:ظرف..انشالله خير!!
ابتسمت ورفعت كراسات لفوق :خلو نحطوهم داخل..
ابتسم محمد وهو يشوف لكراسات الي ف يدها ..
وخشو وحطوهم ع رف مخصص لفصلهم!!
محمد:هي قولي شن صار !!
سهى:خلاص استناني للاستراحة ..خايفه نتأخر ع حصة موضوع طويل شوي فاهم علي!
شافلها محمد هلبه وتنهد:حاضر لكن ..مش تتأخري !!
سهى ابتسمت:هي ..باي...ومشت بسرعه باتجاه فصلهم
ومحمد واقف يشوفلها وهي ماشي...ع وجه ابتسامه  ..
................. ............... . ......
ف استراحة
تمرر ف نظرها ع ساحة ودور عليه وبعدين بدت تمشي لجه معينه ف ساحة وهي شاده فحضنها دفتر!!
لقته مقعمز تحت شجره ع عشب
ابتسمت وكالعادة دقات قلبها تزيد ف خفقان كل م تشوفه تحس وكأن نبضها ملكه هو!!
وكأن حياه ولت محصورة ع شوفته وسماع صوته!!
ولما قربت لقاته ماسك غصن وكأن يرسم حاجة ع  ارض!!
"محمد"
لما سمع صوتها مد برجله ومسح الي كتبه ببوته وقف بسرعه!!
شافتله سهى باستغراب :انشالله م نكونش ازعجتك ؟
ابتسم محمد بارتباك وحط يده ورا رقبته :لا..لا م فيش شي مهم..واصلا اني كنت مستنيك !!
ابتسمت سهى وكيف بتقعمز ع عشب تحت شجرة
"استني"
شافتله باستغراب
نحى محمد جاكة الي لابسها وقعد بنص كم 
استغربت سهى تصرفه..
بس سرعال مزال لما شافته يفرش فيه ع عشب
سهى:لا..لا ي محمد م يجيش هكي تو يتوسخ
محمد بابتسامه:احسن م يتوسخ زيك..
سهى :استغفرالله..وكيف جايه بتنحي جاكته من ع ارض شدها محمد
محمد بعناد:قعمزي ...وهني روحك مش حيصير شي لزي..
قعمزت وهي متضايقة وحطت دفتر ع عشب:ع فكرة مش راضيه ع الي درته...
ابتسم محمد وهو يقعمز ع عشب:وهي تو قوليلي شن هو ظرفك؟
تنهدت سهى وهي تحكيله ع الي صار لحنها..
محمد بحزن:لا حول ولا قوة الا بالله!..وتو هي كويسه !!
سهى وهي تحط ف خصلات شعره ورا وذنها:اي ..الدكتور قال انها حتقعد ف مشفى تحت مراقبه. ..وبصوت حزين..خايفه ي محمد
حس محمد بخوف لما سمع نبرة صوتها وشافلها لقها تشوف لقدام وعيونها مغرقه بدموع
سهى:خايفة ..خايفة يصير شي لحناي..
وبدو دموغها ينزلو
محمد:لا ..ءلا م تبكيش..!
وحط يده ف جيب بنطلون وطلع منه منديل ومدلها ياها ..
خداته سهى وبدت تمسح ف دموعها ..
سهى شافتله:اسفه..م يكفيش جاكيت تو وسختلك منديلك!!
ابتسم محمد بهدوء وهو يشولفلها كيف تحط ف خصللت شعرها متمردة ورا وذنها! وقال بنبرة صادقة:فداك..
تحشمت وتوردو خدودها وزادت دقات قلبها لدرجه حست ان محمد بيسمعها!!
وقفت..
سهى بتوتر وحطت منديل ف جيبها:ءء ..ءهيا..استراحة تمت!
بتمشي طاحت منها ابره انسولين الي ف جيبها بدون ماتحس..
وهي ماشيه ..
"سهى"
وقفت سهى وحست بنبضات قلبها بتوقف"محلاه اسمي !"
التفت بهدوء عكس زوابع وعواصف وزلازل داخلها!
قدملها محمد ومدلها ابرة انسولين:تفضلي..طاحت منك!
تحشمت سهى وبانت ع ملامحا انزعاج وهي تاخذ ف ابره..
وها الشي م خفاش ع محمد وزاد تاكد لما حطتها ف جيبها بسرعا وكأنها خايفه حد يشوفها!!
ولفت كملت طريقها للفصل....
تنهد محمد وولى باش ياخد جاكته ويمشي حتى هو لفصله ..
بس لما وصل شاف لدفتر رسم موجود ..
استغرب..
رفعه وشاف اسم الي كان"Suhaa Abdu Rhman"
محمد بابتسامه:هالبنت ..بس لو نعرف شن الي مذهبلها شيرتها هكي..!
........................... ........
ف فصل السابع
خشت سهى للفصل وحطت ابرة ف شنطة وهي تكلم ف نفسها:اكيد يقول شن هالبنت غبيه..وتنهدت ..الحق انتي غبيه ي سهى..غبيه
"السلام عليكم"
وهدا صوت ابله الي خشت للفصل
وقفت سهى مع زملاها وردو سلام ابله
وبدو ياخدو ف الحصة انجليزي.........
............ ........................
ف كليه اللغات..
ف ممر الكليه..
رتاج بانزعاج:هدا الي اسمه المتنبي نبي نشنقه بيديه !!
..وبدت دير ف حركات بيديها كأنها بتشنق حد...
زميلتها: ههه وين بتلقيه توا تمشي لقبره!!
رتاج:لو اطريت بنديرها ...ي ربي مديرلنا معلقات ومدري شني شن فايده الشعر!
زميلتها:اني نبي نعرف شن الي جابك للغه العربية!
وكيف رتاج بترد شافت شخص بتمغضه هلبه..
رتاج بانجعاز:شن الي جابه توا!
شافت زميلتها للوين تشوف وضحكت:شكله مصمم هلبه..
لفت رتاج بسرعه:هي تعالي قبل ليجي جهتنا...
ولفت زميلتها بس شخص كان مصمم هلبة هلبة...
"رتااج"
سرعت رتاج مشيتها هي وزميلتها ...بس شخص بدي يركض بجيهتهم بسرعة
"رتااج"
زميلتها:وقفي خلاص قرب ..ماليك مهرب منه...
وقفت رتاج بانجعاز وخدت شهيق ..وزفير وبانت ع ملامحها جدية..والتفتت..
شافت زميلها قريب منهم ولما وصل  حط ايديه ع ركابه  وانحنى بضهره بدي يلتقط ف انفاسه
اسماعيل:اه.ه.ه....رتاج خيرك ...!
شافتله رتاج:م خيرني شي بس نسيت حاجه ف قاعه وكنت موليا باش ناخده..
ابتسم اسماعيل وهو يرفع براسه ويشوف لملامحها حلوة :اوكي..بس نقدرو نتكلمو شوي ...وشاف لزميلتها وله شبحلها ...موضوع خاص شوي
زميلتها :اوكي رتاج نستناك ف كفيتريا ..باي ..ومشت
ربعت رتاج يديها وقالت بجديه:مستعجله راهو....
اسماعيل خدي نفس :اوكي .. تسمعي ي بنت ناس راني ناويك بحلال ..ولله ان نيتي صافيه اتجاهك
بس انتي عطيني فرصة وم تسكريش الباب ف وجهي..تمام!
مررت رتاج نظرها ع مكان ورجعت شافتله بنفس ملامح جديه :اسمع..سمعو اني وانت علاقتنا قبل مكانت طالعه من نطاق زمالة...وتنهدت..والواضح ان صار تطور ف هدي علاقه.. بس من ناحيتك انت بس ..
فنتمنى ان نكونو  استاذ وطالبته بدون صفه تانيه لينا..تمام.  . وتو اعذرني
وكيف بتمشي
اسماعيل:م تستعجليش ي رتاج ..واني م ستني ردك ف اي وقت ..وخليك واثقه بان عرضي مفتوح لين توافقي عليه...
تنهدت رتاج بحزن وكملت طريقها..
اسمعيل يعتبر زميلها ف دراسه من سنوات اولى ليها ف جامعه هي وبعض بنات ....كان متقدم عليها بسنتي ف جامعه..
وحاليا مش مستبعدة يكون اشتغل معيد ع خاطرها!!
.......... ......
فهالوقت خش زياد لكليه اللغات بعد م درس سيارته ..
كان ناوي يدير شي يكون فاصل بين عقله وقلبه..!
وهو خاش شاف رتاج  من ورا نظارته شمسيه طالعه من قسم وماشية لجه كافيتريا ...
ابتسم ودقات قلبه زادت قوت حس بان شي الي حيديره هو صح ولازم يكمل فيه...
مشي وراه بسرعه وكات قلبه سابق خطواته باتجاه محبوبة....
وكانت ف نظرات مستغربه تشوفله من جهه تانية ..
فريدة:خالو زياد..!!
.......  ...............
وصلت رتاج للكفيتريا وشافت زميلتها مقعمزة تستناها بكوبين كافي...
قدمت رتاج لطاوله وقعمزت وقالت بسرعه:اسمعي كويس م تسألينيش..عن اي شي فاهمة ..ايوه ..
وخدت كوب قهوى ورشفت منه وقعدت تمرر نظرها ع موجيدين ف كافيه بغضب..
موقف الي صار جعزها هلبه...
هي تعز سمعو ..او اسماعيل ..لان يعتبر زميلها وهو ساعدها ف اولى اياماتها لما كانت زينه تستعد لامتحانتها ..وزي م تعرفوا كليه طب واعره هلبه ف اولى سنواتها....!
كانو مقعمزين ع طاوله ورتاج عاطيه ظهرها للمدخل وزميلتها مقابله للمدخل...
خش زياد للكفيتريا..
وبدي يمرر نظره ع موجدين ف مكان
شافته زميله رتاج:اومي قااد..هدا شنو محلاه.!
شافتلها رتاج باستغراب وهي شادة مق قهوة بيدها:شني ..طار عقلك ي بنت..!
زميلتها وهي مزال تشوفله بهيام:سبحان خلاق عظيم...هدا زين ولا رضى والدين. .
شافتلها رتاج وهي تبي تعرف لوين تشوف..
لقت نظرتها موجه باتجاه مدخل خلف..
لفت رتاج باش تشوف ..وهنا كانت صدمه..
الي خلو عيونها يتوسعو ...وخلاها تحس برجفه سرت لجسمها خلاها طيح مق قهوة من يدها..
وزادت سرعه دقات قلبها وزادت صوت  ..
وزاد موضوع لما شافلها زياد ورفع نظراتها باش يتأكد وابتسم بهدوء وقدم تجاها....
كان طالع حلو هلبه بسوريه زرقه وهو مثني اكمامه وسروال جينز اسود ... كان طالع حلو لدرجه لفت انتباه كل موجدين..بمعنى ادق البنات..!
اما بالنسبه لرتاج حست وكأن زمن..وقف فجأ..!!
وانعدمت اصوت غير من صوت خطواته..
وم عدت تسمع كان ف اصوات دقات قلبها...ال كانت ملهوفه ليه...
وزي م تعرفو ..نقيض قلب ف اغلب احيان.. العقل...  لازم يكون حاضر ف مواقف الي هكي..
وعقلها كان يقول..ممكن جاي لبنت غيرك لفي بوجهك بسرعة ..ي عبيطه!!
وقلبها. ..كان جاي لغيرك علاش شافلك وابتسم وبعدها قدم باتجاهك ..انتي..!
وم بين كل هادي اضرابات م حستش الي وزياد يستأذن من زميلتها باش يكلمها ع انفراد..... !
مقعمز قدامها بطلته..الحلوة...او بتعبير اصح مبهرة!!
جمعت رتاج شتات نفسها وتصنعت القوة ولا مباله!!!
زياد بابتسامه:السلام عليكم
جوباته رتاج بهدوء ع عكس هواجس وزوابع الي داخلها:وعليكم السلام ورحمه الله وبراكاته..
وضافت..الحمدلله ع سلامه!..
تنهد زياد وهو يشوف لملامح وجهها:الله يسلمك...
وهني عم سكوت المكان ..
نظرات زياد ليها نظرات مشتاق يحاول يروي ظمأ روحه...!
وحتى هي مكانت اقل منه ف شوق وهي مقعمزه معاه فاضت ريحه عطره ع مكان غمضت عيونها وهي تشمه..
حاولت ع قد م تقدر تقاوم بس م قدرتش!!
لين قاطع هدا السكون ...
زياد:حنخش ف موضوع طول بدون مقدمات..لان عارف قعدتي معاك هنا من اساس غلط بس مطر..
شافتله رتاج وهي تحاول تخفي توترها:تمام..بس استعجل ..لوسمحت!!
وف سرها"انشالله تلتصق بكرسي وم تتحركش لاي مكان"
زياد قدم وسند ايديه ع طاوله وشبكهم مع بعض ورفع راسه ليها وشاف لعيونها مباشرة:تتزوجيني..!
كلمه هادي نزلت زي صاعقه ع رتاج لدرجه انها شكت بالسمعاته وقالت بصوت عالي شوي:نععم...!
شافلها زياد باستغراب وخوف...
ولما توقضت رتاج للي قالته قالت بتعثلم:قصدي..شن قلت ..يعني  م سمعتش  ...
زياد:تقبلي تكوني شريكت حياتي...تتزوجيني رتاج!
ظهر طيف ابتسامه حاولت جاهده تخفيه ونزلت عيونها بحياء ع ايديها الي مشبكات ع ركبتها  وقعدت ساكته. ...
ولما شاف زياد ردة فعلها تسلل بريق امل لقلبه الي خلاه يقول:تقبلي تكوني شركت حياتي ...تكوني مرتي ..راني ي رتاج شاريك ...نبيك تكوني معاي. ف كل لحظات حياتي..وتنهد وكمل يقول...
نبي كل يوم نفتح عيوني ويكون انتي او وجه نقابله..
ونبي قبل لنغمض عيوني تكوني انتي اخر وجه نشوفه...
توردو خدود رتاج وهدا كان تأثير كلام لزياد عليها...
زياد بألم:م تحرميني منك ..م تحرمي قلبي منك ...
ي مالكته..!
حست رتاج وكأنها تبي تبكي من كثر م اثار فيها الكلام رفعت راسها لفوق وعيونها م غرقتهم دموع ومررت نظرها ع مكان بدون م تشوفله ...
وهدا كله تحت نظراته
زياد:مش حنسألك ع أي شي يخص ماضي او حتى سبب رفضك ليا  قبل بس ..اني نبيك م ترفضينش توا ..!
شافتله رتاج وعيونها مغرقات بالدموع وهزت راسها وع وجها ابتسامه...
ضحك زياد بفرح وهو يشوف لردة فعلها وخايف يفسرها تفسيرة خطأ:موافقة يعني..
هزت رتاج راسها وخدودها موردات :بس..يعني تفاهم مع تريس..!
وناضت بسرعه باش تمشي خافت يسمع دقات قلبها ...
بس جاها صوته وهو يقول:بنبعتلكم امي باش تخطبيك ليا..بعد مرواحه خوك
هزت رتاج راسها بدون م تتكلم...ومشت وقلبها يرفر من فرح...!!
وخلت وراها زياد.. الي تنهد بفرح :الحمدلله...ودعا من وسط قلبه.."ي رب اجعلها من نصيبي و م توقني فراقها"
........ ................... .............. ...............
ف كليه طب..
زينه واميرة وهما طالعات لبرا
زينه:الحمدلله ي ربي لحقنه ف اخر دقيقه!
اميرة بضحكة:هههه...ولله تقولي مستنينا ع غلطه ..رافع ساعته واقف حداه باب مستنينا ...
زينه:ههه..الحمدلله ..مشكله محاضرته لو غبتي ع محاضرته ..م تقدريش تفهميها ..وحتى لو شرحها ليك حد تاني صعب مش زي شرحه. ...
اميرة بتأيد:اي ...وخاصة ان امتحانات فاينل قربت .. !
زينه:الحمدلله..هانت م قعد الي شوي...
وهما يهدرزو وصلو للمخرج ...ولقت اميرة باص متاعها برا مستنيها...ودعت زينه..ومشت ركبت باص ..وانطلق باص باش يوصلها وبعض طلاب...!
واما زينه فهي كانت ليها وجه تانيه..!
وقفت تاكسي وركبت عليه وطلبت منه يوصلها لمكان معين..   ............ ................
......... ..
وهي ماشيه ليه شافت محل العاب وقالت ف نفسها"اكيد  بيكونو زعلانين مني "
طلبت من صاحب تاكسي يوقف ع محل ونزلت
خشت للمحل شافت للي ف استقبالات وسلمت عليها.....
وبعدها خشت داخل وبدت دور ع العاب للاولاد
وشرت بعض سيارات وطائرت بلاستكيه.....
وبعدين ببدت دور ع العاب للبنات صغار وشرت شوي من دمى طبخ ودباديب.....
ولما وصلت للمكان استقبال شافت للمرا الي تخدم عليه وابتسم ...
كانت نظرات مرا ثلاثنية ليها مربكة بالنسبه لزينه..!
توترت..بس تجاهلت وقالت:لو سمحتي...كم حقهم هكي مع بعض..!
ابتسمت مراة وهي تمرر ف العاب ع ماسح وتشوف للاسعار ع شاشه...
مراة:انتي متزوجه!
ابتسمت زينة وهي تشوف للالعاب :لا..لا
مراة :م تزوجتيش قبل بكل
زينه:لا ..م تزوجتش....
مراة بضحكة وهي تمدلها كيس:يعني ي اما انتي اخت او خاله او عمه..ولا
ابتسمت ز ينه وهي تاخد ف كيس:تقدري..تقولي هكي....
مراة:مبلغ 96دينار
طلعت زينه محفظتها الي كان فيها مصروفها شهري ال م تجاوش مئه دينار...
وطلعت منهم سته وتسعين وخلصت عامله...
مراة:شكرا ..عاودي زورينا ي انسه..انسه؟
زينه:زينه!
مراه بابتسامه:ي زينه..اسم ع مسمى ...
هزت زينه راسها وكيف بتمشي
مراة:نقدر نسألك سؤال خاص شوي!
زينه باستغراب:تفضلي..
مراة:انتي مرتبطه..يعني مخطوبه ..!
هزت زينه راسها بلا...وكأنها فهمت لشن تبي توصل مراة...
مراة:تمام..ممكن لو م فيها مانع تعطيني رقمك..
زينه باستغراب:رقمي...!
مراة:عادي لو م تبي ..تقدري تاخدي رقمي اني ...
زينه:ف شي تبيني نساعدك فيه...
ابتسمت مراة:شكلي انكشفت..وتنهدت
لصراحة انتي عجبتيني هلبه ..ونبي نخطبك لخوي
و م تخافيش راهو خوي شخص كويس هلبه..وحلو هلبه..ومستقل بشعله خاص..وهو خوي وحيد ..وع فكرة مش كبير هلبه عمره..33سنه
ها..شن قلتي
ابتسمت زينه بهدوء:شكله ربي راد لخوك بنت احسن مني اني م نيش مفكره ف زواج حاليا..
مراة بأسف:بس ... ي خساره!
ابتسمت زينه:خليك متيقنى ان ربي رادلكم كنه كويسه هلبه ...
ابتسمت مراة:بس ..ها زورينا مرة مرة تمام...
ضحكت زينه وقالت:انشالله ...هي سلام!
وطلعت زينة من محل..
ومشت ركبت التاكسي وانطلقت لوجهتها..!
............. ...................... .....
فالهوقت ف كليه اللغات....
كان مقعمز عقيله ف حجرة اساتذه ولابس نظرات طبيه ويشوف للوراق بعض طلبه..!
وكان مقعمز معاه زميله وصديقه وحتى هو يشوف لوراق معينه..!
وهما مقعمزين مع بعض رن تلفون...
شاف عقيله لتلفونه لقاه مطفي ..ومزال صوت يرن!
شاف لزميله الي مسك تلفونه وشاف لرقم الي عليه
سكر تلفون بدون م يرد ...
ورجع كمل شغله..
وبعد شوي..رن تلفونه مرة تانيه ..
وزي الي قبلها سكر عليه..
ورن مره تانيه...
عقيله:رد مرات موضع مهم!
شافله اكرم وع وجه ملامح سخريه:ف شن مثلا...
تنهد عقيله وهو يولي بنظرة لاوراقه:علاش خطبتها كان م تبيهاش..!
رجع اكرم بنظرة للاوراق:كان مجرد اعجاب وبس..وتنهد وقال..واني فسرته غلط ولبسته لباس حب..وين توقظت ايقنت ان مش حب اعجاب وزال مع وقت...
شافله عقيله:متأكد..؟
شاح اكرم بنظرة ع ن اوراق وهو حاسس ان مخنوق..
ابتسم عقيله بسخريه وهو يشوفله:الموضع بيلي فيه ..ان ف شخص ثالث خش للعلاقه..!
وف هالوقت طق باب الغرفة..
الي كانت بالنسبه لاكرم منجاة....من اسألت عقيله..!
وخشت ..سلسبيل ..وهي طالبه ف كليه..
بنوته حلوة واكثر شي يميزها هي عيونها سود كبار ..عيون الريم..
سلسبيل بابتسامه..:اهلين..وسكتت وهي تشوف لاكرام بابتسامه....وهو مبادلها ابتسامه
مرر عقيله نظرة عليهم زوز وحس كأن ف شي....!
عقيله بجدية:تفضلي سلسبيل...
خشت سلسبيل للحجرة وهي ماسكه لاب توب:اسفه ع الاجعاز بس جيت برند لاب...
ناض اكرم من ع كرسي وع وجه ابتسامة وقدملها وهو يقول:م فيش اجعاز ..تفضلي ف اي وقت..
سلسبيل وهي تعطيه الاب:المهم ي استاذ شكرا ع لاب...
خداه اكرم وهو يسألها باهتمام:انشالله فادك..ودار معاي معروف!!
ضحكت سلسبيل:الحق..لولاك ي استاذ م قدرتش نكمل مشروع ...
سكت اكرم وهو يشبحلها نظرات حلوة وكانت سلسبيل مبادلته نفس نظرات......
وهدا كله صار تحت نظرات عقيله الي كان مستغرب هلبه من تصرفات اكرام...
هو عمره مناضش من كرسي ع خاطر طالب..
ولا حتى تبادل ابتسامات وكلام طويل..كان يختصر كلامه بهزة راس او يسكت...
سلسبيل:هي تو تأخرت ..وكيف بتمشي ...اه هه..قبل لننسى..
فتحت شنطتها ...
طلعت منه فلاش ومدتله ياه...متأسفه ع تأخير...
وهدا الي خله عقيله يفتح عيونه بصدمه...!
اكرم مستحيل ياخد بحث من حد...بعد ينتي موعد تسليم وحتى بعد ساعة منه....!
اكرام ومازلت ابتسامه ع وجه:ولا يهمك ..المهم جبتيه..
سلسبيل هزت راسها
وطلعت ....
تنهد اكرم وله قعمز ف مكانه ولبس نظارته ورجع يشبح لاوراقه...!
استغفر عقيله ربه ف سره وقرر ان م يسألش لان كل شي ولا واضح..!!
وهما فالهسكوت رفع عقيله تلفونه وهو يشوف  لساعه ..
ابتسم وبدي يجمع ف اوراق الي ع طاوله وحطهم ف شنطه العمل متاعه باش يروح بيهم ...
وناض وكيف بيمشي..
اكرم بدون م يرفع راسه  من ع ورق:لو نعرف وين تمشي ..!
ورفع راسه وشافله:ديما بنفس هاليوم وبنفس توقيت ..!
ابتسم عقيله:مش ضروري تعرف كل شي عني..؟
ابتسم اكرم وهز راسه باستسلام ورجع شافله لوراقه...
طلع عقيله من مكتب..
ومنه من كليه...
وركب سيارته وانطلق لوجهته....!
................... .................. .........
وصلت زينه للمكان الي تبيه...
وكان مكان ملجأ لاطفال اليتمى....
شافت زينه للافته وتنهدت"انشالله يسامحوني  م قدرتش نجيهم اسبوع الي فات وحتى امس من موقف الي صار نسيت بكل. !"
ونزلت من سيارة تاكسي..
ونزلت اكياس العاب معاها...!
وعطت سائق اجرته....
وخشت للملجأ ..ولما وصلت لاستقبالات ..شافتلها موظفه الي تخدم فيه وابتسمت ...
مريم بابتسامه:اهلين زينه. 
قدمتلها زينه وسلمت عليها.
وتبادلو احاديث معتاد ..كسؤال عن حال ..واخبار ..واهل..!
مريم :قعدو يسألو عليك هلبه..مش من عادتك تغيبي...عنهم!
تنهدت زينه:عارفه..بس اسبوع الي فات كنت ملازمه سرير لان مرضت..!
وامس صار شي وم قدرتش نجي!!
مريم:هدا علاش جيتي اربعاء...استغربت هلبه لما شفتك!
تنهدت زينه بحزن وهي تشوف للاكياس هدايا:اكيد زعلانين مني تو!
هزت مريم راسها بإيجاب وهي تشوف لاكياس هدايا:تبي اكثر من هكي باش تراضيهم..وقالت بتنهيدة..وخاصة ليلى ..!
شافتلها زينه بقلق..
وكملت مريم تقول:امس قالتلي..انها ملت منا ومعاش تبي تجينا..زي م دارت فيا امي..!
تعبو عيون زينة بالدموع ..
بعدين خدت نفس ورفعت اكياس هدايا ....
ولما وصلت للحجرة متاعهم قدمت وطرقت باب...
م لقتش اي اجابه ولما طرقت مراة تانيه سمعت صوت يقول"الباب مفتوح"..!
ضحكت بهدوء لما سمعت صوت ..
وبدت تفتح ف باب بهدوء ..
وبينت راسها من ورا باب....
لقتهم يلعبو ..ابتسمت وفتحتا ع اخير ولما لقتهم مشغولين  بالعب. ..
حطت اكياس هدايا حداه باب...
زينه بابتسامه وهي فاتحه يديها  قالت بصوت عالي شوي:انا جيت.
ولما سمعو اطفال صوت عرفوها طول ..
ولما التفتت عيونهم فضوليا باش تشوف تأكدو انها هيا وناضو كلهم بسرعه وهما يضحكو بفرح ..
وينادو بأصوات متقاطعه وعالية ..
"خالتو زينه..خالتو زينه "
وناضو اطفال الي ف ملجأ... وهما فرحانين هلبه
عمق احتياج الي فيهم لقوه ف زينه..
حبوها بقلوبهم صافيه..لانهم حسو بصفاوة قلبها..
كانو محتاجين حنان وحب اهل وبين وحضن دافئ..
وم لقوشي كل هدوم كان فيها....
مع ان اكيد مش حتكون زينه بمكان ام واب ..اوحتى تقدر تعوضهم  وهي متأكده من هالشي لان م فيش انسان يقدر ياخد مكان ابوين ...!
بس  تخفف عليهم وتحسسهم بأن ف من يحبهم ويهتم بيهم..وممكن موضوع يكون نابع ف اعماقها لشعور اليتم الي هي تحس فيه ..!
غمضت عيونها وهي تضحك ..
وتستتى فيهم حضنوها كلهم لين قريب طيحوها..
بدو يسألو ..
"علاش م جيتينا الثلاث الي فات..وامس...علاش !!"
كانو يلومها ويحضنوها
اطفال م تجاوزت اعمارهم عشر سنين..!
زينه بضحكه:باهي ..بس تو خلوني لان جبتلكم حاجه حلوة ...
بعدو وهما مستغربي:شن جبتيلنا..
ضحكت زينه وهي تمرر نظرها عليهم حست بأن ف حد ناقص استغربت ولما شبحت لوين كانو يلعبو قبل شوي...شافت ليلى مقعمزة وتلعب بألعاب الطبخ..
بدون م تعبرها..!
تنهدت زينه وقالت بمزح:شكله ف وحدة زعلانه هني...
شافو اولاد كلهم لليلى الي ابتسمت تحت محاولاتها فاشله بانها مش مهتمه...
شافت زينه للاطفال:نعرف اني..م جيتكمش اسبوع الي فات وامس ..واسفه سامحوني باهي..!
سكتوا اطفال وهما مش عارفين شن يقولو يبو هدايا وهما ميبوش يسامحوها...
شافت زينه لليلى كانت عطيتها بظهر ...
ليلى كانت عيونها معبيات بالدموع وهي تشو للعبه الطنجرة بلاستكيه الي فيدها...
زينه:ليلى..!
وهني نزلو دموع ليلى ورسمت ملامح بكاء ع وجها وبدت تبكي بصوت عالي...
ولما سمعت زينه صوت بكها انقبض قلبها بخوف ...
وناضت بسرعه ومشتلها..
ولما وصتلها لقتها تبكي وحاطه ايديها ع وجها...
شدتلها زينه راسها وحطنها ف حضنها ...
وهي تسمع ف صوت شهقتها وعيونها معبيات بالدموع...
غمضت عيونها بألم لمه حست بايديها طوقو ع خصرها...!
قعدو هكي لمدة وبعدين رفعت زينه راس ليلى لقته جفونها محمرم من كثر بكي وحتى من عيونها ....!
وبدت تمسحلها دمعوعها بايديها...وهي تقول
"مش قصدي ..ولله سامحيني !"
وميلت براسها وباستها من خدها...
زينه وهي تمسح  ع راسها براحه يدها بحنان:سامحيني ...وها اليوم جيت بس ع خاطرك ..
شافتلها ليلى بعيونها مدمعات وهي ترشف:يعني..م تخلتيش عنا...!
حضنتها زينه مرة ثانيه وهي تقول:مستحيل..انتو صرت جزء كببر هلبه من حياتي..
سكنتوا قلبي وقعدتو جزء م يتجزءش..من روحي.!
ورفعت زينه وحده من ذراعها وهي تشوفلهم وابتسمت..
وهما فهمو طول وجو وحضنوها مع بعض......
................
"وهادي لايمن"
خدا ايمن سيارته  وهو فرحان بيها...
وهكي عطت زينه لكل واحد فيهم سيارته ..
وقعدت تشيحلهم كيف فرحانين بي لالعابهم ..
وبدت تلعب معاهم ..مرة مع بنات ..ومرة مع اولاد...
وقفت وحدة من بنات وقالت لزينه:شن رايك خالتي زينه نلعبو غميضه..
وقالو اطفال بص بصوت عالي:اي خلي نلعبو هيا وبدو يكرو فيها ...
ضحكت زينه وقالت:كيف بنلعبوها وحجرة صغيرة..لا لا م يجيش هكي
ضحكت ليلى:ساهله...
ورفعت وشاح رقبه شتوي متاعها من
ولاب ..
وقدمت باتجاه زينه ..
زينه:لا ..لا ..قصدكم بتغمضولي عيوني...
هزت زينه راسها بلا..
شافولها اطفال بحزن وقال واحد من اولاد:به انتي م تبيش تحبينا ولا..!
هزت زينه راس:لا..لا اني نخبكم هلبه..
وتنهدت...باه
وقدمت ليلى وهي تضحك بسرعه ولفت ورا زينه....
وربطتلها عيونها ...
ولما كملت...
حطت زينة يديها ع عيونها تتلمس فيهم من ورا ربطة...
وبدو اطفال يديرو حوليها دايرة وهي فنصها...
وبعدين قالو..."واحد..اثنين..ثلاثه...هيييي"
وبدت زينه دور عليهم...
وهما يجرو من مكان لثاني ويضحكوا بفرح طفولي..
وزينه تضحك وهي تمد ف ايديها ف هواء..!
..... .......... ............... ......
فهالوقت درست سيارة عقيله ...
ونزل منه وهو يشوف للافته بعيونه..." ملجأ ياسمين"
ابتسم وهو يقرا ف اسم...
خش للملجأ ..ولما وصل للاستقبالات سمع صوت ضحكات اطفال..ابتسم من قلبه. .
شاف للاستقبال لقى مريم موجوده ..قدملها
مريم بإبتسامه:اهلين استاذ عقيله ..
عقيله بجديه: تمام ...
ومشي للحجرة اطفال بدون م يزيد كلمه..!
مريم ه"متخلف"
ولما وصل حدا الحجرة زاد صوت ضحك اطفال مع صوت تاني م قدرش يميزه ...يتبع

اللهم صل وسلم على نبينا محمد